السبت، نوفمبر ٢٩، ٢٠٠٨

مقتطفات يوم الجمعه

بالرغم ان كنت مفتقده جدا جنتى ( الدكتورة جنه صاحبه مدونة جنه )
ونونا ...صاحبه مدونة الطفشان قصدى مدونة المهاجر
وكيكى بطتى صاحبه مدونة فكك منى عوووو
بجد كان نفسى اشوفهم اوى
واشوف بابا ابو خالد .... بس وربنا فكرنهم ومعانا طبعا
وان شاء الله نشوفهم على خير
بس يا اخونا ..... بصراحه قضيت يوم حلو .... وما بطلتش ضحك وتهريج
ومن اول ما شوفت زهرة الجنه ( مدونة يوميات واحده مفروسة جدا ) فى المترو
ولحد ما فضلنا نسال علشان نوصل للمسجد ...وهيا مصدرانى اسال الناس جيالها انا من الكفر علشان اوصلها
المهم وصلنا الحمد لله ولتقينا بالبنانيت ... واولهم طبعا نهر الحب وهى فوضى الاخوات البورسعدية
وفرحت جداااااااااا لما قعدت جنب ماما امولة ووجعتلها دماغها من تهريجى .... بس بجد بجد حبتها ...
طبيعى هيا من الناس اللى اول ما تشفوها تحبوها....
واتقابلت مع مدونة فضفضة على السريع اللى هيا فضلت تضحك معايا ونهرج وحسستنى انها عرفانى وفى الاخر طلعت بتشبه عليا
ههههههههههههههههه .... بس اتصاحبنا ....ودمها عسل جداااا
ودا كلو وزهرة قايمه بدور سنترال متنقل .... كل شوية تليفون .... كلمنا البت نونا علشان نغيظها هههههههه
وكلمنا بابا ابو خالد ..... وبخ عو كيكيى بطتى كلمتنا ....
وبصراحه البت زهعرة دى كانت شاربه حاجه غير طبيعيه كل ما اكلمها الاقيها منفجره من الضحك مش عارفه ليه
ادعولها بالشفا .....هههههههههههههههه
وشوفنا طبعا ابى ودليا ....
واول ما شوفت الاستاذ خالد ( همس الاحباب ) حلفت لافرسو زى ما قلى هتيجى تفرسينا ...... وهريتو صور بصراحه
بس ما رضتش انزلها ..... كلها يعنى .... بس دى صورة اخدتهالو وهو قاعد جنبى ..... وبيضرب كوبايه حمص الشام
ال ايه تصبيره على ما البيتزا تيجى ..... بالف هنا يا ابو هموسا ..... اضرب اضرب ....
ودا احمد الصباغ .... محسسنى انه قايم بدور عارض ازياء .... بس لو كنتو شوفتوه قبلها .... تعالو بصو بصو كدا

دا وهو بياكل .... وانصح اى حد ما يعرفش احمد وهو جعان .... بس فى الصورة
يحسسك انه قنوع جداااااااا ... وملهوش نفس للاكل خالث مالث ....

بس هنا باه اللى يشوفو يقول هو وهو فى لحظة تجلى رهيبه .... بس دا اثر الجوع عليه .... اصل بصراحه كانو رخمين اوى
واخرو الطلبات اوى ....


وطبعا اللى منورين اوى .... شفقا واحسان بيك .....وسعيده انى اتعرفت عليهم بجد....





ودا الباحث عن الحقيقه .... وبدعيلو يلاقيها يارب .... وكان قايم بمجهود خارق فى حكايه الطلبات .... اتعذب والله هههههههههه



ودول باه صورة للشباب ..... محمد واحسان واحمد سكر والباحث واحمد الصباغ وخالد باشا




طبعا مش عارفه انزل صور تانيه علشان فيها صورنا ,।,, بس كان يوم لذيذ اوى ...
ويلا ان شاء الله نتجمع على خير ... ونتجمع كلللللللللللللللللنا ....






