الأربعاء، أبريل ٣٠، ٢٠٠٨

كان معكم من وزارة الاشوله ....

ايه الهنا دا ....طول عمرى نفسى افهم وزير التضامن يعنى ايه ....؟
والحمد لله ...فى موقع البديل ...عرفت اهم مهامه ووظيفته .... الراجل كتر خيره ...كلف نفسه
واهدى العرسان فى فرح جماعى شوالين دقيق .... شوال للعرورة وشوال للعرير... مهو هيعمل ايه ...؟
مجهود ذهنى جامد بصراحه ....وكلف جامد ....مهو اصل الدقيق بقى اغلى من الدهب ...
وبعدين ميصحش العرير يقف من اول يوم جواز فى طوابير ....افرض مات .... يلا كتر خيره على كل حال...
انا باه بطالب ان الوزارة دى تتلغى اصلا ...او تتغير اسمها وتتسمهى وزارة الاشوله....
________________________
بمناسبه الاجازات انا بصراحه مش عارفه المره اللى فاتت خلانى اتكلم فيها ...مش نق ...ولا انى بتبطر عليها
لسمح الله ....بس حاجه طقت فى دماغى وكتبتها ....ويارتنى ما كتبتها ...
النهارده سمعت فى برنامج الطبعه الاولى بيتقال ان الاستاذ ملط بتاع جهاز المحاسبات ....قرر انه هيلغى
يوم اجازة يوم السبت ...ويبقى اليوم الاجازة الوحيد للموظف هو يوم الجمعه ....وبيقول ان مصر بتاخد فوق
ميه وستين يوم اجازة فى السنه ...وبكدا معدل الانتاج فى مصر هابط ...ال ايه فيه اصلا انتاج ..
ربنا يصبرنى يعنى ما كل العالم بياخد اجازات يومين فى الاسبوع ....بدل ما تلغى يوم السبت
ما تلغى الاجازات زى بتاع عيد العمال دا ...ولا متقدروش على انكم متشوفوش الريس والفرح بتبظ من عنيه
وهو بيقابل العمال والنفاق شغال على ودنة ...وقرفنا بيه فى ام التلفزيون....
يعنى الاجازات مش لينا ...دا علشان سيادة الريس يعمل الفتين بتوعوه اللى بيعملنا ايحاء ان الكل فرحان بيه
طيب الله يخليك يا ريس ...علشان الملل بتاع كل سنه ...ويبقى فيه حاجه جديدة....ياريت تروح
تزور العمال اللى معتقلين ....ومتنساش العيش والحلاوة...بس قبلهم تروح تقف فى الطوابير بتاع العيش
اهو برضو هتبص بصه على عمال الفرن .... وحلاوة العيش...
يلا لما نشوف هيبقى فيه جديد ولا الملل بتاع كل سنه ...
اللى هو سلام على كام نفر ورفعت الايد وبيباى مع نفس الابتسامه اللى من سبعه وعشرين سنه
مع نفرين ويدوها نفاق للمنى روكب فى وشه ...وبرضو الفرحه مخلياه منشكح...
ربنا يزيد الانشكاح ......

دول اطفال غزة ....


طبعا الكل عارف دول مين .....؟

دول فلسطنين .... عرب ....مسلمين ....

مين السبب....؟
قبل اسرائيل ...العرب نفسهم .... كل واحد بيقول يلا نفسى ...الفلسطنين بيدبحو فى بعض ....وكل واحد عايز

السلطة.... غير متنيلين كل شوية رايحين دوله شكل يعملو مفاوضات ...على ايه مش عارفه

واخرها مع مبارك وشويه مع بتاع المخابرات المصريه ....ايه النتيجة ...؟

النتيجه ناس بتستشهد كل يوم ....اطفال بتموت من غير زنب ....وهما متلقحين لسه فى مفاوضات ...

دول مش بيجتمعو فى مفاوضات الا علشان تبقى النتيجة فوضى وموت....

-------------
فى حاجه غريبه صديقه فلسطنيه بتدرس هنا فى مصر بتقلى مفيش اى رساله موبيل ببعتها من خط فودافون

بتوصل لاهلى ولا بتوصلنى حاجه منهم ....

من زمان الموضوع دا ..... من اكتر من شهرين ...

مجايز يكون المشكله فى غزة نفسها ....لا مهى اختى اللى فى الامارات بتبعت الرسايل وتوصل عادى ....

انتى لوحدك ولا زمايلك الفلسطنين .....كلنا كدا ....


طب الاتصال برضو فيه مشكله ....لا الاتصال عادى ....

جربتو تبعتو من اى خط تانى موبينيل مثلا ....بتبعت عادى ...

دا يتفهم منه ايه يعنى ....؟

وصحبتى بتاكدلى على الموضوع الرسايل دا لسه اقربها النهارده كمان ......

يعنى عايز بدل ما الاهالى يطمنو على ولادهم برساله كل يوم ...والحاله صعبه ...لا يدبسو فى اتصال ...

اصلها نقصاهم هيا كمان ....


...................................

الثلاثاء، أبريل ٢٩، ٢٠٠٨

اقتصادنا ضد الصدمات...

دا اسمو ايه باه..... هبل صح .... ولا استعباط.... دا اللى قراته فى موقع مصراوى
هما اصلا لازم يلغو وزاة الاقتصاد ..... وتتعمل وزارة الحرمية....
والاخ دا طالع يقول كدا ليه ....هو حد مكدبه .....الكل شايف وعايش.... يعنى خليك متتعبش نفسك
وروح شوفلك قناه اغانى كدا ....ولا تعملك دماغ ....
حلو عن دماغنا هو الاقتصاد بقى حبه زيت وسكر ....هبل ايه ياربى دا... لما نشوف...
وبعدين يعنى ايه ضد الصدمات ....مركبين ليه سوست ...ولا فاصلين الكهربا....
وبعدين ما كان الاول واكلين ودانا وال ايه العالم كله بيعنانى من الارتفاع .....
ومش احنا بس اللى الفقر ماسكنا ...
ومش لاقين ناكل .....دلوقتى بقى اقتصادنا جامد ...
طب ومنعتو تصدير الارز والاسمنت ....مقلتوش منعت تصدير الغازلاسرائيل ...ولا منعت احتكار الحديد ليه...
ولا متقدروش ....والجبن مظبطكم.....
اه يا معفنين .... بلاش اشتغلات وكلام اهبل باه....وحل عن دمغنا يا عمنا ...

تى شيرتى الاصفر ....

طبعا دلوقتى ما عاد حد مشتى وفيه ناس كتيره اوى بتاجل انها تصيف الا بعد شم النسيم علشان تتاكد
ان الجو مش هيرخم ....المهم انا باه قلت ارتب الهدوم الشتوى ...وجيت عند التى شيرت الاصفر
والتي شيرت دا بعزة اوووووووووى علشان انا بحب اللون الاصفر جدا ودا لونى المفضل ....
ومحدش يعملى فيها فكاكه ويقلى دا لون الغيرة والحقد ....لا طبعا انا قرات كتير عنه
دا لون للتواصل الفكرى ...ومثلا لو اهديت لشخص ورده صفرا معناها انك بتقله انت شمس حياتى
المهم ان انا الحمد لله لا بحقد ولا بغير الا الغيره الحميده طبعا ....
نرجع تانى للتي شيرت الاصفر ..... هو عباره عن تي شيرت ( انتم مركزين اوى كدا ليه ) ليه ظنط
وجبين وبسوسته من قدام ومليان بتجات من كل لون حركات باه ...ويوم ما اشتريته اشتريت معاه
بنطلون جينز ازرق وطرحه صفرا وكوتشى اصفر فى ازرق...ليه انا قلت الوصف دا
علشان الشيرت دا جبلى كلام ....وتريقه .....لما بتغاظ زى عادتى
ومن ضمن المواقف دى ...
****ايامها كنت بدرس دورات تخاطب فى تربيه عين شمس ولقيت وانا ماشيه واحد بيعاكس وبيقلى
اموت انا فى نادى الاسماعليه ....اتارى لبس فريق الكوره التي شيرت اصفر والشورت ازرق
بس انا كان عندى اعتراض انا اه لبسه اصفر وازرق بس النادى شورت مش بنطلون ....واد رخم صح
وما كان ردى عليه الا ابتسامه صفرا علشان اكمل الطقم.....ظرف
****تانى موقف لقيت واحده من الدفعه وقفتنى فى مسجد الكليه برضو وتقلى خدى هنا
مالك بتدخلى المدرج وانت مناخيرك فى السما ومش عاجبك حد ليه ....
اقلها انا ...قالتلى ايوا مش انتى اللى بتلبسى تي شيرت اصفر .... ايوا ...يبقى انتى ...
البت بطه صحبتى تقلها همس متكبره ....دى اوطى من الرصيف ( دى صحبه صالحه معفنه ) بس اهو دافعت عنى
قلت ساعتها يادى ام التى شيرت ....
بطه قلتلى مالك ....قلتلها انا قلقت على مناخير هيا كبرت اوى كدا لحد ما وصلت للسما ..... مش هتجوز
لولو باه قلتلى انتى متعرفهاش... قلتلها لا داانا اول مره اشوفها اصلا...قالتلى ازاى بتكلمك كدا ....قلتلها حقد
علشان احلى منها طبعا ...ولا ايه ( محدش ينطق)
*****موقف تالت ... فى المدرج باه كان فى واحد برضو فى الدفعه قعدت قدامه فضل يقلى ايه دا
لون اصفر ...وانا اقول الناموس ملموم ليه ...وانا كان نفسى اهبدو روسيه ...بس خفت على راسى طبعا
تانى يوم يقلى مش انتى اللى كنت لابسه التى شيرت الاصفر ...
قلتلو ايوا ...اصلى كنت قايمه بدور لمونة يا ظريف ....مش ناموس
****موقف رابع .... قلت اروح اوثق الشهادات بتاعتى من الكليه .....وانا ماشيه فى الطرقه بتاعت المبنى
لقيت عامل هناك وانا ماشيه من قدامه بيقلى ايه لبس الاطفال دا ...
.
فقعنى ...لولا بس انه كبير فى السن ....كنت بهدلت الدنيا .....
دا اللى انا فكراه ...ليا حق باه احبه ....جدا ...ولا لاء ....عشرى اوى .....وبالرغم من كدا بتفائل جدا بيه
واى مشوار ببقى قلقانه منه ....البسه بيدينى ثقه وتفائل اوى .... بس ما بسلم من الظرف بتاع الناس
يلا الى اللقاء يا تى شيرتى اشوفك الشتا الجى .....حد يقلى لسه في شتا جى
اه طبعا لا التي شيرت دا ...لوفضل قرن عندى هلبسو برضو ....حد عندو اعتراض.....
يلا هروح اكمل باه ترتيب الهدوم
فميش حد يساعد ....

الاثنين، أبريل ٢٨، ٢٠٠٨

كل سنه وانتم ماجزين .....

البلد دى تدى فى الهايف على تقيل ... وعلى راى المثل اللى بيقول
ادينى فى الهايف وانا احبك يا ننس.....
زى اشمعنى ليه احنا الدوله الوحيدة تقريبا اللى بتغير الساعه...شويه تقدمها ساعه لقدام
وشويه تاخرها ساعه لورا....ليه اصلا
ولا هيا مياعه ومياصه من الساعه ...؟
بس صحيح احنا فعلا الدوله الوحيده اللى بتعمل كدا ....ولا انا بقيت مدياها طراوة؟؟؟؟
ويامكتر اعيادنا ياحلوين.... بالرغم اننا البلد الوحيده عربيا الا اذا كان عالميا تقريبا بتحتفل
بشم النسيم ....وعيد العمال ....والبدنجان
واشمعنا بيسموها عيد تحرير سينا ....ميقلوش ليه عيد تحرير مصر ....انا احتج ولازم اسم يتغير...
ولا هيا سينا دى فى موزنبيق ....مش مصريه يعنى...
اهم حاجة وتلاقى الكل فرحان ....زى كدا زمان لما كنت فى المدرسة ....
بيبقى الاجازات من النوع دى دمااااااغ...
مهو اى حاجة تبعد عن الشغل والتنفيض يشتغل ...زى العسل على قلبنا .....
المهم هنلاقى عند الكل الريحه مديه على عفانه وبصل .... ربنا يسترها باه...
على العموم انا قلت اديها التماسى
ونقول للكل كل سنه وانتم ماجزين .....
ويلا مع السلام عليكم

الجمعة، أبريل ٢٥، ٢٠٠٨

هغيرها واركب البلاستك

مين يا حلوين هيركب مراره بلستك زى .....انا لسه حالا جيه من قدام التلفزيون كنت بقلب القنوات

لحد ما لقيت قدام على القناه الارضيه احتفال سينا

وريسنا والمدام قاعد وطول الحفله ما شوفتش ابتسامه توحد ربنا.....

