الاثنين، يونيو 30، 2008

حاجه ساقعه على حسابى

كنت بعيد مشهد من فيلم التجربة الدنماركيه .... ااااااااايه دمغكم رايح فين يا خلبيص

مش اللي بالى بالكم يا أشرار .... هقلكم


أمبارح كانت اختى جايه من الكويت المشققه ( شقيقه )وكان ميعاد وصولها بالكتير واحده ونص بليل وبكتيره تلاته

أنما اللي حصل أن سيستم الكمبيوتر وقع فى أم المطار ...ورجعنا لأيام الناقة وكل حاجه يدوى
وتاكد ان تاثير اختى جامد على اجهزت المطار فكهربته ...ياجامد

وقعدت شوية أنا وخالتى ..وفاجئه شافت اتنين ستات لابسين ابيض في ابيض زى الملفوفين بملايات

سرير بيضة ...وخالتى بتسالتى دول أيه يا بت .... كان شاكلى وحش روحت قلتلها وبكل ثقه

دول يا خالتو اتنين ملايكة رايحين يطلعو لناس فى الحلم ...راحت بصتى بصمش اوى وقلتلى يارخمه

مش فالحه ألا في التريقه .... وإذ فجاءة طل علينا أتنين سووووووووود جدا

فرحت قيلالها خلاص يا خالتى عرفت دول لابسين كدا ليه بجد ...فبصتلى ...روحت قلتلها

شايفه دول( السمر) ...اهو البيض ( ملايكه ) وكانو بيدورد عليهم ( السمر )

ولولا الفضايح كانت خبطتنى بحاجه ...

وبعدين زهقت فرحت عند الحاجز وفضلت واقفه مستنيه اختى باه....

والناس يا عينى واقفه مستنيه من جميع العالم ... وكان فى واحده كانت مخنوقه دلع اعدام قبل كدا كام مرة

ومش طايقه نفسها وكان هاين عليها تنطح وكل ما اتحرك تنفخ ... وأنا ساكته ومش عايزة اشد قدامه

علشان أنا أصلا مخنوقه من الوقفه والانتظار دا ..وفى الأخر مسكة طرحتى

وتقلى امسيكيها كدا ...قلتلها ليه ... قلتلى أصلها حولتنى مش شايفه .... قلت اقل ادبى عليها

افرض حد معجب ولا حاجه فى القاعده دى ... اثبتى يا بت بلاش فضايح ...

روحت مبتسمه فى وشها وقلتلها ياااااه بقى من الصبح واقفه وبتبصى فى قفايه ... غريبة

كانت طبعا هتنشل ويجلها حرحر ...ونفضتها خالص بعد ما خرستها والناس اللى جنبها ضحكت عليها


وشوفت شئ غريب ان معظم الناس ماسكة ورقه ومكتوب عليها اسامى محسسنى أن اهليهم فاقدو الذاكره

مش عارفة ...وفيه واحد يا عينى ماسك وارقه مكتوب عليها اسم على بسيونى تقريبا وكل واحد طالع من البوابة

يرفع الورقة ويساله سواء عربى اجنبى هندى موزنبيقى حتى يسالو وفى الاخر واحده ست اللى قلتلو ايوة

واتااااااااارى على طلع واحده ست ....ياحلاوه يا ولاه
وعيله كامله واقفه وكل شوية ناس تيجى من طياره يسلمو عليهم كانو محسسنى ان واخدين المطار لحسابهم
خمستلاف نفر سلمو عليهم ...وانا اقول خير يا جماعه هيا العيله كانت طفشانه فين ... ولا فيه فايدة

وانا باه عامله زى الراجل فى الفيلم التجربة الدنماركيه اللى مستنى اخوه من عشرين سنه

ويسال اى حد يطلع عن طيارة الكويت ... وأنا أسال اى حد شكلو مصرى ... اللي يقلى اثيوبيا

وجيبوتى والسعودية وامستردام ...قلت أيه دا المصرين وصلو لجيبوتى وأثيوبيا اللي فيها حروب اهليه

ومجاعات ...لاولا ولا قوة الا بالله ....البركة فى مبروك افندى

وأخيرا بعد ساعتين ونص تأخير ويمكن اكتر اختى هلت عليا كدا وشوفتها وهيا بتتفتش
وخالتى تقلى اشمعنا هيا دون عن زمايلها اللى واقفين بتتفتش
فقلتلها اكيد كشفوها ... انا قلتلها بلاش حشيش خليها حبوب او سلاح
دا كلو فيه عسكر واقف وسامع ومتنح ومسبهل ...عادى
والحمد لله وصلت بالسلامة

وسلمت عليها طبعا وروحت قايله ليها

يلا أنا اطمنت عليكى أرجعى وادخلي النت مستنياكى فى ميعادنا

فطبعا ضحكت بس من غيظها ..... اختها هتعمل ايه .....؟؟؟
عزماكم على حاجه ساقعه بس شرط ترجوها قبل الفتح ....








السبت، يونيو 28، 2008

حكومة منع الحمل ...

أيه حكاية السكان والأفلام دى كلها ....

خلاص بعد 27 سنه اكتشف مبارك وحكومته أن سبب فشله

علشان الناس بتخلف ... دا أيه دا ....

كل يوم والتاني يطلع خبر عن ازاى يحلو مشكله السكان دى ...

وياريتو حلول عدله .... والله لما بشوفها بتكسفلهم سلف ... قرأت مره أن هيحطو ملايين

علشان يجيبو موانع للرجالة.... ودلوقتى وزير الصحة بيقلك سبب الأزمة السكانية في مصر

هما رجاله الصعيد .... ولازم يتعملهم خطه لتوعيه الرجالة ....

حكومة كسيفه أوى .... دا كلو بيثبت أيه ....؟؟

بيثبت أن طنط ماما سوزان حملتها الإعلامية ...

فى توعيه الناس والملايين اللى أتصرفت على الإعلانات طول السنين دى فاشله فشل زريع

وفى الأخر جالهم هاجس ( دلع هجس ) يقلهم بلاها ستات ندور على الرجاله ... نخليهم يبطلو خلفه ....

أمال فين إعلان .... الراجل مش بس بكلمه الراجل برعايته لبيته وأسرته....

كانو قصدهم رجل الكنبة ولا ايه ...؟؟

برضو مجابش اثر ...ولا فايده برضو ... وال أيه يقلولكم رجاله الصعيد هما السبب

هطل أيه دا .... طب ما قلتوش ليه أن الصعيد فيها فقر بنسبه 80 % ...

