الجمعة، ديسمبر ٢٥، ٢٠٠٩

هنفجرررررررررررررر

امبارح كنت بتفرج على الدكتور عصام حجى اللى هو عالم فى وكالة ناسا

واختصارا للحكايه ان الحكومة طفشتو ودا الطبيعى


بالرغم انه خلانى ابتسم واحس بفخر شوية ان فيه واحد مصرى فى وضعه كدا

الا اننى نزلت على جدور رقبتى لما فوقت من الحلم دا

على واقع انا عايشه فيه

فيه ناس سالتنى مش باينه ليه

وبصراحه كنت بدعى أنى افقد القدره على الكلام واصنج واطرش واتعمى

هتقولولى ليه كدا

اقلكم بعد اخرت صبرى واحلامى ام استك واسع

غير النحس المركز وسوء الحظ

انا قلت طالما انا مش هشتغل فى مجال التربيه الخاصه خلاص مش هشتغل

لا الفتره دى لقيت بابا وماما وكل قريبنا حتى بتاع الانابيب الخلاصه اى حد يعرفنى يقولى اشتغلى

اخرجى من البيت قاعدة البيت وحشه

وماما تقلى دا مستقبلك اقلها البركه فيكم ايه هتتبرو منى ولا ايه ... ابهات ايه وامهات ايه اليومين دول

تقولى يعنى هنعيشلك طول العمر ارد واقولها يبقى البركة فى المعاش هيكفينى الحمد لله

تقلى انتى هتقعديلى لسه لما تتجوزى الحياه صعبه ومش مضمونة يبقى حاجة تضمنى بيها مستقبلك

ارد واقولها هو فيه مستقبل برضو انتى بتصدقى الكلام دا

ثانيا العروسة الصينى ضيعت امل لينا فى الجواز

ثالثا هما الرجاله مخلوقين ليه علشان يشتغلو ويستتونا


وكله من الكلام اللى يحبط اكتر منه يشجع دا ورغم مجهوداتى

فى التلامه والرزاله والتطنيش الا لقيت نفسى مجبره

اند محدوفه حتة حدفه على مدرسه ببيه ..... اه والله مدرسه ببييه

هتقلولى فيه مدرسه ببيه .... اقلوكم اهى دى المدرسه اللى بروحها

يا ساده يا عيال المدرسه جالى فيها بلا فخر وبلا حسد على الخيبه

12 حصه بالاجر .... اسم الله عليا

فى مدرسه عباره عن دور ارضى شبه متهالك الرطوبه واكله دماغة ذات حجرات

عباره عن تلاته متر فى تلاته متر والرائحه السائدة هناك بصرف

النظر عن ريحه العيال اللى تقريبا مش بيستحمو الا القليل منهم

يا جمعتنا تخيلو ريحه المدرسه ببيه مش عايزة اقولكم ريحة بووووووووووووووول بالعربى


اه والله ريحتها تقرف والعيال شغالين طول النهار بووووووووووووول

ما علينا بحال المدرسه الحال اللى يحسر فعلا حال التعليم نفسه

كلنا بنسمع عن حال التعليم نفسه زفت .... انما اللى يشوف الواقع نفسه والله هيحبط وهيشوف الدنيا سودة اوى

انا مش بشوفها سودة عشان اخرتى كدا

لا دا انا بحمد ربنا ان بعرف على الاقل اكتب واقرا ...

وبعدين الحاله المستمره فى اهانه الركن الاساسى الا وهو المدرس نفسه

يعنى مثلا 90% من المدرسين فى المدارس ما بين شغلين بالحصه زى حالاتى كدا وفيهم عقد عادى وفيهم عقد

مميز ودا باه اللى الكل بيعزم انهم هيتثبتووووووووووو

وعلشان تتعاقد مميز لازم تمر بانك تكون على راس العمل اللى هيا مرحله الشغل بالحصه

وبعد كدا تتأهل للمراحل التاليه لاما استحاله تتعاقد لازم يمرمطونا

الحصه بتقف بتنين جنيه العقد العادى ملهوش مميزات وبيقبض 175 جنيه تقريبا العقد المميز 350 جنيه

وليها نفس مميزات المثبت

وممكن المدرس يصرف على الاقل كل يوم من تلاته الى خمسه جنيه مواصلات

وياريت بيركبو مواصله واحده الا ممكن يركبو مواصلتين تلاته

يعنى بيصحو من الفجر غير انهم بيوصلو المدرسه نفسهم تكون اتسدت عن التدريس اصلا

وياريت يكون اللى بيدرس بيدرس فى تخصصه اصلا الا نسبه كبيره جدا بيدرسوا غير تخصصه

واقرب مثال هو انا انا اداب تاريخ وبدرس حاسب الى

ومن هنا ندخل لصلب الموضوع وهو ان الحكومة بنت الكلب اللى كلت ودان اهلينا بانها حكومة زفت الكترونيه

الا انها حكومة تولع بجاز ان شاء الله قولو اميييييييييييييييييييين

المهم المدرسه اللى انا فيها فيها ست فصول ابتدائى من اول لحد سته

وكل فصل ليه حصتين فى الاسبوع حاسب الى

ومن اول اوله لحد رابعه ملهمش كتب دراسيه

ماشى ما علينا ..... المفروض يبقى فيه اجهزة كمبيوتر فى المدرسة على الاقل كل

خمسه على جهاز بلاش عشره بحيث يطبقو اللى بيخدوه او يمشو على مبدا ان فيه حكومة الكترونيه

الا المدرسه فيها جهازين جهاز ملهوش غير شاشه وكيب وفاره وجوز سمعات وملهوش كيسه اصلا

والجهاز التانى محتاج شويه صحه علشان يبطل يهنج ....

عشان حبيت اتفزلك ووديت العيال فى حصه قلت اطبق اللى بيخدوه

اولا هنج منى تلت اربع مرات .... مفيش مقاعد اصلا العيال يقعدو

عليها عشان يادوب مكفيه العيال فى الفصل بالعافيه وفيه اللى بيقعدو فى الدسك

اربعه واصلا اصلا المقاعد معدومة المقاعد يعنى متهالكة

بس يا اخونا دا كلو غير صوتى اتنبح عشان العيال تفهم ولا الهوى الا

واحده شافتنى جالى شلل رعاش قالت تجبر بخاطرى والحمد لله

دا كلو ومطلوب من المدرسين ياخدو دبلوم تربوى ودورة طرقه تدريس ودورة الاى سى دى ال

طرق التدريس الحكومة عملاها ببلاش

انما الدبلومة على ايام ما كنت اخدتها كانت المصاريف تقريب من 350 الى 400 بقت ب 1005 غير الكتب

ومواصلات برضو

يعنى دلوقتى زادت تلت اضعاف .... والدبلومة دى اجبارى على اللى مش واخدين كليه تربيه

انما الاى سى دى ال من 600 الى 700 جنيه غير الوقت والمجهود وتروح الدوره ويطلع على المدرسة


يعنى بيحملو المدرسه مجهود ويبقى مقسم نفسه بين مدرسه ودبلومات ودورات وقرف

غير انه معندهوش انتماء للمهنه عشان مش متعين فعلا وفى اى وقت ممكن يلغو عقده

او ما يتمش تعينه اصلا

اللى فرسنى ان دلوقتى المدارس قايمه على المدرسين دول وفيه عجز فى المدرسين طب ليه مش بيعينوهم

ايه ....انفار سارحين الغيط احنا

هتقولولى طب انا شايفه دا كلو وراضيه وبتروحى برضو

هقلكم هو شبه غصب الكل ضدى ومحسسنى انى متكبره

وانا كارهه اروح اصلا وغير كدا وكدا بطلع همى فى كل المدرسة

من اول المدير اللى بيلاقنى اروح براحتى على الحصه بظبط او قبلها بشوية

لحد العيال اللى الواقعه بيؤكدلى ان استحاله هيفهمو اصلا عشان ماده عملى والعملى مش موجود

غير عدم الفهم اللى بعض منه وراثى والبعض الاخر مكتسب بطبيعه المدرسه والعمليه التعليمية

وشكلو هيستمر ان شاء الله

انا عن نفسى بروح اقعد زى الباشا حتى التحضير بحضرو بالعافيه عشان

مش تخصصى ولا فيه كتب ولا فيه دليل معلم

وبطلت احرق فى دمى ولا ضميرى ينقح ليه

وذلك بطبيعة الجو التلج والرطوبة اللى بيخلى رجليه شبه زرقه فما بالكم العيال

وماما وبابا فضلو يدادو فيا مؤكدين نتيجه لتاريخى السابق فى المهنه

انى هعمل مصيبه وهبطل اروح

وكل يوم بيفوت يبقى عيد بالنسبه ليهم

وبرغم ذلك وعد منى ان المصيبه جيه جيه بس هيا مسألة وقت مش اكتر

عرفتو انا غطسانه فين

غطسانه فى حبة سوااااااااااااااااااااااد ومحبطة جداااااااااااااا

ومش عايزه اتكلم ولا اسمع ولا اتحرك من مكانى اصلا

بس تصدقو وحشتونى جداااااااااااااااااااااااا

دعوتك باه عشان انا فضلى تكه وهنفجر

الجمعة، ديسمبر ١١، ٢٠٠٩

كل سنه وانتى طيبه يا سميه

عيد ميلاد سميه يا جماعه
حبيت اقولها كل سنه وهيا طيبه
كل سنه وهيا قريبه منى
كل سنه وهيا صحبتى حببتى


كل سنه وانا بحبها



وكل سنه وهيا ورده فى حياتى



ويارب نفضل اصحاب طول العمر
ويصبرك عليا هههههههههه
ويارب ما تزعلى منى ابدا ادبا يا سمسمه

الخميس، نوفمبر ١٩، ٢٠٠٩

وكلين بالجزمة ونتغلب... طبيعى

ايه الهبل والعبط اللى شمل الكل دا

من حكومات وناس

وبرامج واعلام

اكتر من شهر ليه دا كلوووووووووو

علشان كوووووووووووووره

طيييييب ..... طظظظظظظظظظظظظظظظ فى دا كلو

وربنا عالم هبله

وكنت عادى جدااااااااااااا من كل اللى حصل

ألا الأدب اللي نازل على أهلينا

علشان شوية أوساخ ولاد كلب يهينو المصرين بره علشان كوره

وإحنا هنا فالحين نقول عروبة وزفت

ملعون ابو دى عروبه اللى تخلينا نتهان فى كل بلد شويه

ونعمل أحنا اللي عاقلين وما نتسرعش فى رد فعلنا

ليه يعنى ولا أحنا كحكومة وشعب خدنا على الاهانه من شوية جزم

مش فالحين ألا فى الوساخه والتهزيق فينا

مهو لو اى حاجه تحصلنا بناخد حقنا بنفس الطريقه مكنش اى كلب فى اى مكان يقلنا تلت التلاته كام

ايه هنفضلهم على نفسنا لحد امته

ولا هنستحمل تهزيق لحد امته

مكفاا اهانه وتهزيق وجلد وقتل

طظظظظظظظظظظظ فى الجزائر وفى غيرها وفى اى حد يهين اى مصرى لاى سبب

خلاص هندادى فيهم وفى العالم مقابل اننا نتهان ويتمسح بكرمتنا الارض

ايه القرف دا

وايه الطيارات اللى الحكومه بعتاها علشان تشجع

ايه الغباء دا ....... طيب بدل ما تبعت شويه ناس تشجع تبعت ناس تتعالج بره

تبعت ناس تحج ....

ولا احنا خلاص مش فالحين الا اننا نبعت ناس للكورة ونفشل

او نبعت مصريات تشتغل خدامين فى الكويت

ولو الحكومة بتاعتنا وسخه بنت كلب

وحكومات اى دوله بره اوسخ منها

يبقى اى مصرى اتحمل كدا وسكت يبقى اوسخ من الاتنين علشان خلاص جتت اهلو تنبلة

وخد على التهزيق

خلاص اتغلبنا بعد ما كلنا بالجزمة افضلو قلولنا حضاره وزفت

ملعون دا على دا عليهم ولاد كلب صيع
مهو مفيش حد عندو كلامة واكل بالجزم ويقبل على نفسه كل دا ويبقى ليه نفس يكسب

واحنا من هنا ورايح

نرفع شعار

علشان انا مصرى .... لازم ناكل طييييييييين من شويه وسخييييييييييييييييين

الخميس، نوفمبر ٠٥، ٢٠٠٩

هيا دى مصر

مهند ابن اخويا لقيتو مبعتر الجرايد بتاعت الفتره اللي فاتت على الأرض

بعد ما رقعت صوتين .....وعضيت الواد

بلمها لقيت تقريبا أخبار اليوم عامله تقريبا فرح لمبارك

وتعدد انجازاتة

قلت يارتنى سبت هنوده يعمل ببيه عليها بس افتكرت انه ديما متبمبرز

قلت ابصق..... قصدى ابص

ألاقى صورتة ولزقه فى قفاه ست أل إيه دى بترمز لمصر

أل صحيح يا ولاد اشمعنى بيصورو مصر فى صورة ست

مش راجل

فى اعتقادي .... أن مفيش راجل عدل مسك مصر أو عارف يشلط لمبارك

أو أن مبارك في عز إنجازاته عايز حته طريه

أو يمكن أن الست دى ترمز للشعب المصر ودى كنايه على أن الست ضعيفة

ومش بأيديها حاجه

ونتيجة لفشل اعتقاداتي الصحيحة المتفزلكة


قلت انسب صورة تتحط ورا وتعبر على مدى خيبة مبارك على مدى 30 سنه

هيا دى

مصررررررررررررررررر




قلتها قبل كدا
دى مصر وبتدعى عليك

الاثنين، نوفمبر ٠٢، ٢٠٠٩

تانجوووووووووو

من يوم ما اتفرجت على الفيلم الاجنبى عطر امرأه

للممثل ال باتشينو وانا بحب جدا رقصة التانجو

مش عارفه انا افتكرتها ليه النهارده

بس اهو حاجه قفزت فى دماغى والسلام

قلت اديها رغي وخلاص

بس تعرفو الرقصه دى رقصه حياه بجد

تلاقى الرقصه فيها هدووووء وفى نفس الوقت شقاوة وحركة

وتلاقى فيها رومنسية وفى نفس الوقت عنف بس عنف لذيذ

بيبين اد ايه الراجل رغم انه المسيطر الا انه محتاج مشاركة

تلاقي ان اللى بيرقصها انه عايش فى الكون لوحده

..........!!!!!!!!!!!!!!!!!


مش عارفه

ايه الحاجات الغريبه اللى بتيجى فى دماغى دى

ما علينا

السبت، أكتوبر ٢٤، ٢٠٠٩

ما اعظم تفاهة ميمو

طبعا الكل عارف برنامج واحد من الناس

فيوم الخميس اللى فات بصرف النظر عن الاماكن اللى بيجبها من عشوائيات

الللى بيحرق دمى بيها ... والله صعب اصدق لسه فيه ناس بتعيش كدا فى زمنا دا


مستضافين نور الشريف علشان الاشاعه اللى طلعت عليه انه لو مؤخده .....( محبش النميمه )

عموما تسأل فى كذا حاجه

وكان حوار عادى باه

لحد ما اتسال عن انه قام بدور حسنى مبارك

وبالرغم انه ناصرى الا من وجهت نظره ان عادى جدا يقوم بدور مبارك

ولا يطلق اعزائى على هذا نفاق طبعا

ما علينا مش دا اللى غظنى

ولا اللى غظنى اكتر انه لو اترشح جوجو مبارك هينتخبو

لو كان من ضمن المرشحين الدكتور البرادعى ولا زويل

انما لو عمرو موسى هينتخبو لو مش موجود هينتخب جوجو

برضو ما اتغظت ابدا خالث مالث

دا كلام تافه جدااااااااااااا ....

انما بجد اللى كان نفسى ابثق على وجه ميمو لو شوفته

ان نور الشريف اكد ان مره من ضمن المرات ان الرئيس مبارك اتصل بيه مره علشان

يقلو كل سنه وهو طيب بمناسبه عيد ميلاده

واللى يجيب جلطه اللى بالى بالكم ان عرفات الله يرحمووووووو مره نزل مصر مخصوص

علشان يمنع عرض فيلم قايم بدوره نور الشريف


مسمعش حد يتفزلك على اهلى ويقلى الفن والبدنجان وبيأثر فى المجتمع والزفت

علشان هقوم مدياه شلوط بالجزمة

يعنى يا حلة اهلك يا ميمو متصل بواحد شغال مبوسه فى الافلام وحتى لو عمل فن عظيم وبدنجان

تقلو كل سنه وهو طيب

وايدك اتشلت ترفع السماعه تحرك شويه البهايم اللى مشغلهم يشوفو حال البلد

تلاتين سنه زفت على دماغنا .... وعندك وقت تتابع عيد ميلاد نور

ايه الهطل دا والهيافه بتاعة حكمنا دول

ولا عرفات الله يرحموووووووووووووووووووو

نزل يمنع فيلم وسايب بلدو والدنيا تولع

محدش يقلى من حقهم دى الافلام دى تعتبر وثائق تاريخيه

انا بقه ارد واقول اللى يفكر يقلى كدا يا شيخ اتلهى

جتك واكسه ...