الأربعاء، نوفمبر ٢٦، ٢٠٠٨

يوم الجمعه يوم حلو اوى

بصو يا جماعه عرفت من زهرة الجنه صحبتى فى الفرسه ونونا
ان يوم الجمعه اللى جى ( بعد بكره يعنى )الساعة 11 الصبح
هنتجمع ونصلى مع بعض ...فى جامع الزهراء
وبعد المحايله على الحاج هيما .... وافق ....
ويارب فعلا اروح زى ما انا عامله حسابى وما يجد جديد
قلت انشر الخبر ودا اضعف الايمان اهو اخد ثواب ولو حتى صغنن
ويارب نتجمع فى الخير وعلى خير ديما
ولزيادة المعرفة بالموضوع
هيبقى يوم حلو جداااااااااااااااا من كلو .... هنتجمع فى حاجه خير
هشوف اصحابى المدونين اللى قابلتهم فى رمضان .... اى نعم مش هشوف نونا صاحبة مدونة المهاجر
وكمان بابا ابو خالد اللى بجد كان نفسى يجى واشوفه .... بس اكيد هما برضو معانا
اكيد الايام جيه كتير ....
وياريت الكل يشارك فيها .... بجد حنحس احساس حلو اوى جوانا
يلا ادعولى اجى فعلا .... وما يطلعلى اى حركة نص كم كدا وترزل عليا ....
يلا اشوفكم على خير

الأحد، نوفمبر ٢٣، ٢٠٠٨

الازهر ....يعنى قميصة نوم حمرا

فى حاجات بشوفها بضايقنى وابقى عايزة اخنق حد ساعتها علشان مش فاهمه ليه بيحصل كدا؟؟؟

طب يا جامعتنا هو الطبيعى يحصل دا ؟؟؟؟

اللى بيحصل دا يتسمى ايه بظبط ؟؟؟؟ ومحدش يقلى تطور ...

علشان اللى بيقول كدا هو اللى طووووووووووووووور ومن فصيل الناطحين فى الارض ...

من قيمة اسبوعين كنت راجعه من المنصورة وانا فى الميكروباص والسواق وقف علشتان يعدى مينى اتوبيس

فلقيت مكتوب عليه ( معاهد اللغات الازهريه ابتدائى واعدادى وثانوى )

دا على ما اذكر ...او بمعنى اصح ما مضمون اللى كان مكتوب عليه ...

قلت ايه الهبل دا ... ايه اللى جاب اللغات للازهر بتاع اللغه العربيه الصميمه والفقه والقران

هو انا مش عايشه فى البلد ولا ايه .... خلاص وصل الانحلال والهبل للازهر هو كمان

الازهر اللى بيجيلو ناس من جميع العالم علشان يتعلمو بس اصول اللغه العربيه

الازهر اللى يعتبر شئ جميل ومحترم اى حد فينا مصرى يشرفه انه فى بلده

عملو معاهد خاصه لغات باسمه علشان يلمو شوية فلوس .. .. ايه المسخرة دى

بيتاجرو هما كماااااااااااااااان ... بتاريخه الدينى واسمه المحترم ( سابقا طبعا )

ويومها قلت بلاش تبالغى يمكن انتى يا بت يا فى غيبوبة وما بتفهمى حاجه

وبالرغم انى كنت ناويه الحوار دا بس لاتهم بالضلال والجهل وممكن التكفير كمان

وابان باه وحده من ارياف وما بتفهم حاجه .... بس لحد دلوقتى حالا وانا بلف على الاخبار

قرات الخبر دا معهد بريطاني بجامعة الأزهر لتعليم الرقص وإقامة العلاقات مع الفتيات


قلت اشطه .... اهى دى الحلاوه ....ال ايه كنت بقول لغات ... دول تفوقو على نفسهم

وبقى الازهر وسطو سايب على الاخر ....

وربنا انا اتحسرت لما قرات كدا ... وربنا يسترها وما اتشل من ولاد الجزم دول


انا حاسه ان العده الجوانيه من مراره وطحال وقولون عندى هيشتغلو بشغل يدوى

بالمنفله يعنى .....


فى ايه حصل فى الدنيا يا ناااااااااااااااااس ؟؟؟؟

الازهر بقى كدا .... اللى المفروض يبقى مكان نرجعلو لما تضيق بينا الدنيا

مكان فيه نور وبيدعو للنور وبيخرج نور للناس فى جميع العالم ....

يجى يوم يبقى فيه قميص نوم واحمر كمان ( يعنى بقى بالالوان يا فضحتى )آ
وبيدعو للرقص والخمرا ...