وفاضلوا يلكو... لوكلوك ...لوكلوك .... بأم التنمية في الصعيد .... هيا فين مش عارفه ...

وخنقين أهلينا ليه .... فين الوادى الجديد وتوشكى وسينا .... واللى فضلو يقولو دى استثمار للشباب

وفتح مجالات عمل جديده ...وهيخفف الضغط على نهر النيل .... والأفلام دى

ولا لما كل الحورات دى فشلت برضو ....ومفيش حاجه نجحت ...قالو العيب فى الرجالة ....

بقلهم 27 سنه ... ومفيش تقدم حتى في البنية التحتية .... طول السنين دى وما دخلوا

صرف صحي فى مصر كلها الا 20% بس .... ومية بينضفوها بنسبه 20% برضو

ووزير الصحة طالع يقول هنقضى عن أمراض الكبد الوبائي فى خلال عشرين سنه

تردو تقول أيه ...؟

عشرين سنه .... أنت بترسمو على مين .... هطل هو ولا هبل ...

لسه بتدوا لنفسك فرصه علشان تخططوا وتصلحوا .... فى حين أن كل العالم

بيجنى ثمار السنين اللى فاتت ... وإحنا لسه هنقول من الأول ....

تخلف أيه اللي أتحط على دماغ الحكومة دى .... يا مصبتى ...

ويرجع يقلك اللي بيحصل دا كلو سببه الخلفه ... طب ما الصين اهى

عاملين زى الرز ... وهما بقو أيه .... وإحنا بقينا أيه ....

هما غزو العالم .... دا وصلو لحد أنهم يجو لحد باب بيتك يحلقو راس كل اللي في البيت

محدش طلع قلهم يبطلوا خلفه .... بالعكس ... دا مقلقين أن نسبه المواليد بتعتهم بتقل


يعنى هما سلاله نادره وناس عباقره ولازم يتكاثروا .... وفى مصر عالم نص كوم وانقراضهم أحسن....

تفكير أيه المهبب دا ...

يا أم الحكومة الهطله .... مش الأزمة فى الخلفه ... الأزمة في التخلف اللي ماسكم ...

والفشل اللي ليه جدور من 27 سنه ...

بس هموت واعرف الإعلانات الجديده بتاعت منع الخلف دى هتبقى ازاى ...

هيجيبو واحد بياخد الحبايه ولا وسيلة منع الحمل زى الإعلانات القديمة ....

ولا الراجل من دول هيروح يكشف فين أصلا

عند دكتور النساء والولادة .... ولا هيطلع دكاترة الرجل وقلة الخلفه...

راجل مين أصلا يقبل بالهبل دا ....

يعنى تفكرهم العبقرى والفاذ خلاهم يتوصلو إلى أن خطتهم غلط علشان ركزو مع الستات

ونسو الرجالة فى إعلانات منع الحمل وتنظيم الاسره ...

فقالو السنين اللي جيه هنركز مع الرجالة يمكن تتحل ..... دا لو هيا مشكله أصلا ....

هوفيه جواز أصلا علشان يبقى فيه خلفه ... حتى الناس أتسد نفسها عن الخلفه أصلا هياكلو العيال منين

ولو فرضنا أن نسبه الإنجاب عاليه فى الصعيد ...

مهو علشان هيكونو سبب باب لرزق علشان الفقر اللي هما فيه....

وكل دا الحكومة السبب ....لا فيه تنميه ولا بدنجان ...

وبعد دا كلو يطلعو يقولو سبب المشاكل دى كلها والخراب اللى مالى البلد هيا ... الخلفه ....

وكمان الرجالة... خيبة أيه دى....
ايه الحول دا ....

الأحد، يونيو 22، 2008

حاجه تقرف ....

اليومين اللى فاتو روحت بلطيم قلت أشوفها قبل ما تتلغى

وتنقرض ولقتها فعلا حلو بس للأسف الشديد النضافه فيها شبه معدومة ....

أنا مش هقول السبب هو الحافظ وسياسته من مركز وظفته الوسخة اللي قال عليها

ومن الطبيعى أن بلطيم فى الوقت دا يهتموا بيها من حيث النظافه ... والبنية التحتية

على الأقل علشان تزود من دخل الناس البسيطة دى ...وبرضو تبقى مكان للسياحة الداخلية

وخاصة انه مكان مناسب وأسعاره مناسبة لفئة كبيره من الناس الغلابة

اللى فى مصر على الأقل تطلع تتهوى من فقعه طول السنه ...

وهقول أن مفيش عمال نظافه تقوم بواجبها ولو قالو فيه هيبقى قلتهم أحسن ...

هو اى نعم فى تقصير من جهة النظافه .... بس فى نفس الوقت فى عفانه من الناس

وأسلوب وطريقه فى التخلص من فضالتهم .... يعنى اليومين اللى قعدتهم دول

اطلع أمشى أخر النهار على البحر تحسو انكم ماشين على ترعه

الناس اللي بتبيع دوره مشوى والناس تطفح وترمى على الشط ... أيه القرف دا ...


كان طبيعى يمنعو بتوع الدوره دول يمشو على الشط أصلا .... او على الأقل

يحطو باسكت للزبالة .... علشان الناس تتكسف على دمها وتلاقى مكان يتنيلو يحطو فيه

دا غير من الطبيعى يبقى فيه عمال نضافه يلمو اى شئ غير الرمل والميه أول باول ...

وطبعا اللى شوفته مفيش اى حاجه من دى زائد عالم مقرفه ترمى اى حاجه على البحر

ومش عايزة حد يستظرف ويتريق .... أنا حره دى بلدي واشتم فيها براحتى ...

بس اياكم حد ينطق .... فاهمين ...


المهم يعنى روحت اتفقعت واتغظت .... ولو فضلت كدا أنا هغير رأى ويروحوا يبوعوها أحسن

وجيت باه علشان أتفرس .....


**أول حاجه عرفتها من جرايد اليومين اللي فاتو أن الأهرام منزله فى الصفحة الأولى
يوم الأربعاء 18 يونيو.....

وبخط عريض

مبارك أكثر زعيم يثق به شعبه بين شعوب العالم
استطلاع للراى فى اكبر 20دوله
94% من المصريين يؤكدون قدرت رئيسهم على ادارة الشئون الدوليه .