وبذلك اعزائى اكتشفت وانا عارفه ان اكتشافه معدوم وذلك نتيجى ليقينى لذلك الاكتشاف

اللى هو انا مكتشفاه من زمان

ان ادى ايه الواحد يكتشف انه اكتشف ان يقين اكتشافه ايام زماااااااااان

تأكد ألاوهو ان حكمنا اد ايه عظماء فى التفاهه والهيافه والعبط والهبل والمعيله .....الخ

والى هنا ننصب هذا الاكتشاف نصب اعيننا

علشان نكشف شعرنا وحوجبنا وندعى لنور الشريف فى عيد ميلادة

علشان اد ايه بين حب وحنية والحتة الطريه لميمو


الاثنين، أكتوبر ١٢، ٢٠٠٩

اكيد فى احسااااااان


اكتر حاجه بتريحنى وانا مضايقه اوى

ان اسمع سورة الرحمن بصوت مشارى

واكتر أيه بقف قدمها فى سورة الرحمن

(هل جزاء الاحسان الا الاحسان فاى الاء ربكما تكذبان)

بجد انا بحب جدااااااااااااا الايه دى

وتعتبر الايه دى تقريبا اللى بتخلينى اعرف اتعامل مع الناس

اى نعم لو اتعصبت على حد بجيب اجلوه وبمرمطو

بس جد الايه دى رااااااااااااااااااااائعه انا عارفه ان القران كله رائع والحمد لله عليه

بس الايه دى بجد جميله جداااااااااااااا وبتخلينى اشوف الناس حلوه ولسه فيه خير

بالرغم ان الواقع نفسه بيقلى غير كداااااااا

خلتنى اشوف اد ايه الواحد فينا بيبقى انانى اوى

ديما ننتظر من اللى كل اللى حولينا انهم يعملونا كويس او يسمحونا لوغلطنا فيهم

ديما ندعى ربنا انه يغفر لنا ذنوبنا

ففكرت ليه احنا مش بنحسن لربنا ولكل اللى حولينا

اكيد لو احسنا ليهم هنلاقى الاحسان

ليه ديما نقول محدش حاسس بيا ولا حد فاهمنى

وانتم لو دققتم شوية هتلاقو فيه اللى بيلجأ لينا علشان يفضفض علشان انت الوحيد اللى فهمو

ليه ديما نقول انا مش لاقيه اللى بحبه كارتباط او جواز

ولو دققنا شوية هنلاقى كتير بيحبوك جدا فليه متوجهش الحب اللى جواك لاهلك واصحابك ولربنا

ليه ديما نقول انا حزين ومكتئبه ومش لاقيه حاجه تفرحنى

ولو دققنا شوية هنلاقى انت سبب فى ابتسام حد ولا ضحكة من قلب حد ولا انك تخرج حد من هم ولا حزن

ليه ديما نقول احنا حظنا وحش وفشلت كتير اوى

ولو دققنا فى اللى اقل مننا نحمد ربنا ولو شوفنا اللى قريبين مننا نجحو فى حاجه

هتلاقى شفايفك ابتسمت وقلب فرح ليهم بجد ولسان بيدعلهم ربنا يفرجها عليهم اكتر

ليه نقول كتير نلاقى كدب ونفاق

ولو دققنا فى نفسنا هنلاقى اننا بنعامل الناس بصدق وبحب

ليه ننتظر ديما احسان الناس لينا الاول

ومانبدا احنا بالاحسان ليهم

ليه ديما لو حد اساء لينا نفضل شيلينها ليه وقلبنا بيسود اوى عليه


وما نركز على الحاجه الحلوه اللى فيه حتى لو كانت ابتسامته بس هيا الحاجه الحلوه

ليه ديما نركز على الحزن والهم والوحش

وما نفكر فى الحلو حتى لو كان مساحته قليله اوى

ليه بنبقى انانين اوى ونفكر فى ايه اللى بيريحنا ويبسطنا

وننسى اللى حولينا وايه اللى ممكن نعملو يساعدهم ويريحهم

ليه منبداش بالاحسان ديما

مهما حصل .... حتى لو احسنا لانسان وما احسن لينا فى وقتها

اكيد هيجى يوم ويحسن لينا ... محتاجين شوية صبر عليه بس

او اكيد هنلاقى فى يوم حد هيحسن لينا فى وقت هنكون محتاجين الاحسان دا اوى

حتى لو بعد فتره

لو ما لقينا احسان من بشر اكيد ربنا هيحسن لينا

وحتى لو ما لقينا الاحسان من ربنا فى دنيتنا اكيد هيحسن لينا فى الاخره

يعنى يقين اننا لو احسنا يقين واكيد هيتم الاحسان لينا

مش بالله عليكم الايه رائعه

واحساس رااااااااااائع جدا بتدهولنا

بجد بحس كل ما اسمعها بنقااااااااااااااء واحس ان جوايا خير وحب لكل اللى حوليا حتى لو عملونى وحش
فاكيد الاحساس بالاحسان راااااااااااااااااائع حتى لو بدون مقابل


الثلاثاء، أكتوبر ٠٦، ٢٠٠٩

علشان تعرفوهم لازم تستهبلوهم


طبعا اليومين دول

كاس العالم للشباب فى الكورة

وبصرف النظر ان مبارك نفض لصلاة العيد

والبلاوى بتاعت البلد

وراحت الصحه ضربة فى جتته وعمل الافتتاح

عادى جدا مهو لعب الكورة بقى اعظم شئ فى مصر ولازم ولابود الريس يشجع

مش دا خالص اللى فرسنى ولا حاجه

اللى مفرحنى فعلا حملة الاعلانات اللى عملنها علشان الناس تروح تشجع

حاجه تكسف ونبى ملايين طبعا تتصرف فى حاجه تافهه

ولو فرضنا الحملة عملوها بجنيه ونص مش مستشفى ولا طريق ولا مجايب دوا احسن

بس هنقول ايه للامخاخ الوسخه

ما علينا وبصرف النظر كمان للحمله اللى تعر دى

الاعلان فى حد ذاته بيحرض على ان اى لاعب يعمل حاجه غلط فى الحياه نسكت

وما نحاسبه علشان ال ايه لاعب كورة ..... ما طززززززززززززززززز


شوفت تلت اعلانات ... كل اعلان اغبى واهبل من اللى قبله

اول اعلان واحد الظاهر بيركن غلط العربيه وعلشان العسكرى بيشخط فيه

يروح ابو صوت حنين ينزلو اسم الاعب ويقول علشان تعرفوهم لازم تروح تشجعوهم


الاعلان التانى المدرب فى السينما ماسك التلفون وبيكلم بصوت عالى والناس اتنرفزت عليه

يروح يقولو البوء المعهودعلشان تتنيلو تعرفوهم روحو شجعوهم

والاعلان التالت واحد شايل اكياس بصراحه ما كملت الاعلان اظاهر مقلب صاحب المحل

ولا طالع غلط ...المهم تصرفو غلط

يروح المحروس قايل علشان تتنيلو وتعرفوهم روحو تشجعوهم

هو كان لازم يجبوهم فى مواقف غلط علشان نروح نشجعهم

ولا كان لازمتة ايه الاعلان اصلا

ايه العبط اللى وصلنالو دا

يعنى اى حد مشهور شويه يتنيل على عينه ويولع فى الدنيا

نروح نشجعوا علشان هيلعب كورة
فبتالى يا جمعتنا يا انفرنا
علشان يستعبطونا (نعرفهم) لازم تروحو نستهبلهو (نشجعهم)
وسلامات



الجمعة، سبتمبر ٢٥، ٢٠٠٩

وحشتونى جداااااااااااااا

وحشنى جداااااااااااااااااااا

معلشى الفتره اللى فاتت كان الراجل بتاع النت مطلع عينى

ومازال وربنا

وكان اللى مخلينى ساكته عليه رمضان وبعديه العيد

قلت خليه يرمضن وبعديها يعيد وبعديها يكسر اند اطلع روحه

وربنا يسترها وما يفصلو تانى

وكل سنه وانتم كلكم طيبين

معلشى جيت متاخره

بس اهو احسن مفيش

هيصو باه
اكيد وحشتكم
ملحوظة
هرد على التعلقيات بس النت يتظبط بس
يلا باه عواااااااااااااافى

الأحد، أغسطس ٠٩، ٢٠٠٩

تعددت المبررات والخيانه واحده

ليه الراجل لما يخون زوجته ....الست ممكن تسامح

انما لو الست خانت جوزها استحاله الراجل يسامح ويوصل بيه انه يقتلها ال ايه عشان شرفه

بالرغم ان الشرع والدين والقانون بيدو عقوبه واحده مفرقش بين كونة راجل وبين انها ست

حتى حساب ربنا واحد يعنى مش هيولع فى الست علشان خانت جوزها

والراجل هيلسعو بحاجه سخنه

ربنا نفسه مفرقش بين الراجل والست فى عقابه فى الخيانه

ليه باه نتقبل ان ممكن الراجل يخون انما الست لا

هقولكم انا الفرق

اولا: نسمع ديما لو الراجل عمل مصيبه يقول دا راجل انما البنت لا دى عيب

ثانيا : لو الراجل خان قبل الزواج او بعده مفيش حاجه هتنقصو

انما لو البنت غلطت هتبقى مش بنت ودا تبقى مصيبه وفضيحه

على اساس ان خطأ الرجل خارجه ... انما خطأ الست بداخلها


ثالثا : البنت من هبل امها لوخطبها شاب عارف وشبعان بنات هيجى فى دماغها الوسخه

دا ساب بنات الدنيا واختارنى انا ... انا اللى خطبت كلبوه ( قلبو)....

انما لو البنت عرفت شباب وحد يجى يخطبها

يتقالو لالا دى عرفت شباب الدنيا... مش كويسه

رابعا :: من اى حق شاب يعرف بنات ويمشى ويعمل اى حاجه بس لما يجى يتجوز

بيبقى عايز بنت لسه طالعه من الكرتونه جديده يعنى متعرفش قبلو حد

انما البنت لو عرفت شاب ويبقى من حقها تختار لالا دى اخلاقها وحشه وبتفرح لما الشباب يكلمها

خامسا : لو الواحد خان زوجته تلاقى مليوين مبرر

الست نفسها تقول دى نزوة وهتروح لحالها ... هخرب على بيتى ... طب لو اطلقت هروح لمين

محدش هيستحملنى حتى لو اهلى ... هودى عيالى فين ...

وتسامحه علشان جه اتاسفلها ووعدها انه مش هيكررها

ويتقال دا كويس بس الست اللى خان معاها هيا اللى ضحكه عليه ومش كويسه

غير يا عينى تجيب السبب من عندها ... لالا انا مقصره فى نفسى ... لالا انا لازم اتغير شوية

غير فى النهاية كتير اوى يسامح علشان الست بطبعها عاطفى

والمجتمع نفسه بيسامح

انما لو ست متجوزة خانت جوزها تبقى مصيبه سوده مش على المستوى الدينى بس

دى ست مش محترمه ... ومن غير سماع اى كلمه منها طخ انتى طالق

دا اذا كان ساب فيها الروح وما قتلها

وجوزها نفسه استحاله يقبل على نفسه انه يغفرلها

لاسباب تافه

مثلا الناس ممكن تتقبل راجل بتاع نسوان حتى لو متجوز

انما استحاله هتقبل ست بتاع رجاله وهيا متجوزة


استحاله يسامح علشان كرمته ورجولته المتنحيه طبعا يقبل بكدا

استحاله يلوم نفسه يكون مثلا سبب فى تقصيره هو اللى خلالها تتجه للحكايه دى

حتى الراجل اللى خانته معا ما يلومة

يعنى الرجل اللى اتخان والراجل اللى خانته معها ابرياء والست فى جميع الاحوال الوم يوقع عليها


ليه الراجل لا يلام عليه لو اقام علاقه قبل الجواز ولا بعده

والست ديما هيا الملامه فى جميع الاحوال

محدش يقول الست عايزة كدا

ماشى الست زفت وطين خليك يا راجل كويس ... مش علشان الناس علشان لو ما سمعت كلامها الست الكخه دى

هتستظل بظله يوم القيامة

ليه ندى الراجل مبررات للخيانه وتقبل من الناس ومسامحه من زوجته

انما الست مرفوضة من كلو

ليه الرجل ديما افضل فى الست حتى فى الغلط


الأربعاء، يوليو ٢٢، ٢٠٠٩

امراض مبارك الحيوانيه

انفلونزة الطيور

انفلونزة الخنازير

ومن يومين اختلى بتقلى دا فيه انفلونزة الكلاب قرياها فى الجرنال

وأخيرا وليس بأخير التيفود اللي ضرب في البلد

دا غير امراض الكبد الوبائى والفيرسات والسرطانات اللى بقو حاجه طبيعيه

دا غير الأنيميا اللى مسكه جتة الناس كلها

والإشاعة بقى اللى طالعه يقلك علشان المية الزفت اللى مليانه بلاوى

ولا الخضار والزرع اللى مزروع بمواد مسرطنه

ولا المستشفيات اللي بكتيرها تبقى زريبه بهايم

ولا الدوا المغشوش أو غالى واللي العيانين مش قادرين يشتروه

ولا الناس اللي ماحليتها الضا علشان تلحق نفسها لو حست بتعب

لالا

دا كلو أمراض مبارك

جبلنا البلا جتهو البلا


فدا عصر امراض مبارك الحيوانيه

والبقاء لله فينا

الاثنين، يوليو ٠٦، ٢٠٠٩

اه احنا ارهابين .... وبفخر


كان من العادى جدا نسمع اننا كمصرين بنتهان ونضرب بالجزمة فى اى دوله

والعادى اكتر ان الحكومة اللى لبسة طرح متعملش حاجه .... دا طبيعى

والعادى بوساخه ان الحاجه مبارك ولا يعمل اى شئ ... ويفضل فى سياسته الوسخة برضو عادى


انما يوصل بينا الحال ان اسمع ان ست مصريه حامل تطعن ب18 طعنه

لحد ما تموت هيا وابنها فى بطنها وكمان جوزها يطعن لحد ما يدخل العنايه المركزة

والحوار دا كلو فى محكمة ووسط قضاة وحرس وناس ومافيهم حد يحوش من اول طعنه

ويلحقو الست وجوزها .... دا بقى دا اسمه وساخه اوسخ من مبارك نفسه


ودا كلو ولا السفاره المصريه تهبب حاجه ... ولا حكومة بنت كلب تاخد موقف

ولا اللى متحنط وعامل نفسه رئيس يحترم نفس اهلو الوطية وياخد اى اجراء

ولا الهوا ... كانها هوا ....

انا محروق دمى حرقة .... ومتغاظة من ولاد الكلب دول

هو احنا خلاص رخاص اوى كدا وما عاد لينا كرمة .... فى ايه كل مره بتبقى انيل من اللى قبلها كدا ليه

بننداس فى بلدنا بالجزمة .... وننجلد وننقتل بره

واحنا نطلع نبعبع بكلمتين ونهبل شوية ... وبعد كدا بنضرب ونتقتل قدام الكل


فين باه الارهابين بتوعنا .... يورونا همتهم باه

يروح يفجرو كام حاجه فى المانيا ويفجرو كام راس

ونعترف للعالم اننا ارهاب .... احنا هبوس فى رجليهم ولاد الكلب علشان نقلهم احنا محترمين

وكمان يقتلو فيا .... دا حلال فيهم كل حاجه يعملوها باسم الارهاب

اه احنا ارهاب بفخر ... واحنا قتلين قتله .... واحنا بنبلع العيال الصغيره
طالما حكومتنا عالم وطيه ومعفنة
اه اللى يطولنى اللى قتل الست دى ... كنت ولعت فيه ... حسبا الله ونعم الوكيل


الأربعاء، يوليو ٠١، ٢٠٠٩

طريق الطلاق ولا طريق الحب

امبارح جيت تزورنا واحده قربتنا ... وهيا متجوزة من يجى عشر سنين

وهيا منقبه ومحترمة الا انها فى مرحله انفصال (طلاق) عن جوزها

وبالرغم اللى حكيته من معاناه وظروف الانفصال وحسيت فيها بحزن اوى

ومكنتش بتخبى بالعكس كانت بتحكى مواقف قابلتها وبالرغم انها استحملت

كتير اوى .... الا انها كانت مديانى انطباع انها متماسكة جدا ....

