الاثنين، مارس 31، 2008

العمه العربية ....احداثها

بجد بجد ..فيه سؤال محشور فى زوري... ونفسى ابثقه ... أل مين الفالح للست والدته وقال قمة عربية ...

انهي قمة دى ...؟ دى تتسمى بيير سلم عربية ... بدروم عربية ... بدنجان عربية ..

عمه عربيه ...اى حاجه غير قمة طبعا...ما دى تتسمى قمة ...امال الخيبة تبقى ايه ...؟

قرفنا كل يوم الزعماء يعبوا الشنط بالسندوتشات والزمزمية يروح جرى على اى ..بتاع من اللي بيعملوه دا..

تيجو تشوفوا هما بيعملو أيه أصلا ...ولا حاجة ....

فالحين فى الكلام وبس...أنما فعل ويطلعوا رجاله أبدا ...يبطلوا باه لبس طرحه ...أبدا برضو...

وبعدين بيلمو بعض ليه ...علشان ينصلح حال ألامه .. طب لو عايزين كدا فعلا ....كل واحد يتلم فى بلدو

ويعدل حال شعبه ...ويقول بؤين للحرمية بتوعه كفايه سرقه... يعنى كل واحد يبدا بنفسه ... مش يسيبو غسلهم الوسخ ...ويروح يتمخطرو ويدوها صياعه فى بلد غيرهم ....

وبعدين فيه يجى 9 رؤساء ميروحوش ولا يعبرو ...منهم ريسنا العزيز ...وملك السعودية ...دول أل أيه الأهم ..
وكوبرات القعدة ...أل أيه أن الدنيا من غيرهم مش هتمشى... وهتقف ...

أل حتى لو راحو هيعملو اللي متعملش ...ما حضرو ميت بدنجان محدش شاف فلاحتهم يعنى ...

وبعدين أكيد ليهم اعزار ..... مش خوف مثلا ..ولا جالهم اوامر بكدا ...ولا تهديد كفانا الشر .... يعنى أكيد سيدنا الريس ...تعب من اللف ...والعضمة كبيره زى ما انتو عارفين يعنى ...... اى نعم لو كانت إسرائيل طلبتو ولا أمريكا كان هيروح صاروخ ...بس برضو ...ميمنعش انه هيتعب على الفاضى ...ياريتو يكون بفايدة حتى...

وبعدين مش وراه بلد ...بتتخرب لازم يشهد الاطلال الواقع .. اللي طايح فى البلد فى عهده العظيم ...
جايز أل أيه يتفاجئ من اللي شافوه وهيحن علينا ...

ولا هو مش وراه بيت ...وأب برضو ... يعنى يشوف جيمى ماسبش أيه فى البلد ألا وحاطت مناخيرو فيه ... وجاب ضلفها وخربها .....هو وعز اللي اللهى نسبة الحديد ترتفع فى الدم عنده ويبقى عمود خرصانه ...
يعلموا ازاى يخرب البلد قصدى يمسك البلد بعد عمر طويل طبعا ....

وبعدين خلاص يا جماعه بلاش وجع دماغ الله يخليكم ...وكبرو لافيه حاجه هتتعمل منهم ولا تنتظرو حاجه أصلا ...دول مش فالحين جوه هيفلحو بره ... انهي عقل يصدق كدا ...

دول أتلم المتعوس على خيب الرجى ... راحو بوشهم رجعوا بقفاهم ......

تيجو أعملكم قمة من قممى .....وربنا هتنجح نحاج... نجاح الموجى ... الله يرحمو ..






الأحد، مارس 30، 2008

شعر جامد جدا ...

بجد بجد انا مت من الضحك على الشعر دا ...
هو مش بتاعى بصراحه ...هو جيلى على الايمل ....
قلت انزله تشوف احنا بيقى فى عز( مش عز حديد ) خنقتنا بنبدع ازاى....
اناب صراحه مش عارفه مين اللى كاتبه ... بس عجبنى ... قلت اورهلكم ...
واللى كتب الكلام دا ...ال ايه متقمص الدور بتاع ريسنا ... فبيقول ...

شعر حسني مبارك .. اهداء الى شعب مصر

ياشعبي حبيبي ياروحي يابيبي ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله ده حال
أحبك محشش مفرفش مطنش ودايخ مدروخ وآخر انسطال
أحبك مكبر دماغك مخدر ممشي أمورك كده باتكال
وأحب اللي ينصب وأحب اللي يكدب وأحب اللي ينهب ويسرق تلال
وأحب اللي شايف وعارف وخايف وبالع لسانه وكاتم ماقال
وأحب اللي قافل عيونه المغفل وأحب البهايم وأحب البغال
وأحب اللي راضي وأحب اللي فاضي وأحب اللي عايز يربي العيال
وأحب اللي يائس وأحب اللي بائس وأحب اللي محبط وشايف محال
وأحبك تسافر وتبعد تهاجر وتبعت فلوسك دولار أ و ريال
وأحبك تطبل تهلل تهبل عشان مطش كوره وفيلم ومقال
وأحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن أسيبك وراح تبقى عبره وتصبح مثال
حبهدل جنابك وأذل اللي جابك وحيكون عذابك ده فوق الاحتمال
وأمرمط سعادتك وأهزأ سيادتك وأخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجبلك جمااال

الجمعة، مارس 28، 2008

الحكومة حووووووووله ...وربنا

يعنى حكومة معفنه خنيقة .... وان شاء الله تولع بجاز ...طبيعى

يعنى حكومة حرميه ॥وكدابة ... وحوله ...دا لو ماكانتش اتعمت أصلا ... بصو

يعنى لما مثلا تعين وزراء فى غير تخصصتهم أصلا ويطلب منهم يفلحو ويدو نتايج ... مش تبقى حولا

يعنى لما تستخدم الجيش فى تنظيم طوابير العيش اللي أصلا مفيش عيش ...وسايبة مصرين يتقتلو على الحدود

من إسرائيل ...وصيادين فى السويس من أمريكا ...مش تبقى حوله...

لما مثلا وزير الخارجية يشتم فى عرب مسلمين وليهم حق علينا ويقول هيكسر رجل اى حد يدخل تانى

ويسيب ولاد الكل بيقتلو فينا ... يبقى نفخ زور ... ولا دى كانت حركة استر جال ... والشطان وزه

لما تصرف يجى اكتر من 7 مليار جنيه على توشكا ولحد دلوقتى مفيش اى خياره طلعت منها..
.
فى حين ما رفعت تمن السماد للسعر العالمي والفلاحين مش لاقياه ...طب مدعم وتزرع الاراضى الموجودة

ولا تصرفهم على البحث العلمى فى أنتاج سلالات من القمح والأرز اللي يدى إنتاجيه عاليه ...
برضو مش دا حول... ولا على المية ...

لما الميه تبقى زى الزفت ...ومفيش قرى كتير مفيهاش مية ...وناس بتشرب من صرف صحى ...ويرحو يحولوا كميات كبيره من ميه النيل لتوشكا ..ويبقى فيه إهدار ... طب متحولوها للناس دى واهو أحسن من الصرف الصحى اللي بيشربوه ...

لما فالحين يبنوا القرى السياحيه للغنياء فقط على السواحل فى حين أن الدنيا هتغرق بعد كام سنه ...

وتبيع أراضى مباني للعرب برخص التراب ...

فى حين مفيش اى شاب لاقى شقه تناسبة ...


لما تستورد يجى بمليار جنيه كبد بط ووز فرنسي سعر الكيلو فيه ب 18 ألف جنيه .

.فى نفس الوقت .... اللي ناس بتدبح كلاب وحمير ...وناس بتاكل ...


لما تطلع وزير تقول مفيش بطالة ... وأنا أكون مش بشتغل ...يبقى دا عمى ولا أيه ..؟.

لما الحج مبارك يطلع يقول أن الحكومة فى مرحله نمو وأزدها اقتصادي عالى

فى حين أن عشرات بيموتو علشان رغيف عيش ...

لما يكون تسمح ببيع السجاير على شرط يتكتب عليها انها ضاره وكمان أمراض الدنيا ... وتقبض على تجار

المخدرات ...طب ماتسمح بالبيع وبرضو يكتبوا أضرارها ...وكل واحد حر ..

لما تعمل مدارس وتقول عليها الذكية ..فى حين أن مفيش حد من العيال بيحضر المدارس ...

والعيال بتطلع أغبى خلق الله... ومبتعرفش حتى تكتب اسمها ...

ولما تصدر غاز لإسرائيل ...وإحنا مش لاقينه وبقى غالى ...

لما تصدر لإسرائيل الرز ...ويبقى سعره مولع نار ...وبرضو مش لقينه...

لما تستورد منها سوست الخيوط .... بملاين من إسرائيل .. وتقول بنشجع الصناعات الصغيرة ...وبندى قروض

لما تسيب ناس سرقو فلوس يجى 200 مليار جنيه تقريبا ... ويحولوها بره البلد ..فى حين سجنت فلاح علشان

جاب قرض يجب بيه سماد للأرض ... ولا موظف جايب قرض يجهز بنته ... ولا شاب فتح مشروع وفشل ...

لما يقول فية حرية ويدفعو دم قلبهم فى حملات الإعلانات علشان انتخابات الريس ...