شوفتو الخبر دا بالرغم ان قرات تانى يوم فى الدستور أنهم قالو أن الجهه اللى عملت الاستطلاع دا

مش جهه رسمية وعملت العينه على 600 مواطن فى الاسكندريه والقاهره بس

وصاحب المركز دا معندهوش بطاقه اتخابات اصلا .... بس هو بيثق فى االريس...هجس صح


أنا باه بقر واعترف وابصم بالعشرين ايدى ورجلى ....أن خبر الأهرام صح مليون فى الميه

بس أنا متا كده برضو أنهم نسو بعض الكلمات فى الخبر العظيم دا ...

فانا هعيد الخبر بطرقتى دا بعد اذن الساده ....

ايوة اخدو كوبى واكمل .....اهو

مبارك اكثر زعيم يثق به شعبه بين شعوب العالم

بيثق انه بايعهم بالرخيص وكاتم على نفسهم
ويثق انه هيقضى على أزمة العيش بعدم وجود العيش نفسه
وبيثق فى انه السبب فى فساد التعليم
وبيق انه باع تراب والبلد وبالع الفلوس فى كرشه

بيثق أن سبب فى التلوث والأمراض سواء كبد او سرطانات

بيثق انه أصلا موجود فى الحكم ظلم وظالم وشعبه مظلوم
وبيثق ان مصر اتخربت وهتتخرب كمان وكمان على أيده

استطلاع للراى فى اكبر 20دوله
94% من المصريين يؤكدون قدرت رئيسهم على ادارة الشئون الدولية

ايوة طبعا انما عليه حتة دين قدره فى ازاى يبيع البلد لإسرائيل

ازاى يسكت والفلسطينيين وإسرائيل يتدبح فيهم ...

ومحتاجين علاج واكل ومش قادر يفتحلهم المعبر ....

ازى خلى المصرين متهانين فى الدول العربيه ... وبقى يتقلهم يا بتوع العيش

بدل ما كانو بيقلولهم يا بتوع الفول ....

ازاى خلى مكانة مصر فى الواطى ....وبقى دورها هامشى

ومنفضل لمعظم الاجتماعات العربية ....وبندارى عليه ونقول علشان العضمة كبرت

وال أيه ثقه .....كفايه كدا بااااااااااه اتفقعنااااااااااااااا ....


*** قرأت برضو النهارده فى أخبار اليوم أن الحكومة المصرية منعه الصيادين

المصرين من الصيد فى الوقت دا اللى فى نفس الوقت فيه سفن تركيه فى المياه الاقليمة

بتصطاد ....ويقلك دا موسم صيد التونة ....وهما بيعملو دراسات عليها ....

وطبعا كدب زى العادة..... وبقى الحكومة قادرة بالآوى

وينطبق عليها مثل اللي بيقول .... باعو السمك فى الميه....

باعو ارض وتراب والسمك فى الميه كمان ....

ودى باه مسخرة الحكومة المعفنه والواطية ....





الأربعاء، يونيو 18، 2008

تكرار مأساة دمياط فى كفر الشيخ

مهو لما فى حاجه بتتفتح بنكتشف بلاوى كتير ...الحكومة بتكون وراها

ومهما طالت المده او مهما عملو علشان تفضل مكتومة ومستخبيه ... بيجى يوم اللي بتنفضح

المهم طبعا عارفين موضوع البرلس اللي فى محافظتى كفر الشيخ....

وبلطيم المصيف ...طلع من سنه 2000 أن فيه مشروع الحكومة عبارة أنها تبيع رمل البلد دى

بصو أنا هقلكم وضع بلطيم أيه الأول .... غير موضوع الميه اللي مش متوفره

وغير موضوع الدقيق اللى حصل مؤخرا ... ودا كان جزء من اهالى البلد سببلهم ضرر اللى هما الصيادين

أما باقى البلد بيبقى زى اى بلد على البحر هما الكام شهر بتوع الصيف اللي بتعتبر دخلهم معظم أيام السنه

جنب أنواع مزروعه زى البطيخ والتين والعنب ... يعنى بلد بسيطة وحلوة وجوها هادى جدا ...

واعرف من زمان أن رملها مفيد جدا جدا لأمراض كتيره أوى

بس يعتبر مصيف بلطيم لجميع المستويات الماديه فيه الراقى والمتوسط والبسيط ....

وبرضو مكان نقضى فيه يوم جميل اوى .... بطبيعة أن المنطقة محدوده يعنى

والمكان دا والأهل البلد يعتبرو فى مرحله كان كلها .... الحكومة هتبيع تراب بلادهم

وصل بينا الحال أن الحكومة مش لاقيه حاجه تبيعها ألا تراب البلد ...

بس مش اى تراب ...تراب بيجيب ملايين وفى دهيه الناس ...

هتعمل المشروع ويقلك استثمار .... وكل الفلوس بلعاها فى كرشها ... واللى يحصل يحصل خراب

فى البلد والناس هتتشرد .... يعنى من الأخر هيتكرر موضوع دمياط تانى مع كفر الشيخ ...

يعنى لما دراسة المشروع تقلك هيبقى فيه 137 أثرا سلبيا و19 اثرا ايجابيا.

ويرجع برضو يقلك استثمار ....

يلعن أبو دا استثمار اللي يجى من وراه أمراض وتسمم وسرطانات

وناس تتشرد وبلاد تتدمر وتتشوه ويتلغى وجودها خالص ....

ودا كلو والحكومة ما يهمها حاجه إلا التمن اللي هتخده هيا ....


وطبعا هيبقى فيه شركات عالمية علشان زى ما يقولو هيبقى تكلفته عاليه جدا والله اعلم باه

طالما شركات عالمية أكيد المحروقة إسرائيل مش هتفوتها ...مهو كلو إشعاع ...

يعنى يوم ما الحكومة تهتم بحاجه فى كفر الشيخ تروح تبدا بالبيع ...

بصو أنا من رأى ( وأنا مش خبيره يعنى ) أنها تنقل كميه محدودة من الرمال دى

فى مكان تانى بعدي خالص علشان يستثمره زى ما بيتنيلو يقولو

( بشرط ان تكون الكميه دى محدده بناء على راى العلماء بحيث ما تضر البلد )

وبفلوس الاستثمار ترجع لأهل البلد ولأهل كفر الشيخ

علشان تحسن مستوى المعيشه وخاصه أن فيه قرى مبيوصلها ميه ومستوها فقير

يعنى الاستثمار يرجع الأهل البلد .... مش يشفطوه ومحدش يعرف عنها حاجه ...

وان شاء الله ميحصلش زى ما بيحصل فى دمياط ....

ويقلك حوار وتحضر ....