وال ايه عندو وقت يحضر احتفاليات .... ومفيش وقت انه يصلح فى البلد ..... المهم

انا مبداتهوش من الاول بس اول ما جيت القناه لقيت اسم النبى حرصه تامر حسنى لابس بدله ظابط

وبيغنى وشويه لقيت هيثم شاكر ....قلت ايه الاقناع دا اتنين كانو طفشانين من الجيش وزورين

واتقبض عليهم جين يغنو لمصر والوطنيه والبدنجان ....قلت ومالو نفضى

واشتغلو باه من ايام غزو الهكسوس لحد والانجليز والفرنسين والبدنجان برضو اللى كل سنه بنفس الطريقه اسمعو

قلنا عادى وشوية دخلو باه على انجازات الريس وازاى كان هو عنصر مهم جد لانتصارنا ...جامد من يومة

وازاى مصر غرفانه بالقمح والناس لاقيه عيش بالهبل ( اللى قرات انهم بيوزعو عيش فى عربيه الزباله

وواحد متصور برغيف عيش فيع فار كامل .....اه وربنا ).....ونسو يعملو اغنيه للى ماتو فى الطوابير

ازاى التعليم عالى جداااااااااا ( اللى انا شوفت مدارس اصلا العيال مش بتروح ....نص مدارس مصر قايله للسقوط..... الفصل الواحد فيه فوق 45 تلميذ...... ان فيه قانون بيقول ان العيل من دول لو سقط سنه لازم ولابد

وباى طريقه ينجح السنه اللى بعدها ....واسالونى عن نبيه (واحد كنت بدرسله هبقى احكلكم عليه).....

وغنو لمحو الاميه ....وهيا بتزيد كل سنه ......


وغنو للمصانع اللى ملت البلد .....ونسو يقولو انها اتباعت وسبب فى تلوث النيل والهوا وبتسبب امراض الدنيا
والناس تخفى اقربها اللى هيتبنى فى دمياط ......

غنو لتوشكى ......ونسو يقولو ان مشروع توشكى دا اتعملتلو فوق 300 دراسه واثبت انه اهدار للمية وللوقت

غير انه اتعرض على السادات وتم رفضه علشان اثبت انه فاااااااااااشل واهدار للمال

ونسو يغنو للناس اللى ارضها بتنتج فعلا وهيخدوها غصب علشان يخربوها ....

غنو لوقفتو مع العرب .......ونسو سلبيته مع صدام والعراق .....نسو انه رافض فتح المعبر للفلسطنين

اللى بيموتو كل يوم سواء جوع او قتل اوهتك عرض ......

وغنو للطرق والمحاور ....ونسو يغنو ل 37 الف واحد اتقتالو عليها بمعدل كل سنه .....

غنو للصحه .....ونسو يغنو لنص المصرين اللى بيشربو ميه مش بيتعالج منها غير 20% بس

وبقى الكل عنده فيرسات وفشل كلوى وكبد وبائى .....

نسو برضو يغنو لناس لحد دلوقتى بتشرب من ترع صرف صحى .....

غنو ان الشعب اختاره..... ونسو يغنو اننا مش طيقينه .....والانتخابات كانت مزورة وكدب.....

غنو على النهضة .....واحنا كل يوم بنرجع لوره والخيبة قوية .....


ويلا سمعونى اغنيه ......بلا خيبة بلا واكسه بلا نيله ياريسنا .....




الخميس، أبريل ٢٤، ٢٠٠٨

عايزة افهم يا اسراء.....

اولا : حمدلله على السلامه
ثانيا : بعد ما سمعت اسراء على برنامج التسعين دقيقه واللى شوفته فى مدونة احمد الصباغ
حسيت انه فيه حاجه اكيد غلطت....او فيه حاجه مش مفهومة
لو زى ما اسراء قالت اتعاملت احسن معامله
دا فى راى الخاص ان كل الانظار عليها ولو لقدر الله حصلها حاجه
هيبقى رد فعل جامده
وتانى حاجه امن الدوله عايزة تبين لينا وللعالم انها عكس اللى متاخد عنها من كلام وضرب وسوء معامله
بس لو كانت نيتها كدا فعلا ليه قبضت عليها اصلا وليه ما فرجتش على بيقت المعتقلين
والناس اللى اتقلت دى معناه ايه....؟
ولما سالها الشيخ معتز انتى هتشاركى فى اضراب اربع مايو
للاسف ردت بالنفى .... جايز يكون مردود التجربه صعبه عليها ....
بس كتير حاطين امال كبير عليها .... لانها تعبتر رمز لفكر وتعبير ....حتى لو ما كانت متوقعه كدا
انا معرفش ايه احساسها بظبط ......بس بصراحه ما كنتش متوقعه منها الكلام دا ....
جايز يكون كلام فض مجالس....
بس برضو مش فاهمه.....
طب هيا ندمانه ....؟؟؟؟
طب هيا راضيه عن اللى هيا عملته .... وفخوره بيه .....؟؟؟
كنت نفسى اسالها ..... بجد نقدر نكمل ولا ناخدها من قاصرها ونكمل كتمه ...؟؟
اكيد فيه غلط....فيه ظلم ....بس مفيش استسلام
عايزة افهم....؟

الأربعاء، أبريل ٢٣، ٢٠٠٨

الدوا بقى اسرائيلى .... الحكومة بعتنا وقبضت التمن

انا قلت انهم رخصونا .....وباعونا .....

لما المرض بقى نسبه عاليه وفى فئه عمريه اقل ... هنقول قدرنا بالرغم من أن البيئة مليانه تلوث من اول الهوا

والاكل المتسرطن لحد الميه الملوثه وسببت الفشل الكلوى والكبد الوبائى ...

بس تخيل لما يبقى فى مرض ....والعلاج فى ايد اكبر عدو ليك ....

عدو على المستوى الشخصي والعربي والإسلام......

عدو كان محتل بلادنا وسبب ازمة امتنا ....وسبب فى سلب كرمتنا ....وزل شعبنا ... وعبوديه حكمنا ليهم...

تخيلو لما الحكومة تبيع شركات الادويه لشركات اسرائليه وشركات امريكيه....

تخيلو لما يبقى مصير الملايين فى أيد عدو بيقتل فينا كل يوم ....

اسم النبى حرصه وصاينه وزير الصحه....طلع قرار بعدم تحليل منتجات الشركات

اللى بتسجل أدويتها إلا بعد التسجيل أل أيه علشان تسهيل الإجراء....


انا كنت قرات من فتره غزو الامريكان للدوا فى مصر وعلى الاساس دى اتباعت شركة امون

بس ان اسمع ان شركات اردنيه مدعمه من شركات يهوديه اسرائليه

ودخول شركة تيفا الاسرائليه للسوق فى مصر... وغيرها من نفوذ اسرائيلى وامريكى

وبيع شركات ادويه زى( سيد) اللى ربحها السنوى 30 مليون جنيه وشركة( الكان)ربحها 60مليون جنيه

ومن غير ان يسببو اى خساره خالص...

غير ان الشركات الاجنبية دى بتعمل ضغوط على الادويه المصريه وبتشكك فى فاعليتها....

نفهم لما شركات اسرائليه وامريكيه للادويه تتحكم فى حياتنا ....

انا عارفه ان العمر واحد وفاهمه اللى هيتقال كله....

دا علشان القمح ....اللى بنستورده من امريكا ...وكانت السبب فى سعره عالى ...حصل ازمة العيش


امال لو كان الدوا..... وايه اللى ضمنا ان الدوا هيكون سليم اصلا ... ومانكونش حقل تجارب ليهم ...

سمعنا كتير ان وزارة الصحه جابت ادويه من بره وطلعة فاسدة ....ومفعولها منتهى ...

ايه هيكون قلبهم علينا يعنى ... طبعا استحاله...

بلاش دا ...فرضنا ان حصلت مشكله وقامت حرب .... ولا الست امريكا غضبت علينا

هيكون موقفنا ايه ...؟

زل ....وضعف ....وموت ...موت ...موت ....

واستحاله طبعا هيكون بنفس السعر ....وطبعا هتزود فى السعر براحتها ....والمرضى الغلابة يولعو...


ومن ناحيه تانيه .....هيساعد زياده الغش فى الدوا ....وطبعا الناس هتشتريه لو سعره اقل..

مهيا كدا موته .......وكدا برضو موته...

بلاش دا ....ليه نحط رقبتنا فى ايدهم ....ليه نخليهم يتحكمو فينا وفى حياتنا....

هيا الحكومة دى ...حكومة وطن وشعب

ولا حكومة ..... عبد ....وزل ....

ياناس ....مفيش حكومة فى الدنيا .... تخلى حد يتحكم فى مورد مهم واساسى زى الدوا ...

ودى مش اسماها سياسة ....دا غباء .....وخيانه .... ويلعن ابو دى سياسه اللى مدخلينها فى كل حاجة...

هيا حكومة خاينه .......خاينه ......وباعتنا ....

كانت سبب فى المرض ....وبقت سبب فى الموت ....

هنستنى لحد امتة,,,,,,,,؟؟؟؟







الثلاثاء، أبريل ٢٢، ٢٠٠٨

مليارات بتتصرف علشان قتلنا ....مش لحمايتنا وامننا....

وزارة الدخليه... ميزانيتها تسعه مليار جنيه ....

السنه اللى فاتت طلبت زياد ...مليار و 180 مليون جنيه ....

السنه دى بطالب بزيادة 364مليون جنيه ( دستور)....او....340 مليون جنيه (البديل)....

بصرف النظر ...لسبب طلبها للزياده دى ....سواء كانت عايزة تجهز اماكن للمحافظتين الجداد

او تاثرها اسم البنى حارصهم بزياده فى الاسعار.....

اللى نفهمو من كدا ...ان الحكومة مش فى نيتها تصلح او تغير الوضع الحالى للاحسن...

او تشوف طلبات الشعب وتغيرها ....

او هيا اصلا مش شايفه انه فيه حاجه غلط .....وكلو زى الفل ...وعايشين فى رخاء ...

واحنا اللى مش وش نعمه... وملناش حق ان يكون عندنا ضغط ولا هنتفرس...


خلاص يا جماعه ...الحكومة بقت كل همها... ازاى تخرب البلد....ازاى تسرقها...

ازاى تطفش فينا ...ازاى تنفض لينا ...ازاى تبيع فينا ....

وبرضو كل شغالها الشاغل ...تبنى فى سجون ومعتقلات ....ازاى تدمر الشباب

وتنوع وتفنن فى انواع التعذيب( قرات مره ان مصر فيها احسن القيادات الفنيه

على مستوى دولى متخصصين فى اساليب التعذيب .....)

ازاى تخلى الشعب فى جهل وغياب ثقافى ...من خلال احباطة وتدميره للمثقفين
والادباء ومصادرت الكتب ...وضعف دور الاحزاب....


اصبح القتل شئ عادى وطبيعى ....سواء اللى اتقتلو على الحدود من اسرائيل

ولا غيرها .....ولا قتل عسكرى الامن للاطفال ....

بتفكر تشترى اسلحه ....علشان تقتلنا بيها وكاننا مش من اهل البلد دى ....ولا دى بلدنا...

ولا لينا حق الحياه بكرامه انسان

فكرت برضو فى حل مؤقت وهيا تزويد عساكرها وسلاحها...

ومفكرتش انها تحط حلول تدوم ...وهيا تحل اصل المشكل ....

طب ما بدل تصرف مليارات الفلوس دى.... على قتل وضرب واعتقال ...

تصرفها على حياه وصحه وتعليم وكرام ...وعلى رغيف العيش...

ليه تفكيرها بقى اسود ....وحلها بقى موت ....

ليه بقت مهمتها الاساسيه ازاى تحافظ على انها ازاى تدوم (رغم الدوام لله وحده)

وهيا اصلا مهمتها ازاى شعب يعيش ...وكرامة وطن تصان ....وأمه تنهض.....

وبالرغم الغيظ اللى انا فيه ....الا انى حاسه بامل ونصر قريب ان اشاء الله ....

علشان الحكومة بكدا ...بينت حاجتين مهمين جدا على الاقل بالنسبة ليا ....

بينت ضعفها الشديد ...بصرف النظر عن السلاح والتمويل الكبير دا ....

علشان عمر السلاح ما كان قوه الا للضعيف..... كان ديما السلاح للامن(للشعب) وللحمايه (للوطن).....

او سلاح للعداء ....واحنا عمرنا ما كنا اعداء لبلدنا .... مش للظلم ....

وتانى حاجه الحكومة عندها يقين انها مش هدوم وفيه قوة بتذيد وشعب فاق وحق لازم هيترد

فكانت لاز م تدارى ضعفها بكدا ....