لحد ما اتغير الموضوع محاوله منى انى اخرجها من الجو الحزين اللى هيا فيه دا

وفتحت التلفزيون وجبت العاشره مساءا

فلاقتها بتقلى بتسمعى 90 دقيقه ... فقلتلها لا مش دايما .... قلتلى ليه

قلتلها اصلى بعاند معتز ... قلتلى ازاى قلتلها كل شويه يقلى فاصل واوعو تروحو فى اى حتى

فبغيظو واروح الحته اللى مسكهالى دى

فضحكت .... قلتلى دا من قيمة كام يوم كان جايب قصه حلوه

فقلتلها ازاى ... فبتحكيلى القصه ... عباره عن مهندس ديكور كان حصل خلاف مع زوجته

وبناء عليه طلبت منه لاما تسيب البيت لاما هو اللى يسيب البيت

وما كان منه الا انه طلب منها تفضل هيا فى البيت مع ولادها وسابلها البيت

ولمدة اسبوع وكان فى خلال الاسبوع دا كان بيطمن عليها من امها

وفى يوم طلب من مامتها تروح البيت عندها وتدخلها الاوضه اللى فيها بلكونة ويخلوها تبص من البلكونة

فى وقت معين متفقين عليه

وفعلا حصل دا ... والزوجه لقت عاملها يافطة من 12 متر طول فى 7 متر عرض

وكتبها كلام رومانسى وحاطت صورتها فى قلب وجابلها ناس تعزف كمنجا

وهيا اول ما شافت دا جريت عليه وحضنو بعض ...

يمكن حد سمع عن القصه او شاف الحلقه بتاعت معتز .... بس محدش كان معايا

وشاف طريقه قربتى دى وهيا بتحكيلى .... وحس باد ايه متالمة وحزينه جدا

لدرجه ان حسيت من كلامة ونبرة صوتها انها بتتمنى دا يحصلها ....

واد ايه مقدرة اللى عملو الرجل دا لزوجته .... يااااااه على الحزن اللى حسيته فيها

وبالرغم انها كانت مبينالى انها متماسكة وقويه ....

وهيا العكس خالص .... اد ايه انها لاحولا لها ولا قوة

اد ايه انها مفتقدة الامان والاستقرار فى عمرها دا

اد ايه منتظره فى اخر لحظة ان ربنا يهدى

وكلمة حنينه من اللى كان اقرب واحد ليها تحسسها ان لسه فيه خير فى الدنيا

حسيت فيها بانهيار كل شئ جواها وحوليها ....

ففضلت طول الليل اسال نفسى ليه فى رجاله تعمل كدا

ليه تقسى ... ليه يهين زوجته ام اولادة مهما كان الخلاف بنهم

ليه الحزن اللى هيا حساه دا كلو .... ياترى هتقدر تتكيف ازاى مع وضعها دا

ياترى مهما حكت اللى جواها حد هيحس احساسها ....


واتاكدت فى الاخر ... ان الراجل ممكن يمتلك عقل وروح وكيان السن بكلمة حلوة

بابتسامه يقابلها بيها ...

يحتويها فى حزنها ....

يسامحها ساعة غضبها ....

يساعدها انها متعملش حاجه حرام ....

يقدر حبها ليه....

يهتم بيها وبلاش اهمال وتجاهل ليها ولمشاعرها....


واى ست لو لقت جوزها عملها كدا .... عندها استعداد

تغفرلو اى سيئه عملها فى حقها على مدا عمرهم مع بعض

اكيد مفيش لا راجل ولا ست عندهم الكمال كله

لكن اكيد مع بعض هيلاقو الكمال

فليه الحزن اللى بيسببوه لبعض دا

وليه الكبرياء على السعادة ولا كلمه انا اسف


بالرغم ان كرهت جوزها دا اوى .... الا ان احترمت جدا المهندس اللى عمل لزوجته دا

لقيت الست واحد فى الموقفين .... بس الرجل الختلف

اتاكدت فيه حب فى الحالتين .... بس راجل حافظ عليه .... والتانى اتخلى عنه بسهوله

حسيت ان قربتنا دى حزينه جدا .... وزوجه المهندس فى منتهى السعادة

ليه
بنختار طريق الطلاق عن طريق الحب

الاثنين، يونيو ٢٢، ٢٠٠٩

أتركنى أحبك....


لا أريد أن تنظر أليا

فكفى نظرتك الاولى التى جعلتنى أسيرة

فتمنيت أن يكون أسرى كل العصور مثلى

******

لا أريد منك كلاما

فعيناك بحرا تفيض منه الكلمات

فأصبح الصمت فى محرابك عشقا

*******


لا أريد منك أن تاتى أليا

فأنا من كنت أبحث عنك

فاصبح قلبى بين يديك
*****


لا أريدك أن تضحك

فكفى أبتسامتك

جعلتنى أسيرة شفتيك

******

لا أريدك أن تقول أحبك

فدقات قلبك تعشقنى
فقط

أتركنى أحبك

الجمعة، يونيو ١٩، ٢٠٠٩

جواااااااااازى باااااااااااااطل ...( عايزة عريس سلف )

انصحكم نصيح لله ...ووالله ما بكدب فيها

مهما شوفتو حد عامل حاجه مش عجباكم ولا غلط ولا معصيه حتى

لا تلومو ولا تستغربو

كل اللى تعملوة تنصحو الشخص دا ... وتدعو ليه بالهدى والمغفره

وتدعو لنفسكم ان ربنا يعفكم ويبعد عنكم الموضوع اللى مش عاجبكم دا


ليه بقول النصيحه اللى ببلاش دى

اصلى كان ليا صديقه كان كل ما حد يكلمها فى ارتباط يبقى اصغر منها فى السن

وكان عندها استعداد والموضوع بالنسبه ليها عادى جدا

وكان تيجى تحكيلى كنت بعقدها فيه .... افضل اقلها ازاى تقبلى حد اصغر منك

يابنتى دا يعتبر عيل حتى لو اصغر منك بيوم

انتى متعرفيش العمر الزمنى للتفكير عند المراه اكبر من الرجل لو كانو فى نفس السن

دا حتى المثل بيقول الاكبر منك بيوم يعرف عنك بسنه

يعنى هتبقى فاهمه وعارفه عنه حاجه .... وهيبقى شاكله مش حلو

وكنت بفضل ورا البت لحد ما تتعقد والحمد لله والموضوع ما يتم


لحد ما انا اتحطيت فى موقف زى الزفت وربنا

انا مش عارفه الحكايه كل مادى بتلحوس معايا كدا ليه

الحكايه ان جالى عريس ....

وانتو عارفين لما يجلكم عريس عن طريق ناس وجواز الصالونات والكراسى دا خنقه وكدا

فضلت افقر فى الحكايه وارفض واحاول اطفشو

الا بابا وماما وانتو عارفين الاب والام فى المواقف اللى زى دى بيبقوا الفرحه مش سعياهم

ان خلاص بنتهم هتغور وهيرتاحو منها قصدى هيفرحو بيها

وبما انى فشلت فشل زريع انى اطفشو

وجبوه غصب عنى على اساس اشوف اقتنع

شوفتو قلت مش مرتاحه ومش عاجبنى .... هو اى نعم باين عليه طيب

واهلو ناس طيبين ومحترمين ...

بس كان عندى امل احب واتحب واجوز عن قصه حب وكدا

هبل صح ... عارفه بس قلت يمكن ربنا يستجبلى حاجه

المهم لحد كدا كويس

ومشو الناس وكانت امو عايزة تاخدنى وهيا ماشيه لدرجه انها جتلى اوضتى ومبسوطة

دا كلو وانا فى غايه الاستغراب مهما مش عارفين اللى فيها

اصلى مكنتش نطقت ال ايه فكرهم انى مكسوفه وانا فى الحقيقه مديلهم قفايا من خنقتى


ماشى كل الظروف مناسبه وماشى الحال بالرغم ان مش مرتاحه

قلت انا هصلى صلاة الاستخاره واللى يحصل يحصل

وبحاول اقنع نفسى باى طريقه .... والبيت متكهرب والنفسيه هباب

لحد ما جه السبب اللى خلانى اعلن الحرب على الكل

الا وهو انه طلع اصغر منى بسنتين ونص ....

اول ما سمعت كدا .... اتشليت اقلهم هو الاخ واهلو عارفين سنى كام

قلت لوسيط الهنا اللى جايبو .... يقولو اه

والراجل يقلو ... دى مش باين عليها سن خالص

واحنا تحت امركم فى اللى انتو عايزينو شقه وشبكة وعفش

وفضلو زن على ودان بابا

ويقلو ما الرسول عليه افضل الصلاة والسلام متجوز السيده خديجه وهيا اكبر منه

وانا اقلهم يا جماعه كان فيه علاقه شغل بين الرسول وخديجة وعلى الاساس دا لما لقه السيدة خديجه اللى اعجبها

فى الرسول من امانه واخلاق وحسه بالامان هيا اللى طلبه منه الزواج

انما انا كنت اعرفو اصلا وحتى لو عرفتو لا هو الرسول ولا انا خديجة علشان اطلبو للجواز

واستحاله هقبل

وانا دا كلو وانا الجنونه اشتغلت

وانا استحاله اقبل بالوضع دا واخد حد اصغر منى حتى لو ايه بالذى

وهما وبابا وكل اللى عارفين الموضوع مش شايفين الحكايه غريبه

ومرحبين بالموضوع اوى

وانا كل ما اسمع الكلام دا عفريت الدنيا تتنطط فى وشى وازعق

واعلى صوتى واتنرفز

وشويه اعيط ومكلمش حد ...

ولا فيه فايدة مع اى حد وكل ما بابا اصعب عليه ويلين شويه

حد يروح يقلو عادى واقبل ويضربولو امثله وقال الله وقاله الرسول

يجى يطلعهم عليا انا ويهزق فيا ويقلى انت كل موضوع قرفانى فيه

وشويه ياخدنى باللين ويقلى انا اب وعايز افرح وعايز اشوف عيالك قبل ما اموت

اى نعم انا فى مرحله العنوسه ...

بس معنديش قدره اتقبل باى شكل من الاشكال ان اخد حد اصغر منى ولو بيوم واحد

والدنيا ولعت فى الموضوع لحد ما بابا حلف عليا يجوزنى عافيا

وانا حلفت لو حصل اى حاجه عافيا .... اى نعم هو المحروس طيب وملهوش زنب

بس حلفت ان هطلعو عليه واخليه يكره ويلعن اليوم اللى طلع من بره بيبتهم


والمصيبه ان الكل محسسنى انى غريبه التفكير ورفضى واصرارى ومن المستحيل اوافق

ملهوش مبرر ولا منطق وانا مش وش نعمه

وانا نفسيا زفت ومش لاقيه حل علشان اول مره فى حياتى الاقى بابا بالعند دا معايا
زى ما تقولو فقد الامل في ان اتجوز وانا اقلو خلى عندك امل فى ربنا
طب انا زنبى ايه الكل يطفش ما عدا دا ويلزق اصبر يا بابا يمكن تفرج عااااااااااااااااااااا

بس صحيح هو انا اللى غريبه علشان برفض حد اصغر منى ولا كل اللى حوليا يغيظو علشان شايفنها عادى

ومبررهم الوحيد ان انا مش باين عليا سن .... اى منطق دا

انا مليش زنب ان جيه مسخوطة شويه ... كنت جايه ايام غلاء جابو منى حاجه بسيطة

اعمل ايه .... اكره نفسى ولا انتحر


بس الحمد لله فى اخر لحظة توصلت لحلين الاول

ان اعمل اعلان جواز فى المدونة .... معلشى يا جماعه انا مزنوقه فى عريس سلف

وعد يكون سلف .... ديتها اطفش بيه المرحوم باعتبار فيما بعد

وارجعو لاصحابو تانى .... وعد فعلا وعد

عارفه انكم نعمه الاصحاب ونعمه الوقفه فى المواقف اللى زى دى
التانى لو استندلتو فيا عايزة يوم الخطوبه تيجو البلد وكل واحد ماسك حاجه مولعه
ويقلو جوااااااااااااز همس باااااااااااااااطل
وانا هحاول ابلغ عن بابا

بجد انا نفسى ابطل عااااااااااااااااااااا دى

جالى جفاف من كتر الغم اللى انا فيه دا وربنا

قطيعه الجواز واللى عايزينو ....

السبت، يونيو ١٣، ٢٠٠٩

بيحصل كدا ليه ...


كل مرة انخدع في حد اقول بعدها انا كدا فهمت الناس

وبقى عندى قدرة ان احكم على اى شخصيه تقابلنى

بس للاسف .... ببقى كدابه .... بكدب على نفسى

فعلا مهما فهمت معنى الكلام من الناس

سواء المعنى المباشر ليه او غير مباشر القيه فى النهايه كدب فى كدب

مهما الاقى ناس بتبتسم فى وشى الاقى ورا الابتسامه دى نفاق وكدب

مهما احاول اقرب من ربنا او لو غلطت واستغفر ربنا واحاول ما اكرر الغلط

الاقى ناس تدينى مبررات وتشجيع على حاجات متاكده انها غلط

بس فى نفس الوقت الاقى الناس دى بتعملها وبتدينى امثله لناس تانيه عمله نفس الحاجات دى

ومفيش حد معترض عليهم واشوفهم كسبو حاجات انا خسرتها قبل كدا

عارفه ان الكل هيقول بس خسرو رضا ربنا

بس هقول كلنا غضبنا ربنا وانا اولكم الا من رحم ربى ودا يعتبر ملاك وما اظن ان فيه ملايكة بنا اصلا


مهما اتكلمنا مع الناس بحسن نيه وبصدق المنتهى بس للاسف الاقى كدب وتمثيل

نقابل ناس يدونا وعود كتيرة من غير ما تطلب منهم الا حبهم وصدقهم وفى الاخر نلاقى الكدب

نقابل ناس نحبهم فعلا ونودهم ونتمنلهم الخير ونفضل ندعيلهم من قلبنا ربنا يوفقهم

ويفرجها عليهم ... واول ما يفرجها عليهم ... اول حاجه بعملوها بنسونا احنا

ولا قدرو حبنا ليهم واول احساس يوصلنا اننا اصلا ما كنا في يوم عرفنهم صح


بجد كل فتره انخدع فى ناس ليا وكانو يعتبرو اقرب واعز الناس لقلبى

برجع الوم نفسى اوى .... ليه اثق فى الناس كدا ... وليه اكلمهم بحسن نيه اصلا

وليه اخد كلامهم صدق .... ليه اديلهم مبررات لمواقف كانت ممكن تورفر عليا وجع كبير اوى

وليه لما يسيؤ ليا اسامحهم بسهوله ....

ليه ندور على صديق والصدق فيهم معدوم

وليه ندور على حبيب والحب عندهم مجرد وهم

ليه نشترى ناس هما بيبعونا فى لحظة

ليه نتعشم فى ناس بيتخلو عنا فى اشد وقت محتاجنهم فيه جنبنا

بجد انا مصدومة فى كذا شخصيه فى نفس الوقت تقريبا

لما بجد بجد حزينه جدا ...