و أنا نفسي اعرف الحكومة دى عايزة توصل بالبلد لفين بظبط .... اكتر من اللي هيا فيه ....

غير أنها عايزة تحرق البلد باللى فيها ... هيا بتفضل تفنن أزى تستفز الناس ....

الله يحرقكم زى ما بتحرقو فى دمى .... يا حكومة يا معفنه ...



الثلاثاء، يونيو 17، 2008

نصيحه التوكيلات دى يعنى سرقه ...


بصو عايزاكم تدعو معايا على بتوع التوكيلات والصيانه دول ...علشان خلاص قرفت منهم خالص

وحسبنا الله ونعم الوكيل فيهم هما كمان ....

ليا موقفين مع بتوع الصيانه دول والاتنين تحسو انهم حرميه وما بيتقو الله فى اى تصليح

اول موقف كان من فتره يجى سنتين تقريبا او اكتر فى توكيل نوكيا فى المنصوره قابلتنى مشكله

فى الموبيل بابا مقتنع ان أحسن حاجه التوكيل .... المهم رح الموبيل للتوكيل ....قعد يجى 15 يوم

التصليح كان بكام 200 جنيه تقريبا المهم بابا وهو جبهولى لقيتهم كسرو الكافر ومركبينو غلط أصلا

بالرغم اللى نفس المشكله قابلتنى تانى وديتو محل صيانه عادى خدو منى 35 جنيه بس ....

دا كان اول موقف ... ومش مهم خالص .... فى دهيه الموبيل ....


تانى موقف هو الساعه بتاعتى الرادو بابا بصراحه وداها لواحد سعاتى قلو عايزة قطعة غيار

قال طالما محتاجه قطعه نوديها برضو للتوكيل علشان يجبها أصليه ....

وكانت صحبتى الفلسطنيه راحه القاهره ودتها للتوكيل فى العتبه فى عماره الاوبرا

( أنا عايزة اى حد يفوت من هناك يحدفهم بقال طوب فى دماغهم ويقلهم دى من همس )

المهم خدو 300 جنيه مش مهم .... اجى البس الساعه برضو بتقف وكانى متصلحتش

ودتها تانى لصحبتى توديها ليهم .... فضلت عندهم ... وبنت خالتى قلتلها هتيها

تتصل بيا من هناك ....وتقلى مش لاقينها .... نعم ...دا أنا أخلى سنتهم سوده ...

طب خدى كلمى الراجل .... هاتى يا ختى

هيا لونها أيه يا أبله .... مدهبه .... حريم ولا رجالى .... حريمى

طب متقلقيش هنلاقيها أن شاء الله ..... إهمال وغباء ...

طبعا يومها رجعت من غير ما تلاقيها .... وعلشان شهادة الضمان

كانت مع صحبتى الفلسطنيه ...رحتلهم ....وجابتها ....وللاسف برضو اشتغلت يومين

ووقفت .... يادى النيله .... مفيش فايده

بابا شك باه .....راح موديها للسعاتي المعرفه ....راح قالو ما تعملش فيها اى حاجه

وناقصه من جواها قطعه ....

بابا يتصل بيهم ....يقلهم ازاى اساعه ميتعملش فيها حاجه وكمان ناقصه من جوة قطعه

عرفت ازاى يا حاج ... الساعتى قالى لما لقتها مش شغاله بعد ما بعتها كذا مره

طالما اتفتحت بره يبقى مالناش دعوه وضمانك ملهوش لازمة عندنا ....

ولمابابا دخل فيهم شمال .... راحو قيلين ليه تعالى بس وهنرضيك ....

الحرمين كان بابا قاعد قدام جامع ....ز متخلفين حتى فى الرد


شوفتو يعنى الساعه باظت ....وما عدش حد عنده ضمير ....وسرقه ..

علشان الناس واثقه ان دا الضمان يبقى عندهم زمة ... وزمتهم أصلا بايظة

وال ايه يقلك مؤسسة الشرق الأوسط للساعات ...المركز السويسرى

جتكم القرف ....يا كدبين ...يا حرميه ....

وحسبنا الله ونعم الوكيل فيكم .... انا عايزة كل واحد داخل المدونة

ينشهم دعوه يصبحو الصبح مسروقين .... ومتلاقو حتى مفك تصلحو بيه



وكل واحد يكتب الدعوه فى تعليقه .... علشان غيظى وفرستى ترتاح شوية

لما اشوف باه .... مين دعوته مستجابه ....
يلا ادعو بزمة كدا ....شدو حيلكم معايا .....


الاثنين، يونيو 16، 2008

يادى ام الثانوية العامه ....

ما شاء الله..... ما شاء الله..... ما شاء الله

حصوه فى عين ما يصلى على النبى ( عليه افضل الصلاة والسلام )

غش هنا ..... وامتحانات متسربه على الشمال ..... وحدف ورق الاسئله من الشباك

وحلها وتصوير الاجابه وتوزيعها تانى من اليمين ....أما هناك مدرس ماسك ميكروفون وبيملى الاجابه



حاجة تفرج كدا .... أمخاخ ....وشجاعة ....على خوض معركة الثانويه العامة .....

ويعتبر فخر ...فخر ...وفخر كمان من عندى ...للحكومة الحولة ( شيلو النقطه من فوق الخاء وحطوها تحت )


وفى الأخر متعسبين أوى من اللي حصل .... ليه معرفش .... سم عليهم كدا ....


لو ما قلتش ان كل دا أصلا موجود من زمااااااااااااااااااااااان جدا ...

وفى جميع المراحل من أول الابتدائي .... واعدادى ....وثانوى ... وجامعه ....

أنا مقلتش اهو .....

هقول دى نتيجة متراكمة و طبيعيه جدااااااااااااا ..... لطريقه الحكومة فى التعليم ....

تعليم زى الزفت بكل المقايس والله .... عيال بتطلع من دبلومات من غير ما تعرف تكتب ولا تقرا

وطبعا كتير عارف المسابقة اللي حصلت علشان عايزين ناس تقرا عدادات الكهربا فعملو ليهم امتحان

صغنن كدا تحرير معظمهم سقطوا ....ومنهم يجى 44% تقريبا ما عرفوا يكتبو اسم مبارك ... أحسن طظ


وكل اللى يتنيل يطلع ... يعمل فيها شاملول ... يقلك أزمة الثانوية العامة

هيا الدروس الخصوصية .... الله يحرقكم

دا هبل يا معفنين .... الدروس الخصوصية دى من قبل ما العيل يدخل المدرسة وهو بياخدها

يعنى مش مستنى يا حيله اهلك يدخل ثانوى علشان ياخدها .... يا عالم يا هطله ....