والحرية فى اختيار ......... وألاقى الراجل اللي بيدينى ورقة الانتخاب يقلى اختاري الريس ...

ويشورلى ...ويخليني اختار قدامه ... وفعلا اختار العدل ريسنا اللى مغممنا .. زى الهبلة ...

شوفتو .... خلونى حوله ولاد المعفنة ..

عااااااااااااااااااااااااااا عااااااااااااااااااااااااااااااا

ااااااااااه ياااااااانى ياللى مش هتجوز علشان احو ليت ..........




الخميس، مارس 27، 2008

يارب يحصل فعلا ....اضرااااااااااب

النهارده لقيت كل المدونات بتنادى باضراب عام لكل المصريبن
مدونة ميت وجبهة تهيس
وانا بشجع الفكره جداااااااا
ونشلت كام صورة من مدونة ميت







الأربعاء، مارس 26، 2008

الف مبروك لسمية وساره

وصلنى خبرين حلوين جداااااااااااا
ان ساره صحبتى اللى من الاردن خلاص اتقرا فتحتها ...بقت مخطوبة يعنى ...وبقت عروثة
وكمان سمية صحبتى من السودان ...اتخطبت وبقت عروره برضو ...
فرحت جدااااااااااا ...وبتمنى ابقى احضر فرحهم بس التذكرة عليهم ...هو انا اللى هتجوز ولا هما يعنى ...
سميه صحبتى شوفتها فى رمضان اللى فات لما جيت مصر ...وخرجنا بعد الفطار واتفسحنا ...
وركبنا مركب فى النيل ... وبصراحه نسيت اسم المركب ايه ... اصلها ما كانت طبيعية ...
انا قاعده فى امان الله وبكلم سمية وبرحب بيها ...وخلاص طلعنا بالمركب ...الا واشوفلكم
حاجه كدا ... ينقطع لسانى ان اقول انه يمتدد لفصيله الرجاله بشئ...
لقيته لابس بادى اندر قط وقصير وتحته بدى احمر ولابس بنطلون بناتى ...وملعبك شعره بقزاره
وفجاءه ...ركزو معاياه لقيتو واقف فى وسط المركب والكاست اشتغل ونازل رقص ...انا طبعا اسبهليت
وتنحت ... وسمية جنبى اتسرعت ...المعفن دا نازل رقص ولا احسن من فيفى عبدو...
وتقسيمات ...باكل فى نفسى ....وبحاول الغوش على سمية وخالتها ....واشاور على حاجه بعيده واقلهم شوفتو الاهرامات ..ههههههههههههههه... واقنعها ان دا مش بيمثل رجاله مصر ..
اى نعم انهم فى مرحله الانقراض ...ولا عندى دليل ان يثبت ان دا مش راجل ... بس هعمل ايه ؟
هقلها ايه ...فضحنا الله يفضحو ...
وفضلت اقنع فيها ... انه عمل كدا علشان يحول من كرت لخط ...قصدى يصرف على امه وخواته...اضطريت اكدب...اعمل ايه ؟اخلى الفكره تترسخ عندها ... لا طبعا ...ندراى على خبيتنا فى الرجالة ...
بس انا كنت بتمنى يكون معايا ساعتها صوباع روج ......كنت هدهولوه ...
وحلفت هروح مخصوص ...وهكون عامله حسابى فى صوباع ..وهدهوله...
وهجيبة سائل علشان يبقى حلو عليه ... حاجه تكسف ...وتعر ...
اوش ورى فين لسميه ...
ودى كانت ذكرياتى مع سومة فى مصر ...
والف مبروك عليهم ...

كلنا مدمنين والبركة فى كوكو...

أحنا عارفين كلنا أيه معنى الإدمان ... وفيه أنواع غريبة من الإدمان ...
سواء إدمان مخدرات باه دا بيبقى للعالم الضايعه ...
ولا إدمان مثلا كمبيوتر ونت دا للناس اللي مخها نضيف شوية .. يبقى معظمة إدمان شات ...
أو إدمان مصاصات زى كدا .... ههههه
أو ممكن توصل لإدمان الشربات ..ودا للناس اللي بتحب تعمل دماغ معفنة كدااا....

أما أزى ندمن اى حاجه ...دا بيبقى كعمل فردى أو نتيجه أصدقاء سوء ...والأفلام دى ...
أما لما يوصل بنا درجه عاليه فى التقدم فى الإدمان ويكون السبب الرئيسى والمدعم الاساسى هيا حكومة البلد
وكبار المسئولين ....دا باه بيخلينى ادخل فى بلبله ...والمصيبة أنهم أول المدمنين ...
قصدي يعنى افرح علشان أتقدمنا ....ولا أتنيل أتغاظ وأتفرس ....
يعنى اى إدمان ليه اضرارة الصحية والنفسية ودا طبعا المعروفة لاى حد ..... وبناء على ذلك
بجد من أعماق اعماق قلبي ومش عايزة احلف أنى ظلمت الحكومة....
وأنا بكلمكم والدمعة ح تفر من عيني ... معلشى ابقي سامحيني على لساني الطويل ... دا لو اعتبرناه طويل

بس ممكن تعتبريه بقى إدمان ... وكلو من فضلت خيرك ... المهم كنت عايزة ..

وأقول لحكومتنا العزيزة اناااااااااااااااااااااااااااااااا اسفه جدا أوى خالص ... والله العظيم اكتشفت النهارده أن عندي بطئ فهم ... معلشى حقك عليا وأدى رااااااااسك أبوسها ...اتفوووو ...قصدي اممممممموه

بس برضو الحق عليكى يعنى كنتى تفهمينا .. توضحي الصورة ل 99% من شعبك اللي عندهم بطئ فهم
أحنا برضو أهل... وأكيد هنفهمك وهنقدر الظروف ... عادى يعنى.....

عادى جداااا لما تبقى مدمنة طوابير ..... ولا مدمنة اعتصام ...أيه يعنى ....!!!!!
بس مش عارفه أقول حرام عليكى صحتك يا حكومة ...ولا أقول التنوع فى الطوابير والاعتصامات مفيد
اهو وماله على الأقل علشان متمليش ... القعدة وحشه برضو ياختى ...
مهو لازم تخلى طوابير العيش اللى بقى امر عادى جداااااا وفيه ناس باه تتفزلك وتقول دا بيبقى فيه مطاوى وسنج وفى عشره لحد دلوقتى ماتو بسبب طوابير العيش ... عادى يعنى قدرهم ... اهو الطابور يخف شوية ...
...ولا طوابير علشان نطلع بطاقه التموين وشهادات الميلاد ...ولا طوابير العوطليه ...ولا طوابير المخدرات ...ولا طوابير المرضى اللي عندهم فيرسات ... ووصلو 8 مليون مصري ومعظمهم مش لاقى علاج ولا حتى مكان ...
ولا طوابير الناس اللي بتعبى ميه من ترعه صرف صحي علشان تشرب ...
وطوابير ترشيح الناس بتوح المحليات علشان عددهم قليل ...راحت ماجرة شويه ناس تقف مش علشان تعطل الناس لحد ما باب التقديم يقفل ولا حاجة ......بزمتك مش دا ادماااااااااااااااااان .. عينى عليكى يا كوكو ...
ولا اعتصامات الدكاتره والمدرسين والعمال ....الخ ...
وربنا عذراكى الأمر غصب عنك ...بقى إدمان ...بيجيلك هرش ...واكلان فى جتتك ...عايزة تخدى حقنه طابور

بس أول مره اسمع أن المدمن شعب بحالو يدفع تمن الإدمان للحكومة وإدمان لنفسه ..... يعنى تدمنى بمزاجكم
وكمان تخدو فلوس ...وإحنا ندمن غصب عنا وبرضو ندفع فلوس...
يعنى إيه زنب الناس اللي أصبحت مدمنة طوابير هيا كمان دى ....دا أنا أدمنت الطوابير من كتر تفريجي عليها
فى التلفزيون ....آه والله ...ولو ما اتفرجتش عليها كل يوم أحس أن دماغي مطيرة ...
وأقول لبابا ادينى ....ادينى ...وبابا ياعينى وبيشوف منى عذاب بيصدر فرمان يجمع ناس ويوقفهم طابور

وناس تفرح ...هى ....هى هى هى هى هى ... هنقف طابور ...هنقف طابور ...

حتى العيال فى المدارس ...الله يرحم كرهي لطابور المدرسة .... بقو مش عايزين يدخلوا الفصول ...
وطبعا بعد فرح ... يطلعوا الفصول اللي هيا برضو فى نظام طابور...يعنى برضو فضلو وقفين طوابير فى الفصل
وبكدا كسبنا نقطة جامده جدا ...وبطلنا نشتكى من زحمة الفصول ... وأصبح بدل ما الحكومة توفر أماكن للطلبة
بقت يادوب توفر بلاطة فى أرضيه يقف فيها العيل من دول ....
اقلهم كفاية حقد باه ... خلى العيال تجمد ... ويطلعوا رجاله ... ويكافحوا ...
وتحيا الحكومة ...

وتيييييييييييييت ....تيييييييييييييييييت .... هنعمل توابيررررر

تيييييييييييييييت ... تيييييييييييييييييت ... وبقينا مدمنييييييييييييييييييين ...

ومساااااااااااااااء الخيييييييييييييييييييييير ... بنمسى. يا كومة ...قصدى يا كوكو .....