فان شاء الله خير....مهما حصل .... وحقنا هيرجع لينا ....

ولا ايه يا جماعتنا ......؟؟؟؟؟؟





محافظ سوهاج طظ فى كلامك انت كمان .....

دا أكيد اسمه غباء وحموريه .... كنت قلت أن محافظة سوهاج عايزة

تستولى على 3000 فدان من يجى 500 اسره عاشو يجى 20 سنه يستصلحوا فيها ...

وبعد كدا تضرب فى دماغهم يعملوا مطار بالرغم أن حكايه المطار

دى كانوا عايزين يعملوه من يجى عشر سنين

وبعد ما حددو الأرض اللي هيقوم عليه المطار شوية ناس من الكبار استولو عليها وعملو عليها مبانى عقاريه

يعنى كان من عشر سنين كان هيكون فيه مطار ...... المهم نتيجة للهجس دا كلوه أيه ....؟

تشريد 500 اسره ونقلهم لأراضى تانيه يبدأو من جديد بالرغم أن أتقال

عليها أنها ماتنفع زراعه علشان ارض صخريه ....ومافيش ابار

هدم محطة صرف صحى اتكلفت 70 مليون جنيه علشان الارض اللى عليه يكملو بيها المطار ....

.بالرغم ان اشتغل بنسبه 70%بس من المشروعه كله والباقى واقف ....

وبعدين اعادة بناؤه جنب قريه تانيه ....

دا اسموه سرقه ووساخه وصياعه على حق .....بس علينا احنا...

يعنى لو فرضنا كان فى مطار هيتعمل او مجرد فكره ونيه انهم هيتنيلو يعملو مطار فى المكان دا من عشر سنين

ليه عملو مشروع الصرف الصحى .... فى المكان دا..... اكيد معمول قريب ...

برضو لو فرضنا ان المكان دا المقرر ليه ضيعو 10 سنيين من مجهود وفلوس الناس يصرفوها على الارض


لو فرضنا انهم هيعملو مشروع صرف صحى جديد ....احسبوها باه ضاع 70 مليون طظ فى الهوا

الناس هتعمل ببيه(حمام) فين لحد ما يتعمل مشروع تانى ......

انا لو مكانهم يروح يعملوها قدام مبنى المحافظ..... اه والله ....

او يعبو الببيه فى اكياس وكل يوم الناس تحدفها فى واجهة المبنى .....( قرف للركب )

المهم استحاله هيبقى بنفس التكلفه ..... ونرجع تانى للاصل وهيا سرقه واهدار المال ....

بس نفسى باه افهم ليه ما يخدو اراضى تانيه ويسيبو دى ......سياسة ...ما يلعن ابو دى سياسه.....

انتو اذكياء .....والناس كلها مش بتفهم ......دا لو المحافظ نزل بنفسه وشاف حمار ماشى فى الشارع

وساله عن رايه فى الحكايه دى ..... مش هيرد عليه وهيعمله ببية طبعا ,....

يعنى الحكايه هجس وقلة ادب ....ومسخره ان عشرين سنه وسبعين مليون واربعين الف فدان

وسنين من عمر وصحه ناس وباعو اللى قدمهم واللى وراهم ....تروح علشان مطار .... ما طظ

حتى لو كان من رايهم انهم لو سمعوا الكلام ويغيرو البنيه التحتيه للشوارع والطرق .....

ما بدل تضيعو فلوس على هتتبنى عن تهجير الناس دى ومشروع الصرف الصحى ....

اصرفوها على دا. التحتيه والزفتيه ....واعملو دا بدل الخراب لدا كلو

وبعدين ليه دا كلو ....قلبكم على فلوس البلد ...دافعين حاجه من جيب اهليكم ....ما انتم واكلنها ولعه

ولا هيا تناحه وعند .... ولا علشان الناس نجحت فى زراعه الارض

فى حين ان مشاريع الدوله فى استصلاح الاراضى فاشله وماطلعتش خياره حتى .....

وبالرغم من ان تلات مزارعين اعتقلو من الامن ....

وعشرين اتقبض عليهم لما اعترضو على وضع حجر الاساس بتاع المطار فى ارضيهم ....

والمحافظ مستنيى محصول القمح ينضم ....وهيبدا فى تنفيذ المشروع فعلا ......

لا بصراح عاطفى ....

على فكره الناس اصحاب الاراضى دى عاملين اعتصام بيتوعدو بالموت علشان ارضيهم ....دا لو خسرو القضية

على العموم احنا عارفين يعنى ايه صعيدى ....راجل ...راجل وبحق يعرف يحافظ على حقو

الله فى سما لو حقكم اتاخد وماقدرتوش تحافظو عليه ...انا بقلكم تروح تحلقو شنبكم و تلبسو طرح انتم كمان ....

ومش هقول انتم رجاله ....لالا انتم نسوان ..... فالاحسن خليكم رجاله....

لما اشوف ......!!!!!!!!!







الاثنين، أبريل ٢١، ٢٠٠٨

مفيش حاكم عربى اسمه رااااااااااااجل....

طبعا اكيد معظم الناس شافت اوبريت الضمير العربى ...

شافت ازاى اطفال اتقتلت....

شوفت ستات اضربت واتهانت...

شوفت كلب بيهجم على ست وفية عساكر يهود واقفين ....

اغتصاب ما فرق بيت ست او راجل ...

فى هدم بيوت....

فيه رجاله رجولته اتهانت ....

شوفت رجاله عرب بيضربو بالقلم وبالرجل وبالجزم....

شوفت الفلسطنين بقتلو فى بعض وكمان العراقين ولبنان ....
شوفت فتنه فى كل مكان ....

شوفت دموع طفل وطفلة ....دموع ام وست عجوز .....دموع شاب وراجل عجوز

شوفت موت ما فرق بين طفل ولا ست ولا شاب ولا عجوز...

شوفت زل .... شوفت حسره ...شوفت الم ووجع ...

شوفت بلادنا بتحتل ...وشوفتها مدمره ...

وبرضو شوفت مغتصبى الحكومات .....ملهمش اى شرف نطلق عليهم زعماء امتنا .....

حكام عار علينا .....رخصونا .... باعونا ....خانونا....

شوفتهم بيسلمو وحاطين اديهم فى ايد ولاد الكلب والابتسامه ما تفارق وشهم...
باعونا وقبضو التمن .....

لو بادي كنت جبت كل واحد فيهم ....وخليته يحس بمعنى الالم....

يضرب قلم ....يداس بالجزمة....يجوع ...

فين ضاميرهم وسايبين شعوب حياتهم دمار وموت والم .....

لو مش رجاله ...سيبو الحكم للرجاله ....

مش خايفين من ربنا .......

حسبنا الله ونعم الوكيل فى كل حاكم عربى ......

اضراب الاردن كمااااااااااااااااااااان...


لما تشوفو حاجة زى دى ....تحسو بايه ....؟؟؟؟
اكيد نفس اللى انا حساه....فخر ...فرحه .... اكيد هننتصر...
شباب الاردن برضو هيعملو اضراب ...تضامن مع مصر ...وبرضو علشان يحسنو الوضع عندهم...
نفهم من كدا ايه ...؟
نفهم ان الحركة ما بقت محليه ....او مصريه فقط ....
لا دى بقت الدول العربية بتتحرك ....
الكل حاسس بظلم ..... عارف ان حقه رايح ....
فكان لازم نفكر ... نعبر ....نتكلم .....نتحرك ....نطالب بحقوقنا ....
لالالا...قصدى لازم ناخد حقنا .....
لو ما كنش بالذوق يبقى بالعافيه ....
لو ماكنش بالسلم ....يبقى بالدم ....
نفهم ان الحكام العرب مهما رفضو خلع الطرح ... علشان يبقو رجاله ... ويفوقو ويعملو حاجه للامه...
هيبقى جيل الشباب هو اللى هيعمل ان شا ءالله ...
دى خطوه تجاه اتحاد عربى ....حتى لو كنت بحلم ...بس ان شاء الله هيبقى حقيقة ...
احنا قلنا بدانا ....واستحاله هتبقى النهايه ...
فمين اللى بعد كداااااااااااااا ....يا عرب ...

الأحد، أبريل ٢٠، ٢٠٠٨

حضرت اللواه....طظ فى كلام حضرتك

النهاردة فى برنامج الحقيقة على دريم كان فيه اسره احمد مبروك اللي فى تلته اعدادى

و أتقتل برصاص الامن

وهو فى تالت دور واقف فى البلكونة

المهم الأستاذ وائل كان بيكلم اللواه رئيس لجنه الأمن والبدنجان فى مجلس الشعب

بصراحة استفزني اووووووووى واه لو كنت اعرف ارد عليه وأكون معاهم

الأستاذ بناء عن الكلام اللي دار فى الحلقة لما قالو انه شهيد .....قال دول مش شهداء ولا حاجة

ليه كنت المفتى يا خويا .... ولا الإيمان خر منك لدرجه انك عارفه هو ميت شهيد ولا ميت دلع

وكمان كان معترض ليه طالع فى بلكونته وهو فى الدور التالت يتفرج

تناحت أيه دى ....؟ أنت مالك .... لما تبقو تطلعوا قانون منع الوقوف فى البلكونات ...

ولا اقلك قانون بلاش بلكونات خالص..... ابقى اتكلم يا خويا... بلاش هوا ...كتر كتمت حضرتك ...

والفرسه اللي بجد باه ...لما سأله الأستاذ وائل وقلو لو ابنك مات كدا هتعمل أيه ...؟

رد رد الله فى سماه لو كان قدامى مش عارفه كنت عملت فيه ايه ؟؟؟ رد الأب الحنين

وقال يروح فى ستين دهيه .....ولا راع مشاعر الأب واهل اللي أتقتل دا ...

آه نسيت أن باه فى ناس كتير معندهاش دم أصلا... هيبقى فيها مشاعر....

المهم بالرغم من كلام الناس والأهل والجيران أن الرصاص جه من عساكر الأمن ...

أن فضل الحاج هو لواه برضو حاجه سابقة كدا اللي قعد معاهم فى البرنامج يشكك ...

ويؤكد نزاهة التحقيق ...

وفية طب شرعى وبدنجان وبحث جنائى ممكن يعرفو ا نوع الرصاص ومنين اللى ضربوا

وال إيه يحققوا ....بجد بجد اقتنعت اطمنت ....

بلا واكسه الله يخليكم.....وانزلو من على ودنا كدا ....

بس اللى فهمتو من الانطباع اللى بان من كلام الباشا ....أن دا حق الأمن فى انه يقتل الناس وهما فى

البلكونات فى الظروف اللى زى دى ...... شوفتو المصيبة ....دمه ثكر....

أمال لما أن شاء الله مصر كلها لما تستجيب لدعوه إضراب 4 مايو و اللى من ضمن الأفكار اللي دعو ليها

للابتعاد عن الاحتكاك من وش الأمن أن الناس تهتف أو ترفع شعارات بطالب بحقوقها
وهما فى البيوت والبلكونات ....

يبقى معنى كلامه أيه ...؟ بيسبق مثلا .... بيخوفنا ...

ولا بيفرض علينا أمر ابن جزمة معفن ..... علشان لو حصل يبقى عادى من حقهم ......

لا صحصلنا كدا ...وفوق من الدور ...وبلاش اللون دا ...

سكوت ....شبعنا سكووووووت .... وهنطلع صوت ......وتوووووووووت

خوف ...بطلنا خوف بالجامد اوى .....

موت ...مستعدين ....دا لو ماكانش الناس ميته أصلا ....

بس أقول لسياده اللواء باه ...بص ياباشا ....

أن شاء الله هيجى يوم هنشوفك فى البلكونة ...فاهمنى يا معلم

وهنسمع برضو ملايين هيقولو فى ستيييييييييييييين دهيه للكل.......

وطظ فى كلام حضرتك .....

ملحوظة
اللى حابب يتفرج على الحلقة
هتتعاد الاحد العصر الساعه تقريبا الساعه أربعه ...

بيتى ....سما ،بحر ،جبل

مكان بعيد مجرد بحر وسما ...

وبيت صغير على جبل عالى ...

بحر نظرتي ليه حب وغموض ...

سقوطي فيه صعود ...

مهما تركت الكلمات ....

فتجد الاحتواء...

أحب الأعماق...

واعشق الظلام...

تتسرب المياه داخلي....

فتغمرني غمر .....

فلا أريد الخروج .....




لاقائى بالسما غرام....

فهيا زادي من الكبرياء....

واشتياقى للمطر تمرد....


و انتظاربحب همس الرياح...




أتمنى ثباتا مثل الجبل....

وشموخا كلما زاد علوا ....

الصعود له شاق انتحار ....

والنزول منه إجبار...