المشكله تبدا من أول المدرسة والفصل والمدرس والوزير نفسه .....

المدرسة لاما قايمه بدور مشلوله وهتقع وطبعا غير مؤهله للدراسه من حيث الشابيك والمقاعد

حتى السبورة ...
لاما جديده وفيها كل حاجه من اوضة الحاسب الالى والمعامل

والحمد لله معظمها غير مستعمله ... اه والله العظيم .... منظر يعنى ...
بيخافو يستعملوها لعيل يبوظ حاجه فتبقى مسؤليه على اللى ماسك الحاجات دى

أما الفصل اللى يبقى عدده فوق 45 طالب وكلو متنحه لاما اصلا عنده سوء تغديه وانيميا

والاشف اكوام على جتته( وخاصه اللى بيتشغل فى الغيط ) ....

وقاعد فى يوم دراسى ممل وكتب ممله وتفقع القرد والله

ومات جواه حب العلم وانه حتى يطلع حاجه كويسة فى بلده علشان شايف قدامه أن مفيش حد بياخد حقه

أما المدرس هيعمل أيه ... تخيلو يجيب وقت ل 45 طالب انه ياخد غياب ويشرح الدرس ويدى تطبيق

ويعلم الكراريس غير حط درجات وتصحيح امتحانات وعمايل بروفيل وواقف دا كلو فى فصل يجب ضغط

غير دا كلو هيمتحن علشان يا خد الكادر ....يعنى الحكومة المعفنه كانت عملت امتحان علشان تزود الأسعار

علشان تعملهم دلوقتى امتحان علشان تحدد مين يا خد الزيادة ... حكومة متخلف ومعوقه والله

اما من حيث الوزير نفسه ... بصرف النظر عن شكله ...اللى يدى ليك أحساس كل مر بتشوفه

كانك بتتفرج على تلاجه بباب واحد ( اصلو قصير ) وانا اتوقع بعد ما يطلع من الوزاره

يروح ينضم لاعلان

يا لذيذ يا رايق بتاع اسبريت دا.... انا قلت بصرف النظر...

أن هو أصلا غير مؤهل لمنصب وزاره التعليم ....وعلشان الحكومة حوله زى ما بقول ديما

بتحط ناس فى أماكن غير مناسبه ....هو تقريبا خريج هندسه ( مش فاكره )

حطاه فى التعليم ليه ....فى ناس كتير خريجه أصلا تطور تعليم وطرق تدريس ...واساتذ جامعه

يعنى كل حياتهم تعليم .... عارفين طرقه مواطن الضعف والقوة فيه عارفين ازاى يتصلح ...


وشوية يقلك علشان الكل بيبص على المجموع وهو السبب علشان يدخل الكليه

امال هيدخل الكليه بايه حماره ...ربنا يشفى ....

اى دوله عايزة تنهض بالبلد ومستقبلها تهتم بالتعليم .... والحكومة الحوله دى العكس

تخيلو خفضوا ميزانيه التعليم 30% وبرضو البحث العلمى خس خالص
ومفيش وراهم الا الثانوية ويارتهم فالحين فى حلها ....

بس هنقول ايه حووووووووووووووووووووول ....

السبت، يونيو 14، 2008

انا ك . د من الحكومة الواطيه دى ...

طبعا كنا زمان نسمع عن سينا ....لا لا مش موضوع سينا رجعت تانى ليهم( إسرائيل ) ...

أنا قصدي توجيه الشباب ليها وفتح حياه بكل المقايس .... ومبارك عمل فرح ليها

وسينا ياجماعه ... وسينا هيا المستقبل ...

سواء من زراعه اللي أصلا هندخل مرحله الفقر المائى قريب

و الإسكان اللي أصلا مفيش حد معاه فلوس يشترى طوبة واحده حتى ...


وطبعا الموضوع دا كدبه زى اى كدبه من أفلام مبارك والحكومة ....
وبرالرغم ان اسرائيل اصلا خدتها بس مش عارفه قرات موضوع عنهم تانى ....

يا جماااااااااااااااااعه سينا دلوقتى بقت مزبلة إسرائيل ....

ويارتها مزبله عاديه ولا حتى صرف للببيه بتاعهم ....

بس شوفو باه الحكومة اللي تولع بجاز وسخ ....

سينا بقت مقبرة ومزبلة لمخلفات نووية .....

وبالرغم أن وزارة البيئة فضلت من أول القرن بتاع مبارك تنفى دا وتتنح

ألا أنها فى الأخر اعترفت أن إسرائيل بتدفن مخلفاتها النووية فى سينا

يعنى فى الحالة دى نقول أية....

باى منطق .... سواء دينى ولا انسانى ولا منطق حاكم حتى ....

أيه أم الحكومة المعفنة دى .... ناقصين أمراض ....

أيه السبب اللي يخليكم مجبورين يدفن فى بلادنا مواد مشعه بتجيب

أمراض مسرطنه زى الزفت ... مش كفاية الأمراض التانيه ...

بس للامانه الحكومة اللي ان شاء الله هتتسرطن كلها .... بتحط حد معين

وتم رفض شحنه اسرائليه ... شوفتو المسخره .... يعنى مش بترفضها علشان

أصلا مش مسموح بيه أنها تدخل بلدنا .....وأنهم عاملين على بلدنا .....

وكميه الأمراض والبلاوى اللي هتكون نتيجة للمواد المشعة دى ....

لا علشان نسبه الإشعاع عالى .... بصراح عندكم ذمة ...بس ذمه وسخه وزباله

حتى لو اشعاع اقل ولو هنحط نسبه ولو واحد فى الميه صدق من الهجس دا

ليه الكلاب دول ما دفنو زبالتهم عندهم .... غير ان الحكومة هنا غبيه ...

طبعا مضر جدا عليهم ....

حسبى الله ونعم الوكيل فيكم ..... خربتو البلد ....
انا ك د من الحكومة الواطيه دى ..









الخميس، يونيو 12، 2008

هنا البيع بالتجزئة .....

أيه اللي يجى على بالك أول ما تسمع أن السفير الاسرائيلى جالوا مرض خلاه متلقح فى الفرشه

وحياته مهدده بالانقراض ....أكيد هنحس بسعاده جدا ...وهنكمل وندعى عليه ....

شويه يدعو ان ربنا يعذبه فى

الدنيا وبعدها يموت ويكمل عذاب فى الاخره ...