قصدى بنمسى يا اااااااااا حكووووووومة

حكومة تمنها واطى ...

لما سمعنا أن إسرائيل قتلت كام واحد على الحدود ...وكان أخرهم بنت عندها 14 سنه تقريبا ...

والحكومة حطت جزمه فى بؤها ...ومرد تش ولا عرفت تاخد حق الناس دول ...

وإحنا نتشال ونتهب ولا فيه فايده ....

والنهارده اسمع أن سفينة حربيه امريكيه ...تضرب نار على مركب صيد وتقتل صياد واتنين

متصابين ... وبرضو الحكومة حاطه جزمه فى بؤها ...

قتلو واحد من غير ذنب ألا انه بيصطاد سمك فى بلدو ....وساب بنت وولد عياله يتاما ...

مبتردش ليه على ولاد الكلب دول ...ما تحجز السفينة كلها لحد ما التحقيق ينتهى ليه..

كل اللي عملوه قوات الأمن أنهم استجوبوا كام كلب من عليها وسبوهم يرجعوا

بزمتكم دول رجاله ... أيه خايفين يا نسوان ..هيا شويه أمريكا وشوبه إسرائيل ...ومفيش رد اعتبار

ولا أخد حق لينا ... أجبلكم كام ست من بلدنا تمشيكم يا معفنين ...

حكومة بنت كلب مش فاضيه ألا للسرقة والبيع ... وكل اللي طالع على مبارك أن الحكومة محققه ازدهار
ونمو اقتصادي ...نمو أيه وهباب أيه ..؟

أذا كان الدولة بتبيع أصولها ... وأخرها أنها قررت تبيع 51% من قناه السويس ... يعنى كمان ملناش حق الاداره

يعنى فيه احتلال زى ما قلنا قبل كدا ...وأكيد حاجه زى دى ...إسرائيل ما هتسبها تعدى ولا أمريكا...

وطبع الحكومة المعفنة مش هتقول لا...أو بعنى اصح مش هتقدر تقول ولا حتنطق ...هتتكتم ...
طالما دفعه التمن ... وتمن اوطى منهم أصلا ...

يعنى ناس بتموت فى بلادهم من غير حد ياخد حقهم... وكمان أرضنا بتتباع ....

فاضل أيه تانى الحكومة هتعملو وفى نفس الوقت هتحملو ونتكتم ....

لحد امتة هنتكتم للعالم الزبالة دى ..؟؟؟؟

الاثنين، مارس 24، 2008

سياسة المبوسة فى فلسطين...

شوفت تقرير على الجزيرة بيتكلم عن المفاوضات اللي بيعملوها فتح وحماس فى اليمن ...

و أنا أصلا مليش نفس افهم سياستهم ولا بحب كلمة سياسة أصلا ... ولا عايزة اعرف سياسة ....

علشان اى مشكلة بتمر بينا بحسها اجتماعية وإنسانية ... حتى لو فى احتلال

أحسن ما نتفزلك ونقول سياسة وهبل من المصطلحات الملعبكة ....

المهم أول حاجة لاحظتها ...أن طبيعي اى تقرير يجى يتكتب اسم البلد اللي عنها التقرير ...

وبدل ما يكتبوا اسم البلد فلسطين أو على الأقل فلسطنين .... مكتوب حماس وفتح ...

تانى حاجة مفاوضات أيه وهباب أيه اللي كل يوم متنيلين يعملوها على قلة فايدة ...شوية مفاوضات

كانت الحكومة المصرية الفالحة عملتها ...وشوية فى السعودية ...وأخيرا فى اليمن ... أيه الهبل دا

يعنى واخدنها صياعه فى كل بلد شوية ...واسمها مفاوضات ..وياريتها مع الطرف التانى اللي يتحرق بجاز

إسرائيل ...ألا هيا قاعده كل حوراتها أساسا مبنية على أنهم يتفقوا يتلقحو ويلمو مع بعض ولا لاء...

وفى أخر الصياعه يروحوا البلد يدبحو فى بعض ... وفى نفس الوقت سايبين ولاد الكلب يكملوا عليهم ...

فى حين اللي أسمو عباس دا ...الفاشل أصلا ...مش فالح ألا يلبس جزمة تتقطع على دماغ ولاد الكلب

تمنها 20 ألف يورو ...وسايب شعبوه متحاصر وبيعاني من نقص شديد جدا فى الاحتياجات

اللي تساعدهم على أنهم يعيشوا ( طبعا لحد ما يدبحوا ) ..


وفالح يروح يتنيل ويتلقح شوية مع إسرائيل باسم انه هيعمل حاجه ...وطبعا فاشل ... وفالح انه يسلم ويحط

أيده فى أيد ولاد الكلب وفرحان بسنانه وبيضحك ...فى الوقت اللي أمهات وأطفال بيبكو دم بدل الدموع ...

ويروح يبوس وزيرة الخارجية بتاعه أمريكا اللي راسها شبه راس كرات أبو شوشة ...

وشوية بتقلب على خنفسه المطلقة ... وان شاء الله هتتحرق اكتر ما هيا محروقة ....

واسماها ساسة ..قصدهم سياسة المبوسة ... نفسوه يبوس طب يستنضف ...فاشل كمان فى دى

فكرني بالله يرحموا عرفات ...شوفتو مرة بيوطى على أيد برضو الولية اللي كانت ديما بتحط برص على

اللياقة ...وبتحط رجلها فى وشوه ... حتى كانت عامله زى كيس القطن المتنجد ...

بس هنقول أيه ...؟؟.. تذكروا محاسن موتاكم .... اللي يعرف حاجه عن الست محاسن يقلى ونبي ..؟

يعنى من الأخر كل واحد بدل ما يصيعش علينا وال أيه يعمل مفاوضات ...

يتلم فى بلدوا ويشوف الناس عايشه ازاى ..ويخليهم يعيشوا عيشة محترمة بدل ما يجى اليوم اللي بنشوفكم بتبوسو
جزمهم ...دا لو ماكنش حصل فعلا ... جتكم القرف مليتو البلد ..

.وسمعني سلام كبيررررررر اووووى لعباس افتدى ...أجرى ورآه وابوسة ...

الأحد، مارس 23، 2008

عايزة اعيط على ساعتى اللى باظت...

أنا طبعا ديما متغاظة ...ومفروسة ..وخاصة باه فى موضوع الساعة اللي باظت دى ومش لقيا ليها حل

وخاص الراجل الرخم بتاع التصليح قرفنى وكل مرة يقلى دى اتظبطت ..وعمرها ما هتقف ...ويادوب

متكملش فى ايدى كام ساعة وألاقيها اتنيلت وقفت... قلت أوديها التوكيل وخدو منى 300 جنيه

وبرضو وقفت ..مش عارفه اعمل أيه ..؟ عايزة اعيط ..؟

وكنت بزن على دماغ بابا ... يصلحها ...وبعدين لاحظ حاجة غريبة جداااااا عليا

أنى بطلت زن...ومش بس كدا ...واديتو الساعة
وقلتلو ذكرى منى ليك يا حاج ....
خسارة دى غالية ... وماركة حلوة

ونبي أنت اللي غالى ...أنت بتسمي 3400 تقريبا غالى ... ولا ماركة رادو دى ماركة

مش خير يابت انتى اتهبلتى

لا وحياتك يانوحى عقلت ...تعرف ليه..؟

ليه يا فالحه ...؟

بزمتك تزعل 3400... ولا تنق وتقر على ساعة وزير الإعلام اللي بمليون و 400 ألف جنية
وساعة وزير الصناعة اللي ساعته تمنها أربعه مليون 190 ألف ...

شوفت الهنا اللي إحنا فيه يا حاج ... تخيل لما ساعة تبقى اكتر من مليون والتانيه اكتر من أربعه مليون

شوف الدراع كلو بكام ... وشوف كمان الدراع دا لو أتفك هياكل كام بني ادم من ال 40% اللي عايشين تحت
خط الفقر عندنا..

وربنا لو أنا منهم ...لكنت اعرف هما فين ...واتسلى على عوقله عوقلة و صوباع ...صوباع
لحد ما أوصل للرقبة ... ابصق وأروح بيتي أكمل جوعي نوم ...


طيب والراجل الرخم اللي خد يجى ستين جنيه مرة ووقفت ..والتوكيل اللي خد يجى 300 جنية وقفت...؟

عادى يا عمنا يعنى فوفو ( انس الفقى وزير الإعلام ) وشوشو ( رشيدى وزير الصناعة ) ... بيلبسو ساعات بملايين ... عملو إيه يعنى ...؟ ولا حاجه الإعلام بيزنقو عليه بعد مؤتمر الوزراء الإعلام اياه..
وتقريبا ودانى سمعت ان اى حد فى اى فيلم ما كان بنسبه 95% عريان وكمان لازم يبقى بوس وأحضان
يترف عليه قضيه على اساس ان دا الفن ولازى منه ... ولو اى برنامج عرفنا بيحصل أيه ...من سرقات
وقرف ... يترفع عليه قضية بتهمت سد نفس الناس ... وتسبب فى توتر الأعصاب ...
ال ايه الناس مش جيلها شلل أصلا ...ونصهم ميت..
أما اسم النبي حرصه وزير الصناعة اللي هيا أصلا الصناعة ملغيه من زمان ... من أيام صناعة القبقاب أبو وردة ...ومابيتكسفو ا...
لما بنستورد كل حاجه تتخيلوها ...حتى سوستات بتاعت البنطلونات من إسرائيل ...( ستراهم والله كتر خيرها )

يبقى ازاى تبقى رجاله الحكومة بالغنى اللي بالهبل دا
ح يحسو بملايين بيدورو على رغيف عيش... حاجه تحزن وتكسف ...
مهما بطنهم مليانه ...
تخيل لما يلبسو ساعات بالتمن دا ...يبقى فى جيوبهم فلوس كام ....؟ ومنين اصلا ...؟

بس اكيد ال 300 جنيه دول الواد ضاربهم فى جيبة ... ولا حط قطع غيار ولا حاجه ...علشان كدا وقفت ....