كلما سقط منه حجرا....

سقط منى هما....


وبيتي .....


صبغته بلون الشمس....

ونوافذه هيا الحياه....

وبابي هو كياني.....

فأيقنت بهذا أنه حلمى ...

الخميس، أبريل ١٧، ٢٠٠٨

تعليق اتنين .....تناااقض

المره دى شايفه فى تناقض ....يلا بسم الله
***كل زوجه تتهم زوجها بأنة انانى وكل زوج أيضا....

_ أنت عارف أن جوزها انانى برضو.... أما صدفه غريبة

***كيف نطلب الكمال فى المرأة مع أننا لسنا كذلك...

يعنى أنت مش كامل ... أنا مش هنطق ...افهموها باه

*** مهمة المراه أن تحسن أليها فتنسى ...وان تسئ ألينا فلا ننسى ...

نيست من تعبها مع العيال ياعينى والطبيخ
اما انتو دا اسمه حقد باه وسواد


****نجح العلماء فى علاج كل الأمراض ....الا الزواج

استغفر الله العظيم بتقول على حاجه حللها ربنا مرض ......عليكم به

****كل المصايب تقع فى البيت ولذلك يهرب الأزواج

وأول مصيبه هما .... الحمد لله خدو الشر وطفشو

****اذا خفت من صديقك مرة فيجب أن تخاف من صديقة زوجتك ألف مرة

ليه من حلوته ...وبعدين نعتبر دى نصيحه بناء عن تجربة ولا أيه ...؟ هه

***فتش عن المراة وراء زوجتك

ربنا يشفى... دا وقت استغماية

****كل الناس ينصحون المراة كيف تكون زوجه ولا احد ينصح الرجل

ينصحوه بايه يكون زوجه برضو ...ودا من ايه باه ...؟


****الممثلات يتحدثن فى التلفزيون عن احدث الافلام واخر الازواج

يعملو ايه ما ......بيكرهم الملل والخنقة ....كتر خيرهم ....وبعدين بفلوسها تعمل اللى هيا عايزاه

****اعطنى عنوان او اسم رجل فى هذا القرن او القرن الماضى ليس نادما على انه تزوج ...

عم عبده جنب البقال اللى على اول الشارع....ينفع

*****محاولة لارضاء زوجتك تشبة محاولتك اطفاء المصباح الكهربى بالنفخ فيه ...

ليه انت فاكره مصباح لمبة جاز ....وايه مصباح دى .....اخر مرة سمعتها من ايام مصباح علاء الدين

**** ليس سؤالا شخصيا ولا تافها ولا فلسفيا ...بالضبط مافائدة المراه ...؟

كمان بتعترض على حكمة ربنا ...بس على الاقل خلفت حضرتك ... مهيش فكاكة يعنى

*****ان تتزوج اربعا هذا كثير ...ان تتزوج واحده ها كثيرجداا ...

ليه هو هيبقى اللى بيجوز دا احول ولا ايه ....؟ فكرو ان الاربعه اقل من واحد

بح خلاص






الأربعاء، أبريل ١٦، ٢٠٠٨

اسراء اختفت ليه ..ولا يكون اتخطفت ...؟؟



فى ايه اللى بيحصل بظبط....؟


جه اتصال فى العاشره مساءا من والدة اسراء عبد الفتاح انهم مش لاقين اسراء واختفت


يعنى ايه اسراء تختفى بعد طلوعها من السجن...


جايز تكون راحه فسحه من وراها اهلها ...


ولا زهايمر ....


لا طبعا لا الوقت ولا الظروف مناسبين نهائى ...


بس دا اكيد مش طبيعى ...


وبرضو استحاله يكون صدفة ....


يبقى راحت فين ....


قصدى مين اللى خطفها ....او بمعنى اصح مين اللى ورا اختفائها الغريب دا


دى حكايه مش يتسكت عليها نهائى ....


وليه اصلا تختفى لا هيا عامله جريمة والحمد لله اخدت برائة وافراج....


حد يفهمنا .....


الطرف الوحيد اللى ليه مصلحه فى الموضوع دا ...هيا الحكومة...


خلاص الحكايه


ولا انا غلطانه...


دى تبقى مسخره....


احنا عايزين نعرف راحت فين....

بقت سايبة و لا ايه...؟

ال وعد حسنى ال .....ربنا يصبرنى

لاحولا ولا قوة الا بالله حرام فعلا اللي بيحصل فى فلسطين اللي بقى وضعهم صعب جدا....

لدرجه أنهم بينقلو الناس المتصابه على عربيات كارو علشان مفيش بنزين للعربيات

فما بالكم باه بالاكل والادوية والحاجات الأساسية ....تبقى ازاى

واصبحت حياتهم صعبه جدا....

بس بجد انتم عبط ....معلشى أنا مش بشتم بغرض الشتيمه والسلام ...حاشة لله ...

أنما بغرض أفوقهم من الأحلام اللي عايشين فيها ...

علشان أنا ليا أصحاب من فلسطين وأصدقاء عيلة كمان... غالين عليا جداااااااا ....

وما أحب أشوفهم فى الوضع دا ...

بس لما بقول عبط بقولها علشان لما اقرأ أن حصل مظاهرات وحماس بطالب رسميا

حسنى مبارك بتنفيذ وعده.... أن غزة مش هتشوف الجوع تانى

يبقى دا اسمه أيه ...؟ مش عبط منكم ولا أنا غلطانة...؟

دا حتى اللى مايشوفش من الغربال يبقى أعمى ....وعد أيه اللي انتم وخدينه من حسنى ....

مش لما يفلح جوا فى البلد يبقى يفلح بره .....

لما يبقى ياكل جوه يبقى يروح يشوف ظروفكم .....انا عارفه انى كلامى زى الطوب

وعارفه ان مصر هيا المنفذ الوحيد ليكم ... واننا اخوه ولازم نقف جنبكم

بس محبش اعمل زى ناس واعمل البحر طحينة ...
.
مهو بعت اسرئيل الغاز بدل منكم .... وبرضو الرز ... بلاش دا

كان عمل حاجه فى الناس اللى بتتقتل على الحدود... ولا كانى حاجه حصلت ....

دا انتم بالرغم من الظروف اللى انتم فيها .....وربنا ارحم مننا بكتير ....

دا الناس هنا بتموت علشان رغيف عيش.... وانتم بتموتو علشان ارضكم وبلدكم ....

انتو اى نعم الحمير غاليه عندكم لما وصل الحمار ب 600 دولا ودا علشان تركبوه بدل للبنزين

أنما فى مصر باه بتدبح عندنا علشان الأكل ...
.
يبقى انتم مستنين وعد ايه بس...؟ فوقو كدا وصحصحوا....

محدش هيجيب حقكم الا انتو وبس..... لا تدورو على حسنى .....ولا على حسنيه حتى...

بس على العموم ربنا يخيب ظنى ويعمل حاجه فعلا .... ويطلع اد وعدو...

وبعدين ما تنتظرو من ريسنا حاجه اليومين دول مش فاضى والله بيرتب لحفلة عيد ميلادة .....

كل سنه وانت طيب يا كبييييييييير


عمال غزل باقى مصر اضربو برضو ...احسن

احنا قلنا ايه على اسم النبى حرصة رئيس الوزراء لما راح المحله
وفرحان ان صرف للعمال خمستاشر يوم مكافئة ...قلنا هو عايز يعمل تفرقه
وعمال المحله دول مصرين واحنا من موزنبيق
وبالرغم من كدا قلنا دول اهلينا واى شئ يفرحهم كانه فرح لينا برضو ....
المهم من يومين وحصل اضراب لباقى عمال مصانع الغزل فى مصر(وخاصة فى شركة وبريات سمنود)
وطالبين انهم يتساو ب عمال غزل المحله ....
بالرغم انه طلب غبى برضو ....كانو يروحو يسالو عمال المحله عملو ايه بمكافئه ولا جابو بيها ايه بلا خيبة ...
يلا احسن شوفت حلك للمشاكل يا نضيف ......
حسيت بطولك ...قصدى بانجازاتك....
يلا روح هز طولك كدا بالمرة وروح اديهم شهر الارباح وخمستاشر يوم مكافئة ....
ولا علشان مش هتعمل هتروح تقول عليهم دول بلطجية وتافلمو علينا برضو ....
بلا خيبة ... الله يحرئكم زى ما حرقتو البلد ....

الثلاثاء، أبريل ١٥، ٢٠٠٨

مبروك

الحمد لله النائب العام افرج عن اسراء عبد الفتاح
الف الف مبروك عقبال الباقى يارب

وربنا خيبه

مفتاح الكعبه اتباع ب تمنتاشر مليون دولا فى مزاد بلندن
واللى اشتراه مجهول
ايه اللى وصل مفتاح الكعبه لانه يتباع فى مزاد فى لندن ...
دا يعتبررمز دينى للمسلمين كلهم ....
مش فاهمه ايه اللى بيحصل الا انه يعتبر خيبة ....
فى حد هيبقى قيمة المفتاح عنده اكبر من قيمته الدينيه عندنا .....؟
مش عارفه اقول ايه بصراحه...
غير حسبنا الله ونعم الوكيل...

اضرااب اربعه ابريل



يوم 4 ابريل انجبت البشرية للعالم اجمع وللمصرية بالخصوصية وكانت خصوصية مهببه

ال مين صحيح اللى جه فى اليوم دا .......

مش فاكره...ومش عايزة افتكر لسبب بسيط جدا.... انه مش مهم .. طظ

بس اللى فكراه طبعا واكيد ولابد وان شاء الله هيحصل ....هو اضراب 4 ابريل ومهم جدا لكل واحد محترم عايش
فى البلد دى

المهم قرات مقاله عن اضراب 4 ابريل فى

جريدة البديل .....

وضحلى اد ايه بقى عندنا فكر وثقافة وقبل دا كله احترام لذاتنا ....

والكل نادى باضراااااااااااب سلمى ...


سواء الناس اللى تقعد فى بيوتها او النا س اللى تشترك فى المظاهرات المحترمه

وانا متاكده انها هتنجح ان شا ءالله ... ليه ...؟

هما نادو اننا دعوة لمقاطعة «اللحوم والدجاج والمترو»....وكتابة الشعارات علي العملات الورقية

دا انا كدا كدا بطلتها اصلا من ساعة ما سمعت عن الحيمر اللى بتدبح الله يقرفهم ....



بس بصراحه انا ضحكت اوى من تعليق الناس على الخبر...

زى مثلا

بواسطة على حسان,

عودتنا الحكومة على القرارات العصبية والبوليسية ما هو رأى القانون فى كل ممن يلبس ملابس سوداء يوم 4 مايو

هل يعاقب قانونا وما رأى شيخ الأزهر فى ذلك...طبعا هيقول حرام



بجد استنتاج جامد جدا ....ما هيا الحكومة معودانا مش على القرارات العصيبة لا عودتنا على الهيافه والهبل ....

بس عادى البسو اسود سوريه علشان تبقى عندنا حجه قوية ضدهم





بواسطة أبوشادي,

وللحرية احلمراء باب بكل يد مضرجة يدق

حد يفهمنى دى

محمد العربى ...

حرام عليكم هاانجيب هدوم سودة منين انت هتفأروا علينا ليه ।انا بتشاءم من الملابس السوداء .... ينفع أزرق

ورد عليه الاخ اللى بعدو




الأخ إلي بيتشاءم من الملابس السودة، أو معندهوش، مفيش مانع يخليها زرقا أو منيلة بنيلة في يوم ميلاده الثمانين।


انا باه بقلهم البسو اسود......... وخلى شغل الازرق دا للحكومة





بواسطة على الدين الأشأم,

لأ ياعم انا خايف

ايه المرجله دى كله .... هو مبارك اسقط عليك ولا ايه...؟



احمد عباس

صدقوني واللهي مفيش اسود واسوء من ده يوم يوم ميلاد حسني مبارك لابد من لبس السواد والطم علي الخدود كمان

لالالا حرام لطم الخدود ....بس ممكن توزعو قرص بعجوة ...