وشويه هيدعو ربنا يكمل عليه بأمراض تانيه

لحد ما ما يلاقو ليه علاج ويتلقح لحد ما يعفن كدا ...

وغيرهم يدعو عليه ان ربنا ياخدو على جهنم عدل ....

بصراحة أنا من الناس الاخيره .... أولا معنديش صبر أصلا ...

وثانيا علشان سمعت ان اللى ربنا هيخدو كليته باظت خالص وعايز نقل كليه ضرورى جدا

والزفت كان عامل إعلان بيطلب متبرع بكليه مقابل مليون جنيه .... بس الإعلان ذكر انه رجل أعمال

طبعا فى ناس راحت بس عرفو من الممرضات انه الزفت الاسرائيلى فرفضو ومشو...رجاله والله ...

فدلوقتى متفق مع سمسار يجبلو واحد .....

يعنى دلوقتى بقينا بنتباع بالتجزئة .... على عينك يا تاجر ....وشغل على نضيف ....

يعنى ما يروحش يجيب من عندهم اى كلب ياخد منه

لا حسبها مع نفسه وقال عندنا اى كلب قمته أغلى من اى بنى ادم هنا ....

ومهما كان المبلغ هيبقى برضو ارخص

وارخص بكتير جدا ....من قيمه اى كلب فيهم ....

فقال اشترى بالفلوس .... وانا برضو الكسبان.... حتى لو زوت السعر ...

بس ياترى هيلاقى حد يبيعلو كليته ....وأنا متاكده أن هيلاقى كتير .... مش قصدى خيانه والله ...

الكل عارف الظروف .... فى كتير ليهم ألف مبرر ومبرر ....

واللى يقدر يمنع اى حد من يقوم بدا .... يبقى يديلو اللي محتاجه ....

وبعدين فين شيخ الأزهر يتحفنا بفتوه ويقول حرام ويعتبر جريمه ... وخاين كمان

طبعا ما يقدر واستحالة ينطقها .....

فى اى قانون فى البلد يعتبر اللى هيعمل كدا مجرم وخاين .... لا طبعا ...

يعنى مفيش قانون مشرع يمنع دا ....

نيجى على القانون الاخلاقى .... أخلاق أيه بظبط هنا .... مفيش أخلاق بتقول الناس تموت من الجوع

مفيش أخلاق تجعل سبب أن الناس ترتكب مصايب من قتل ورشوة واغتصاب وسرقه

علشان مش لاقيه العيش الحاف ....

فى بلد أصلا سبقت وبتبيعنا ليهم ....

لا قانون دوله ولا قانون اخلاقى ولا حتى قانون الرحمه تمنع اى حد يعمل كدا

طالما فى دوله مبتعرش و بتتعامل ألا بقانون الظلم والبيع

لو قلنا عليه خاين .... يبقى الحكومة خاينه أصلا ...وهيا اللى بدات بالبيع ....

أنا مش بشجع اه .... بس برضو ما اقدر امنع حد ...

عارفه كتير هيرفضو أصلا .... عادى كل واحد حر فى رايه ....

بس أيه رأيكم ....؟؟؟

الأربعاء، يونيو 11، 2008

بلاش افلام علينا ....

مش عارفه حكايه ربط اى حادثة اليومين دول

بقانون الحكومة طلعته .....

بالرغم أنها حصلت قبل كدا .... بس ليه علشان تبين أنها بتقر قوانين اللي فيه صالح البلد

بصرف النظر لشرح اى القانون ولا هو فعلا ضدنا ولا فيه صالح لينا ....

الحكومة بقت قاعده زى العمل الرضي ....اى حاجه تحصل .... تقوم شابطه فيه

وتفصل بتمصمص فى شلاضمها وتقول اهو دا أخر اللى بقول عليه .... شايفين

اللهى تشوفي اللى الشعب شايفه ....

طبعا سمعتو عن صاحب محل الدهب اللي أتقتل ....كان الأول يقلك فتنه ...

دلوقتى كل الإعلام أتوجه سواء مع او ضد الحكومة ....ويربط بين قانون الطوارئ

وبين الحادثه ... مش عارفه هيعمل أيه القانون دا

فى أمر واقع أصلا .... وحتى لو اتقبض عليه ...مش هيرجعو الراجل اللى مات

يعنى ميخنقوش اهلى باه ....

نيجى باه للزفت اللى راح موت عياله التلاته ..... الأول كان يقول دا مجنون

دلوقتى يربطوه بقانون الطفل ....اللى جى من بره ....

والحكومة هتتشل وتطبقو ....بالرغم التمثلية بتاعه مناقشته فى مجلس القفا

يعنى بلاش أفلام ولا تديو لنفسكم مبررات علشان تقنعونا بقانون انتو أصلا

متخدين النيه فى تطبيقه ....بلاش ونبى الأفلام دى

ومتخدوش من مصايب الناس وموتها وسيله لإعلام وترسيخ وجهة نظر يارتها

تكون فى صالح الشعب او نتاج فكرهم هما ...

إلا هيا قانون لاما لصالح لستمراريه الحكم والتوريث لاما قانون جيلنا من بره

أل أيه ازاى يضمنو حق العيال ... وليه الحول دا طيب

بالرغم أن دينا موجود من قرون .... وبيحثنا على دا


يعنى من الأخر أنا عارفه أن مفيش فى جتت حد فيكم دم ...ولا بيهمك كرهنا ولا استحقارنا

ولا بيهمك مين مات ولا أتقتل ولا راح فى داهيه ....

يعنى اتلمو وبلاش الأفلام دى .....جتكم القرف ....فقعتونى




الثلاثاء، يونيو 10، 2008

تموت الوساخه من بعدك ...

أنا مش عارفه ليه بلطيم دى حظها وحش ليه ....

كل سنه يحصل حاجه فيها ... بس بصراحه اكتر منطق فى كفر الشيخ بتقوم بمظاهرات مش عايزة أقول

أنها تكاد المنطقة الوحيدة اللي فيها شوية حركه كدا وبتنفس عن غظها وفرستها ....
علشان بقيت المحافظة اصلا فيها مصايب ومشاكل بس هيا فعلا المنطق اللى بتتحرك ....

جايز علشان عندهم حمدين صباحي .... بس فينه يشوف اللي بيحصل ..؟؟؟

السنه اللى فاتت قطعت الطريق الدولي علشان لما الصيف يجى بتتحول الميه لمنطقه المصيف

ولا حد معبرهم ....وطبعا مفيش حد يستغنى عن الميه حتى لو كانت ميه معفنه وتجيب الأمراض زى

ميه الحكومة الهببه دى .....