عادى يا نوحى إيه يعنى واحد ياخد 300 جنيه أمال لما تسمع ابن رئيس الوزراء حاج برسيل ( نظيف)
منضف على جيوب شباب وبيدى ابنه اللي مشغلو فى القرية الذكية 90 ألف جنيه فى الشهر ...
اللي ما شوفناش منها اى ذكاء ألا فى أخدان الفلوس بس ...
ولا واحده من سكرتايرة الحاج وزير المالية بتاخد 30 ألف جنيه فى الشهر غير العربية والسواق
شوف الحاج نفسه بياخد كااااااااااااااام .....؟؟؟؟؟؟

كبر يا حاج ومتشغلش باااااااااالك ودع الخلق للخالق....

قادر ربنا يفرسهم زى ما فرسني ... ياااااااااااارب حبة سخط من عندك على اللي فرسنى ...

ودااااااااااااااااعا يا ساعتى ...





السبت، مارس 22، 2008

كل سنه وانتى طيبة يا ماما ...

النهاردة يوم الام ...
فكل سنه وانتى طيبه يا ماما وربى يباركلى فى عمرك...انتى وبابا طبعا
انا ااه عصبيه شويه .... وكتير جدااااااااااااااا ماما استحملتنى كتير ...ما هيا هتعمل ايه..؟
مخلفه واحده مجنونة ...هتفضح الدنيا يعنى ...
بس انا والله بموت فيها ...اصلها طيبه جداااااااا...وغليه عليا طبعا ... وحتة سكره كدا... شفتوا ليه السكربقى غالى دا من غلو مامتى حببتشى....
ودمها سكر...وضحكتها عسل ....وهيا صحبتى جدااااا
وانا اسفه على اى حاجه عملتها...وخلتك يعنى تزعلى منى كنت هبولا ...
ويارب يهدينى ليكى ديما ...
فكل سنه وانتى طيبه يااااااارب ...
وكل امهات اصحابى وامهات المسلمين بخير..

الخميس، مارس 20، 2008

كل سنه وانتم حلوين

احب اهنئكم بالمولد النبوى
واذكركم بموعد استحمامكم السنوى
ههههههههههههههه
لالا انا بهرج طبعا
كل سنه وانتم طيبن
وديما يارب تكونوا بخير
وتكونو اكلتو الحلاوه
والولد جالوه حصان حلاوه ...او حمار حتى
اما البنت يكون جتلها عروسة حلاوة ...او عريس يكون خير وبركة
وشفطو السمسمية والحمصية والفولية ....والملبن الرخم دا
طيب مفيش باه ليا حتة هريسة اصلى محبش اللى فات دا كلو...
على العموم انا هستنه...
وكل سنه وانتم طيبين وحلوين...

الاثنين، مارس 17، 2008

حكومة الفواجر..........ااا

طول عمري اعرف أن كلمه فاجر أو فاجرة دى شتيمة وقلة أدب ... معلشى فى الألفاظ الزبالة دى ..

بحس أنها أحسن من هبلي .... وبرضو لما أتفجر موضوع الحبه الزرقاء ( فياجرا ) والمبالغ الكبيرة اللي تقدر بالملايين ..اللي الحكومة بتستوردها من بره ... كنت متخيله اسم فياجرا دلع نياجرا الشلالات إياها...وقلت أل أيه جيبين الاسم منها دلاله على القوة وكدا يعنى ... وكنت أقول أيه قلة الأدب دى ...

فالنهاردة بس اكتشفت أن لو حد قال فاجر ولا حد يتكلم ويطلب اى حبايه من إياهم ... مش يبقى قليلى الأدب

بالعكس لازم يحس بالرقى ولازم نصحح مفاهمنا باه من الشتيمة دى ... أصلى أنا أكشفت بعد ما عصرت مخيخي ... أن اللي بنقول عليها شتيمة دى ( فاجر ) جيه من أكله غالية جداااااااااا ...
ودى بتبقى للحرمية.... قصدي للأغنياء طبعا

واسمها( الفواجرا ) وبرضو من نفس الاكله دى اخترعوا ا دوا الفياجرا ... تخيلوا ...

هتقلولى أيه اللي جاب فاجر ..لفياجرا ... للفواجرا .... حقلكم أن عيني جيت على خبر فى جرنال الدستور

بيقلكم أن الحكومة ودا بناء على طلب إحاطة لرئيس الوزراء( برسيل) قصدي نضيف ...

ووزير الزراعة( بوظة ) قصدى امين اباظة

بتفاوضوا على صفقة كبد البط والاوز الفرنسي اللي بيقلو عليه مشهور..

لاستيراد يجى 50 طن واهي الاكله دى يا جماعه معروفة بالفواجرا ...

واللي سعر الكيلو فيه بيوصل ل 18 ألف جنيه مصري ... المال لو البطه على بعضها توصل بكام ...

وبناء عليه الصفقة دى هتكلف الحكومة مليار جنية ..

شفتو الهنا ...ناس تطفح سم هاري على قلب أهليهم أكله واحده ب 18 ألف جنيه ...

وناس تانيه ملهاش إلا بجنيه عيش معفن وياريته موجود أصلا ...

ولا هيا ناويه تاكلنا كبد بط ... وبعدين مالو البط بتاعنا ... مهو زى الفل ...

يعنى الفاجر جاب الفياجرا من الفواجرا ... عرفتو الصلة ولا لسه ...؟

يعنى خلاص وصلو لقمة الاستفزاز والوساخة ... والفجووووووور ... فاضل أيه تانى ...؟

آه نسيت ... وكمل فجورهم لما اتضح أننا بنستورد من إسرائيل بقيمة 151 مليون دولار

شماعات وسوست وكارتون واقمشه للجيوب وبطانة .....

الله يفقعكم زى ما فقعنى ...




السبت، مارس 15، 2008

احلى اكله ... مقرفه


بصو باه انا قررت اكتب برضو فى التبيخ اللى هو دلع (طبيخ) اهو تغير... يلا نبدا .....


النهارده اتغديت حاجه لو شوفتها وهيا بتتعمل بتقرف اكولها ....ولو اكلتها اتقرف بعد الاكل ....يعنى اكله مقرف وخلاص .... انا والله كت ما باكلها او بمعنى اصح بطلت اكولها ... وبس النهاردة غظت فى نفسى واكلتها ...

تعرفوا هيا ايه .....؟؟؟؟؟؟؟

طبعا الفسيييييييييييييييييخ....!!!!!!!!

هو بورى معفن ....بس ليه تااااااااريخ من ايام الفراعنة .... مش عارفه هما كانو بيعملو حضارة ولا فاضين

يعفنوا السمك ...ولا ايه ...؟

المهم بالرغم من كدا مقدرش اغلط فى عفانه بقالها سبعتلاف سنه ...

انا انصحكم للى يحب يطافس زى كدا ...وعايز ياكلوه ... يشتريه جاهز ...وياكله وبعد كدا يا خد دوش ويفضل بالجاز ....

او يضطر يتعذب ويشوفه وهو بيتعمل ....ويتعذب تانى مره وهو بياكله...

وعلشان القرف يكمل هقلكم كدا كدا الطريقة .....لالا ...مفيش حاجه اسمها مبلاش دى ...

هتتقرفو يعنى هتتقرفو .....يعنى بزمتكم اتقرف لوحدى .....

المهم لو انت جايبة من محل مهما كان محترم ومتسرمك ...وسرميكه ملونة حته ...وال ايه تديك احساس بالنضافه

انسى صاحب المحل بيجيب السمك البورى ...ويروح رميه على اى سطح فى الشمس لحد ما يعفن وبعدين

يجيب برميل كبير بلون الازرق( ال ايه بيدى للسمك احساس انه عايش لسه فى البحر)...

وحبة ملح على حبة شطه حمرة ويسبها تقريبا عشره ايام تعيش وتكمل عفانه مع نفسها ...وممكن تزيد المده ودا على حسن جودة العفانه ....

اما لو عملنا فيها نضاف وولاد ناس ...وعملناه فى البيت ...دا يتطلب منك برضو تسبيه يعفن يوم وتقومى غسلاه بميه دافيه كام مره ....وطسى فيهم حبة ملح وشطه ولمون ونقطتين زيت ( بقيمة اتنين جنيه ) وانصحك علشان الزين غالى ...وكدا كدا هو معفن ...بلاش منه احسن بلا وجع الب ....

وبرضو تسبيه كام يوم لحين اتمام عفنه ...قصدى نضجة ...