عبيدة,

يا ريت نعلق شعارات مكتوب عليها أبيض يا ورد بعد كدة أسود يا مبارك



موااااااااااافقه بس حرام نجيب الورد فى الموقف دا ... ممكن نغيرها ابيض يابدنجان ( بتاع المحشى )

نادية, محرمناش من حاجة {بطالة - فساد - امراض - شهداء طوابير عيش} الجمايل متتنساش

فاضل حاجة واحده بس .... نتحرم منه سخسيا (شخصيا )... قولو ااااااااااااااامين

محمد الباشا,

حتى القماش الاسود هيغلى علشان الاغنيا هيشترو ويحتكرووالناس مش هتلاقي هدوم تلبسها في المياتم



ياعم خليك متفائل ... جيب باتنين جنيه صابغه سوده وسودها عليه ...الجيش بيقلك اتصرف



مصرية جزينة,

كنت بحب يوم 4 مايو جدا لانه عيد ميلاد ابنى البكرى ، لكنى للاسف اصبحت اكرهه جدا لانه يوم نتذكر فيه

الديكتاتورية والقمع وحكم لايعلم الا الله متى ينتهى ... بس ربنا كبير



ونبى انا خايفه تيجى فى يوم تكرهى ابنك .... ربنا يسترها

بس ايه رايك نكتب على يافطه اسم مبارك ونعلقها فى رقبه ونعدمة.... ويكون راح شهيد المصرين

محدش قالك تخلفى فى اليوم دا ....



يلا ياجماعه قول على افكار تانيه ...
ليوم الدفنه دا مش الميلاد ...









الاثنين، أبريل ١٤، ٢٠٠٨

سياسة التزهيق لحدالتطفيش

النهارده وفى الصفحه الاولى فى الدستور اشوف خبر بيقول

( هروب مؤلف كتاب "علشان متنضربش على قفاك" الى امريكا بعد مطاردات امنيه)

هو ايه اللى حصل لدا كلو علشان نزل كتاب ...

وبيقول ان وزارة الداخليه توحشت وبقى اسهل حاجه ليها علشان تتخلص من خصومها لاما الاعتقال لاما القتل

فالحل الوحيد اللى كان قدامه انه يروح لامريكا ....ينفد بجلده....

بعد ما ساب مراتة واولادة الخمسه علشان كان معاه تاشيرة قديمة لامريكا....
وبيناشد جميع اصدقائة وقرائه ان ميعتبرهوش هارب ودا نتيجة للظروف اللى قابلتة ...

بس دا نفهم منه ايه بظبط ...؟

ان الاستا ذ عمر كان ظابط يعنى عارف اساليب اللى بيقومو بيها فى الاعتقالات واصبح محامى يعنى عارف

القوانين اللى بتضمن ياخد حقه وبالرغم من كدا كان الحل الوحيد اللى قدامه يسيب حقه وبلده ويروح لامريكا ...

شوفو باه قابله اد ايه من اضطهاد وتهديدات...

دا بيدل على مدى الظلم والقهر اللى اصبحنا فيه ...

ولا مدى القوة المتمثله فى حاجتين لاما اعتقال وطبعا بيقابله فى الاعتقال اهانه وضرب تغذيب...

ولا يخدوها من قصرها ويقتلو على طول ...

ايه البلطجه دى ...؟

مش عارفين نعيش حياه طبيعيه فى بلدنا ...

ماشين على سياسة التزهيق لحد التطفيش ...ولا ايه؟

لاما نرضخ ونجوع ...لاما نطفش من بلدنا ....لاما نتقتل ونعتقل ....

ايه الحل يعنى فى الهبل اللى بيحصل دا ...؟

السبت، أبريل ١٢، ٢٠٠٨

انهم لا يعجزونك ياااااااااا الله ...


دا اسمه ايه ...؟
طبعا حرق دم من الحكومة المعفنة ....
دا احمد عنده ستاشر سنة كان جى من الدرس تانى يوم الاضراب وراجع للبيت وحاول يتجنب المتظاهرين
الامن مسكوة هرسوه لحد ما جاله نزيف داخلى فى البطن والصدر وراقد فى المستشفى......
وعلشان مخ ام الحكومة الزباله وان شاء الله يولع بجاز وسخ مش مكفيهم دا لاء راحو مكلبشينه فى السرير
ال ايه علشان مايهربش....
تفكير ايه الوسخ دا ....
بصراحه من غيظى مش عارفه اعمل ايه ....؟ الشتيمه بقت انضف منهم .....
خلاص مفيش رحمه ولا انسانية ....زنبة ايه احمد يضرب وينزف وكمان مش مرتاح فى نومتة...
بصراحه حاسه بعجز كبير ....
حد يقلى اعمل ايه علشان متنقطش ولا اتفرس ..
استحاله يكون دا الطبيعى ...واستحاله هنرضى ونطاطى ليهم ....
واستحاله يكون دا هيخوفنا .....
بس استحاله برضو اننا لما نشوف دا ما نتهزش من جوانا ....والله العظيم حرام ..
حسبنا الله ونعم الوكيل فيهم ...
انهم لا يعجزونك يا الله ...

الجمعة، أبريل ١١، ٢٠٠٨

ايه الهيافة دى ....؟


احنا متفقين ان فيه سرقه غباء تخلف ...صح ...انما نلاقى قمة الهيافه والهبل ...دا يعنى حاجة جديده شويه

من يجى عشرة ايام تقريبا او اقل ...سمعت عن كتاب اسمه (علشان متنضربش على قفاك)...

صاحب الكتاب اسمه عمر عفيفى ودا كان ظابط سابق فساب الميرى واستقال وراح اشتغل محامى ....

وزى اى واحد محترم من البلد دى وفعلا مصرى .... تقريبا فلما شاف الحاله بتاعت الاعتقالات

ولا البدنجان دا ...واى ظابط يجرك على السجن والمواقف اللى زى دى ...

وطبعا علشان كتير منا ما يعرف القانون كويس ...فراح كتر خيره عمل كتاب بسيط بالغه العاميه تعرفنا ازاى

نتصرف فى المواقف اللى زى دى ونعرف اللى لينا واللى علينا ...

دا كلو كويس جداااااااااا....

واتنشر يجى اربع صفحات فى الدستور ايامها عن بعض الاسئلة ...

وبرضو جه الاستاذ عمر فى العاشره مساءا حلو كدا ...لحد دلوقتى .....

النهارده باه اشوف فى الدستور برضو والمصرى اليوم خبر بيقول ....

ان الحكومة عن طريق مباحث المصنفات تصادر الكتاب وتسحب يجى خمس تلاف نسخه من المكتبات ليه مش

عارفه ...ودا طبع لازمله حكم قضاء... وطبعا دا محصلش ... سحبو الكتاب بلطجه وفرده كدا ...

فراح الاستاذ عمر قدم بلاغ فى وزير الدخليه ومدير مباحث المصنفات الفنيه ...الى النائب العام....

يعنى ايه ....كتاب الراجل يتسحب من السوق ...هو هبل ...علشان بيعرفنا حقنا ....

دا لو كان كتاب من اياهم كان اتساب.... ولا هيا هيافه ...

مخهم مفوت ..... ال ايه يعنى الكتاب هشجعنا ولا مناسب اللى بيحصل اليومين دول ...

وبكدا هتتحل المشكله ... وربنا هبل وتخلف منهم ....

وعلى فكره الكتاب كويس وفيه معلومات حلوه وباسلوب سلس وبالعاميه يعنى مش مكلكع......

وهو عباره عن سؤال واجابه ..... دا بناء على قرات جزء اللى فى الدستور بس ان شاء الله هبقى اشتريه ...

مفيش حاجه مضمونة دلوقتى ....دا لو لقيته .... عالم تفقع فعلا .... بزمتكم مش هبل ...



الخميس، أبريل ١٠، ٢٠٠٨

حكومة خولل فعلا ...

دا نسمية استعباط ولا استهبال يعنى ...؟
ايه حكايه رئيس الوزراء عمنا نضيف ووزيرة القوة العاطلة خريجة الابتدائية ووزير الاستثمار ووزير الصحه
اللى يروحو فى الوقت دا المحله ...ويصرفو لعمال المصانع خمستاشر يوم مكافئه...
هو فى ايه ...؟ دا على اساس رايحين ينقطو فى فرح ولا ايه ...؟
ولا دى كماله الاستفزاز للناس...
ولا عايزين يعملو تفرقه باه على اساس ان عمال المحله مش تبع المصرين ...ومن موزنبيق..
ولا فاهمين انهم لما يعملو كدا هيفرحونا ويحسسونا انهم انجزوا ...وحلو المشكله ...
ولا هما فكرهم اصلا ان الاضراب كان اضراب عمال بس ومش اضراب مصر كلها ...
ولا هما حاسين انكم دافعين حاجه من جيبكم وجين يتعنتظو عليهم ويبقششوا عليهم ...
دا كلو دا من فلوسنا يا مخليل .....الا صحيح ...
مش دى المحله اللى شايلنها على دماغكم وزعقين وهيا اس المصايب...
ولا دى مكافئه على اللى حصل وتشجيعه انه يحصل اكتر .....
وبعدين انتو نزلين المحله مش خايفين على نفسكم من الاضراب ولا انتم متاكدين انه مش هيحصل حاجه
واللى حصل دا كان معروف مسبقا...
ولا يكونش شوشو ضحك عليكم وخلى مخكم يقلكم دا بكدا بترشو الناس علشان ما يشاركو فى اى اضراب تانى...
ميكونش دا صحيح ....
ولا جايز تكون رحله واحنا مش واخدين بالنا ....اصل حصلت فى مدرستنا واحنا فى الاعدادى رحله لمصانع المحله
فقلتو يلا حاجه ببلاش ...وتوووووووووووت رحله ...
ميكونش دا صحيح برضو ...ما هيا حكومة خولل فعلا...
بس مش دا برضو اكبر دليل ان الاضراب نجح هو اى نعم حقق ولو حل مؤقت دا ...
علشان عقليتهم متقدر على غير كدا ... بس برضو يعتبر مكسب لينا ...
مهما برضو مصرين ...
يلا ما اطولش عليكم دول عالم فى الطراوة ....يبقى يقابلونى هيعملو ايه فى الاضراب الجى ...

دعواتكم لاسراء ...


بجد بجد بتمنى ابقى مكانها فى اللحظة دى ..
ويارب انول الشرف دا ...
تعرفو دى مين طبعا ...!!
دى اسراء عبد الفتاح اللى دعت الى اضراب سته ابريل على موقع الفيس بوك
وهيا عضوه فى حزب الغد
بس للاسف دلوقتى معتقله وتم حبسها خمستاشر يوم على زمة القضية
وتهمتها هيا تحريض على الاضراب
اللهى يجلهم ضربه لما تشيلهم من الكرسى اللى قعدين عليه...
اللى كان السبب وخلاهم يعملو كدا ولاد الجزم...
بس
وربنا ماهى تهم ...دا شرف ليها وليا ..
ولمصر كلها ....
بس هنقول ليه لعالم عملت ازمه فى العلف من كتر اكلهم فيه بقى اخرهم يعملو علبه لبن ...
دول بهاااااااااايم ...لومؤخذه
فانشاء الله ربنا هيخرجها بالسلامه .....دعواتكم...
وحسبنا الله ونعم الوكيل فى اللى كانوا السبب فى اعتقالها ....
يارب عليكم بهم فانهم الا يعجزونك ....

الأربعاء، أبريل ٠٩، ٢٠٠٨

قصيدة طظ ...للحكومة ..

الحمد لله الانتخابات المسكره (المحليه ) خلصت ...... زى استفتاء الرئيس كدا والشورى والشعب ...فله اوى
كووووووووووووووووووووسه ...ومقوره كمااااااااااااااان
بس عادى جدا ....احنا جبل ...جيت عليها يعنى ....يلا طظظظظظظظظظظظ
لما ما اشوف اى يافطة تعرفنى مين اللى نازلين فى الانتخابات ... عادى طظ
لما الوحيد اللى اعرفوه مترشح ....حزب وطنى ...طوظين ...
لما اعرف وانا فى البيت ان انتخابته واتمضى باسمى ليه وانا كنت اصلا نايمة ...
وكل الدفاتر متقفله من غير لصالح بتوع الحزب الوطنى ....
يبقى باه لازم تسمعونى ... قصيده طظ ...للحكومة كولهاااااااااااااااااااااا
تيت تيت ...طظ
ترابتت تيت ...طظ
ااسف لصحابى للى بيقرا ( ونطقى لطظ) بجد بجد من قهرتى ....اسمى يتحط للحكومة الطين دى ...

نفسى افهم لازمتهم ايه ..؟بتوع الامن دول ...


أيه حكاية الأمن دى ... اعتقالات وضرب نار وقنابل بتاعة دموع وبدنجان ....

أنا نفسي اعرف هو الأمن دا

لازمته أيه أصلا ...؟
مش علشان يمنع حدوث اى مصيبة ...والحفاظ على الأمن ... دا دوره الرئيسى الاساسى .....

أنما فى الحالة اللي هو فيها فى المحله .... دا دوره يستنه الخراب يحصل ...وبعدين يجر ناس ويعتقلهم

فبما أن الحكومة عامله احطياطات امن جامده كدا .... ضد الإضراب على أساس انه إجرام ومش حقنا

ومنعت ناس المثقفه من المظاهرات زى ما سمعنا ..