المره دى باه اسم النبى حرصه أبو شغلانة وسخه ( دا اعتراف منه بكامل قواه العقليه )

المحافظ يعنى حب يظهر نفسه فى المنطقه ....وقال يعمل حركة نص كم كدا

راح لاغى حصة الدقيق بتاعت الجماعة الصيادين .... طب مهما كانوا فى حالهم وبيقولو يا حيطه دارينى

لازم يقلب الحال كدا ويعمل قلق علشان يعجب الحكومة .... ويثبتلهم انه بكدا بيحلل الفلوس اللى بيخودها

ويقلهم اهو بشتغل ....وبطلع عين الصيادين الغلابة....

ولما الناس اعترضت باعتراضها برضو الطريق الدولى .... راح امن مركزى وبقى اى حد ماشى فى الشارع

يشدوه ...وخدو نا س من بيوتها ...

بس هقول أيه لما يقول شغلانة وسخه هتبقى طرقته هو أيه ....غير أنها تكون أوسخ ....

مهيا وساخة بوساخة باه ....

لما يبقى محافظ يبقى اسلوبة وطريقه فى حله للمشكلة انه يمنع عن الناس لقمه العيش ويطلع يقول شوية عيال

وأنها شغلانة وسخه .... هننتظر فى عهده الوسخ أيه باه ..... نتوقع الانيل والأوسخ دائما ...


فتموت الوساخه من بعدك يا محافظنا ...






الأحد، يونيو 08، 2008

تحيا النكسه ....

طبعا مر علينا اليومين اللي فاتو بذكرى ( مش اللى كانت بتغنى واتقتلت )

بذكرى الوكسة اللي هيا دلع النكسة

واد ايه ان شعب مصر مر بحاله نفسيه زى الزفت ( يجو يشوفونا احنا )

وان حرب اكتوبر ضيعت الاحساس دا

مين الاهطل اللى قال كدا ....نفسى اعرف

لو صدق فعلا وحسو بالنصر وانه رجعو بلدنا .... يبقى كدب فى كدب

ولو كان فى انتصار .... هيبقى انتصار وقتى ظاهرى .... وليس دائم وجوهرى ...

ايه اللى خدناه من من حروب قامت لاسترجاع ارض النهارده هيا محتله فعليا

عادى سينا متباعه لليهود.... وكأنها التكيه بتاعت اهليهم

اى مدينه سياحيه هناك مليانه يهود بيتعاملو احسن من المصرى صاحب الارض

وغير كدا شغالين خدمين هناك ويقلك دا اسمه سياحه ..... يا خى طظ


مفيش مصرى بيمشى هناك الا بجواز سفر .... كانه مش من البلد .... وغريب عنها

ليه قريبه بتحكى قدامى مره بتقول ابن اخت سلفت اختها ( شوفتو التوه دى )جى من شرم الشيخ ترحيلات

يعنى ايه يا جماعه ....يعنى جى لافف على الاقسام من شرم الشيخ للقاهره لطنطا لكفر الشيخ

ليه يا جماعه ....هو كان رايح يعمل ايه اصلا ....

عنده عربية ملاكى وقال اروح اشتغل بيها فى شرم كاجره يعنى ....وهناك مسكوه ولففه

ليه هو عمل مشكله ..... لا علشان معهوش جواز سفر ....

قصدكم تصريح عمل ....؟؟؟

لالا جواز سفر .....

يا جماعه مش معقوله ..... تلاقيه تصريح بس مخلوط عليكم الموضوع

والله جواز سفر .... ممنوع اى مصرى هناك يمشى الا بجواز سفر وعليه تصريح بدخوله شرم الشيخ

ويا عينى جى كانه لابس تهمه وعملوله كعب داير

يا جماعه هيا شرم الشيخ دى فى مصر....

ولا تقصدو مكان تانى ....

ياستى والله دا حصل .....ولا بنبالغ فيه

يا جماعه انا اعرف انها مليانه يهود والمصرين شغالين ليهم خدامين اى نعم وكلو علشان خاطر السياحه

بس علشان يدخل شرم الشيخ يدخلها بجواز واختام وبدنجان ....لا اكيد تهريج

انتى هتفلقينا ....والله حصل دا كله ....وابقى اسالى ....

ميكونش اتباعت ...ولا احنا مش فى مصر اصلا ....

انا بصراحه معرفش موضوع الجواز الا منهم ..... وماروحتش اصلا شرم .....والحمد لله

يعنى ما نعدش نبص باه على النكسه والزفت

وننسى الوكسه والخيبة اللى احنا فيها دلوقتى ....


وتحيا النكسه ....



الخميس، يونيو 05، 2008

مجلس قفا الشعب

طول عمري كل ما أتفرج على مجلس الشعب دا

أشوف حاجه واحده ......واسمع حاجة كلمة واحده

أشوف ناس رافعه أيدها ..... واسمع كلمه واااااااافقة....

أنا عايزة اعرف مجلس الشعب دا لازمته أيه بظبط طالما اى حاجه بتتطلب تتناقش

بيتوافق عليها ....

وحتى لو مافيش موافقة من المعارضة على الموضوع ....

طبيعى مهو عدد نواب الحزب الواطى ضعف المعارضة فى العدد يعنى لو فرضنا المعارضة
رفضت كله على بعضها الموضوع

والحزب الواطى وافق ... هتلاقو سرور يقول .... موااااااااااااافقة

ومفيش حد من الحكومة بيعبرو ويروحوا الاستجوابات ..... واللي بينام ويشخر ...


بلاش دا ....لو قلنا بلاش ظلم ... النايبين المدهولين دول بيعملو اللي عليهم ....

بيفرسونا سواء المعارضة ولا الحزب الواطى

يعنى كل النايبين والموكوسين فى الحزب الواطى تلاقى اديهم مرفوعه على طول ....

فى اى حاجه ... حتى لو فيها خراب للبلد ....

أما اسم النبى حارسهم المعارضة ..... بيفضلو يقدموا فى استجوابات منها الأهبل

زى فوق العشرين واحد مقدم استجوابات علشان دينا الرقاصة .... واللى مقدم من الأخوان

علشان مساله الختان دى .... يعنى خلاص البلد كامله وعدله ريحين يفقعونا ....

ويوم ما ربنا يكرمهم ويقلو على موضوع ..... وطلعونا على كارثة من كوارث الحكومة

ياعينى يفضلو يتشالو ويتهبدو مكانهم ومفيش فايده ....