وجيبة وافتحى بطنه وشيلى العفانه الظاهره دى ...وهاتى لمون كتير اهو بنحاول نموت اكبر قدر من الجراثيم

وكام راس بصل ...علشان يديكم مناعه ....تحوشو كام رغيف عيش قبلها بسنه ....هيا اكله جامده ومحتاجة عيش بلدنا .... لتكتمل التضحيه الكبيرة وتاكله ...بالهنا...

وبعدها اقعدو مع نفسكم وافضلو اقرفو فيها.... وحاولو تقومو الاول قبل الناس اللى بتاكل معاكم علشان تقرفوهم وهما بياكلو ... امال هنطلع قرفنا فى مين ...؟؟؟ مش كدا ولا ايه ؟؟

ملحوظه : ممكن تحصل حالات تسمم متخفوش ...دى اعراض جانبيه بسيطة جدااااااا...

اهم حاجه شوفو باكو النعناع اللى بيجى فى الاعلان بيطير هدوم الناس دا بكام ...وجبوه وكلوه ...

وبجنيه لبان بنكهت القرفه على نعناع ...كدا يعنى ... بحاول اخليكم تنسو القرف والعفانه دى ...

يلا باه ...النهارده كان يوم العفانه العالمى ...

كانت معكم ...

همس ...من قدام حوض بعد غسل ايديها ....



الخميس، مارس 13، 2008

حكايه عمرو خالد .... وملايينوه


طبعا الكل سمع عن اللى اتكتب عن دخل الدعاه وكانو بيقولو ان عمرو خالد فى المركز الاول

واستضافه الاستاذ احمد المسلمانى فى برنامج الطبعه الاولى وناقشه فى حاجات كتيره

من ضمنها رايه والهدف من الاساءه للرسول _ص_ فكان رايه ودا اللى انا فهمته منه يعنى

ان السياسه العامه فى الخارج ضد الاسلام بتقوم على عمل ضغط نفسى
من سوء المعاملة والاساءة بالروسومات اياها...

علشان يستفز المسلمين بره فيقومو باعمال هدامه فيستغلوا دا ويظهرو الاسلام بالصورة الوحشه دى....

وهدفهم برضو من دا انهم عايزين يخلو الجاليات الاسلامية فى اروبا تهاجر منها ودا فى نظرها مكسب كبير بصرف النظر عن الخسائر من حكايه المقاطعة ..... دا لو فيه مقاطعه فعليه اصلا مهو لازم نقوم بمقاطعه بصرف النظر عن راى الجماعه اللى بيقولو ان هنقاطع شركات مش دوله هيا اه صورة من صور المقاطعه بس برضو هو اقتصاد البلد بيقوم على ايه مهو من ضمنها الشركات دى...
فلما نتسبب فى خساره حتى لو بنسبه بسيطة دا يعتبر خساره للدوله نفسها ... فيعنى لازم نمشى فى الاتجاهين ومن ضمنهم المقاطعه ....ودا راى ...ولا ايه يا جماعة ؟؟

المهم سالوه عن الحمله اللى عاملها ضدد الادمان .... هيا بصراحه حمله كويسه جدا وعجبنى جدا الشباب اللى طلع يحكى عن مشاكلة وتجربته اللى منهم تجربته مع الادمان استمرت من عشرالى تمنتاشر سنه ...

وهو ما كان متخيل انهم يوافقو على الظهور المباشر على التلفزيون يعنى ....
بس انا بقول يعنى لما الواحد مدمن
الدنيا كلها عارفه انه مدمن وبتبص ليه نظره احتكار ففى اليوم اللى ينضف يبقى مكسوف يورى للناس نجاحه
مش معقوله يعنى ... بالعكس دا يحس بالفخر ...

المهم يا جماعه انا هحط الرابط بتاع موقع عمرو خالد ...اهو احس انى عملت حاجه ...

ومنها البى دعوته انى انشرها وابعتها لمعظم الناس قدر الامكان

http://www.amrkhaled.net/
اما عن ردو عن حكايه دخلوه اللى بيقولو وصل اللى 2ونص مليون دولار .... دا كدبه وقال مش صدق
وقال كل دخلو هو عن طريق البرنامج بتاعه وخلاص ومش بياخد اى فلوس من اى لقاء او ندوة
بس بصراحه مش عارفه الناس بتنق ليه ...؟ عادى يعنى لما يوصل دخل لفوق الاتنين مليون دولار
لاهو حرام ولا عيب ... طالما جى من حلال وينفق فى الحلال ...هو لازم االلى بيدعى للاسلام يبقى بيشحت ...
علشان ينفع ... على الاقل بيبين الاسلام بصوره كويسه ومحترمة ...
وايه يعنى حتى لما ياخد مقابل مادى من مقابله فى برنامج ولا ندوه ...داانا قرات مره عن عمرو ذكى بتاع الكوره علشان يطلع فى بنامج بتاع شوبير طلب يجى ३० الف تقريبا وكانت مده عباره عن ساعه ...بس شوبير رفض وهدده ان مفيش لا خمشتاش الف بس وكان هيكلم فى هيافه وهبل ...اما لما عمرو خالد يطلع يكلم فى كلام على الاقل يدى امل فى الظروف المهبب دى مندهوش زى عمرو الاولانى ...
ولا كلام الهيافه بقى غالى عندنا اوى
وبعدين بدورو ليه على ناس بتقدم خدمه وتدعو لشئ كويس مهما كان المقابل ...امال اللى خربنها ومولعين فى البلد
ومشحتين الناس ....وبرضو بياخدو ملايين .... ومحدش بيكلم ... وحتى لو اتكلمو ...الكلام من غير فايده
يعنى منتفزلكش يعنى ...
المهم اى حد عارف حد مدمن ... ينزل دون لود من الموقع بتاعه ( الاستيكر) بتاع الحمله ويلزقها فى المنطقه
اللى عايش فيها ... دا طبعا بعد ما يطبع اى عدد ربنا مقدره عليه ...
اهو نوفر حاجه من 17مليار جنيه اللى اتصرفو على المخدرات السنه اللى فاتت ...
انا كدا عملت اللى قدرت عليه ....معلشى اضعف الايمان يعنى...
وسلام يا رجاله...ويابنات


يلعن ابو سياسة الحكومة .....

بصو لما نقول حكومة حرميه دا بقى حاجه عادية جداااااااا.. أما الحاجة اللي مش عادية ولا طبيعيه ..

أننا نطلب منها حل للمشاكل دى ...... لسبب بسيط جدااااااا أنها أصلا حكومة فقر وهيا السبب فى البلاوى دى

يعنى لما أكون بتفرج على الجزيرة وألاقى تقرير عن طوابير العيش ...وأحس أننا متهانين جدااااااا...

ولا أحنا شعب ليه كرامه ولازم تتحافظ عليها ... وكل الناس تتفرج علينا ويقلو أننا مش لقين ناكل ....

ازاى اى حد يحترامنا ....

هيا أصلا حكومة بنت جزمة معفنة ... سياستها أنها تتهان ويتف عليها وتضرب بالجزمة على دماغها الوسخ بشرط انك تدفع اى حاجة ....

شغالة بياعه فى كل حاجة واى حاجه.... والمصيبة الكبرى أنها باى تمن ....

أنا مش هقول أرقام ولا إحصائيات ... علشان خلاص دماغي ورمت منها ... الله يحرقهم بجاز

يعنى لما هيا تبيع حق الشعب دا مصيبة .... وتبيعه بتمن زباله زيها .. مصيبة اكتر .... دا كلو ووكلين الجزمة

ومكتومين ... بس لما توصل أنها تبيعوا لعرب أو أجانب ويوصل بيها وساخة أهلها تبيعو لإسرائيل ....
ودا باسم الاستثمار ولا السلام وزفت ....دا باه لازم

يبقى عندنا دم ...ونعمل حاجه..

باعت الغاز الطبيعى لاسرائيل ودول تانيه بعقود لمده عشرين ولحد خمسة وعشرين سنه وبنفس السعر ...الزبالة .... وكمان مدعم ....فى حين أنها بتقتل فى الفلسطنين وفينا وزلنا ....

ولما نسمع أنها باعت عشر فدادين مباني لأسر أمراء سعوديين سعر المتر 400 جنيه تقريبا فى القاهرة... فى حين أن ناس كتيره مش لاقيه حته تسكن فيها.... ....

دا غير شركة عمر افندى اللي ابتاعت بكل فروعها والمخازن والبضاعة اللي فيه .... بتمن جزمة من اللي بيلبسوها....

ويقلك استثمار .... واخوة ... ميلعن أبو دا على أبو دا ... لو كان على حساب حقى ...

ولما توصل الحكومة المعفنه أنها تقرر تبيع من قناة السويس بنسبة 51% لاى مشترى حتى لو إسرائيل

بس المهم التمن .... دى تبقى كارثة ... يعنى مش كفاية بيعتنا كل حاجة ... لا دى كمان بدخل احتلال

إيه التفكير الوسخ دا...؟
إيه السياسة دى ...؟
إيه المنفعة من الاستثمار المهبب دا ...؟

خلاص بقو بهايم مش فهمين بيهببو أيه .... اى رئيس ولا الا حكومة تعمل كدا ....