فقدت الثقه فى الناس كلهم على السواء حتى لو هما اهل للثقه دى

معدش عندى استعداد اصدق الناس حتى لو فعلا صادقين

بقيت ابتسم فى وش الناس وكل ابتسامة وراها الف دمعه

بقت الناس بتسمع ضحكى ولو دققو اوى هيلقو صوت بكايا

بقيت بكدب والناس فكرها انى لسه زى ما انا صادقه

بقيت بتوقع حاجات وحشه وفعلا بتحصل


عارفه ان بغيب بغيب وبرجع بكلام غم ونفسيا زفت

بس مش عارفه بيحصل كدا ليه

يمكن علشان لسه ما اتمرجحت ... عااااااااااا

الاثنين، مايو ٢٥، ٢٠٠٩

عاااااااايزة اتمرجح .... اه ونبى

رجعت يا جماعتنا من الكويت الشقيقه

وبصراحه انا كنت زهقت وعندى شويه حورات غم كدا

اللى خلتنى ابعد عن التدوين فى الفتره اللى فاتت واقفل المدونة كمان

عارفه ان فيه حد كاتم فى نفسه ويقول كنا مرتاحين
احب ارد واقلو مرتاحين فى عينكم ...
وقلت هاجى لصحابى نطلع ونروش مع بعض

الا وانا كل ما اتصل على حد

الاقى غرقان فى حزن وغم ..... يادى النيله

ولقيت معظم المدونين اصحابى بيمرو بفتره اكتئاب

وانا الصراحه مش ناقصه انا شبعانه منه وبفكر اصدره

فاتصلت بنهر الحب وكيكى وزهرة اننا نروح نطلع يوم نهوى على نفسنا كدا

ووافقو مبدايا.... نخليها يوووووووم فرررررررى يعنى

بس انا وكيكى علشان طقين شويه

بقلها تعالى نروح سنما نتفرج على فلم رعب اهو ننفس على الطاقه العدوانيه اللى جوانا

ولا اقلك نتفرج على فيلم عمر وسلمى تو

قالتلى مش كنتى قلتيلى على يوم دريم بارك

وعليها ....

قررنا نطلع يوم لدريم بارك نتمرجح

واتفقت معاها انى هعلن عنه للكل

بالرغم ان هيما فضل يقلى هو انا مخلف واحده هبولا ....

قصدى احنا لسه شبعنا منك دا انتى لسه يادوب بقالك اسبوع ... بس على مين انا عامله اعتصام

فككم وهتمرجح يعنى هتمرجح ....المهم

يعنى الدعوة مفتوحه للكل .... كبير صغير .... انشالله المتجوز يجيب المدام والعيال

بس اهم حاجه يفتكرونا فى السندوتشات وكدا يعنى

نطلع نتمرجح وركب الزحاليق ونفس عن نفسوينا فى اعماقنا المدفونة

المهم باه فى الموال دا .... ان فيه مشكله صغننه

بما ان انا مش من القاهرة وكيكى وراها امتحانات .... فعايزين حد متبرع ينظم اليوم دا


ويفضل يكون المتبرع فى قمة خنقته وكئابته علشان ينظم على حق وصح

ينوبكم ثواب حد يتطوع وينظم .... علشان انا والغلبانه كيكى .... نفسنا نتمرجح

اه ونبى ونبى ..... عايزة اتمرجح اند اتزحلق

وبعدين اللى هيتبرع وينظم هينظم مكان التجمع .... الميعاد .... واليوم

اه ياريت بلاش الاسبوع دا ولا الاسبوع اللى جى

علشان امتحانات كيكى .... وانا مشغوله الاسبوعين الجين دول

يعنى بعد عشر ايام كدا ....


عايزة همه يا جماعه .... ومن فرج مسلم عن اخيه كربه ربنا هيفرجها عنه يوم القيامه

وما اعظم تفريج الاكتئاب المركز اللى احنا فيه

وباعظم وسيله .... المراجيح


بجد انا عايزة اتمرجح .... عااااااااااااااااااااااااااااااااااا


مستيه الرد ....

صحيح كل واحد يجيب سندوتشاتو والعصاير وميه

واعملو حسابنا انا وكيكى علشان احنا اصحاب الفكره

اه محبش مجهودنا يروح على الفاضى

انا عن نفسى بحب الجنبه البيضه والشاى بحليب

بلاش برجر وكوفته وسجق .... انتو عارفين الخنازير قايمة بدور جبار دلوقتى

وياريت حد يتبرعلنا بتمن تذكرة الدخول .... تبرعو ولو بجنيه ...73 كيكى 73 همس


يلا العوافو عليكم .....



السبت، مايو ٠٢، ٢٠٠٩

عهد الخنازير

الظاهر ان العالم بيحتفل بعيد الريس
اللى بقى سنه واحد وتمانين سنه
وبعتولو احلى هديه
هيا وباااااااااااااااااااااء الخنازير

أنا مستغربه ليه الفزع بتاع فلوزة الخنازير دى فى مصر

أنا مش قلقانه خالص ....

ودا اقتناعي بأمر واقع أصلا

قلقنين من الخنازير ليه ...؟؟؟؟

مهو أحنا من زماااااااااااااااااان بيحكمنا شوية خنازير

والخنزير الكبير مظبط الجو علشان يمسك بعديه الخنزير ابنه ....

غير حكومة الخنازير اللي مبلطة في وحل فشلهم وطين المصايب اللي عملوها على دماغ اللي جابهم


أما بالنسبة للمرض في حد ذاته

دا علشان الخنزير الكبير بسبب فشله وتخلفه

حب بقضى على الملل .... بمعنى قال بدل ما الناس تموت

بالفشل الكلوى والكبد وفلوزة الطيور والأدوية الفاسدة

واللي بيموت في بيته بعد ما يقع سقفه على دماغه


وبيموتو من الفقر والجوع .... واللي بيموت من النقطة والشلل فى عهدى


اللي هو عهد الخنازير

وبالنسبة للي يحب يشارك برأيه بخصوص خنازيرنا الواطين ... فى موقع مخصص

اسمه .... مبارك دوت خنزيركم دوت ديل

الثلاثاء، أبريل ٢٨، ٢٠٠٩

خسارتى صعبه

حسية معنى الخسارة اللى بجد

ويارتها خسارة ماديه

للأسف خسارة معنوية


وعبرت عن الخسارة دى بالضحك

علشان الدموع مش راضيه تنزل

مش هقول بضحك علشان بدارى

لا بالعكس أنا بستمتع بالضحك وحاسة أن بضحك من جوايا

علشان مش عارفه ابكي

وحتى لو بكيت مش بلاقى راحة بعدها

ولا أن البكى هيعوضنى الخسارة دى


هو دا احساس طبيعى ولا أنا خرفت وبقيت حيطة مش بحس
بس بجد خسارتى صعبه اوى
فربنا يسترها علينا كلنا ... وربنا يغفرلنا

الأربعاء، أبريل ١٥، ٢٠٠٩

فزلكة قرعة

وحشتونى يا خلابيص معلشى كان فيه شويه حورات كدا معايا ماكنتش متابعه المدونة

ومن ضمن الحورات دى أن باخد دورة في جامعه الكويت وكان أول يوم ليها النهاردة

وباخدها فى مجال التربية الخاصة والمحاضر بيتكلم أن فئه ذوى الاحتياجات الخاصة مش بس بتشمل إعاقات

لا دول كمان بيشملو الموهوبين ودول بيحتاجو بيئة تنمى الذكاء وتستغلة صح

وراح ضارب مثل بأحمد زويل

بس للأسف المحاضر اللي ضرب المثل ضرب بطريقه استفذتنى الصراحة

وانتو مش تايهين عن غيظى باه

المحاضر بيقول يعنى احمد زويل أخد جايزة نوبل ليه علشان معاه الجنسية الامريكيه

أنا باه انفقعت ... قلتلو لا حضرتك أخدها علشان واحد اخترع حاجه كويسه فاخدها

وجنسية احمد زويل مصريه قبل ما تكون امريكيه

راح قايل لا علشان جنسيته امريكيه علشان كدا اخدها

قلتلو ازاى ...يعنى نجيب محفوظ اخدها علشان امريكى ... مهو مصرى ومعهوش الجنسيه البدنجانبة

قلى دا مجال تانى .... قلتلو بس دى جايزة واحده عالميه فى جميع المجالات ولما حد بيخدها

بتساوى القيمة العلميه زى اى مجال تانى ...وروايات نجيب محفوظ وصلت للعالميه



راح قالى لولا امريكا مكنش زويل بقى كدا .... قلتلو والله زويل كان أساس تعليمو مصرى

وذكى بطبيعة الحال ومتخرج من جامعه مصريه وراح امريكا يكمل دراسات عليا

مكنش رايح عادى ودولو حقن ذكاء ....



قلى اكيد الوالد والوالده ساعدو موهبته .... هو مولود فى بيئة عاديه جدا وطبعى عندو ذكاء

يعنى متولد فى مولد نووى يعنى


فقلى يعنى لو انتى هتختارى المنتج المصرى .... ولا المنتج الامريكى .... روحت قلتلو حسب فلوسى

قلى فرضنا معاكى فلوس كتير قلتلو يبقى المصرى قلى لاء مش هتختارى المصرى

قلتلو لا انا طبعى كدا هختار منتج بلدى ( وانا فى بالى بقول مهو اى منتج عربى بيبقى غالى عن الاجنبى

واسال عن الصين عندنا دول بقول بيصدرولنا حلاقين شعر اند دقن فبما أن معايا فلوس كتير هشترى الغالى )

قلى أنا عن نفسى اى قدامى منتج اوربى ولا امريكى وقدامى العربى أنا هختار الاجنبى

قلتلو وليه نصرف فلوسنا على منتجتاتهم طالما عندنا امكانيات نحسن من منتجنا احنا


راح احنا عن نفسنا لما نجى نعمل معامل نوويه هنختار خبره اجنبيه .... مش عربيه


قلتلو اكتر علماء فى العالم فى مجال الطاقه النوويه علماء مصريين

قلى علشان مصر ملهاش امكانيات للموهوبين ... قلتلو خلاص خلى الكويت تبعت تجيب العلماء المصريين


وتمولهم وتنمى الموهبه واول حد هيستفاد هيبقى انتم بدل ما الأجانب يستفادو


قال لا احنا هنجيب خبره اجنبيه .... دا كلو ومررتى وفقعتى فى زياده مستمر وبالرغم ان بكلمو ببرود


قلتلو باه .... لو خيروك تجيب احمد زيل كخبرة ....ولا عالم امريكى

قلى هيجيب احمد زويل علشان حاصل على الجنسيه الامريكيه ....

قلتلو بس برضو احمد زويل مصرى ....ومازال مصرى برضو


انا مش عارفه ليه الناس ايا كان جنسيته بيفرح بالجنسيه الامريكيه ولا الاوربيه

وبيعتبر فخر .... وممكن يتنازل عن جنسية بلدو ولو قالولو هديك جنسيه امريكا ولا بدنجان



وراح قال يعنى لما بنتعب بنسافر لاى دوله اجنبيه علشان نتعالج علشان هناك امكانيات عاليه

وانها اروبا حتى لو كان الى بيعالج عربى ... كفايه انها اوربا

ومن ضمن الكلام اللى حصل واحد معانا بيقلو شخصيه يهوديه اصلا معاه سبع جنسيات نزله مصر قريب

بصراحه معرفتش هو بيشتغل ايه بظبط بس تقريبا دكتور قلو عادى

ايه يعنى لما يعالجنا ... هو احنا هنروح نتعبد معاه فى المعبد بتاعه

ليه من كلام المحاضر حسسنى ان مجرد اسم امريكا على اى حاجه حتى لو بنادم

يبقى كانو نازل من السما ... وشئ نفتخر بيه ....

كانهم اسيادنا ..... واحنا عبيد .... ليه الانطباع العام من كلام المحاضر

حسسنى ان زفت الطين امريكا صاحبة الفضل على العرب ولولا هيا كنا نضيع

لما يبقى دا محاضر ودكتور جامعى عربى مسلم يوصل أحساس غبى دا



لما يديك أحساس أنهم أصحاب فضل علينا .... وهما سرقنا وبيستغلو ثروتنا واحنا بالنسبه ليهم

سوق حمراوى ... يعنى سوق استهلاكي .... واهي حمير بتآكل

وبيقولو انتماء الشباب معندهمش انتماء لبلدو ليه

علشان ملقاش اللى يربيه على كدا ... بيربيه انه يستعر من بلدو مهما كانت

ويفتخر باللى زللنا ويبقى كل ولائهم ليهم

حاجه تجيب حرحر

الجمعة، أبريل ٠٣، ٢٠٠٩

عيد قومى

قد أفتى جميييييييييييييييييييييييييييع شيووووووووووووووووووووووووووخ

المسااااااااااااجد ودار الافتاء المصريه

أن الإضراب حرااااااااااااااااااااااااااااام


تيييييييييييييييييييييييييييييييييييييييت

قطع إرسال وكان ذلك تشويش من الحكومة الواطيه

والحاجه مبارك كان بيلعب فى الاريال بتاع الإرسال


أنا طبعا مش فى مصر

ولا عارفه أيه صدى ولا استعداد الناس للإضراب

بس الظاهر أن الإضراب هيبقى عيد قومى كل سنه
وهتطلع اغانى زى المضروبين اهم ...فقعه وزل اهم

الغريبه ان لسه متفرجه من يومين على فيلم السادات

وذكر إضراب للى حصل علشان بس على السكر

واستجاب للإضراب

علشان راجل ... ومتربى مصرى فعلا حتى لو ليه سلبيات

مش زى المحروس الحاجه مبارك ... اعتصامات واضرابات

وان البعيد يتنطر فى وشو حبة دم ويحس بالناس إلا البعيد فقد الإحساس

بالوقت والزمان والناس وأكيد الإحساس بنفسه وجبلته المتعمقه

ولا بياثر فيه حاجه ...ولا بيحس باد أيه الناس تعبانه وقرفانه

أنا عارفه أن الإضراب مش هيخلى الكلب يتخلى عن العضمة

ولا هيخلى الميت يحس

بس برضو أنا عامله إضراب .... علشان هنتفق كلنا على حاجه واحده

هنسمع كلمة لالالالالالالالالالالالالالالالا

وهتخرم ودان مباااااااااااااااااااارك الطرررررررررررشه

محدش يرووووووووووح الشغل

محدش يرووووووووووووووووح المدارس
محدش يرووووووووووح الجامعه

محدش يرررررررررروح الحمام حتى

حتى لو حد راح الحمام

ابقو ارفضو تشدو السيفووووووووووووووووون

خلى اليوم دا كلو لا لالالالالالالالالالا




الجمعة، مارس ٢٧، ٢٠٠٩

ترنن ترنن ... قلة ادب

ليه اى حد يتصل سواء عن قصد أو بدون قصد على رقم وطلع الرقم غلط

يقوم يلقح جتت اهلو على اللي بترد

أكيد كتير منا جالو معاكسات تيلفون منها اللى بتبقى مره وتعدى

ومنها بتكون كلمها كويس حتى لو كانت معاكسه

ومنها اللى بتبقى بكلام سافل .... ولو ما رديت على الرقم يبعتلك رسايل

فى منتهى السفالة وقلة الأدب .... ساعتها تبقى متعرفش تعمل أيه غير أن يتحرق دمك

أنا عن نفسى قابلنى دا كلو

قابلني معاكسات عاديه مره واحده ....

قابلتني عالم سافلة اتصلت تسال عن حد ولما رديت قلت لا الرقم غلط شويه ألاقيها تبعت رسايل زى الزفت

قابلتني اتصالات مستفزة جدا وتغيظ لدرجه انك عايز تضحك .... بس طبعا بنمسك نفسنا بالعافية

زى مره كدا ....

ترنن ترنن ....

أنا .... الو مين ....

هو ... الدكتورة ياسمين معايا ....

أنا .... لا والله الرقم غلط ....

ورحت قفله السكه


شويه .... ترنن ترنن ....

أنا ... نعم تانى

هو ... مش انتى الدكتورة ياسمين اللي من المنصورة

أنا ... لا يا سيدى مش أنا

هو ... ازاى دا وكيل النيابه احمد باشا هو اللى مدينى رقمك

أنا ... تلاقى بس حضرتك لغبطت فى الأرقام

هو ... لا أنا متأكد مش الرقم هو .........

أنا ... ايوة فعلا بس يبقى فيه سوء تفاهم ولا حاجه

هو... ازاى

أنا ... زى الناس ...طاااااااااخ فى وشه


شويه ... وترنن ترنن

أنا نفضت المرة دى

لقيته بيتصل تانى .... ترنن ترنن


انا باه وانا شرار طالع منى

ودخله شمال فيه

أنا ... مش قلتلك الرقم غلط هو أنت البعيد مش بيفهم

هو ... بمنتهى البرود انتى بتفتحي ليه عليا أنا كنت بسمع الاغنيه اللي انتى حطاها أصلها حلوة اوى

أنا ... هو أيه الغلاسه هو حد قالك قبل كدا انك رخم ولا حاجه يا ضنايا

هو ... لا متغلطيش أنا هقول لأحمد باشا وكيل النيابه

انا ... طظ ... وكيا نيابه ولا بدنجان ...احمد باشا دا على نفسك انت يا بابا مش عليا وعلى الله تتصل هنا تانى

الله فى سما هتقى قبل ما تخلص رن عليا هتلاقى اللى شدك من قفاك ...حاجه تقرف

وطخخخخخخخخخخخخخ فى وشه


دا يحصل فى بلدك ماشى .... عادى يعنى

أنما تكون بره فى بلد غريبه .... وتلاقى معاكسات من غير ولاد بلدك برضو ممكن نخدها عادى جدا

عالم واطيه وبتتسلى

أنما تيجى مكالمات من ولاد بلدك بمعكسات تشل

أمبارح بليل لقيت تلفون بيرن ... كان الوقت متأخر ما ردتش

اصحي على نفس الرقم بيتصل

وأنا برد نعم .... مين حضرتك

هو ... أنا محمد

أنا ... نعم حضرتك عايز أيه

هو ... أنا كنت اتصلت بالغلط على رقمك أمبارح فقلت اتاسف

أنا ... اوك ولا يهمك

هو ... ممكن نتعرف

أنا ... لا والله مبتعرفش .... سلام .... طخ فى وشو


وأنام تانى واصحى بعد الصلاة على نفس الرقم

وأنا باه جبت أخرى ... ايوا

هو ... أنا محمد

أنا ... ايوا عارفه مهو أنت عرفتنى بيك قبل كدا ... خير في حاجه تانية

هو ... ممكن نتعرف ...