ليه ما تمنع اللي بيحصل فى المحلة قبل ما يحصل أصلا .... ويحللوا الفلوس اللي بيخدوها .....

دا بيخلينى أفكر فى حاجه من أتنين ... (حلوة حكاية أفكر دى ...جامده صح ...اسمالله عليا )

أنها أصلا عارفه اللي دا هيحصل.. ومستنياه يحصل فعلا من البلطجية دول

علشان يشوهه صورت الإضراب أو يكون ليهم هدف خاص وهيا السرقة مستغليه الوضع ...

فالحكومة تستغل الصوره دى فى الإعلام وتخدر الناس وتحبطهم اكتر من اللي هما فيه ....

.ودا يبقى كدب وتخلف منها وضعف و تبقى مصيبة ...أن يخيل ليها أنها نجحت ...

لاما أصلا مفش حاجه اسمها امن ...ولا هيا عارفه أيه اللي هيحصل وكل اللي عملته منظره

وإظهار ضعف وغباء فى صورة قوة وذكاء ودا من نشر العساكر والعربيات...

وبعدين ليه لحد دلوقتى مبيته سوء النية وسايبة الأمن دا كله فى المحله ...

برضو هنقول لاما عارفه أن هيحصل حاجة وعندها علم مسبق بيه .... لاما عامله عرض وفرحانه بنفسها

لتستفز الناس اللي عندها ضغط لوحدها ومفروسين ... وبرضو البلطجيه يشوفو شغلهم ...

يعنى الوضع كلو غباء فيه استفزاز لمشاعر الناس ...والناس عايشه فى توتر علشان مش لاقيه

أمان .... مين اللي هيلاقى فى بلده عربيات امن مركزي (اللي زى قلتهم او بمعنى اصح ليهم مهمه واحده

فقط وهيا أنها تعتقل الناس ) ويمشى ولا يعيش فى أمان ...

ولا من غير توتر .... مركبين للناس العصبى يا عينى ......طبعا استحالة ....

فمن الأخر ..اسحبوا نفسكم كدا ...وكفاية أوى اللي حصل ... السجون أتملت ....والمستشفيات برضو

مثلا تكون حجتكم الانتخابات ...اهى برضو فنيتو .... على الرغم إنكم عارفين أن دا اللي هيحصل برضو

فانتو عايزين إيه بظبط ...؟ فتعالوا على نفسكم وفهمونا ...

الثلاثاء، أبريل ٠٨، ٢٠٠٨

رقم واحد ....تعليق

بصو طبعا معظم الناس عارفين مين الاستاذ أنيس منصور وعموده المشهور بيه فى الااهرام يوم الجمعه ...

بصراحه معظم كلامة تريقة وعدم الاعتراف بالمراءه خالص ...ولا اعتراف بفكرهها ...ولا اعتراف بشخصيتها

ووجودها ...مش عارفه ليه.... وبرضو الحياة الزوجية ...محسسنى أنها عقد ... والراجل اللي أتجوز يبقى

ارتكب اكبر خطاء فى حياته ....دا اللي وصلني ..


وعلى رأى صديق عزيز عليا جدا
.
مش كل شغلته فى الحياه ان ينقض جنس خالقه الله زى ما اتخلق


وطبعا حاجه زى دى ...غيظاني ....قلت مش هنقدر نمنعه من الكتابه على المراءه ...بس قلت انقل كلامه ...ونعلق تعليق متواضع ....على نفس شخصية الرجل اللي بيتكلم عنه ... بس الجزء الخاص بالمراءه فقط


ونبدا بسم الله ... يوم الجمعة اللي فات بيقول ...

1_ الرجل الذى يقول انه لم يخطئ قط له زوجه اخطات كثيرا ..

- مهو اللي عمره ما اخطئ دا لاما انه ملاك هابط علينا ببرشوط من السما...لاما معاق ذهنيا ..

وطبعا مش هو حد فى الاتنين ...وفعلا أول أخطاء الزوجة أنها عرفته أصلا ...



2_ الرجل يبحث عن العقل والحكمة عند زوجته .لأنة لم يستخدم لا العقل ولا الحكمة فى اختيارها .

- يبحث فين بس ...هيا صحراء ...... وبعدين هو مش استخدم العقل ولا الحكمة هيا أصلا ما كانت عنده

وكتر خيرها كسبت فيه ثواب واتجوزته ...


3_ ساءت الأحوال الاقتصادية لدرجة أن كثيرين قد أشهروا إفلاسهم والباقي عادوا إلى زوجاتهم ..


طب وهيعملو أيه ...لما يخلصوا مصروفهم ...الست تتفضح يعنى ...

الناس تقول مش عارفه تأكل جوزها ...ياخراشى ...دى تبقى فتيحه (فضيحة)


4- الزوجة التى تضحك كثير على نكت زوجها :ممثلة قديرة .

تلاقيها ياعينى قالت ليه أنت سبب بسمتى وضحكتى ...فراحت طلبه معاه هيافه وخنقها بالنكت ...تكسفه

5- كل الأزواج فى غاية الرقة واللطف مع غير زوجات الاخرين ...

ياكثوفى دا نقول عليه أيه ؟؟؟....شوطار ...رجاله قليلة الأدب

6- من عيوب زوجتك أنها لم تختار رجلا غيرك !

أوافق حضرتك ...دا لو طلع ندل ...

7- عندما يرغب رجل فى الزواج :فمن المؤكد أنها أخر رغباته !

رغبات أنهى بظبط .....؟؟ عايزين نفهم .. بس الحمد لله أنها كانت سبب للهداية


8- سألوا رجلا : أيهما تختار السجن أو الإعدام فقال : الزواج فهو الاثنان

أحنا هنتلكك ولا أيه ....بلاش نظام دا ॥ وبعدين مين أصلا هتوافق على حد سوابق ...اما والله غريبة

9- لأسباب تافهه يكون الطلاق ولأسباب أتفه كان الزواج ..

واللي بياخذ باسباب التفاهه دى هو الراجل .... أحنا مالنا باه

10- الحب :مطب والزواج :مقلب والطلاق :مهرب .

للست طبعا ..عندك حق والله .....فصدقت

11- كعكة الزفاف هى الشئ الوحيد الذى يصيبك بسوء الهضم مدى الحياه

مهو لو كان فالح كان استنضف وجاب حاجة نضيفه ....بس هنعمل ايه ..؟
ومش كدا وبس لا دا كمان شفطها كلها لوحده .....
بخل بعيد عنك



12_ أنت أذكى الناس وأعقلهم حتى تتزوج

أكمل .... لحد ما أتجوزت واحده طلعت أذكى منك ........ شكرا

12- كل خطباء المساجد ووعاظ الكنائس يهاجمون كل أنواع القمار ألا الزواج ..

دا اكيد سؤال بما تفسر ...أنا يا أستاذ ....علشان القمار حرام ...والزواج حلال ... صح

هي هي هيى ..أنا شطوره



14-لا شئ يفسد ما بين الأصدقاء إلا : الفلوس والزمن والزواج .

والله لو التلاتة دول فسدوا يبقى من فساد الشخص ذاتة ...

بس أقلكم هيا كانت باين عليها صحوبية معفنه .... متعملوش حجه باه


15- زواج الفانين مثل قزقزة اللب أذا بدأت فلن تتوقف

بدأت ...امممممممممممم ..يعنى هيا البؤ ...أمال مييييييين القفا باه ...؟؟؟ مليش دعوه

يتبع ......

وعد الريس الجديد ...زرع ...حصد ...طردا

يعنى الناس مقروفه فى عشيتها ومش لاقيه حاجه عدله ..قالو ومالو ملناش دخل من بقيت أهلنا يعنى ...

لما سياده الريس يوعد الناس اللي تكون جاده فى استصلاح الاراضى وتزرع وتنتج هيكتب الأرض دى باسمهم

قلنا حلو ... استصلحوا...وزرعوا ...وحصدوا ...

تيجى الخيبة باه ....بعد درس زرع وحصد دا ,...... قالو ليهم خرج...فى داهيه يعنى ...

مره نسمع عن اسر اعتصمت برضو علشان أرضيهم اللي فضلو يتصلحو فيها يجى 20 سنه وبعد كدا

فى سوهاج ..واذ فجاءه يقلو هنعمل مطار ...وضاق فى وشهم وما تحلا إلا الاراضى دى علشان يعملو عليها المطار... ويقلو ليهم هنديكم ارض تانية ...

طب بدل الحول دا متروح الاراضى دى واعملو مطار ولا بدنجان دا .....

برضو جم على ناس واخده فى حدود 4000 فدان واستصلحوه ...وبعد كدا بيطالبو بوعد سياده الريس

طبع سياسة التنفيض... لا والمصيبة عايز ياخدو الاراضى دى ويكملو عليها لحد 7000 فدان ويدوها لشركة

يابانية تقريبا .... حاجه تشل...وتجيب ضغط...

يعنى تخدوها من اهل البلد وتدوها لناس غريبة ...ما يلعن أبو دا استثمار ...اللي يشرد مئات الأسر

ويضيع مجهود سنين الناس عاشتها فى تعب وقرف...

ويقلو هنديهم 35 للفدان ويسيبو الارض .... قلو ما ندفع احنا المبلغ دا ...الحكومة رفضت

يعنى تعب ازيد من 20 سنه وناس مستقره ...وكمان هيدفعو فلوس ...وبرضو لاء... ضغط صح ...

هو أيه اللي بيحصل ...... طيب لما وعد سيادة الريس أتغير ...مش تدو فكره للناس علشان تعمل حسابها...

وعد الريس الجديد .... زرع ...حصد ....طرد ...نقط ...شل ...فقع ... حطو انتو الفتحه ...

اللى حصل ما حد يقلل منه ..

شوفتو اللى حصل فى المحله طبعا .... ومازال ...طبعا
ورغم التعتيم التام فى القنوات حتى الفضائيات ..... والاشاره ليها بتقارير ...بالرغم ان قلت لنفسى دا الموضوع دا
هياخد ليه شهر على الاقل وايه...؟ هيبقى الموضوع الرئيسى لكل البرامج... ولكن تم كسفى ...طبعا
المهم كل شغلهم الشاغل دلوقتى الخراب اللى حصل فى المحله ... والكل اجمع فى
ان معظم اللى عملو كدا ...شوية بلطجية ... وحد ماجرهم .... واللى حصل دا كلو حد من بره ...
اولا : قلنا مليون مره ان الاضراب بينادى عدم خروج الناس من بيوتها ... وكفيانا حول ... ويا عالم مين اللى ماجر
البلطجية دول ....افهموها باه ...
ثانيا :حد ايه اللى من بره اللى حرض الشعب انه يعمل اضراب .... احنا هنهرج ...
ولا هيا لبانة كل حاجه تحصل نقول من بره ....
ولا دى استهانة بشعب مصر اللى هما ما عندهم استعداد ولا شجاعه يعملو كدا ... تبقو بتضحكو على نفسكم
لا مش معنى اننا شوفنا كتير ...جوع ومرض وتعليم منيل لحد اكل الحمير والكلاب ...يبقى مش هنقدر نعمل حاجة
ثالثا : بلاش باه اسلوب الاحباط اللى نشرينوه فى الاعلام دا .... محصلش حاجه ...انتظام فى جميع المصالح الحكومية... حصل ايه ...
لو فعلا زى ما بتقولو كدا... شايلينا على راسكم وزعقين ليه ... متنفضولنا ... حطين امن مركزى ومغرقين البلد بيهم ليه لحد دلوقتى ... بيهببو ايه ؟؟؟ ساهرنين على راحتنا ...
بصو احنا كدا كدا نجاحنا .... كفايه ان فكره الاضراب انتشرت بين الناس كلها ...فى العالم كلو
نجحنا حتى لو بنسية واحد فى المليون .... برضو كسبنا ...
كسبنا ثقافه ...كسبنا فكر ...كسبنا اول حركة ...هتخلينا نرجع حقنا ...
اللى حصل متستهونوش بيه ...
ولا حد يقدر يقلل منه ...

الاثنين، أبريل ٠٧، ٢٠٠٨

هيا بدايه ...بس مش النهايه ...


بصو انا مش هتكلم عن أيه اللي حصل علشان الكل عارف .... وكتير منكم شارك وشاف بعينه لاما فى الاخبار

لاما على النت ..

بس الحمد لله جلنا تأيد من عند ربنا ....وغضب عليهم ...واهو انتو شوفتو الجو عامل ازاى ....!!!

والحمد لله نجح الإضراب ... عارفين ليه ... علشان لأول مرة من زمااااااااااااان

قدرنا تفق على حاجه واحده ... من غير حد يتريس علينا ... ولا لحد فضل علينا .... يعنى لو بصينا شوية لقدام

ممكن فعلا نتجمع علشان نغير البلد دى ...