هبله ....تخلف .... معاقة ذهنيا ... أنا مش فاهمه ... لحد أمته هنتكتم ونفضل حاطين الجذمة ....
مش بعيد اى حد يصحا على هبد باب يسحبك ولا يسحب حد من أهلينا ... ونيجى نسال يقلنا أننا متباعين
والله مش بعيد اصلا نكون متباعين .... وبنضحك على نفسنا ... وكلو باسم سياسة ولاد الجذمة

ميلعن أبو الحكومة.... على أبو سياستها .... على أبو الكبير فيها لحد اصغر حمار فيها ....

حوت وعربيه امن ......توفو الى رحمة الله

حصل حاجتين فى محافظتى الجامده هما ملهمش صله ببعض........ بس يعنى جديد فى بلدنا....

أول حاجه حصلت أن فيه حوت نادر جدا انتحر على شاطئ البحر فى بلطيم .... بيقولو انه تاهه

وخدو منه أجزاء للدراسة .... وهيدفنوه لحد ما يتحلل ويبقو يشيلو الهيكل ويحطوه فى المتحف ....

بس انافى اعتقادى انه جى يتفسح ....ولما شاف حال البلد انتحر ..... وتعيشى يا حكومة...

الحاجة التانيه ..... ان قوات من الأمن حاصرت مجموعه من الإخوان فى المسجد وهما بيصلو مع مجموعه من

ناس .... وعملو ليهم رعب .. لحد ما إمام المسجد استنجد بالناس عن طريق ميكرفون المسجد

لحد ما أهل البلد مطلعو على الأمن واتخانقو معاهم لدرجه أن العساكر طفشت فراحوا كسرو العربيات
وال ايه امن ........واكسه تقيله

الأحد، مارس 09، 2008

كلاكيت تانى مرة .... مش عايزة اتفوتر يا حكومة

النهارده وأنا على الغدا لقيت فى رسالة موبيل جيالى ....

فطلبت من ماما تناولني الموبيل ... فرحت ابص أشوف جيلي أيه ...
قلت جايز حد عايز يعترف انه معجب بيا ولا حاجه ... ومكسوف يكلم ... ببص ... لقيت التالي ...

CpA
جهاز حماية المستهلك :من حقك طلب
فاتورة عند شرائك سلعة أو خدمة
تمسك بحقك

لولووووووووووووووووووى ..... دى زرغوتة منى .... أصل عجبتنى تمسك دى .. حقك دى جامده

بصراحة .... أنا انفجرت من الضحك ... بابا ولا ماما ما كانو عارفين يكتمونى ازاى

سالت اى حد اتبعتلو الرساله دى قبل كدا .... الاجابه لا طبعا

وكل ما افتكر الرسالة ولا حتى ابص على الموبيل اضحك ..... على الخيبة طبعا

أولا: اشكر كل من ساهم فى الرسالة من أول صاحب النية انه يبعتها ليا
لحد اللي كلف نفسه وطرقع صوابعه وبعتها فعلا

وبشكر الحكومة فعلا على الخوف علينا جدااااااااا وعلى ضمان حقنا طبعا ... ومش قصدها يعنى
انها تضمن حقها وتشوف فواتير الناس علشان تشفط الفلوس على أساس أنها ضرايب وحق الشعب

وهيا بتحصلها علشان مصلحتنا طبعا ... ولا مثلا زى مقلت قبل كدا بتجمع 58 مليار وكلو من الموظفين الغلابة

وبتنفق على المرافق 22 مليار بس ... فين الباقى طبعنا شفطوها ...مبدأ إن أنسفناكم طبعا...

ثانيا : برضو بشكر كل من ساهم فى أن المعلومة توصل لحد الشعب وهو قاعد فى بيته .. يعنى من خلال الإعلانات الروشة اللي بتستخدم مصطلحات زى( هتفوتر_ هتظبطك ) على أساس بيستخدمو مبدأ الاندماج فى المجتمع وطبقه الشباب باه ... والرجل الطيب هيفهمك ... وواحد اقرع لابس بيجامه مقلمه يحسسك انه قايم بدور قلم رصاص... وهبل من دا ... وكعى يا حكومة فلوس فى الحملة الاعلانيه دى ...

ومش بس كدا وكمان رسايل على الموبيل أيه الهنا دا .... انا بعتبر دا تحريض على الشغب ...

ثالثا: بقلكم أيه ربى يخليكم المرة الجيه نفسى تكتبوا وتفرحوني كدا وتقلولى التمسك برغيف عيش نضيف... أتمسك بحقي أن الأسعار تبقى مناسبة لدخل اى مصرى ...

أتمسك بتعليم وثقافة محترمة.... أتمسك بحقي أنى اركب مواصلات كويسه....أتمسك بحقي أن اختار حكومة محترمة .... أتمسك بحقي إن اشتغل ...

أتمسك إن أحاسب اى مسئول قارفنا فى عيشتنا وناهب فلوسنا ... أتمسك بحقي فى رجوع التأمينات اللي اتسرقت ... أتمسك بحقي كمسلمه من دوله عربية ... ومحدش يهين فينا ...

الله يخليكم دا نوعية الرسالة اللي عايزاها .... وكفاية هبل باه ... وحلو عن دماغ اهلى ...
انتو بتضحكو عليا ولا على الخيبة اللي انتو فيها.....

رابعا : دا كلو علشان فضفضت وقلت انى اشتريت بوت وماختش فاتوره ...
وقلت مش عايزة اتفوتر يا حكومة....
طييييييييييييييييييب .... مش عااااااااااااااااااااااااايزة اتفوتر يا كومه .... معلشى نسيت ح


السبت، مارس 08، 2008

سلام كبير لحلاقين مصر ....

أنا زهقت من التلفزيون قلت افتح النت وماكنش فى دماغي اكتب حاجه النهادرة......

لقيت محمد اخويا دخل من بره...
وبساله أنت اتاخرت ليه ....؟
قلى أصل البلد مقلبوه ....
عادى ما هيا متنيله مقلوبة من زمان ... بس ليه يابنى حصل أيه ؟

قالي فيه يجى خمس عربيات بوكس مليانه عساكر جيه تاخد الشيخ عاطف؟

أنا الصراحة معرفش الشيخ دا شخصيا بس اسمع عنه انه يعنى بيدى دروس دينية أو حاجة زى كدا....

المهم هو أصلا ما كان موجود فى البيت فراحو قلبو البيت وبهدلو الدنيا ....

ومش كدا وبس .... لا دول خدو كل اخواتة الرجالة من غير ما يكون ليهم ذنب أصلا

والضابط بيتعامل ...... متقلوس التكية بتاعة اهلو ... شتيمه معفنه ...وغير من اساليبهم الزبالة..

انا كنت بسمع بحملات الاعتقال دى ال ايه علشان الاخوان ...واقرا فى الجرايد .... واقول ايه الهبل دا

دلوقتى حدانا فى البلد ..... أتقدمنا .... والحكومة بتظبط فيها ....

يعنى سايبنى الناس العريانة والعلمانيين اللي ملو البلد .....

ورايحين يلموا فى ناس كل ذنبها أنها مربيه شويه شعر فى دقنها....
.
واحتمال كبير أوى يكون الحلقين فى منطقتهم ماتو ولا هاجرو ...

قلت الحمد لله أنى حلقه دقنى ..... هههههههههههههههههههه

سلام كبير اوى للحلاقين اللى مظبطنا .... وسمعني أغنيه ......
خلى المقص ( قصدي السلاح) صااااااحي ...

حكومة هبله صحيح ....

الجمعة، مارس 07، 2008

شعاااااااار (كلنا الحضرى ).....

أنا بجد ومن غير حلفان الدمعة كانت هتفر من عيني فر .... وفى نفس الوقت فرحت جدا لما اخويا بيدينى جرنال الدستور ... ولسه ببص على أول صفحه لقيت صورة الريس الكبير منوره وجنبها خبر انه ادخل شخصيا فى حل مشكله الحضري .... بجد اتلغبطت جدا وبقى مخي يودى ويجيب .... وألوم نفسي جدااااااا

بس لقتنى فجاءه قلت .... الله اكبر ... الله اكبر ....الريس طلع بيسمع ....
لالا محدش يفهمني غلط .. وكنت ظالماه
أصل كنت متخيله طول عمري ... ان الريس يعنى مش واخد باله مننا ... يعنى على أساس أننا فى العصر الحجري .. ومش عارف ازاى يتابع أخبارنا ... يعنى مفيش تلفيزيون ولا فضائيات ولا فيه نت
ولا جرايد ... ولا حوليه حبة ناس عايز يتولع فيهم بجاز هما اللي مش بينقلولو أحوال البلد ... بس رجعت قلت

لالالا دى أهانه فى حق ريسنا انه يبقى ريس البلد والحكومة ومش عارفه حاجة فى البدنجان .. والعمه تتلبس
بس بعد إعجاز لقيته عارف أخبار البلد ... وإيه اللي بيجرى فيها ... وأتكرم رغم مشغولياته الكبيرة ...
من طلوعه قمم ومباحثات وفسح وسفريا علشان الشأن العربي زى اللي حصل فى أخر مؤتمر للمعلمين الزعماء
وكان كل شغلنتهم بوسه من هنا وبوسه من هنا .... وضحكة أهي اهى ... واكل يضرب ... وبيباى ... ومبوبيلات باه ... ولا فى دماغهم شعوب ... بلا نيله ...