واكيد هيخرج جيل جديد من اطفال الشوارع ...على ما العيال تتخرج

المطلوب اعمل ايه يا ناس ...اشد فى شعرى واضيع اخر امل انى اجوز بيه

يارب بحق حسرتى دى .... تحسر اللى كانو السبب ويتشلو فى تفكرهم وايدهم ولسانهم

ويارب نزل عليهم عذاب الدنيا قبل الاخره ....ورينا فيهم أيه فانهم لا يعجزونك



الأربعاء، نوفمبر ١٩، ٢٠٠٨

عباقرة واحنا ظلمنا غبائهم ....

دا موضوع جديد فى مدونة رابطة المتفرقعين
**************
لما بطرس الغالى يترشح لابصر ايه عالمى .... اللى لف على تلت وزارات والتلاته مخروبين

مش بسبب لسمح الله فشله العميق والمتاصل فى ذاته العبيقة .... وسبحان الله من ساعة ما الخبر انتشر

والحمدلله اقتصاد العالم اتخرب

لا طبعا علشان بس احنا اصلا مش وش نعمه .... والدليل على كدا ترشيح الوزير المتحنط

اللى هو بعد مبارك فى اللزقة فى منصبه فاروق حسنى بتاع البدنجان

اللى برضو يترشح ....ويتقطر فى منصب عالمى برضو .... بالرغم ان اصلا ملهوش لزمة هنا

والثقافه فى عهده انحصرت على افلام المسخرة والمهرجانات الهبلة والكتب الجنس ...

ومصادرة الكتب المحترمه وموت كتبها المحترمين والمثقفين من غير اى تقدير من الدوله

لسبب بسيط انهم رفضو التخلف والظلم وقالو لاء ...

دا يمكن ظلمناهم ويمكن برضو احنا عالم مبنفهمش حاجه بالنسبه لعقليتهم العبقريه المستفذه االمشلولة

انما اقرا ان مصر تفوز بجائزة اليونسكو لتطوير التعليم لعام 2008...

لا دى باه كدب يا ولاد الهبله ... تطور ايه للتعليم .... هو اساسا فيه حاجه اسمها تعليم

دى العيال بتطلع من دبلوم ما بتعرف تكتب اسمها ..... بلاش كفايه لحد الان كل وظيفه وزارة التعليم

كادر المعلمين .... وتعاقد المدرسين بالحصه والاجر .... ولحد الان فيه عجز كبير فى المدارس

تطور ايه ومعظم مدارس مصر قايله للسقوط ....

تطور ايه واللى بيدرسو فى المدارس للطالبه ... من خرجى الدبلومات ومعاهد الخدمه الاجتماعيه

تطور ايه ويبقى العيل ما بيعرفش خاجه ولازم ينجح بحق القانون

بمعنى انه لو سقط سنه لازم السنه اللى بعدها

ينجح باى شكل .... ويقلك دا تطور

الظاهر احنا اللى ظلمنا الناس دى .... وانا عن نفسى هروح على كل راس واحد فيه وفى ايد جزمة

واديه بيها مش لسمح الله نيه اهانه لالا.... لا دا عتاب .. على انهم مش فهمونا ذاتهم الواطيه قصدى العظيمة

واننا غلطنا علشان ما فهمناهم كويس .... دا احنا خساره فينا .....

هما العباقره كدا بيتبهدلو فى الاول .... بس اكيد هيجى يوم والتاريخ هيزكر عبقريتكم اللى ودتنا فى دهيه ...

روح ربنا يخدكم وياخد امثالكم ونرتاح باه ....
حاجه تفقع

السبت، نوفمبر ١٥، ٢٠٠٨

الحزب الواطى بيوزع فى البلد بالعك

ايه الهبل اللى بسمعو دا .... دا هبلهم فاق وبقى مركز بالغباء والهطل

ايه حكايه ان الحزب الزفت الوطى ان يوزع بقايا املاك الدوله بالتخصيص على مواطنين


دا المفروض كل واحد يقوم يتحزم ويرقص ....
جتكم نيله دا انتو فشلتو فى توزيع العيش يا ولاد الجعانين ... جاين توزعو املاك بلد