ونكنس العالم الزبالة والقرف اللي مالي البلد ونحطو فى اقرب صفيحة زباله

لا اللي يضحك فعلا أن بتابع الأخبار على الجزيرة حيدر البغدادي نائب حزب وطني

وبيقول أن اللي حصل وقف لمصالح الشعب ... مصالح أيه يا أبو مصالح ...بلا خيبة والبلاوى السوده اللي حرقين بيها البلد مش يدوسها بيها على الشعب نفسو...

وبيقول فيه مظاهر من غير ناس ... ليه اتعميت مش شايف اللي فى المحله ...

مش شايف الأمن اللي مالي البلد علشان يموت اى مظاهرة ...

وبعدين لما بيحصل مظاهرات ماشين تقفشو فى الناس وترموهم فى السجون ...

وبعدين أصلا الإضراب قايم على أن الناس تلزم البيوت ومحدش ينزل منها ...

مش تعمل مظاهرات ... افهموا باه ...

وبيقولو أن المصالح الحكومية والمدارس شغاله ....واصلا الشوارع فاضية والجامعات فاضية ...شايفنا دقين عصافير ... أمال أيه بيان وزير الداخلية اللي هدد أن هيعاقب اى حد يقدم على الإضراب ...
.دا فى حد ذاتة نجاج ...

وبعدين الأمن حجز المحامين فى نقابتهم ...واقبضوا على ناس فى حركات كفايه ...يعنى سجنو الناس من قبل ما اى حاجة تحصل ,.... أحنا هنقرى على بعض....

وأيه اللي فيه مظاهر من غير نا س ...والموظفين شغالين عادى ..... هو حول ....

وبعدين متستعجلوش دى بداية ... بس ان شاء الله مش النهاية ...

يعنى المره دى إضراب...... شوفو المرة الجيه هتبقى أيه ....؟؟

الجمعة، أبريل ٠٤، ٢٠٠٨

يوم ستة ابريل ياااااااااا مصرييييييين...

لما مصر تكون عايزنا فلازم نبقى رجاله.. ونقف وقفت رجاله ....
معلشى يا عم المليجى ...البتك فى الكلمة ...الجمله اللى فاتت من فيلم الارض الرخم ...

المهم بجد بجد كنت مبسوطة اوى النهاردة لما لقيت رسايل على ايملى وناس بعتالى عن الاضراب يوم 6 ابريل

زى كدا مثلا

يا جماعه يوم الحد 6 إبريل إضراب لكل الشعب المصري في كل المحافظات بسب الغلاء اللي في البلد عايزين كلنا نشارك و نعمل إضراب عن العمل و الكليات و المدارس و الشراء لكل شئ حتي السجاير يا ريت بجد نعمل حاجه علشان نفسنا و علشان مصر أمانه عليك ترسل الرساله دي لكل اللي عندك الوقت قليل و عايزين مصر كلها تشارك

---------------------------------------------------
الساكت عن الحق شيطان اخرص .السادس من ابريل انتفاضة الشعب المصري تبدأ من الحادية عشرة صباحا بميدان التحرير للمطالبة باستقالة حكومة نظيف و زيادة الاجور وخفض الاسعار..شارك لو كنت غاضب..شارك لو عندك ارادة..شارك لو لك وجود..شارك لو مازلت تريد الحياة..شارك من اجلك واجلي..شارك حتي يحسوا بوجودنا..ارسلها لكل الايميلات اللي عندك لكل اصحابك وجيرانك لكل زملائك في العمل من اجل ان يستمع


بس مش هيكون كلام وبس ...لازم يبقى كلام وفعلا ... خلينا رجاله ...ونقف وقفت رجاله ...

مجتش على يوم ..نقعد فى البيت ... فنخلينا ولاد ناس ونحترم نفسنا ونقعد فى البيت ...

علشان نعرف ناخد حقنا...

كل واحد يخلص اللى وراه وينفض للشغل ...دا لو موجود اصلا ... مفيش حتى طوابير عيش ....

واللى قادر يروح المظاهرات ويشترك ف يها يبقى كويس جداااااااااااا .... اصل وحده جارتنا بتقول فى امن

وبيوقف العربيات وبيقولو محدش يخرج .... مش تايد للاضراب لاسمح الله ...

لا علشان محد ش يشارك فى المظاهرات ....

يعنى المهم اياكم الاقى حد طلع من بيته ....فاهمين ... ويارب اللى يطلع من بيته الا لو كان هيشارك فى

المظاهرات ... ميعرفش يروح ويجيلو زهايمر ....ويتوه... ولا بيته يتنقل ...يلا باه

خلو بلكم أنا بينى وبين ربنا عمار ....ودعوتى مستجابه ...... اللهم بلغت ...اللهم فشهد ..

يلا ربنا معااااااانا ااااااااااااااااااا..... ومصر لو عطشااااااااااانة .....

جوازعتريس من فؤاده .....بااااااااااااااااااااااااطل ........ باااااااااااااطل ....أسفه دا فيلم تانى

المهم ....بجد بجد الله يخليكم متفروسنيش ومحدش يخرج ماشى .....

الخميس، أبريل ٠٣، ٢٠٠٨

رن جرس .... متعه ...

النهاردة خرجت أنا ومامتى حببتشى ...وطول ما أحنا ماشين تدعى الكهربا تقطع ... وأنا أقولها ليه بس

تقلى ما انتى بترخمى جامد لما بنقف قدام الباب واحنا رايحين لاى حد ....

ااااااااااااااااه طب اعمل أيه ...؟

مش بضرب الجرس علشان يفتحو ....

ترني مرة ..تكه ...مش تلزقى فيه لحد ما يعلق ...

دا انتى فضيحه ...فاكرة اليوم اللي اتبليتى على أختك ...

اها..ههههههههههههههههه ياماما مش كنت بهرج ...

احكلكم باه عن حكايه الجرس دا ....أنا معرفش أشوف جرس ألا لما أحط صباعى عليه ...

معرفش دى أيه..؟ بس بحب جدا كدا....اخنق صح... اصمتوا ...

أما يوم اختى دا ...... كنا خارجين أنا وهيا وماما ...وفيه بيت واحد جارنا على أول الشارع حاطت الجرس بره خالص....طبعا تلقائى رحت ضربت الجرس...

لقيتهم باه ماسكنى ...بطلى ...هتفضحينا ... واختى تقلى يالهوتى راحة تضربي الجرس على الناس كدا

وماسكينى ودانى لما خلصت ..... فى الوقت دا لقيت مقابلنا واحد من اللي عايشين فى البيت ...(كان زميلى )

عشان اسكت اختى ...وهو بيرمى السلام علينا وماما بترد ...رحت قلتلو على فكره سونسون اختى رنت الجرس

متخليش حد يقلق فى البيت ...لعب عيال هنقول أيه ...؟

طبعا ...ماما سونسون ....اتصدموا ..... شوية ...

وأنا أقولها عادى يا سونسونة ياحببتى ... مش عيب نقول على غلطنا ...


ومشينا شارعين ولقيت برضو جرس رنيت ...رحت قبل ما حد ينطق فيهم .....

أيه يا ماما انتى اتعديتى من سونسون ولا أيه ...؟

ههههههههههههههههههههههههههههههه

برئيه أنا صح ......

بس فعلا أيه الناس الرخمة دى عامله الجرس بره ...... أحسن ...كل واحد يتحمل نتيجة غلطه باه....

يعنى بالرغم من أن بحب رن الجرس ....ألا أنا بكره حد يرن علينا ..وخلتش بابا يعمل جرس عند البوابة

هو اللي بنعملوه فى الناس هيتعمل فينا ولا اييييييييييييه.....؟






ريسنااااااا مدمناااااااااا...

لسه من شوية جيه من عند التلفزيون بعد ما أتفرجت على حتة صغننه من برنامج البيت بيتك

كان فية واحد اسمه محمد هو افريقى منين بظبط مش عارفه وغنى جدا وصاحب مؤسسة خيرية ...
وكلها من فلوسة الشخصية ...وبيقول من ضمن نشاطها انه بيعطى اى رئيس دوله خرج من الحكم
ودول ملهمش الا خارجه وحد بس وربنا وحده هو اللى يقدر عليها

يجى خمسة مليون تقريبا بالدولار( أصلى ما كنتش مركزة ) ... ودا على مدة عشر سنين.... ودا فى أفريقيا

بصراحه أنا انفجرت من الضحك .... الراجل دا طيب ولا بيشتغلنا ........ولا مش عايش فى دنيتنا...

ولا عايش وشايف الوضع قال أشجع الناس اللي لزقه فى الحكم دى خلى الشعب بتاعهم يفيص شوية...

متخيله مثلا لو كنت مكان الراجل دا ...وأشوف مين بظبط من الحكام العرب أديه الفلوس دى .....

ألاقى اللي صدام اللي أتعدم أصلا وبلدو مولعه ومحتله ... ولا فلسطين اللي عرفات مات وبيقولو مات مسموم

ولا أديها لملوك ..... ولا أديها لريسنا ....!!!!!!!!!

أنا بيتهيئلى لو ريسنا سمعوا ...هيقلو روح ياشاطر العب بعيد ...أحنا فضينلك جى تتكلم فى ملايين اللي بالنسبة

لينا ملاليلم ....لو كان بالمليارات كنت هفكر ...وبعدين هرفض طبعا ....

وأنا باه زى ما انتو عارفن اتغظت غيط حكام أيه وبدنجان أيه اللي جى يدلهم فلوس ....مش كفايه 27 سنة

جيب مصر هو جيبوه ...ياراجل عيب عليك ...جى تفرسنا ...

وعيب أوى تقول كدا ...دا حتى ريسنا هيلاقيها عيب فى حقنا .....

طب شعب مصر كلو عنده استعداد يكتبلو سينا باسمه ......

بس يحل عننا ... ......بس أدى وشى لو أتعتع من مكانه........

دا أحنا بقينا لريسنا ادماااااااااان ... وأدمن مناظرنا من الخراب والبلاوى اللي بنشوفها فى عهده ...

يبقى هيسبنا ازاى دى عشره ياراااااااااااجل ... دى حتى العشره فى الحاله بتاعتنا دى متهونش ألا على ولاد

الحلال آه والله .......صلى عن النبي كدا وابعد الأفكار دى من دماغك ...

مش ناقصين كاااااااااالو فى دمغنا ...كفايا اللي أحنا عايشين فيه الله يسترك.....
وحل عن دمغنا يا حاج محمد ....

الأربعاء، أبريل ٠٢، ٢٠٠٨

هيا بلطجه ولا ايه ياحكومة ....

بصو لما الحكومة أيام المحرقة اللي عملوها ولاد المحروقه بجاز( اسرائيل) لاخونا الفلسطنين ... والحكومة

تحت ضغط نوعا ما منا وشكلها هيبقى زباله قدامنا بالرغم أنها مبتهتمش بشكلها المهم جيبها ...

فتحت المعبر علشان الفلسطنين الجرحا ....بس كانت الغباء والتخلف كانو سماتها تخيلو ناس بتموت

والحكومة كل اللي عملتو انها استقبلت 36 جريح تقريبا ومايطلعوش بره مستشفا العريش فى حين أن فيه
حاللا ت كتير كانت محتاجه علاج وجراجات إمكانياتها مش موجودة فى العريش وبرضو قالو لاء

ومش بس كدا لا دول كمان كانو يوقفوا كل واحد بيموت ويسالوه ويعملوا إجراءات لحد ما مات حالتين
فى الوقت دا ...ماشى دور نداله مش مهم..

برضو لما حجزت فلسطنين ورمتهم فى المعتقلات (أل مش مكفيها مصرين ) وبهدلتهم وتطل بمنهم معلومات

عن اللي بيساعدوهم وأماكنهم ..طب انتو مالكم ..بتتحشرو ليه....ولا حاجزنهم ليه أصلا ...هما نقصين ..

ولا افترى ..ورخامة ...وسابو شويه يروحو .. نكبر من كمان...

ومنعو الوفد اللي جه من اروبا علشان بيطالب رفع الحصار من غزة ...بلطجه ...

وأوامر ماشيه بالجزم على رقبيهم ...ماشى ..

أنما تيجى على 200 مصرى كانو بيشوفو قرايبهم فى غزة واتحجزو وعايزين يرجعوا مصر

الحكومة منعاهم ...ليه هو بقى لحمنا رخيص اوى كدا...

مش فارقه معاهم .... يعنى لو اتقتلو هناك ...برضو مش مهم ...وكل حجتهم أنهم دخلو غزة لاسباب غير معروفه... هو غباب ياااااااااااااااا ناس ...