المهم نرجع مرجوعنا لمجهود الريس انه حل مشكله الحضري ... والحمد لله ...
بس قلت دى ايه دا ... يعتبر دا بشرت خير أن خلاص الريس باه يهتم بينا وهو كتر خيره حل حاجه ...
اى نعم طلعت تافهه ... بس جايز دى البداية .
وحاجه تانيه ... يعنى سمع عن الحضري ... مسمعش يعنى عن المصايب اللي مليه البلد ويقوم كدا مثلا يحل
مشكله العيش ... ولا مشكله الميه .... ولا مشكله الكادرات ... ولا مشكله التعليم .... ولا الاحتكار والأسعار المولعة.... ولا البطالة .... ولا .... أيه تانى فكرونى ... دماغى فوتت ...
مش مهم مهو أكيد عارف .... ماشى كنت ياريس منفضلنا .... مجوعنا ...
سببت لينا فى المرض ومش لقين علا ج واللى موجود مغشوش
مفيش رغيف عيش نعرف ناكله عدل .... مش مهم مسمحينك ...

ونبدا من الأول ... والحل هيشتغل .... ويا سيدي اعتبر شعب مصركلو الحضري ولا ما نشبهش يا ريس

ومن النهارده هرفع شعااااااااااااااااار (كلنا الحضري ) وعبرنا باه
وسمعنى سلام كبير جدااااا .... لريسنا الجاااااااامد اوى ..... والصلح خير

.

الخميس، مارس 06، 2008

احساس فكر....

انسابت يدي تحت محرم راسي ....تنتقل من مكان إلى مكان

فإذا بى ينتبه فكرى لما يحدث.......

ماذا لو كانت اصابعى تستطيع أن تخترق قمة راسي لتصل إلى عمق فكرى ...

أتمنى أن استطيع أن انزل إلى العمق ... لأعرف بماذا أفكر ...؟ وماهية فكرى ..؟

هل النزول إلى عمق الفكر علوا بالأفكار ذاتها .....؟
أم هو البحث عن المعلوم المجهول الأصل ......

فإذا كان معلوما بالفعل ...فلماذا نطقت شفاهي جهلا ....

اهو جهل بما هيه فكرى ...؟
ااوريد فعلا معرفة ذاك ...أن أصل لأغرق فى عمق افكارى ...

أم انتظر إلى خروجها من قمة راسي فى افعالى ...

فإذا انتظرت الفعل فهل اترك الفكر أم سأظل أفكر ...هل كان الفعل خطا أم صواب ...؟

لو استطاعت اصابعى الوصول إلى العمق هل تخرج فكرا صالحا وتترك الخطأ قابعا ...أكان هذا صوابا ..؟

فهل من المعقول ترك خطا فكرى هكذا ... أهذا صحيح ؟
فلماذا لا يخرج من عمق فكرى لابثقه .....؟
وليظل فكرى صحيحا.... لكى أقوم بصواب الفعل ..

لا ..... لا أدرى ..هل هذا أم ذاك تصل أليه أو لا .... أم لا يوجد اختيار بتا...
أم يدي لا تستطيع أن تصل للعمق إلا مره واحده فعليها الاختيار ...؟

أذا أن كنت ابحث عن الفكر ... إلى ماذا يقودني ألان ...
اهذه شفاهى هى التى تهمس بداخلي ...

وان كان ...فلماذا أذا أتمنى أن تصل للعمق ؟؟
قد يكون بعيدا .....عميقا ... هل بالفعل استطيع التماس هذه المسافات ...؟
ولماذا امزج دائما بين راسي وفكري ... ويخيل لي أنهم شئ واحد....
هل هذا ظني ... أم اعتقادي .... أم احساسى ....؟
إحساس ... إذا هو الإحساس ..هو الذى يدفعني لكى أيقن أن وصلى لعمق فكرى ليس بالتمني ...

بدخول يدي من قمة راسي .... بل احساسى الذى ايقننى لكى أصل بالفعل لما هيه فكرى ...؟؟؟

الأربعاء، مارس 05، 2008

مش متفوتره ... يا حكومه...

أنا دماغي فى العالى .. الأول اتفضلو عصير مانجه متقطع فيها خمس صوابع موز ...خمسه هه فاهمين..

المهم النهاردة نزلت للمنصورة ... انا وبابا العزيز كان عنده استشاره عند دكتور ...وعلشان كان فيه سابق معرفه ... قمنا أنا وبابا بالواجب مع الأخر اللي بياخد الفزيتة ... وكنت على يقين انه هيعتزل الشغل... يعنى هندفع فلوس ونسكت ..لازم حبة تحبيش كدا ...

خلصنا ونزلنا وفضلنا نتفرج على المحلات (استنوا أكول خمس معالق موز..) ...هه وبعدين وقفنا قدام محل

جزم بتاعت الرجالة ...شوفنا جزمة ب 300 جنيه عارفه عارفه أنكم تقولوا عادى سعرها معقول بس انا برضو قت كدا يعنى هدفع من جيبى ...وقلت لبابا

فداك يا حاج ...

قلى انتى عايزانى البس فى كل رجل 150 جنية ...الناس حدانا فى البلد هتقول ايه؟؟؟ هيقولو عمل زى عباس

ولقيته فجاءه بيقولى ...

شوفتى ... مكتوب أيه؟؟

خير مكتوب أيه يا بابا ؟؟

مكتوب دا قسم الحرميه فقط..

فكان شاب زى الفل واقف وسامع حوارنا ...فراح مشارك معانا وقال دى يا عم الحج تتنفض كويس وتتحط على السرير ...

كان نفسي أطول وأقول واستفسر ...من الأخ دا ازاى تتحط بظبط وعندى استعداد ادفع انا 300 جنيه بس الحج كان معايا ...فهمنى طبعا يا عفريت

سبنا المحل بعد ما دعينا عليهم ... وبابا اتنازل عن حق انه يشترى ... أنا باه قلت لاء لازم أنا اشترى معقول ما أدبسه فى اى حاجة ... فين شخصيتك يا بنتى ...

بابا ...( منفض) ..بابا

نعم

الله...... البوت دا حلو جدااااا...

أنا هروح أصلى العصر وهاجى ...

ماشى أتفضل وادعيلى ... أنا هستناك هنا ...

اياكى تفكيرك يوديك لبعيد ويجيبك عندى علشان أوديكى فى دهيه...

ديكى مين ...لا مهو لازم اجيبه انسى ...

دخلت المحل ( استنو اشرب خمسه بؤ عصير ) ...

لو سمحت عايزة البوت دا

مقاس كام

38

حاضر ...اتفضلى على ما أجيبه

رحت دخلت وقعدت قدام المرايه

اتفضلى رميت الشبشب اللى جيه بيه

ايه دا ...مش طلع اللى كان فى بالى ...مش مهم هجيبوه برضو...

فضلت اقيس فيه ...

شويه ادخل البنطلون فيه واقف قدام المرايه ...الراجل يقلى الله جميل ...

طبعا ما أنت عايز تبيع

لا والله ...

شويه وأشمر البنطلون ...يقلى الله جميل

برضو ...انت عايز تبيع والسلام

قلتلو هخدو بس على شرط لو معجبنيش على الطقم هرجعه ...وطبعا الحكومة عملالى قانون حق المستهلك

أن ليا الحق ارجع اللي شريااه واخد فلوسي...

لالالا .... تبدلى بس ...باى حاجة تانيه

ازاى أنت بتعترض على الحكومة ...

لا مش قصدى .. انتى هتلبسبى تهمه ....بس مش هينفع

ماشى هبقى أبدل ....يلا فوترنى...

يعنى أيه افوترك؟؟؟

لالالا انت مش بتهتم ...كمان بحملة الاعلانات بتاع الحكومة ...

تفوترنى يعنى طلعلى فاتوره

لقيته سكت .... روحت استغليت الموقف ...وقلت بلاش بس بشرط لو جرى للبوت حاجه فى خلال سنه هجيبة

قلى هتيه ...الراجل متخيل أنى هرجع فى كلامى ...حلفت وقلتلوو توقع منى أنى هجيلك فى اى وقت

واشتريته وبابا جالى لاقانى حطاه قدام الأمر الواقع...

وحاول يعقدنى فيه ... بس على مين

وراح سالنى عن الفاتورة ...

قلتلو ياعم فاتوره ايه ؟؟؟

دى حكومة حرمية بتجمع مننا ضرايب 58 مليار جنيه ... على أساس هيعملو حاجه ومدارس أيه ومستشفيات أيه ؟ وأبصر أيه... وكا الحكايه انهم بيصرف 22 مليار جنيه بس ... والباقى أن اسفئناكم ؟؟ بالسم الهارى يارب

هروح بقى أريحهم واخد فاتورة ...وبعدين أل أيه حطين ثقة وهيعملو الضرايب على أساس العينة ...

يالهوتى ....

أيه.... فى أيه ؟؟؟

أنا خافيه أن الراجل يعترف من أول قلم ...... ويدلهم على البوت ويقلهم دى العينة ....

تعالى تعالى .... على العوض ومنه العوض فيك يا ضنايا

طب بالمره هات موز من العربية دى .......