مخ اهليهم وسخ .... عايزين يبيعو البلد باى شكل وباى طريقه ...اى حاجه تجبلهم فلوس

وطلعين النهارده يقلولك المواطنين ... طب فين ناصيبهم من زمان

عايزين يفهمونا ان الكام شركة اللى فاضلين هتكفى فوق السبعين مليون واحد

وماسكين بؤهم كلمة توزيع بالعك قصدى بالعدل زى اللبان

عدل انهو بظبط ما يكونش قصدكم عدلهم هما .... اه ونبى حوشو العدل اللى بيخر منكم

اللهى تميلو ما تتعدلو يا ازفات

عايزين يفهمونى انهم هيوزعو على الاخوان .... ولا هيوزعو على الشباب المعتقل وليه خلفيه سياسيه

وايه الشروط اللى على اساسها يقررو مين اللى ياخد ومين اللى ما ياخدوش

ومين اللى حط القوانين دى .... مبارك ...جمال .... حكومة زباله ....وحزب واطى

ولا ميكونش مجلس العبيد والمجلس المحروق ناقشو الموضوع دا .... اصلى ما سمعتش عنهم

ولا حتى ناقشوه .... هتلاقو اديهم اللى هتنشل عن قريب مرفوعه بالموافقه ...

مهما عاملين زى قراطيس الجوافه .....


انا نفسى افهم ...هو مش المفروض اى دولة محترمة لازم يكون ليها اصول ماديه علشان نواجه اى كارثه
ولا مش ضرورى

طب بطريقتهم دى ,... اللى هيا مش ضرورى .... هيحصل ايه فى البلد...

على اساس النهضة والاصلاح والمشاريع والمصايب والجوع والمرض .... ايه ناوين يفرضو ضاريب جديده وينشوها اسم جديد

انا بقترح ان يكون اسمها ...ضرايب الخيبه ....

وبعدين القرع بتعهم دا مفقوس اوى ..... دا لو فرضنا ان الحكايه دى هتتعمل ...شوفو قدمها اد ايه

اعلانات بالشئ الفلان وكع يا وزير الاعلام من ميزانيه الدوله ومن قوت الشعب الغلبان ....

والناس تجرى وياعالم الاستماره هتبقى ببلاش ولا بفلوس واطفحى مبلغ وقدره يا حكومة

وطبعا استحاله هتنجح ...يقومو باه يعملو لجان ....ومؤتمرات ....وتصريحات

والوسطة والكوسه ....وقورى يا حكومة ...... واطفحو يا شعب....

ولو فرضنا برضو بعد كدا والناس خدت اللى بيقولو عليه .....هايجى واحد ومش بعيد يكون

جمال اسم النبى حرصه ابن مبارك .... او حد من الحرمين التقال ....

يشتروا الليله حتى ولو دفعو اضعاف الاضعاف .... مهيا برضو فلوس مسروقه سابقا قصدى متخصخصه سابقا

والناس اتعادو من الهبل .... ويروحو جرى بايعين .... دا لو ما خدوها باى قانون ولا فرده بعد الفلم دا

وبعد كدا اى حد يطلب حقو ولا حاجه تتعمل فى البلد ...

الحكومة ترد وتقول اجرى ياااااااد وانتى يا بت العبو عند بتكم


ولا جيمى والحكومة بتعمل مصايب ....ورمو مصيبه الناس تتلبخ فيها ....

ولا مش عايزة الناس ترتاح باه من القرف دا .....

ولا هما صح .... واحنا اللى خرفنا يا جماعتنا .... حاجه تجيب خلل فى الدماغ

الاثنين، نوفمبر ١٠، ٢٠٠٨

الرجال كاااااااااااااالبحر

معلشى اليومين دول مشغوله حبتين ... بس قلت انزل حاجه كتبتها زمان
بدل ما اسيب المدونه يعشش فيها العنكبوت
فادونى ودانكم كدا
توووووووووووووووووت
لالا انابهرج .... يلا روحو اقراوها .... وبلاش دلع ولكاعه ....
**********
الرجال كالبحر...!!!!!!!!

يسع للكثير من الوهم.......
ويفيض بالكثير من الكذب.....
والمراة...!!!!!!!
تغرق فى الوهم والكذب بعد ظنها انهما السعادة والامان....