أنا ... والله حضرتك رديت عليك وقلتلك أنا مش فاضيه أتعرف

هو ... طب انتى منين

أنا.... هو مش فاهمنى انا مش عايزة اتعرف

هو ... طب انتى منين بس

أنا ... هو أنا بتكلم هيروغلوفي ... بقلك أنا مبتعرفش انت مش بتفهم

هو ... يبقى انتى من المنصورة

أنا ... طيب روح باه يا شاطر شوفلك حاجه تلعب فيه

هو ... يعنى انتى من المنصورة

أنا ... انت عارف أخر مرة تتصل هنا بدل ما اتصل على المغفر (الشرطه)
وخلى عندك دم شوية



أنا عايزة اعرف ليه يعنى يبقى فيه قلة أدب في الاتصالات

ولو فيه رفض يقلب الوش الخشب ويقول كلام زباله ... ولا يبعت رسايل فيها كلام قلة ادب

حاجه فعلا تغيظ ...

الأحد، مارس ٢٢، ٢٠٠٩

عايزين امل بيستعبط

فى الوقت اللي ألاقى فيه هنا الحكومة فى الكويت بتستقيل

والحكومة أتغيرت بصرف النظر عن السبب التغير ...بس فيه تغير والسلام

حتى لو مفيش سبب ولا نتيجة من التغير دا ... فيه خلق ووشوش حالقه جديد ....

فكر مستحمى جديد ... أمل بيستعبط

المهم اجى أقارن التغيرات اللي حصلت فى مصر قصدى التحنيط والتوابيت

ما علينا أنا مش قصدى على الخاله مبارك ...ولا التحنيط اللى هو فيه

لا أنا قصدى على الحكومة نفسها ... أبو طويلة نضيف اللي كان فضلو لمبه ويبقى عمود

اللي نضف على جيوب مصر كلها ووسخا بخيبته في كل حاجه

واللى كان أخر ما أتذكر انه زار بلد فى الصعيد أتصرف بس على

ترتيب الزياره يجى 2 مليون جنيه

ولاد الحرميه علشان شوية زرع وقرف ... وهدايه ليه وللصيع اللي جاين معاه

يصرف اتنين مليون ( على ما أتذكر) من ميزانيه بلد تعتبر من البلاد الفقيره فى مصر

مسخرة وهبل وحاجه تقرف ...

وأخير أقرأ فى خبر أن الخالة مبارك يرو ح يشكر فى مجهودات وزير البترول

أنا عايزة أتف والله ... لالا انا عايزة ارجع عليهم

ولا أخلى مهند ابن اخويا يعمل ببيه على ولاد حرميه دول

يعنى بعد الخيبه اللى حطها علينا ويبيع البترول لإسرائيل

يطلع يشكر فيه ... أحنا البلد الوحيده فى العالم .... ماسكها واحد أحول

يثبت ويشكر في اللي يخربوا البلد ... بيعاند فينا

ولا علشان ودانه باظت عندو حول فى السمع وما بيعرف يفرق خالص

اى مكان فى العالم لو حصل مشكله من الطبيعى الوزير يزحلق

دا اذا كان مكانش عنده دم واستقال لوحده

إلا هنا يبقى وزير أهطل وبرياله وعامل مصايب ويطلع عملى زى الخنفسه المطلقه

ويقلك هنواجه المشكله ... عندنا خطط .... انا مش بهرب من المسؤليه

يا عم ابو رجل اللى مخلفينك وجبوك تقرف فينا ....اهرب يا عم .... غور يا سيادة الزفت

طفشتونى من البلد اللى ارجع ألقيكم محروقين بجاز معفن

السبت، مارس ١٤، ٢٠٠٩

شوية رغى

الجو هنا مديني بنج وخمول غريب ... مش عارفه اكتب أيه

قلت ادخل أرغى شويه ... ونديها تهيس ... مدونتى باه ... وبصراحة طراوة


المهم ... ماما بتكلمنى وبتقلى أنا هرجع تانى المدرسة وهقوم بأعمال النظارة

ليه يا ماما علشان فضلتى تزني على ودانى بلاش تدخلى الامتحانات الكادر

شوفتى خلونى ناظرة تانى .... ولا يهمك يا ماما دا وزير ابن كلب حيوان

واخرو هيسرح بشويه كلاب عن قريب ... بس انتى شدى حيلك وأبقى ناظرة شديدة

بلاش طيبتك دى واى حد يتنفس بصوت عالى ... أبقى قليلى وانا اشرحهملك

ونبى اسكتى ما حدش جابنى ورا ألا انتى

احفظى الجمايل دى يا ماما




××××××

هنا باه بالرغم الواحد مخنوق من اللى بيحصل فى مصر

وجالو حرحر الا وانا ماشيه ببص من شباك العربية

لقيت يافطة مكتوب عليها شارع جمال عبد الناصر

بجد حسيت بفخر كدا.... مصريه صميم

×××××××××

تصدقو الدنيا دى صغيره ... مرة وأنا ماشيه فى السوق

لقيت اللى جى ورايا ونازل بوس فيا

لالالا محدش يصوت ويقول راجل

لالا حاشا وماشا رجاله أيه بس

متفقين أنهم انقرضوا واللى موجود دا حفاظ على النوع وللمشاهد فقط


ما علينا لقيتها واحده صحبتى من أيام الجامعة

يعنى ضاقت فى وشها فى مصر

جيه تسلم عليا هنا

بس كانت صدفه حلوة اوووووووووووووووى

وكانت من ضمن شله المعسكرات والرحلات كانت ايااااااااااااااااااااااااااااام

هبقى احكى عليها بعدين


××××

كان عندى مقابله شغل وكان الراجل بيكلم وبنتناقش

فراح قيل أحنا فيه هنا ديمقراطيه مش زى مصر

شوفتى لما غيرنا الحكومة كذا مره

قلتلو ليك حق .... وأنا بقول فى عقل بالى سبحان الله

الله يحرقك يا نظيف فضحتنا ...


يلا سلامووووووووووووز


آه صحيح فيه عالم غبيه وبتعمل فكاكا على قفا اهلى

بتسبيلى تعليقات تنمى على مدى عمق وانبثاق التخلف والتفاهة


الحمار اللي سايبلى تعليق مره أن أنا فضحت مصر بخصوص

موضوع فرس البحر

ووزير التعليم فى مضر وبيدعى زى قعد على مصطبة

أحب أقلك أنت أكيد رفيق الزير في الزريبة

ومخك وسخ وإذا كان فيه فضيه يبقى أنت يا حمار


والفكاكه التانى اللى بيقلى على الصورة اللى مكتوب عليا تنحى

لمبارك .... جى يقلى كلمة تنحى دا كلمة قليلة أدب

هو البعيد غبى ولا حاجه ....

لو أنت فهمتها على أساس أنها كلمه عيب .... دا علشان أنت سافل ومتخلف

وبرضو مخك وسخ .... دى لغه عربيه

وكانت الصورة أصلا نازله في موقع اخبارى كحمله إعلانيه

وأنا لما شيلتها مش علشان خاطر هباب عيونك ... ودخلى سايبلى تعليق

على أساس أن كلامك اثر فيا ولا حاجه

لا يا خفيف دى علشان الحملة دى خلصت وظبطت المدونة


فمش عايزة حد يسبلى اى تعليق خارج الموضوع

ويعلق بأدب واحترام .....

مش ألاقى لسان طويل ودعى وتفكير متخلف

لاما هرد بعد كدا مش بالكلام لا هرد بالحزمة

أنا روحي فى مناخيرى أصلا جتكم القرف وانتم فئه غيبه

وأنا حره فى مدونتى ومحدش قلكم اتنيلو ادخلو ووفرو الكلام لنفسكم

ولا عايزين تعرفونى انكم خلصتوا شهادت محو الاميه وبتعرفوا تكتبوا


خلصناااااااااااا



الأحد، مارس ٠٨، ٢٠٠٩

أسأله فى الحب ...

أزاي تتأكدوا أنكم بتحبو الحب الحقيقي ؟؟؟

أزاي تتأكدوا أن في حد بيحبكم فعلا حب حقيقي ؟؟؟

أزاي تتعايشوا مع الحب دا ؟؟؟

أزاي تحافظوا على الحب دا ؟؟؟

أزاي تخلو الحب دا نقى ديما ؟؟؟

أزاي تخلو الحب ديما في زيادة مستمر ما يتوقف ولا يقل ؟؟؟

أزاي تخلقوا حب ماحدش حبو قبل كدا ؟؟؟

أزاي تحبوا بطريقه مختلفة وخاصة بيكم لا حد حبه قبل كدا ولا حد هيحبو بعد كدا؟؟؟

إحساسنا أيه لما نسمع كلمة بحبك أو بعشقك ؟؟؟

إحساسنا أيه لما بنقول أنا بحب ؟؟؟

الثلاثاء، مارس ٠٣، ٢٠٠٩

حيوان صينى وزير تعليم مصر

تم بحمد الله استيراد فرس البحر من احد حدائق الحيوان من الصين الشقيقه

وذلك لتولى وزارة التربيه والتعليم فى مصر

وذلك نتيجه ان البرسيم خلص قدام يسرى الحمار قصدى الجمل

وليس نتيجه تعديل وزارى اللى بقالنا كتير نسمعه عنه

ولا بنلاقى حد بيغور فيهم فى دهيه

طبعا هو الخبر دا شبه اكيد ان شاء الله والمفروض هيبقى قريب جدااا

هتقلولى ازاى ... هقلكم علشان فى الوقت اللى فيها مصر لسه بتحاول

تقضى على الاميه اللى هيا فى العكس نسبه الاميه بترتفع فيها لا قصدى فى

الوقت اللى بتحاول مصر تصلح التعليم فى الاساس

تلاقو العيال بتطلع ما بتعرف تكتب اسمها حتى

وفى نفس الوقت اللى فيها الصين مش قضت على الاميه بس بتاعة القراه والكتابه

ولا حتى اميه الكمبيوتر .....لالا دى بقت بتقضى على اميه الحيوانات

اه وربنا قرات خبر ان فى حديقه حيوان فى الصين استعانت بمدرسين علشان يعلمو فرس البحر

الكتابه .... حاجه تفقع صح

وعلشان احنا كل حاجه بقت مستورده من الصين فايه المانع يستوردو فرس البحر يشتغل مكان يسرى الحيوان

طب وربنا التعليم هينصلح حاله

وهنحترم الحيوان الصينى بدل ما يسرى الوزير


مش كدا ولا رايكم ايه ????

السبت، فبراير ٢٨، ٢٠٠٩

عايزة اروح لامى

ازيكم يا جماعه ...اتحدث اليكم من الكويت الشقيقه

اللى الظاهر عليها هتفرسنى بزياده

الحمد لله الجو مستقر بس انا لسه ما اخدت عليه خالص

وصولى للمطار كان الحمد لله كويس

بس الكرسى بتاعى كان فى مكان غبى

كان جنب جناح الطياره بظبط ... وجه فى دماغى جميع

اافلام الطيارات اللى راحت هباء

وخاصه باه وانا قاعده جنب المحرك قلت اخ هلاقى باه حاجات تنفجر

وهضيع وكل شويه استغفر ربنا افتكر لقطات من افلام مهببه

بس يا جدعان الطيران ما اختلف كتير على ما كنت اخر مره ركبته

كان يجى كدا من قيمه تسعتاشر سنه

بس ايمها مكنتش بفكر فى افلام عااااااااااااااااااااااا

عموما غير تتنيحى فى المحرك اللى

فيه ست بعيالها فى الكرسى اللى وريا كلو ودانى من كتر المناهده مع عيالها

وصداع وقرف اشتغل ....

عموما انا قلت بلاش اتعصب عليهم واسترخى كدا واقول اذكار احسن

وشويه لقيت الجرايد بتتوزع بصيت ما لقيت الا حكومى كلو

قلت بلاش علشان عايزة احتفظ بمررتى ...

بس الراجل اللى قدامى كان فاتح الجرنال ... وعنيا ضربت فى خبر

شلنى ... قلت انا مارضيت ابص فى جرنال لازم وانت بتقرا يا عم الحج تنشر الجرنال

ولا كان عندك غسيل ....

الخبر يا اسيادنا ان الحكومة المصريه العبقريه بتقول ان حجم

الاستثمارات فى مصر فى الدواء اللى مدة صلاحيته انتهت مليار جنيه تقريبا ودا بيعاد تدويرة وبيتباع

دا مش اللى غايظنى ولا حاجه بالرغم انه خبر يشل فى حد ذاته

الا ان اللى يشل ان الحكومة ادت فرصه اه والله مكتوب فى الخبر

مهله لاول ابريل تقريباعلشان تتخذ تقريبا اجرائات علشان تقضى على التجاره دى

يعنى على ما الناس تخلص بياعه فى الدوا والناس اللى بتشترى تاخد الدوا

وتمرض وتتكسح .... ويدور على مكان فى مستشفى ما يلاقو

شوفتو الهنا مهله لزياده الفساد والمرض والموت للناس

مش تاخد اجرات بتفتيش ودور على الدوا الفاسد وتعدم واحراقه

لا بيديهم فرصه .... الله يحرقهم ولاد المحروقين

بس يا اسيادنا .... روحت مغمضه عينى قلت بلاش انا اللى افجر الطياره

وروحت وطلعت لفيت ... ودانى باظت جدا من اللغات الغريبه

والهنود والبنجلاديش والبدنجان

ودانى باظت خالص ....عاااااااااااااااااااااااااا

اول يومين ودانى باظت ............

بس على فكره وحشتونى جدااااااااااااااااااااااااااااا

ومفتقداكم جداااااااااااااااااااا جداااااااااااا

وماما وبابا وحشونى اوووووووووووووووووووى

انا عايزة اروح لامى عاااااااااااااااااااااااااا

متنسوش تدعولى ان يجعل السفريه خير ليا وكثفو الدعوات وبلاش بخل فيها
عاااااااااااااااااااااا

الأربعاء، فبراير ٢٥، ٢٠٠٩

هتوحشونى من مصر للكويت

تحديـــــــــــــــــث
انا الحمد لله وصلت بالسلامه
وانا بخير والحمد لله
انا اى نعم فاقدة الاحساس نوعا ما
وحاسه انى تايهه
بس الحمدلله انا بخير ووصلت بالسلامه
ووحشتنونى جدااااااااااااااااا والله
انا هبقى هرد على التعليقات ان شا ءالله
***************
بكره ان شاء الله هكون فى الكويت ....

والله كانت ناوية اعمل يوم فيرى اقلكم نطلع نتفسح فيه ومنه اسلم عليكم قبل السفر

اللى اصلا معاده اتحدد بسرعه
بس الحمد لله جالى دور برد كان شديد عليا اوى الكام يوم اللى فاتو دول

وكشف ودوا كان دور اول مره فى حياتى يجيلى بالطريقه دى .... بس الحمد لله


المهم بجد بجد كان نفسى اشوفكم قيل ما امشى ..... هتوحشونى جداااااااااااااا

وهيوحشنى تهرجنا .... وكنت مديه وعد لكيكى ندخل سينما نتفرج على فيلم رعب

بس للاسف ما حصلش هههههه

وزهرة .... هتوحشنى جداااااا وهيوحشنى السنترال اللى مشيالى بيه

وهمس الاحباب وفرستى فيه .... ونهر الحب هتوحشنى جداااااااااا

وبسمه اختها ... ومونى واختها كان نفسى اشوفهم


وسميه اللى قالتلى كانت نزله مصر قريب ....