بالعكس الحكومة والحزب الواطى هما المستفادين ....

جايبين للشعب ضغط والسكر من اللى بيسمعوه من استجوابات المعارضة ....

وخلو الشعب فى حاله من الهطل والتناحه ولا مباله بعد ما يسمعو كل مصيبة واختها

وما يقدروش يعملوا حاجه ..... غير عرقين فى نفوخهم يتنفخو وخلاص ....



يعنى ميتنفعش نسمية مجلس شعب ولا زفت ,......

نسمية مجلس مبارك .... اشمعنى دا مهو كل دهيه تلاقى ملزوق اسمه .....

مجلس الحزب الواطى ...... وعز اللى يجيله نغزة فى قلبو


او ممكن نضيف كلمه صغننه ......مجلس قفا الشعب ....

مهو الحزب الواطى والمعارضة فالحين يتصونا على قفنا واحنا مش بننطق


ودنيااااااااااااااااااا ( مش الرقاصة)


الاثنين، يونيو 02، 2008

هو لازم اى تغير يحتاج تدخل عسكرى ؟؟

قبل ما أقول كدا .......

أيه الحاجات اللي عايزين تتغير فى بلدنا ...؟؟

أظن كل حاجه عايزة تتغير ... مفيش اى وجه إصلاح ولا عارفين نعيش فى مستوى محترم

ولا عارفين ناخد حقنا ولو فقدناه مش عارفين نرجعه ...

طب مين السبب فى دا .....؟

طبيعي أنها تكون الحكومة والحاكم ...

ولو قلنا بلاش نظلم ....يبقى مجتمعين كلنا أنهم السبب فى استمرارية الوضع

اللي أحنا عايشين فيه ومش كدا وبس لا فشلت فشل زريع فى الحلول

طب أنا عايزة اعرف التغير ازاى ...؟

أننا نختارهم ودا عن طريق الانتخابات وبما أن الحكاية دى

تزوير وكدب فى كدب وتمثيل ....

والحاكم حابب ومتمسك بشعبة أوى لمده 27 سنة

لدرجة انه مش مصدق أننا عايزنة يرتاح ويحل عنا ...

وبما أن حصل تغير فى الدستور والاستمرارية العمل بقانون الطوارئ

اللي الكل بياكد أن كل اللي بيحصل دا تمهيدا لتوريث الحكم ....

فانا عايزة اسأل سؤال محشور فى زوري

إل الدستور دا معمول لمين بظبط .....؟

يعنى مش هو محطوط علشان يحدد مسئوليات الحاكم

ويضمن حقوق الشعب ولا أنا غلطانة ...

يبقى مش قدمنا ألا الدستور يجبلنا حقنا

ودا يخليني أروح أسال سؤال عايزة حد يجاوبى عليه ....

هل الدستور بيدينا قانون نحاكم الحاكم لو اثبت عليه تقصيره فى حق شعبه والوطن ....؟؟؟
وطبعا مش محتاجين أسباب انه يسال السؤال دا ...!!!!
طب لو فيه

ليه ما نستخدم القانون دا ....
ولو فى حاله انه يدينا الحق فعلا لدا ....
هل نقدر فعلا يحصل دا .... ؟؟؟

ونبقى ناس متحضره زى ما بيقولو ونتعامل بالديمقراطية

هل فيه قدرة شعبيه وقياديه تطالب بالحق دا طب لو مفيش ...؟
أظن أن دا ظلم جامد لينا .... ازاى القانون والدستور يدى حق الاستمرارية لحاكم
مع ارتكابه أفعال أو سمح بحدوث أفعال نتيجتها تخلى البلد
ترجع لورا وتعيش حاله فوضى وفقر ...
دون ما يدينا الحق فى عزله ومحاسبته ....وعقابه لو وصل الأمر لكدا ....
طب لومقدرناش نعزله ......
واستمرت الحياة فى مصر كداوهو فضل مكانه والخراب استمر ...

هل الحل هو سيطرة عسكرية ؟؟؟
هل نقدر نعمل دا....هل الحياة فى مصر أصلا تسمح بدا ....؟
ولا هنلاقى ناس تقول هنلاقى نفسنا زى العراق ونلاقى أمريكا محتليانا وبتقتل فينا ...
لا طبعا مش هنعمل زى العراق ....
أولا: معندناش سبب مباشر وحتمي زى حكاية النووي دى فى تدخل أمريكا فى الموضوع دا
وبعدين دا شأن خاص داخلي ولازم قيادات التغير يبقوا على قدره فى التحكم والسيادة
ثانيا: أحنا لما هيبقى فيه تغير أكيد هيتحط جميع الظروف فى الحسبان ....

علشان يبقى فى تغير قايم صح ومش عشوائيولا هيكون اندفعنا نحو التغير ....
لمجرد التغير ...أو ناس حاسة بملل ..... دا مستقبل بلد يا رجاله ولا أيه ...؟؟
ثالثا : الله يرحمك يا صدام .... أرجو قرأت الفاتحة على روحه .....
ولا فكره التغير والانتصار على الظلم واخذ الحق .... هو بالضرورة يتطلب تدخل عسكرى ....؟؟؟
مينفعش سلمى كدا .... مش علشان هقول أحنا متحضرين وبس ( احم احم ) ...

على الأقل مفيش حد ليه سلطه أو تأثير على الجيش أصلا
ولا فكرتى دى وخداها من تاريخ مصر أن اى مرحله تطلبت ثوره وتدخل عسكري .... جايز صح

ولا هنغلط ونعمل زى الحكومة واى حاجة نحشر الأمن ....
ولا هيجى اليوم اللي فعلا يجى التغير من الشعب ....والقرار قرارنا أحنا ...؟؟؟
يعنى ندخل على اى حاكم كدا ونقلو معلشى أصلنا عايزين الكرسي اللي أنت قاعد عليه ....

الموضوع طق فى بالى ....حبيت أقولوا ....

تعتبر نتيجة يأس ( 27 سنه صبر كفايه باه)....

وحبيت أشوف هو فى حد فكر فى الموضوع زى ... ولا لاء

ولا هيا الحكاية مش مستاهل تغير أصلا .....والدستور كتر خيرة ....
متظبط على المقاس بظبط .... يغير اللي مش عاجبه واللي فيه مصلحته ....
زى قانون الطوارئ ....وديتها استفتاء .....
والله شكلي هيست على الأخر ....
وأحلام اليقظة والمخمودة وخده حقها معايا على الأخر ....