ياااااااااااااااااااااارب صبرنى .... لخص يا حج هتجيب يعنى هتجيب ......

الثلاثاء، مارس 04، 2008

شوفو الحكومه المعفنه والزبالة موقفها ايه...

ولسه القتل موجود واسرائيل بتضرب بالصواريخ دا مفهوم وواضح للكل.....
وبرضو حكومة خرسة ومتخلفه وجبانه...
ومفيش زعيم راجل يرد او يوقف اللى بيحصل فى غزة من قتل للاطفال او قتل مصرين على الحدود.. ...ويحسسونا ان ليهم قيمه او لازمة فى القعده...برضو دا واضح للكل خيبة الحكومات دى الله يحرقها
بس لما الحكومة المصرية اللى ينزل عليها صاروخ ....وتولع تبقى هيا مشتركة فى قتل الناس دى وكمان فى قتل سماح الطفله المصريه اللى ماتت على الحدود ... دى تبقى مصيبه وتبقى حكومة زبالة وينداس عليها بالجزمة ...
لما تبقى حكومة مصر النهاردة يكون اول يوم فى ضخ الغاز الطبيعى لاسرائيل ...فى وسط القتل دا والمصايب دى
استحاله تبقى حكومة نضيفة ومحترمة ...
بتزودهم بطاقة علشان يقتلو فينا ...دى مصيبة وبيقلك دا دعم للسلام بين مصر واسرائيل ...ميلعن ابو دا سلام
ويولعو بجاز ...امال لو ماكانش فيه سلام وزفت ...كانو هيعملو ايه...
وموقفش على كدا وبس ...انها تضخ ليها الغاز فى حين اننا فى مصر الغاز بقى سعره مهبب فى ام دمغهم...
لا كمان الحكومة المعفنة بتديهم الغاز مدعم ...بسعر المتر المربع من الغاز ب ३ دولار.........
وسعره العالمى اتناشر 12دولار ... شوفتو ام الوساخ بتاعت الحكومة ...
يعنى بتوفر احتياجات اسرائيل من الطاقة २०% دا فى الوقت الحالى ...
وفى السنين الجيه هتزيد لما توصل الضعف يعنى اربعين فى الميه...
يعنى الحكومه اللى يجلهم حمه تخدهم كلهم هيا اللى بتقتل فينا ....شوفتو الخيبة ... مش بزمتكم ولاد ...ولا لاء

الاثنين، مارس 03، 2008

ياحكومات اخلعو الطرح باه ...


100 قتيل ...200 جريح .. قتل ما فرق بين طفل رضيع ولا ست ولا بين راجل عجوز ... رئيس حكومة فاشل ولا ليه لازمة ... كل اللي عمله راح أتبرع بحبة دم وهو لابس جزمه ب 20 ألف يورو ... غير كدا ولا زعيم عربي من اى دوله طلع راجل ويقول كفاية ... كفايه موت اطفال ملهمش ذنب ..

ليا أصدقاء من فلسطين و أتكلمت أنا وصحبتي وهيا حاليا فى غزه وبسؤلها عن أحوالهم وابسط حاجه عن الأكل وكدا جه ردها عليا أنهم بيموتوا فى كل لحظة ألف مرة من الرعب اللي شايفينو هيا وأهلها
وأطفالها .. أما حكاية الأكل دى صعبه جدا وقالت حتى الأغذية اللي أشترنها من مصر طلعت مغشوشة .. تخيلو

أما صحبتي التانية واللي لسه موجودة فى مصر بسبب ارتباطها بالدراسة كلمتها وبسؤلها عن أخبار أهلها
فى غزه لقيت نفسيتها زفت ولا هيا عارفه تكمل رسالة الماجستير بتعتها .. بسبب قلقها على أهلها
وقلتلى أخر مرة كلمتهم وبتقلى لو حكتلك على النار اللي عايشين فيها مش هعرف أوصف لدرجه أنهم
مش عارفين يخرجوا يروحوا للدكتور لينزل عليه صاروخ ولا حاجة.. وأمها بتقلها إحنا عايشين في نار


أما الحال المصري أنا بحمد ربنا أن المعبر فتح علشان الناس تتعالج .... دا بالنسبة لكل اللي قدرنا نعملو للفلسطنين ...

أما لما حصل دخول ليهم فى المره الأولى الدنيا قامت ولا اتهدت لدرجة أن وزير الداخلية قال لو حد دخل هنكسر رجله ... طب هو فين دلوقتى لما طفله مصريه قتلوها ولاد الكلب على الحدود سكت ليه ...
فين كسر الرجل يا سيدى... كان بعبعه ...

حد فيهم نطق ... حد أتكلم ...طب الفلسطنين وهنقول احنا مالنا ... كل واحد يدور على حاله معلشى نداله باه

أما لما تموت طفله مصرية برضو هتتكتمو.. فينك يا وزير .. فينك يا عم الريس ..

أيه مش مكسفين من كسر الكرامة اللي فيكم .. دا إسرائيل بتقول هتعمل هولوكوست ( محرقة ) وبرضو

مفيش رد فعل .. ومصطلح هولوكوست دا موجود من أيام هتلر لما جمع ملايين اليهود وحرقهم بالحيه

ولحد دلوقتى بتستغل الحكاية دى فى جذب تعاطف دول العالم ليها ... وحصولها على تبرعات بالمليارات

وأخر حاجة حصلت لما رئيس فرنسا قرر أن كل طفل فى المدارس يدرس حياه طفل يهود أتحرق أيام هتلر

ليغرزوا الحب لليهود وبالتالي الكره للعرب على أساس أنهم أعداء اليهود...

ودا كلو مفيش راجل عربي من اى حكومة عربية يطلع يقول حاجة ... مش هنقول ياخد حق اللي ماتوا

على الأقل يوقفوا اللي بيحصل ... طبعا الجبن والضعف اللي عايشين فيه ... موت إحساسهم

وخلاهم يلبسو طرح ... فينك ياهتلر دلوقتى ...







السبت، مارس 01، 2008

حكومة ...فراولة ولب وقفا يتف عليه ...

طبعا مفيش حد يقدر يستغنى عن العيش ومن الطبيعى اى حكومة محترمة توفره علشان اعتمادنا الاساسى عليه بشكل يومي ...... ودا عن طريق حاجتين لاما نزرع مساحه تكفى وتدينا إنتاج ميخليش فيه عجز ..لاما نستورد قمح كويس جى على أساس أن فيه ناس هتكلوا...

إلا حكوماتنا النحس الذكية اللي هيا مش ذكية أصلا مش فالحة فى اى حاجة بالعكس و منيله الدنيا ..

الحكومة الله يحرقها قفلت توريد القمح المحلى من سنتين وكان ربنا كرمنا
على أساس أن القمح فى الخارج ارخص من القمح المحلى
والاستيراد اقل تكلفه وارخص من الزراعة ودا اللي خسر الفلاحين فى مصر سنه 2005
و خلى الفلاحين فى السنة اللي بعدها 2006 يقللو من الزراعة لحد 2 مليون فدان قمح ...واللي حصل بعد كدا
أن زاد السعر لحد 400 دولار للطن .. وبقى 6 مليار جنيه فرق أسعار 2007 ...والسنادى الفرق هيزيد لحد 8 مليار ... دا طبعا تخطيط واحتكار بالنسبة للسوق العالمية (امريكا واستراليا وكندا وفرنسا ودى الدول اللي بنستورد منها ) واللي حصل دا كانت ضربة ولاد كلب على قفى حمير الحكومة ... اللي بتستعبطلى فيها ...

ومش بس كدا لا دا القمح اللي بنستوردو متسرطن ...وغير مطابق للمواصفات .. زى اللي حصل فى مرسى مطروح اللي القمح فيه لونة ميال للاحمرار ومخلى العيش يطلع مشقق وشكلو غريب وبالرغم من كدا الناس بتاكلو علشان مفيش غيره أصلا ...

ورئيس غرفة صناعة الحبوب ومنتجاتها قدم مذكرة لوزير التجارة والصناعة بيقول فيها أن أنواع القمح اللي مستوردنها غير مطابقة للمواصفات ...

حتى رغيف العيش تحت رحمة ولاد الكلب دول ما فيه ناس قالت الحل ونقدر نعتمد على نفسنا ونعمل اكتفاء بالقمح المحلى بزراعة 3 ونص مليون فدان ونعدل من أنواع القمح ونخلى الفدان يجيب 27 اردب قمح بدل 17 ..ودا كلو والحكومة ولا حطة فى دماغه ومعتمده على القمح اللي يجى من بره وهو اعفن نوع بيجلنا ومتهبب ..

دا كلو ومفيش فايده و فالحين يزرعوا 140 ألف فدان لب ... خلاص الناس شبعانه وفاضل تتسالى بأكل اللب وهنتف على الحكومة ولا أيه بظبط...
ويزرعو فراولة ويصدروها .. وشغلين فى التفاهه وال تنمية وهبل ..... وربنا لسه فاكرة مره ريسنا شوفتو فرحان ومبتسم لما راح يزور أل أيه الاراضى ومتصور جنب كرتونتين فرولة ..وكام حاجه كدا


خلاص باه امخخهم بقت فردة جزمة .. اتعمو مش شايفين اللي بيحصل ... مفيش أحساس
..
مفيش دم الله يحرق دمهم واحد واحد ...