مش معروفه ازاى يعنى ...دول اهلهم ...اخواتنا ولازم نساعدهم ...فرضنا أنهم رايحين يتفسحو

رخامة ...هبل .... استعباط...خلاص طالما راحو مش عايزنهم ...
هيا تكيهم ياروح اهليكم... انتو ورثتوها ولا ايه ...؟

سايبين اللي يتقتل على الحدود ....واللي يتقتل فى السويس...كمان بتصدرو ناس تموت وتتبهدل...

ايه ملهمش حق يدخلو بلدهم مهما ارتكبو من جرائم ...دا لو فرضنا أن مروحهم لغزة جريمه ....

دا انتو بقيتو مسخر ه اوى .....وعالم معفنه وزباله ...

أنا والله مش فاهمه ازاى أتمنع من دخول بلدى مهما كان الوضع ....

دى بقت حاجه تفقع والله ...




وزير تعليم ولا وزير مراوح...

وجيه بالليل...وماسكة الجرنال ألا وألاقى حتة دين خبر جامد اوى ...

لدرجة أن لقيت زلطه ملزوقة فى دماغى...

قريت أن وزير التعليم الحاج يسرى الجمل ...حط ميزانية 26 مليون جنية ...علشان حبة مراوح سقف...

كراسى على حبة طربيزات وكام الة تصوير أوراق ...دا كلو علشان يجهز بيهم صالات الكنترولات فى

الاسماعلية علشان يريح اللي شغالين فى امتحانات الثانوية العامة ....شوفتو الهنا ...


أيه النفس اللي سيادة الوزير هبوووه علينا دا ... أيه دور الطراوة دى ...وحركات ومراوح ...طب علشان السرقه

تبقى مبلوعه ..قولو مكيفات ...ولا شفطات حتى ... رايح يقول مراوح ...

وفرحان أوى وحاسس انه عمل انجاز...

والحكايه كملت يعنى وخلصنا مشاكل الثانوية العامه ...فاضل اماكن التصحيح هيا المشكله ...

أيه الخيبة دى ...طب بدل الفلوس دى تتصرف فى كراسى ومراوح... يوزعها على المدرسين احسن

وهما هيمضو على تنازل عن حقهم فى المراوح ...اى والله يا خويا ...

منبقاش اقرع ونزهى .... الناس جعانه ...وتقلى صالات ومراوح ... هتقلى أحنا مالنا بالجوع أنا بتاع علم

ومالو حل ياعمنا مشاكل المدرسين والعيال ....

طب ما انتو دخلتو حاسب فى المدارس بملايين برضو والله العظيم فى مدارس لحد دلوقتى مفيش اساتذه

متخصصين يعلمو العيال ...وبيخافو يفتحو فصل الحاسب الالى ليهم ليبوظو حاجه وهيا مسؤليه ومتعهد بيها

ومش عايزة اقول ان سمعت فيه مدارسه فيها حاسب الى وهيا أصلا مش وصلها كهربنا ...

ايه هيشغلوها ببطارية قلم ..

ولا العيال اللي أصلا طفشانه وماعدتش بتحضر مدارس ...والمدارس فاضيه ...بلااااااااش

طب افرض افرض يعنى حبو يصححو فى الشتا ...ما انتو بتقول راحه ..

مش لازم يبقى فيه حتتين خشب يولعو فيهم وكام جوز شراب ...

أنا بما ان طول الشتا فاضية ..هروح أسال ممكن اجيب كام ازازة حاجه ساقعه اسرح فى الصالات دى

جايز المروحه قصدى البليه تلعب ونلم قرشين ...

وبرضو نخلى بالنا من مصطلح الصالات دى ..كلمة تقلق ..هل يا ترى هتقلب فى الشتا

يعنى فى الصيف علم ...والشتا جمع العلم كلو ( عواااااااالم )..الله اعلم

فبصو الله يخليكم مش كل وزير يطلع ...يقلنا بؤين فى الطراوه ..ويعمل حجه المروحه ...

حلم يفرح ...بس طاااااااار

اصطبحنا وصبح الملك لله .... النهارده الصبح ماما جيه تصحينى علشان افطر ...
قومى يا هموسة .... أيه اليافطة اللي كتباه على الباب دى ...

(محدش يصحينى لحد ما اخلص حلمى )... يعنى ايه

ياماما مش عايزة أكل ...شبعانة ..... سبينى شوية...

شبعانه أيه... يامعصعصة ... قومى ...

حرام عليكى وربنا ....ارتحتى كدا ...

ليه خير ....

كنت بحلم ... كنت بشوف هو مين العريس اللى قالتلى عليه الابله دودو...
سبينى أكمله علشان اعرف منين وأخلاقه كويسه ولا لاء...

هههههههههههههه...... بجد ...

لا بالنعناع يا نوحى ...

قومى مش هسيبك تنامى تانى ... متشهريش طول الليل قدام النت ...قومى اقعدى معنا ...

نت أيه بس..... انتى بتشبرى ... طب سترى عليا ...

واضطريت أسفه وتحت ضغوط الحكومة الداخليه انى أقوم...

بابا .....بنصبح يا كبير ....

مالك ...هو كل يوم سهر ... ( بابا لما بشوفنى قاعده قدام الجهاز كانه شاف عفريت ...دستور )

ابدا والله يابابا .... أصل منتش عارف اللي فيها ...

خير ...

ياسيدى كانت الابله دودو جارتنا .... وقفتنى وقلتلى أنها حلمت ليا حلم جامد جدا ...

انه اللهم اجعلو خير وحقيقه (خد من قلبى وسر يارب)... شافتنى لابسه فستان الفرح وبتجوزبعد يجى تلت شهور تقريبا ... وبتقلى فضلت اعيط علشان البيت هيفضى...

قلتلها يا دودو ركزى مش وقتو عياط .... وبعدين أنا معاكى بروحى ... ها و بعدين يادودو ..كملى
وكمان بنرتبلك الشقه وحضرنا الفرح بس عمك ميدو جه خدنى من الفرح ...

طيب العريس حلو مش اقرع ولا اوزعه ...ولا ايه ظروفه ...انا مش عايزة اتسرع..

لا مش عارفه .... بس كنا فرحنين اوى

الله يفرحك بزياده ...ركزى يا دودو مفيش حد بيحلملى الحلم دا ليا كل يوم ...ركزى وقلى هو مين ...مفيش وقت

انتى بتقولى بعد تلت شهور ...الحق اشترى اللي فاضل فى الجهاز ... أبوس أيدك ركزى


وربنا ياهموسه مش فاكره ... بس ان شاء الله خير

بس يا بابا فقررت من أمبارح أنام ....وأركز اوى علشان أشوف مين اللي ربنا نوره وعرفة قدرة وهنآه

وهيجى دا..... يبقى أنا غلطانة .... يا نوحي


ولقتيه فى الحلم ياختى ....

لسه كنت مستنيه علشان ادخل على منطقة أحلام العرسان ..

اصل كان فى واحده بتاخد دورها فى طوابير المنطقة ...

اسكت يابابا زحمة اوى هناك... امر من طوابير العيش فى قدام الافران ...


بس ماما الله يخليها بالرغم أنها قرات اليافطة .... نفضت وصحتنى ...يرضيك كدا ...

لا طبعا ...بقلك ايه سيبك من السندوتش دا ... وقومى نامى كملى الحلم ...

جايز تعرفيه وتلاقيه ....ونرتاح منك...


مين ...

قصدى نفرح بيك ....

طيب اخد السندوتش ...علشان الحكايه هطول ... اصل يا عينى الناس اللى مش بتلحق مكان فى طوابير العيش

بتكمل واقفه فى الحلم ... وانا باه هقف فين ولا فين ...مش قلنا نركز ولا أيه يا كبير ....


ركزى ياختى ركزى ....
ادعيلى يا نوحى ... ربنا يسهلها ونلتقى بعد الحلم .... واشوفك فى الفتره المسائية ...سلام

الثلاثاء، أبريل ٠١، ٢٠٠٨

عايزة اشوف حاجه عدله ونبى ...ثقافة رئيس

قرأت خبر النهارده بيقول نائب فى مجلس الشعب مقدم استجواب أن ازاى السيد جيمى راح الصعيد

علشان يعمل دعاية للحزب الوطني لانتخابات المحليات بالموكب بتاع الريس ....
وزعلان جدااااااا... مش عارفه ليه .....؟؟؟؟ هو وأبوه واحد يعنى .... يعنى عايز يروح بمكروباص..

بس يارتها تيجى على اد كدا.. هو من المفروض نفهم حاجه غير كدا ...... قصدوه يعنى
انه خلاص ورثنا حتى الموكب الرياسى ...

كتير بنسمع دا ...دا بقى بيقوم بدور الريس ...دا اخد القرارات الفلانية ... دا هيبقى الوريث بعد سياده الريس...

ومن كتر اللي بنشوفه وبنسمعه على التوريث والبدنجان ... بقينا فى مصر منقسمين ...تلاقى ناس من كتر الكلام

دا بقت مدمناه ...وعندها انتحار فكرى حتى ...

وكل همها فى الدنيا تلاقى رغيف العيش اللي مش موجود طبعا ..

ودول كتير جدا ...غلابة مش عايزين من الدنيا ألا الستر والحلال ...

وناس بتهرى وتنكت فى نفسها ...وتاكل فى بعضها لما خسوا النص ...وخايفين يعملوا حاجه ...

وناس كتر خيرها حاسين بالبلد وبيعملو اللي ربنا مقدرهم عليه ... بس للاسف دا مش كفايه ... انا بيتهيئلى

أن سيادة الريس وجيمى ...مستفادين بالاعلام دا اكتر منننا ....من كتر ترديد حكايه التوريث على الناس

خلاص عملهم زى متقولو كدا تخدير للناس ( ومش الكل ) عملهم نوع من أنواع الاستسلام الغبي

وعلى رأى المثل.... جيمى على الودان امر من البدنجان ...

وتلاقيهم بيقلو عادى ما يتكلمو أيه المشكلة ....المهم أحنا بنعمل أيه ...؟ وأيه اللي هيحصل فعلا ...؟

اللي نفسى يحصل فعلا والإعلام يعملوه ... أن يمشى فى اتجاه تأنى خالص .... هو اى نعم بيعرف الناس المصايب والبلاوى اللي الحكومة بتعملوه ...واللي كان عدمها وقلتها احسن ... وخنقنى بحكايه التوريث دى ..

ودا بنشوفه فى اى حته نبص عليها ...حتى تيجو تبصو على صفيحة الزبالة

تلاقى كلام على ام الحكومة المعفنه دى.... يسد النفس برضو

المهم أنا قصدى أننا عارفين خلاص الزفت والنيله اللي بيحصل ...عن طريق ناس معين ...يعنى عارفين الغلط

وأظن أن عندنا نسبة ثقافه كويسة ووعى عن حقوقنا وعارفنها كويس جداااااااااا...

بس افرضوا خلاص جيمى مش وريث ولا حاجه ... مين اللي هيستحق يبقى انضف من اللي موجود دلوقتى...
دا الوحيد اللى وقف قدامه ( أيمن نور) أتسجن وحالته الصحيه بقت صاعبه جدا ...
يعنى لازم يبقى اليومين دول الإعلام والصحافة تثقف الشعب ثقافة الرئيس... يعنى مين اللي يكون على مقدرة يطلعنا من البلاوى السوده دى ...

ولا نبقى نستنه انتخابات رئاسه تانيه ونسمع عن كام اسم و اللى تطلع كوسة أصلا فى الاخر ...
لازم يبقى فيه تثقيف لكل الناس فى مصر .. مش نسب المثقفين بس اللي تبقى عارفه وباقى الناس تاكل فجل تعريف الناس على القيادات والناس محترمه ... مش اسمنا عايشين عهد منيل
ومش عارفين اللي عنده القدره فعلا يخرجنا منه ...

يعنى نرمى كمية التخدير اللي وخدنها و اللي عفنت فى دمغنا ...ونثقف نفسنا عن الناس المحترمة اللي
هتخرجنا من اللي أحنا فيه ... علشان لما يحصل انتخابات غصب عن أتخن تخين بعد كدا ...ان شاء الله

نكون اختارنا صح وعن ثقة ونحترم نفسنا ...بدل ما بعد كدا نلاقيه الاما مسجون لاما يكمل قرف فينا

ونبى ونبى أنا عايزة أشوف حد جديد ...أنا السنه العدله اللي اتولدت فيها ..
كان سياده الريس استولى فيها على التكيه قصدى الحكم....

ومن يومها مشوفتش حاجه عدله ...

عاااااااااااااااااااااااا عاااااااااااااااااااااااا يااااااااااااااباااااااا

حد يجبلى اوممممممممممممممممى ....


عااااااااااااااااااااااا عاااااااااااااااااااااااااااا

عايزة أشوف حاجه جديده ونببببببببببببببببببببببببببببى
......