*********

الرجال كموج البحر......!!!!!!
لا يظل عاليا كما هو........
ولا يصبح فى الاسفل دائما.......
وليس له ملامح تحدد من هو......
المرأاة......!!!!
موجه تسحبها لداخلة لتغرقها فى حبه.....
وموجه اخرى تهدم ما اتمت بناءه من احلام على شواطئه.......
وفى النهاية تترسب احلامك داخل اعماقه.......
ولا تستطيعين رؤيتها الا بالنزول اليها......
ورغم نزولك وتضحياتك لا تتحقق ولا تقدر.......

***********

الرجال كالسفينة.......!!!!!!!
يبحر كما يشاء .......
واينما يشاء......
ليرسو على كل ميناء قليل من الوقت.....
ليلقى من اوهامه.......
المرأة.....!!!!!!
تنتظر بفارغ الصبر هذا اللقاء.......
وترسم احلامها بالوان حبها ........
التى بقليل من الماء تذوب الالوان ....
فتودع احلامها .......

**********
الرجال كالشراع....!!!!!!
يصبهم الخوف والفزع امام رياح شديدة.......
امام موجة عالية........
يهتز كيانه ........
ولا يجد امامه الا.......
المرأة...!!!!!!!
وهى الشراع الذى ينقذ نفسه به ...
ولكن بقسوة شد الحبال .....
ليثبت قوتة امامها....
وليس امام الخوف والفزع......

***********

والبحر ........!!!!!!
دمووووووع أمرأة......

******


الاثنين، نوفمبر ٠٣، ٢٠٠٨

جووووووووووو منيييييييييييييييييح

بقلنا فتره كبيره اووووووووووووى كل يوم نسمع عن إضراب ولا اعتصام ولا وقفه احتجاجيه

وكل واحد فيهم واقف قدام المكان اللي خنقينه فيه دا على أساس أن في أيدهم الحل والربط يعنى

ومعظم الحلول بتبقى مؤقتة أو تافهة أوى ... والناس يا عينى تيأس فتنفض


طب ما يروحوا للرااااااااااااس الكبيره ليه ؟؟؟؟

اللي في أيده كل حاجه فى البلد ..... ما عدا الإصلاح طبعا

يعنى مثلا العمال ولا الدكاتره ولا المحامين ولا المدرسين ولا الناس اللي على المعاش

دول كلهم بيعملو اضرابات .... واعتصامات .... وبالرغم من كدا كل شوية يطلع مسؤل يقول بؤين تطيب خاطر

والحقوق تموت ...والناس تنفض وتقول عملنا اللي علينا ومفيش فايده

طب ما يجربو كدا يخدو المدامات والعيال واى حد يقدر من العيله ويروحو قدام قصر العروبة ويبلطوا

طبعا بهجس ..... طب ما أكمل باه هجس

لو حصل وكووووووووول الناس دى راحت عملت الاعتصامات والوقفات بتاعتها قدام قصر المخروبة

أولا : مبارك هيعرف إيه اللي بيحصل فى البلد دا لو فرضنا أن غيبوبته ما فكت وفاكر أن البلد لونها بمبى

والشباب فل و الضحكة مفرودة على وشوشنا بمكوة رجل بتاعت شعبولا

فهنوصلو .... أن البلد لونها بقى اسووووووووود ....

ومعلم فى كل مكان فى جسمنا مصيبة وكارثة من كوارث عهده وحكومتة اللى تنحرق بجاز


ثانيا : هو اى نعم كدا كدا مفضوح ... بس أكيد هنفضحو بزياده

خاصه ان مش هيقابل الوضع دا بالحضن والمبوسة ..... وفى نفس الوقت استحالة هيعتقل الالاف

من الناس دى بستاتهم وعيالهم


فمن المتوقع من مبارك في الحالة دى إيه باه ....؟؟؟؟ قدامه حلين مفيش غيرهم

ودا من خلال هجسى اللى لسه مستمر .....


أول حل ..... هو عمل أباده جماعية .... وهيقول اهو هنخلص على شوية ناس

وسوف يطلق عليها التاريخ ..... ( دويقة قصر العروبة ..... عبارة قصر العروبة ....قطار قصر العروبة )

وتانى حل : اللي برجحوا لمبارك ... انه يشترى علبه ريييييييييييد بووووووووول

ويشربها فتطلعلو اجنحه فيطير .... ويقول للشعب ....
ريييييييييييييد بووووووول بيعطى جو منيييييييح


وهكذا كان نتائج التهيس والهجس اند الفرسه