ومونى واختها ودريم واحسان وشفيقه .... معلشى لو نسيت اسامى

كفايه اسامى علشان ممكن اعيط دلوقتى واغرق القاعده .... وانا النفسوية طين

بجد بجد هتوحشونى جداااااااا.... بس ان شاء الله لما انزل اكيد هنتقابل

بس اياكم حد ينسانى هموته ..... ما تقلقو هيبقى فيه نت واول ما اوصل

وكان فيا نفس يعنى هطمنكم بالعافيه عليا ههههههه

كفايه كدا علشان انا هيجيلى جفاف من كتر البكى ....

اشوفكم على خير .....ولو عرفت اتصل عليكم قبل ما اركب الطياره

هبعتلكم بليز كولنى وانتو تتصلو ههههههه .... لا بجد لو فيه فرصه هتصل ان شا ءالله هتصل

لو مفيش تبقى سماااااااااااااااااااح ... ولا اقلكم تعالو على المطار القديم نسلم اهو توفير والله
قابلونى فيه على الساعه تلاته كدا ... اوك

اه صحيح اى حد فى الكويت ... او رايح الكويت .... او طفش من الكويت

او ليه نفس يجى الكويت .... يسيبلى ايملاته وانا هنفضلو قصدى هضيفو

ونبقى نعمل لقاء مدونى مصر فى الكويت .....

هتوحشووووووووونى .... فهنخليها ايملات وتلفونات

سلام مؤقت

الأربعاء، فبراير ١٨، ٢٠٠٩

هو فيه حاجه غلط ؟؟

فى حد فيكم بدأ أى حاجه وكان ماشى فيها كويس جدا بس فجأه وقفت بدون مقدمات

ويكون سبب عدم التكمله والاستمرار صدمة ليكم .... دى حاجه


حاجه تانيه .....فى حد قابله موضوع يخصه ... وحسبها كويس ...

وقال لا بلاش .... يقلولو ايه السبب

تفضل تقلهم فى اسباب ... وفى الاخر يقلولك جرب دا شئ كويس ليك وتوكل على الله

ترد وتقول عارف ان تكالى على الله .... بس ربنا عرفو بالعقل ... فى اسباب ان الموضوع مش هيتم

يردو هما ويقولو .... لالا انت مشائم .... انت غلط .... بلاش التفكير دا .... احنا اكبر منك وعارفين


انت .... تسمع الكلام .... حاضر

النتيجه ..... طاطاطا تششششششششش.... طلعت زى ما انت توقعت بالظبط


الحاجتين دول ديما بيحصلو معايا ...

انا احب افكر فى اى شئ هعملو ... من حيث الاسباب اللى هقوم بيها .... النتيجه اللى هتترتب

هتعامل مع مين ... زى ما تقولو كدا تخطيط .... والحمد لله فى البدايه بخطط كويس

واسعى انى احقق اللى عايزاه ... والحكايه تمشى كويس جدا ....

وفجأه تقف ... تفشل .... اتصدم ... اتخنق ....ألخ....


اى موضوع سواء يخصنى انا ... او البيت ... او اصحابى ... نكون بناقشه ....

واقول هيحصل كذا.... والنتيجه مش حلو .... واقول الاسباب ....

يفضلو يقولو ليا .... انا عنيده .... الحوار معايا صعب .... انا معقده

يا جماعه والله مهو انا عنيده ... وبعدين الحوار بتاعى صعب ليه مهو لاما تقنعونى لما تقتنعو بكلامى

رد فعل اللى بتاقش معاهم ( بابا مثلا يتعصب عليا ولو كانت تحت ايده حاجه

يخبطنى بيها ويقلى ما بتسمعيش الكلام ليه

ماما تفضل تتناقش معايا ولما ما تلاقى اى رد تسبنى ... اصحابى اخر ما يزهقو يسكتو ويقلولى يا عنديه

واعملى اللى شيفاه .... خالتى تقلى الحوار معاكى معقد وهسيبك وهمشى )


انا رد فعلى .... على بابا مثلا لما القيه اتعصب اوى .... اقوم مبتسمه فى وشه واقول حته تضحكو

يهدى شويه ... ارجع تانى للنقاش ... واتكلم براحتى ....

وهكذا لحد ما يخلى حد يجى يشلنى ويدخلنى اوضتى ويكسر ورايا قلة اند زير ( مش هقول بيحدف جزمة )


ماما مثلا .... اللى ما تلاقى رد عليا ... اى حاجه بتحتاج نقاش خاصه مع بابا تقلى اتكلمى مع ابوكى

انتى بتعرفى تتناقشى كويس وبتخدى حقك حتى من ابوكى .... انا باه اقلها اشمعنى دلوقتى ما انتى ياما بتنفضيلى



اصحابى باه .... انتى كنتى الصح اللى فينا ..... اصلك شيخه حضرتك ( تريقه طبعا )

النتيجه .... بالرغم ان معظمها م شهقول ديما تكون فى صالحى .... ورأى كان صح ....

ومعظم توقعاتى فى محلها

الا بحس انى نحس .....


بس زهقت كلام .... وزهقت نقاش .... طالما كل حاجه بتوقعها بتطل وحشه ...

هيا اى نعم فى حاجه توقعتها وحشه ونجتنى من مواقف .... والحمد لله

بس ايه النحس دا .... اللى مضايقنى كل ما افتكر كلام ربنا لما بيقول انا عند حسن ظن عبدى لى

وانا ديما بقول ظنى اكيد هيبقى خير فى ربنا بس اللى بيحصل فى الواقع بياكدلى ان جايز ظنى مش خير فى ربنا

والموضوع ينحس فى الاخر .... والفشل يبقى على ودنه .....

ساعات اقول دا يمكن عقاب من ربنا ليا .... ان اى حاجه تفشل كدا وتعتبر مهم جدا بالنسبالى

ماما ديما تقلى قولى الحمد لله ودا يعتبر بلاء .... وان شاء الله ربنا عاين ليكى الخير وبيعوضك

اقلها لو انا اتاكد انه بلاء مش غضب من ربنا عليا هرتاح .... بس ازاى اعرف

تقلى لالا خلى ثقتك فى ربنا اكبر .....


انا عايزة اعرف ....

اولا :

دا فعلا يبقى نحس .... ولا قريب من ربنا ....

بالرغم ان اى موضوع بمربيه بيبقى نسبه كبيره تفكير وتحليل تصرفات للناس ورد فعلهم

مش حكاية ذكيه ولا حاجه .... بس محبش حد يستغبانى ... ولا يستغلنى ولا يضحك عليا


ثانيا :

اى فشل بيحصل فى كذا موضوع مش عايزة اقول لمدة سنين تفتكرونى ببالغ

دا يعتبرغضب من ربنا عليا .... ولا فعلا بلاء زى ما ماما بتقلى


اللى خلانى احكى عن الحكايه دى ان لسه مقابلنى موقف وحصل زى ما انا توقعت برضو

ودا خلانى بطلت اكلم فى اى حاجه جاده ... مقضياها تهريج وبس ...

وما بقيت اتكلم مع اصحابى سواء واقع ولا نت ولا حتى لفلفون

بصراحه استنو كدا ( ببص شمال ويمين ) وبوشوش ....

كلام فى ودنكم اند سركم .... محبطة ومقضياها تفريج على افلام رعب


واكره جدا لما احس انى غمامه ونكديه ... انا نفسى بتخنق من نفسى

محبش الغم اعمل ايه ....عااااااااااااااااااااااااااااا

اه صحيح ... هبقى احكيلكم على الافلام بعدين ......

واياكم حد يقول عليا نحس .... انا اقول على نفسى

انما انتم جاملونى وانا مش هقول يا كدابين يا منافقين .... انتم اصحابى وبحبكم برضو

وبلاش لاتوقع لحد فيكم حاجه .... وعفريتنى تطلع

حبشتكون اند عفرتكون ..... هكمل التحضيره بعدين هسبكم باه

سلاموزززززززززز

الاثنين، فبراير ١٦، ٢٠٠٩

أنهو أشيك ؟؟؟


من قيمة كام يوم لقيت اللى بيكلمنى على الايمل بخصوص حمله عاملها علشان لبس البنات

حمله اسمها لا للبس الضيق

وبالرغم ان فهمتو ان لبسى مش عبايات ولبس عادى وجينز وكدا

فهمنى ان الحمله هدفها مش المحجبين بس ولا حتى المسلمين هدفها البنات عموما

هو اسمه محمد العتر صاحب مدونة خواطر انسان وطلب منى ان اكتب عنه فى المدونة .... فقلتلو اوك

بس شئ غريب جدا اهتمام من شباب بخصوص لبس البنات وكل ما يحصل حاجه يقلك السبب فى لبس البنات

اى تحرش اى معاكسه اى اغتصاب اى تصرف واطى من واحد تجاه بنت يقلك مهيا اللى جبته لنفسها

مش شايفه لابسه ايه .... تفكير اهبل ومتخلف

هو اى نعم فى لبس كتير من البنات مستفز وفيهم اللى مش لابسه دى مرشوشة أسبراى

وحتى التصرفات الواطيه بتاعة الشباب مش مقتصره على البنت اللى لبسها لازق بالعكس

معدش حد مفرق بين اللى بنقاب وبين اللى مش لابسه

وكل واحد فيهم بيدى لنفسه مبررات بس ...

اولا: اللى بيعمل كدا بيبقى قليل الادب ومش متربى اصلا

ثانيا : مليون فى الميه هيترد اللى بيعمله دا فى اخته او بنته او زوجته او حتى مامته لقدر الله

ثالثا : حتى لو فرضنا ان البنت لبسها ملفت اوى محدش قلك تروح تتحش بيها

ولا تلاقيهم متنحين من كتر البص عليها

العقاب واحد على الاتنين وربنا مش هيسبك علشان هيا لبسها كدا لا دا انت هتتشوى وهتولع

رابعا ودا الاهم باه اوى : ان ربنا قال اللى يرفض دعوه ست

( والدعوه قصدى مبنيه على اى شئ ملفت فى البنت)

انه هيستظل بظله يوم القيامه

يعنى ربنا مدى للرجاله شئ عظيم جدااااااااا ....

بس هنقول ياه هيا قله ادب.... ومبررات عبيطة ... يقلك لبسها مش كويس.... وهيا اللى عايزة كدا


لا حضرتك حتى لو هيا عايزة كدا خليك متربى وما تنولها اللى هيا عايزة على الاقل افتكر ظل ربنا يوم القايمه


واحد اهبل يبقى مبرره ... انا راجل .... لالا انت واطى منتش راجل .... هو علشان انت راجل يحقلك

حتى لو الحق دا مدهيولك المجتمع .... فاعرف ان فيه حق ربنا اللى ما يفرق بين راجل ولا ست


وعلى فكره والله البنت مظلومة .... انا مش بعمم الكلام سواء على البنات ولا الشباب

وعلى فكره اللبس ما بيحدد تصرف البنت يعنى فيه بنت تلاقيها نست نصه فى البيت قبل نزولها

بس جدعه فى تصرفتها وبتعرف تحافظ على نفسها كويس اوى

وفيه بنات من اللى لابسه اخمرا ونقاب ووالله العظيم شوفت بعينى بيعملو تصرفات زى الزفت

يعنى مهوش مقياس اللبس ....

المهم ان احنا دلوقتى فهمنا ان لبس البنت سبب بيخلى الشباب تعاكس وتقوم بحركات قلة ادب

دا كلو فهمينه .... اللى انا عايزة افهمو باه .... هو المفروض البنت تعمل ايه فى الموقف اللى زى دا

انا عن نفسى اتحطيت فى مواقف واتحكالى من اصحابى والبنات قرايبى تصرفات سافله جدا

المفرضو يبقى نعمل ايه لو لقينا تصرف واطى ...

بصو من اللى شوفتو .... لو البنت سكتت من خوفها ولا الموقف شل تفكرها وخلاها زى الصنم

يتبادر لمخ السافل الجزمة انها عايزة كدا وبنت من اياهم

لو البنت ردت وهزقت .... ووالله العظيم مش هو بيعمل حاجه ولا بيرد لا تلاقى باقى الناس اللى حوليها

تزعق فيها وانتى مش كويسه انك رديتى ... انتى اللى عايزة كدا .... عيب انتى بنت ميصحش تردى

اسكتى طالما محدش شاف .... هتفضحى نفسك .... ميصحش تعلى صوتك

انا مش فاهمه هيا البنت المفروض تعمل ايه ؟؟؟

انا عن نفسى .... وباقولها لكل اللى اعرفهم.... اى حركه ولا كلام سافل يقابلك ....

تاخدى حقك كويس اوى .... وتهزقيه .... وتخبطيه باى حاجه وياسلام لو كان بالجزمة وتكون بكعب


ولو حد فيكم زى كدا بيلبس ارضى وكوتشيات .... ممكن تفكى الرباط وتخنقيه بيه

بصو انا عن نفسى بفكر اشيل سنجه .... ولا مطوه ....

أنهو أشيك فى رايكم ؟؟؟؟؟






السبت، فبراير ١٤، ٢٠٠٩

كل يوم حب وانتم طيبين


كل يوم ليكم نظرة حب وكلمة حب فى يوم حب لسنه كلها حب عايشنها

الخميس، فبراير ١٢، ٢٠٠٩

اوووووووووووووووف

انا بصراحه متغاظة جدا .... دا غير الغيظ بتاعى العادى يعنى

من قيمة كام يوم سمعت مبارك وهو فى فرنسا وانا هموت واعرف هو ليه كل يوم والتانى فى فرنسا
وعرفت انها اكتر بلد هو زارها من ايام القرون الوسطى اللى بدا لزقته وحكمنا
جايز بيروح يطمن على الخميرة ولا ايه

المهم واحد بيسالو سؤال انا بصراحه ما ركزت فيه بس انا ركزت اوى على تفاهة اجابته

بيقلو لا انا مش هقول احنا هنعمل ايه علشان ممكن نقول ويرجعو فى الكلام بعد يومين

اجابه عبقريه بصراحه .... ما علينا كان ايه السؤال اللى انا فى ظنى كان عن تقريبا المؤتمر

ولا القمه اللى بيدعو ليه علشان غزة


قلت ياسلام دا انت اكتر واحد يطسنا قرارات واسرع واحد يرجع فيها

المهم امبارح باه شوفت برنامج احمد منصور على الجزيره وكان بيصورة على معبر غزة

ويا عينى بقالو يجى 11 يوم كل يوم يلاقى كلمة مرفوض

فاتقابل مع وفد اللى جى يتقصى الحقايق فى غزة بخصوص محاكمة مجرمى الحرب

وبالرغم من ان مبارك قارف اهالينا كل يوم ويقول المعبر مفتوح

الا ان الناس اتقابلت بالرفض لدخول غزة ليه مش عارفين؟؟؟ ...

وبعدين قالهم احنا مش هنتكلم معاكم


والناطق باسم الوفد مصدوم ...

من الحقيقه والواقع وبيقول انه قرا فى الجرانين ان الحكومة المصرية بتسعى لمحاكمه القاده الاسرائلين

كمجرمى حرب

وكان متفائل بس للاسف لقى الواقع غير خالص

كان نفسى اخبط على التلفزيون من ورا واقلو انت عبيط بشكل يا حضرت الناطق

دا مبارك حد بياخد على كلامه .... كل يوم بتصريح وكل يوم بكدبه

حتى شوف الالف الاطنان اللى مرميه فى الاستاد بتاع العريش والمخازن

اللى المصرين وغير المصرين اتبرعو بيها وما دخلتش لحد دلوقتى

اللى هما فى نفس الوقت قارفنا كل يوم ويقولو دى المعابر مفتوحه والمساعدات دخلت

كدب للركب يا ناس

طيب بلاش يودو المساعدات للفلسطنين .... يجبوها بدل ما هيا مرميه فى الهو دا

واكيد المطره والهوى والبرد مع شوية شمس والله اعلم هطول لحد امته الرميه دى

انا بقول يوزعوها على الاماكن العشواقيات فى مصر ولا فى الصعيد

بدل ما تتسرق ويطفحوها فى بطونهم


طبعا كلو كلام فى الهوا .... وتهجيس وتهيس .... عارفه والله ... مدونتى وبراحتى يعنى

لا وايه كان واقف طابور عربيات اسعاف والله ماشوفنها ايام الحرب

اشمعنى دلوقتى مرصوصين .... منظرة ....

انا نفسى افهم مش راضين ليه يدخلو الوفد .... لا هما يضرنا فى شئ

الله يحرقهم كسفونا وفضحونا مع كل وفد جى .... دول اجانب مهمش مسلمين حتى

بس الغريب فعلا ان تقريبا معظم المحامين اللى متطوعين علشان يحققو ويجمعو المعلومات

علشان يجرمو كلاب اسرائيل .....من الدنمارك ...

اللى كانت من فتره فيها موضوع الرسول عليه الصلاة والسلام


انا حاسه انه كل حاجه دخلت فى بعضها وبقت حولا جدا

وما عدت فاهم حاجه .... بيرفضو ليه دخول الوفد

بالرغم ان كلام الراجل فيه تفائل كبير جدااااااااااا

حسبنا الله ونعم الوكيل في مبارك وحكومتة وكل واطى كانو السبب فى اللى بيحصل

اوووووووووووووووف


الثلاثاء، فبراير ١٠، ٢٠٠٩

انا مش هكدب ... بس مش هكون صريحه

تعايشتم مع موقف اضطريتم فيه للكدب.....

او بمعنى اصح اضطريتم انكم تخبو حقيقه......

برضو اسمها كدب حتى لو ما كانت تأزى حد.....

كدبتم لمجرد ان مفيش حد متقبل الحقيقه.....

كدبتم علشان مفيش حد بيسمعكم اصلا.....

كدبتم علشان ممكن يسمعكم بس بعديها مش يتقبلكم كانسان.....

كدبتم علشان اللى حصل دا قضاء ربنا ملكمش يد فيه ولا خطاء منكم بس مفيش مخلوق بيتقبله....

كدبتم علشان ما حد يبصلكم بصه وحشه ....

كدبتم على ناس علشان لقيتم الناس دى بتكدب عليكم اصلا....

كدبتهم علشان تحبو حد .... كدبتم علشان تتحبو من شخص ... كدب بسبب حب


كلنا بنتكلم من ورا شاشة كمبيوتر ....

كلنا عارفين بعض عن طريق كلام بيعبر عن فكرنا عن حياتنا

البعض صادق جدا ... والبعض بيحاول يبان كويس علشان الباقى يتقبلو ...

البعض بيبقى فى الحقيقه انسان مش كويس بس بيحاول يخلق لنفسه شخصية كويسه

فيه اللى دافعه مشن هيعرفونى دا كلو كلام نت .... فيه اللى دافعه انا فعلا عايز اتغير وابقى كويس

فيه العكس خالص يعنى شخصيته فى الواقع كويس جداااا .... انما على النت غير خالص فاهمين طبعا

انا عارفه ان الرقيب هو ربنا دا شئ مسلم بيه طبعا

طيب مين فيكم اتعرف على ناس عن طريق النت سواء شات ولا تدوين ولا منتديات

ولا عن طريق اصحاب .... وكانت بنسبه 50% من معرفتكم بيهم من الكلام عن نفسهم

و50% الباقيه نسميها تخيل وتمنى ان الشخصيات دى اللى بنعرفها تطلع فى الحقيقه زى اللى بنتمناها

انا عن نفسى قابلت دا ... اتعرفت على ناس من منتديات وتدوين

وفيهم برضو شات لما كان اول اهتمامى بالنت

فيهم اللى لقيتهم عكس تخيلى خالص وكانت شخصيتهم على النت خلفيه لشخصية كدابه فى الحقيقة

وفيهم اللى عرفتهم طلعو شخصيات اجمل واحلى من النت بكتيررررررر

وحبتهم جدااااااااااااا كانى اعرفهم من زمان .... وفيهم اصحاب ليا من سنين من غير ما اقبلهم حتى

وفيه اللى اعرفهم من ناس كنت اعرفهم فى الواقع اصلاوكانت متخيلهم كويسين جدا

وبعدين شوفت حياتهم على النت

منتهى الكدب والتخلف دافعهم الوحيد ان دى حياتى وانا حر اكدب

وكلو كلام نت ....

بستغرب ليه الحورات دى كلها .... ليه الانسان ما يعيش الا بطريقه واحده وشخصيه واحده

لو كويس اكيد الناس هتحبو ... ولو كان وحش وعندو نيه صادقه انه يتغير الكل اكيد هيتقبلو

كلنا عندنا اخطاء .... وكلنا عندنا مميزات هتنحب علشانها وفينا عيوب هنتغير بسببها


انا عن نفسى اعتقد ويارب اعتقادى يكون صح .... ان انا شخصيتى واحده سواء على النت

سواء فى الواقع .... عادى بضحك وبهرج وبتعصب

مش عايزة احلف انى ما كدبت ...

بس بجد ما باحاول حتى احط نفسى فى موقف يسببلى

يخلينى اكدب فيه

بحاول ديما اكون صادقه ... صريحه .... بحاول صراحتى لما اقولها ما تجرح حد ولا تحرج حد

بس للاسف .... اه والله للاسف

الكدب بقى افضل فى حالات كتيره قابلتها

وما اكتشفت دا الا لما فاتت المواقف واتنيلت قلت الصدق وكنت صريحه


محاولات صدقى وصراحتى .... خلتنى اخسر حاجات كتير

خلتنى محلك سر ....
خلتنى يسوء الظن بيا ومن ناس كنت بعتبرهم قريبين منى جداااااا

كنت قدمهم زى ما بيقولو كتاب مفتوح ... بس الظاهر كانو طافين النور وهما بيقراهوه

خالتو ديما كانت تقلى بصراحتك دى منتش نافعه ولا حد هيفهمك ولا هيقدرها

وفعلا والله العظيم صدقت فى كلامها

محدش يقلى فيكم لا طبعا .... حلو الكلام جداااااااااااا مهو انا ياما اتكلمتو وقلتو

انما الواقع حاجه تانيه خالص ....

كل حاجه بيقلك اكدب ...نافق .... اضحك ضحكه صفرا ....

انا بعد كدا

مش هكدب ..... بس مش هكون صريحه

الجمعة، فبراير ٠٦، ٢٠٠٩

اختار ما بين القوسيين

لقب وزير التربيه والتعليم يسرى .....( ح- ح –خ )
( عباره عن حروف تبدا باسامى حيوانات زى الجمل )
ومتى واين هيغور فى داهيه ....
ابقو جاوبو .... المهم باه يا خلابيص

سمعت ان هيبقى فيه تقيم شامل للطالب ودا عباره عن 50 % بيعطيه للطالب على الانشطه

سواء كانت العاب ولا موسيقا ولا رسم و50% على المواد

بصراحه الراجل دا خليفه بوش فى الغباء المستوطن بجد .... دا رجع فكرنى بالطالب العبقرى نبيه

وقلت احكى واكمل القرف اللى كنت فيه باه ...

بصو باه ... اختى وماما بعد ما خلصت الحورات اللى كنت بدرسها ...

قالولى اشتغلى بصراحه انا كارهه التدريس اصلا من اللى شوفتو وقلت لاء

انا حابه قاعده البيت احسن ... على الاقل احافظ على شويه الصفار قصدى البياض اللى فى خلقتى

وفضلت على كدا ... لحد ما فيه واحد ابن حلال مدرس عارف بابا بيوزرنا وقالو احنا عندنا جدول طاير

خليها تيجى وهنريحها خالص يعنى تيجى الصبح براحتها وتروح لما تخلص

اه الجدول الطاير دا عباره عن حصص من رسم على كمبيوتر على دين مشكل كدا يعنى

انا اضايقت بعد دا كلو ادرس رسم وهبل من دا ...

اختى باه وماما قالتلى عادى يا بنتى بس المهم تطلعى من البيت وتتهوى احسن من قاعده البيت دى ...

وبصراحه يارتنى ما سمعت الكلام والله ... المهم بعد اكلهم فى ودانى قررات انى اجرب تانى

ويارتنى ما جربت .... روحت يا ساده يا كرام مدرسه عباره عن فتنه دينيه طائفيه

نص المدرسه مسيحين ... ونصها التانى مسلمين سنه نقاب ودقون ... قلت فل اوى كدا

دى البدايه ... انا بصراحه كنت هتزحلق بدرى بدرى منها الا ان انا لقيت ناس

اعرفهم مدرسين يعنى كانو زمايلى قلت اهو نروح نتسلى

المهم استلمت الجدول السلطة ... وادور على كتب احضر منها ... ادور على دليل معلم ... كلو نووووو

ويردو عليا ويقولى لسه الورزاره ما بعتت حاجه

المهم ابص فى ام كتب الحاسب الالى ... مش عارفه احضرو ازاى اصلا ... وكلو ولازم يبقى عملى

فى حين ان الحكومة الالكترونيه اللى مغرقه المدارس بحاسب الالى

( وفيه بعض المدارس ما كنش دخلها كهربا اصلا)

ممنوع منعا بتا فى معظم الاحوال ان الطالبه يدخولو اوضة الحاسب الالى ...

بصرف النظر عن العشر اجهزة
مش هيكفو الطلبه اللى فوق 45 ....

لا مبداهم الاجهزة دى مسؤليه والعيال هتخربها واللى مسؤل عنها هيتازى

يعنى الاوضه دى هيجلها يوم وتبقى متحف فى كل مدرسه والاجيال اللى جيه هتتصور جنب كل جهاز فيهم

المهم .... انا باه كل ما اجى احضر درس معرفش احضرو اقوم سايبه مكانو فاضى

عادى يعنى ... وكان فيه مدير مطولش بصراحه وحاسه سبب طفشانه منى او انا من ضمن الاسباب

كل ما يجى يمضى للمدرسين فى كشكول التحضير يمضى للكل ويجى عندى ... يلاقينى ما حضرتش

او لسه بحضر .... يقلى طيب خلصى وابقى هاتى الكشكول امضيلك ... طبعا بنفضلو

اصلى اللى بيفقعنى فى تعلمنا المهبب دا ... ان اهم حاجه الكشكول دفاتر التحضير

انما العيل يفهم ولا يتعلم لا طبعا طظ

الجديد ايمها

البروفيل حاجه عباره عن ملف كدا من خلاله لازم تنجحى الولد فيه التلت سنين الاولنين

ان شالله ترقصيلو فيه تنجحيه وخلاص .... دا بالاضافه الى النجاح بحق القانون يعنى لو فيه سنه سقط

تانى سنه لازم ينجح باى شكل وباى طريقه


المهم باه فى فصل سنه تالته ... كانو يشلو بصراحه ومستواهم زى الزفت ...ما عدا اتنين تلاته

بس اللى كان جامد جدا نبيه باشا ... اهو هو دا ما كنش بيعرف يكتب اى حرف ولا حتى اسمه

بس بقى فى سنه تلته ازاى .... معجزة وربنا ... وبينام نوووووم

وبصراحه ضربته ضرب ولا بيحس ...جبله حيطة

المشكله ان بقلهم يا جماعه

الواد دا عنو بطئ فهم ... بطئ ايه انا كمان ... لا دا عندو شلل فهم ....كساح فهم

يا جماعه مينفعش يتعلم مع دول دا يتحول لمدرسه فكريه ...

المدير قلى يا خرابى لو قلتى لامه كدا ... احنا قلنالها كدا ... فضلت تصوت وتقول

انا ابنى كويس بتفولو عليه ليه ... بعد الشر عنه ... وما قدرنا نعملو حاجه

هو ايه دا يا اسيادنا .... دا انا مش راضيه اقول ان المدرسه كلها تتحول لمدرسه فكريه

او تولعو فيها كلها ارحم والله .... ردت مدرسه انجليزى وتقولى

والله ليكى حق انا عملت امتحان ... تخيلى يا ختى لقيت الواد كاتب اسمه ازاى

المفروض يكتب اسمه بالانجليز على ورقه الاجابه ... ماشى وحصل ايه

ولا حاجه .... اسمه علاء وكاتب اسمه بالعربى .... لولولوىىىى( دا انا من فرحتى بزرغت )

كويس انه كتبه اصلا ... لا مهو انتى مش واخده بالك ... كتبه بالمقلوب

يحلاوه يعنى زى كلمه اسعاف كدا على عربيه الاسعاف ...

ايوااااااااا.... انا ...الواد دا ليه مستقبل باهر

ازاى يعنى ... فضلو سارينه هيبقى ميه ميه

بصراحه المدرسه كانت تشل ... وعلى فكره معظم المدارس كدا

والحمد لله يارب انى طلعت من جامعه وبعرف اكتب اسمى


المهم خلصت الملفات وكان ناقصلى خمسه فروحت باه للناظره الجديده وبقلها انا ناقصلى

خمس ملفات فانا عايزاهم علشان اكمل الملفات ... ردت عليا وقالتلى اتصرفى

قلت اتصرف ازاى يعنى .... قلتلى صوريهم .... انا كدا جابو اخرى معاهم وعملتها حجه

قلتلها نعم ليه ... انا هصرف عليكم ... على العموم جبتيهم هعملهم ما جبتيهم احسن برضو ريحتينى

وسنتلها المكتب وخرجت

تانى يوم جالى موجهه وطلب الكشكول بتاع التحضير ... جبتهولو وكلى ثقه ودماغ

فتحو لقى دروس مش متحضره طبعا ... سالنى قالى محضرتيش ليه الدروس دى

روحت باه مستغليه الموقف وقدام المديره والوكيله اياها .... وقلتلو ابدا مفيش

اانا اصلا مش تخصص المادة دى وكمان معيش كتب للتحضير ولا دليل معلم علشان اعرف احضرها ازاى

وبصراحه محتاجه كلو عملى والاوضه بتاعت الحاسب مقفوله .... غير اصلا معظم الحصص بتبقى الاخر

فنص الفصل بيروح ... المديره سمعت كدا وكانت هتتشل الصراحه منى

انتى بتقولى ايه ... انتى هتجبيلنا مصيبه ... العيال بتبقى موجودة ...

انا وكلى برود هو انتى دخلتيلى فصل علشان تعرفو مين اللى موجود

الوكيله المسيحيه ...ترد وتقلى مهو انتو بتتلكعو فى المشى لحد ما العيال تمشى

رحت باه قلبتلها الوش البلاستك .... وقلتلها انتى شيفانى عامله جمعيه وبقبضها

انتى تقصدى بمين انتو دى ... ترد وتقلى المدرسين

قلتلها ومين اصلا اللى بيكلمك شيفاهم عاملين طابور ورايا ... لما تحبى تتكلمى معايا

وجهى كلامك ليا انا بس علشان ما نجبش فى سيره حد

وبعدين ايه اتلكع دى .... ليه شيفانى مسكه مرايا ومشط وبتزوقلك فى الطرقات

مبلاش الطريقه دى معايا .... علشان مش بحبها فالعيال بتمشى ايه يعنى هو انتم

بتبقو موجودين علشان تعرفو اصلا

لا انتى بتكلمى كدا علشان معتمده على ابوكى وعارف اللى فى الاداره

ابويا مين .... مش انا بكلمك لوحدى دلوقتى .... متخرجيش الكلام لناس تانيه

وبعدين انا بعرف اتكلم واخد حقى كويس ومعلشى بابا بيجى يتمم على العمليه بيعتمد عليا الصراحه


دا كلو الموجهه يقلى بس براحه هدى نفسك شوية

روحت قيلاله ... اسكت يا خويا انت متعرفهمش اسالنى انا

راح ضاحك ...وقلى ولا يهمك هعرفك يتحضر ازاى ....

وتعرفنى ليه .... انا واثقه فيك وفى خطك ....حضر بنفسك ينوبك ثواب

دا كلو المديره شبه مسروعه

وبتقلى كل يوم تطلعيلى بحاجه .... انا مش عايزة الكلام دا فى مدرستى

روحت قايله ليه كفانا الشر هيا المدرسه اتخصخصت وانا معرفش

هيا المدرسه بتاعتك ولا بتاعت الحكومة

ولا هيا كمان زى حكايه الملفات

الموجهه بيقلى ملفات ايه

بقلو بتاعت التلت سنين الاولنين دول مدبسنى فيهم ويقلولى دى عليكى وانتى اللى هتعمليها

اقلهم دى على مدرسه الفصل يقلولى لاء وعملتهم بس فاضيلى خمس ملفات يقلولى اجبهم على حسابى

مش كفايه دفاتر الدرجات هصرف عليهم انا دفاتر ولا موصلات ولا تصوير

قلى لا هيا فعلا مش عليكى

روحت قايله بجد .... رحت لفه للمديره يعنى مش عليا وقرفنى بيهم

راحت قايله ايوة مش عليكى ....

انا باه ....وكنت تقمصت الدور .... نعم امال مدينى يجى 145 ملف ليه وكمان اصور

على العموم انا هوزعهم تانى على مدرسين الفصل

وفعلا ما صدقت وطلعت وزعتهم وروحت ....وانا برضو متغاظة كانو بيستغلونى

وتانى يوم الصبح .... الاقى مدرسه منهم بعتهملى تانى وتقلى لا هما عليكى

اقلها لاء طبعا .... قالتلى المديره قالت انهم عليها

نعم باه .... مديرة مين اللى قلتلك .... اللى قاعده تحت دى

يانهار اسود دى لسه قايلالى قدام الموجهه مش عليا

نزلتلها تحت واقلها حصل كذا كذا وانتى قايله قدام الموجهه كذا وكذا

تقلى لا محصلش ....


انا بكز على سنانى ومفنجله عنيه .... ازاى محصلش

يعنى مهو لو انتى ادى فى السن كنت قلت كلام بس انا مسكه نفسى بالعافيه ازاى محصلش

انا باه هتجنن .... هيا اى نعم هيكل قاعدلى على الكرسى ويادوب بتاخدلى النفس بمساعده

بس متكدبش ....وتجامل على حسابى ...

انا كان نفسى اهزقها واقلها يا كدابه .... الكلمه دى بس

ورحت طالعه من المكتب ومقتش عارفه انا بقول ايه

كل اللى فكراه ان شا ءالله المدرسه دى هتولع باللى فيها عن قريب

وطلعت اتصلت فعلا باه بابا ... قلت بلاش اقل فى ادبى لحسن بابا اللى فى الوش

الو ايوا يا بابا تعالالى دلوقتى ممكن فى المدرسه

فى ايه .... لما هتيجى هتعرف

جه بابا العزيز ... وبصراحه اول ما شاف الست ما قدر يتكلم هيا اى نعم ضعيفه اوى

وزى بتوع الصومال والله ما بتريق هيا فعلا كدا

انا باه قلتلو حصل كذا وكذا .... وما عدت قاعده فى المدرسه دى

فى مدرس راح يجامل على قفايا ولسه بيقول معلشى المدير وى وى

روحت قايلاله هو انت كنت موجود اصلا علشان نشهدك ولا ناخد رايك فى حاجه انت تسكت خالص

هو اتكتم وخاد بعضو وطلع

وانا روحت طالعه سبت الحصه .... واخدت كل الدفاتر اللى عملهلهم حار ونار فى جتتهم

ووقفت على باب المكتب .... وقلت يلا يابابا نروح

هيا ترد وتقولى طب خليكى لاخر الشهر لما نشوف مدرسه

قلتها لا شكرا .... ال يعنى هتفلحوا ....

وانكجت بابا واحنا فى الطريق بقلو مش عارف تولع فيهم .... قلى بزمتك دى المديره دى

بتكلمنى وبترتعش وضعيفه خالص

اقلو يا عم دول كدابين .....

قلى وانت بتشتمى فيهم وتقولى المدرسه هتولع باللى فيهم

قلتلو ايوا عن قريب .... بس مين قلك

الاخصائى الاجتماعى

اه دا على اساس انى هخاف يعنى ... دا حاسس بنفسه اوى

من يوم ما خطب بنت وكيل الادارة تقريبا .... ومحسسنى انه الفتك ... جتهو نيله وهو اقرع

بس انت قلتلو ايه باه .... قلتلو معلشى اصلها لما هيا بتتعصب محدش يقدر يكلمها

انا بابا قلى كدا وانا وهو انفجرنا من الضحك .... يا مصيتنى يا هيما

وادى تجربتى التانيه .... اللى انا من يومها وقلت مش هشتغل

وماما كل شويه تقلى مش لو كنتى بتشتغلى دلوقتى بالحصه .... كنت زمانك اتعاقدتى

وبعد التعاقد تعين

اقلها هو انا فعلا اتعقدت بشكل .... بس ليه الحول دا

طالما فيه تعين لازم شغل بالحصه وبعديها تعاقد وبعديها تعين

اللى هو الله يرحمه ....يا حاجه مفيش تعين دى الكلمه دى اختفت زى طربوش بتاع زمان دا

وبعدين انتو بتصدقو .... طيب مهو زميل ابنك اهو بقالو يا عينى اكتر من عشر سنين

ويادوب متعاقد ....فضلو عشره لحد ما ما ربنا يكرمو يتعين زى ما بيقولو

وقتها باه هتبقى اصلا وزارة التربيه والتعليم تكون اتلغت خالص

وانا كدا مرتاحه لحد ما يجيلى ابن الحلال اللى انا حاسه انه اتلغى هو كمان( دلع انقرض )

يبقى عاطله وبفخر وعانس .... علشان حكومتى الفقر .....

عاااااااااااااااااااا عااااااااااااااا عااااااااااااااااااااااااااا عااااااااااااااااااااااااا عااااااااااااا

محدش يحوشنى سبونى اعيط

الأحد، فبراير ٠١، ٢٠٠٩

حاجه تقرف


همس:
حصل ايه طمنينى
رانيا:
عملية المقاومة
رانيا:
امبارح كانت جنب البيت
همس:
يادى النيله
رانيا:
وهربنا من البيت
همس:
احنا مش هنخلص باه من الحورات دى
همس:
المقاومة هيا اللى ضربت
همس:
ولا اسرائيل
رانيا:
واللة احنا اتبهدلنا اكتر من ايام الحرب
رانيا:
لا المقاومة
همس:
المقاومة بتضرب فيكم
رانيا:
فجرت لغم في جيب عسكري
رانيا:
واليهود ردوا علينا
همس:
اه
رانيا:
باربع طيارات من الجو
رانيا:
والدبابات
رانيا:
بتضرب
رانيا:
بالقدائف
رانيا:
لاكن بيحكو لسا انهم بدهمش يردوا الحين
همس:
هو مفيش حل
رانيا:
بدهم بعدين
رانيا:
يردوا

رانيا:
فترة
رانيا:
بدهم يردوا رد قاسي لاهل المنطقة
همس:
انتى بتقليلى كلام عن حماس زفت
همس:
والناس فرحانه بيهم اوى
همس:
مش عارفه اصدق مين
همس:
اوعى تكونى بتكدبى وظلماهم
همس:
ههههههههه
رانيا:
لا صدقيني انا
همس:
اصلهم بيقولو
همس:
ان اللى بيعتقلوهم
همس:
عملاء من فتح
رانيا:
وانا وحدة من الوطن
رانيا:
الشريف
رانيا:
الي ضاع ما بين رجلين الناس الي بيتاجرو ا في دم الناس
رانيا:
الغلابة والاطفال
همس:
بس بيقولو دا عملاء من فتح
همس:
كانو بيقولو لاسرائيل على اماكن المقاومة
رانيا:
لا واللة ما هم عملاء من فتح
همس:
وفيه ناس شافت فديوهات متصورة
همس:
بالحكايه دى
رانيا:
هدولا ناس بيشوكو من الفساد الي بيعملوة في الارض
رانيا:
في بعض منهم
رانيا:
هدا لا شك
همس:
طيب انتى شوفتى بعينك
رانيا:
10%فقط
رانيا:
والباقي هما بيضربوهم من الناس الغلابة
رانيا:
اة
رانيا:
بعيني
رانيا:
ساعة القصف
رانيا:
في ايام الحرب
همس:
امال بقول كدا وبحكى فى المدونة مفيش حد مصدقنى
رانيا:
وصاحبتي اخوها
همس:
وبيقلو دا كدب
همس:
واحنا ضد المقاومة
رانيا:
بهدلوة وفرضو علية اقامة جبرية ممنوع يخرج من باب البيت لمدة 3 شهور

رانيا:
واللة هو هده الي بيحصل في البلد
رانيا:
وخال تهاني مرات اخوية محمد
رانيا:
وابن خالها
همس:
عملو فيهم ايه
رانيا:
طيب خليكي بالمساعدات الي بتيجي من الدول ببيعوها للناس بيع
رانيا:
منعوهم من الخروق من البيت
همس:
والله انا نزلت موضوع فى المدونة وحكيت محدش مصدق
رانيا:
وهددوهم بالضرب
رانيا:
والموت
رانيا:
انتي صادقة وربنا علي ما اقول شهيد
رانيا:
وافضلي علي كلامك
رانيا:
وربنا هو عالم بيكي
همس:
انا بقولهم مش معنى انهم مقاومة ان ليهم الحق فى انهم يعتقلو الناس ويقتلوهم
رانيا:
عشان بيشتكو من الوضع والضرب في المدنيين
همس:
يقلو دول عملاء فتح
رانيا:
بجد صح لسانك
رانيا:
لا واللة فتح اشرف منهم
همس:
ياسلام
رانيا:
وما عملو فينا 1% من الي عملاه حماس فينا
همس:
الناس متخيله انك ما بتعرفى حاجه فى البلد
همس:
بيقلو هيا ما بتعرف حاجه فى السياسه
رانيا:
واللة طلع صرمة عيل فتح اشرف من احسن واحد في حماس
همس:
اللى يسمعك كدا هيقول انك فتحاويه
رانيا:
واللة انا كنت في الجامعة اليوم ويم الاتنيين
رانيا:
وهربت من غرفة القسم
رانيا:
الي كانو الاساتدة قاعدين فيها
رانيا:
لانهم بيحكو علي حماس
همس:
بيقولو ايه
رانيا:
واللة انا منا فتح ولا حماس
رانيا:
انا مع ربنا
رانيا:
ان حماس بهدلتنا وانهم بيبيعو المساعدات للناس
همس:
بقلهم كدا وربنا بقلها دو واحده ملهاش فى سياسه ولا زفت
رانيا:
وانهم بيديه اتباعهم فلوس من المساعدات وباقي الشعب والناس الي مهدومة بيوتها بتتفرج عليهم
رانيا:
وقلت لاستاد بدناش نحكي في هده الامور
رانيا:
حكالي هيني واقف يجو يطخوني
رانيا:
وانا شفته معصب ومنرفز
رانيا:
فرحت طلعت من الغرفة وسبتهم يكملو الكلام
همس:
يعنى اساتذه الجامعه ضد حماس
رانيا:
ورئيس الجامعة كمان
رانيا:
وانتي لو تعرفي بيعملو اية في الجامعة والبنات
رانيا:
مش حتصدقي
همس:
اذاى والناس كلها بتقول احسن حاجه حصلت هيا المقاومة
همس:
بيعملو ايه
همس:
لا احكى علشان انزل الكلام دا بالنص فى المدونة
رانيا:
بيضربو البنات وبنيموهن علي الارض وبيحطو رجليهم علي بطونهم وبيقولو الشاطرة فيكو تيجي تفزع ليها
رانيا:
في منتها قلت الادب
همس:
ليه كدا
همس:
هما فتح البنات دول
همس:
ولا ليهم نشاط ضدهم
رانيا:
يا بنتي 105 حالة من البنات من بينهم حالات اجهاض وكسور واغماء
رانيا:
وبيحكوا للبنات
همس:
بالرغم حتى لو كانو دول ولا دول ما يصحش يعملو كدا
رانيا:
كلام منتي قلت الادب
رانيا:
وعمري ما بقدر احكي كلمه منه
همس:
ازاى انا هتجنن بصراحه
رانيا:
هدولا الشيوخ والي دقونهم شبر
همس:
العالم كلها معترفه بيهم انهم حاجه عظيمه
رانيا:
واللة دا حصل
همس:
طيب تعرفى تجيبى اى فديوهات
همس:
ولا حتى صور
رانيا:
انا ما كنت في الجامعة
رانيا:
واللة مرة حصلت مشكلة كبيرة في الملعب عندي وانا خفت
رانيا:
وهربت من الملعب
رانيا:
وازميلتي
همس:
مفيش حد بيصور الكلام دا
رانيا:
دكتورة في الجامعة راحت تفزع لبنت كان الشب بدوا يضربها علي راسها فهيه الي تلقت العصا وايدها انكسرت
همس:
دا انتى شوفتيه
همس:
بنفسك
رانيا:
لا في بنات من فتح وبنات من حماس بيصوروا
همس:
انا نفسى افهم دى جامعة بنات
رانيا:
والامن بيراقبهم وكلهم بيتعرضو للتحقييق
همس:
طيب ابقى اطلبى منهم تصوير
رانيا:
وانا صراحة بخاف اصور
رانيا:
انتي عارفاني
همس:
اه يا خيبه
همس:
اه عرفاكى
همس:
واللى بيشوفنى بنزل كلامك يقولو البت دى سبع
رانيا:
اهلي مش ناقصين مشاكل
همس:
اقلهم دى يا جماعه فضفضه بينا علشان اصحاب وبتحكيلى عن ظروفها وبطمنى عليكى
رانيا:
ههههههههههههههههههههههههههههه
رانيا:
بجد اصلك مش متخيلة الوضع عنا
رانيا:
تو اياد بيحكي مع بسمة وبيحكيلها عن حماس
همس:
بصراحه لاء مش متخيله
رانيا:
فابويه زقع ليه
رانيا:
وبطل يكمل ليها
رانيا:
وبسمة صراحة بتسلم عليكي كتير
همس:
كلامك شبه مستحيل لواقع العلم كلو معترف بيه ولو حد قال حاجه ضده يقلك انا عالم مبتفهمش دول لو ما ماقالو اننا تبع اسرائيل اصلا
رانيا:
اللة يسامحمهم
رانيا:
وياريتني ما سمعت الكلمة دي منك
همس:
انابقول انا كمان هيتقال كدا عليا
همس:
مش بنقلك واقع بيتقال يا بنتى
رانيا:
حتي حتي لو بهزار
همس:
بعرفك الناس شايفه حماس انهم ملايكة
همس:
وانتى بتحكيلى الرعب اللى انتم عايشين فيه
رانيا:
اة عارفة واللة
رانيا:
لاني كلمت علا صاحبتي
همس:
انا بقلهم انا لا سياسيه ولا زفت ولا انا ضد حماس طالما بتقتل اى كلب اسرائيلى
همس:
بس دا مش يديها الحق فى اللى بتعملو فى الناس
رانيا:
وحكتلي انوكل الناس بيحكو مع المقاومة
همس:
اه طبعا
همس:
كلهم معاها
رانيا:
وبتجمع فلوس للمقاومة لشراء السلاح
همس:
بس معاها فى المقاومه ضد اسرائيل
همس:
بس مش معاهم لما اكيد يسمعو كلامك دا
رانيا:
وهيه ما اقتنعت بالي حكته ليها
همس:
بالرغم انهم بيشككو فيه ومش مصدقينى

همس:
شوفتى محدش بيصدقك ولا بيصدقنى
رانيا:
مش بس في مصر دا في كل العالم
همس:
ايوا طبعا
همس:
هو شئ كويس جدا انهم يقاومو طبعا وكلنا معاهم
همس:
بس مش فاهم اللى بيعملو فيم والحكى دا
همس:
من حقهم ودا بئه شئ طبيعى
همس:
ولا فى ايه بظبط
رانيا:
بجد ان ما كان في مقاومة
رانيا:
الي بسيطة جدا من الشرفاء
رانيا:
في غزة
رانيا:
من ابناء حماس وفتح والجهاد والجبهة
رانيا:
وكل عناصر حماس من مصادر موثق فيها
رانيا:
كانو في انفاق تحت الارض
رانيا:
والقطاع كله انفاق
همس:
واللى غايظنى ان فيه فصايل كتيره فى المقاومة وكل الفضل منسوب لحماس بس
رانيا:
شفتي
رانيا:
وهدا مجننا
همس:
طيب ليه ما يقولو مقاومة فلسطنيه
همس:
مش يقولو مقاومة حماس
رانيا:
غباء
رانيا:
بعيد عنك
همس:
على الاقل ما يجعلو فيه فرق فى المقاومة
همس:
استنى هنا يعنى ايه مصدر موثوق منه
همس:
انت اش عرفك انهم مستخبين فى انفاق
رانيا:
يعني ناس واصلة في حماس
رانيا:
وحكي انهم مبلغين يتخبو في الانفاق
رانيا:
من بداية الحرب
رانيا:
وانا اولاد اخوالي 5 في حماس وابن خااتي كمان
همس:
مين قلك كدا
همس:
اها
رانيا:
وهما كانو متخبيين رانيا:
وكل اقاربنا في حماس
همس:
يا نهار فقعه
رانيا:
وهيه ما حد فيهم اتصاوب ولا استشهد
همس:
ولا قام باى مقاومة
رانيا:
وامي بتحكيلهم ما حد منكو يجي عليه
رانيا:
ولا يسلم عليه ولا يزورني
رانيا:
ولا اي حاجة
رانيا:
كانو تحت الارض
رانيا:
هما وكل اتباع حماس
همس:
يعنى كل عيلتك حماس
رانيا:
واماكن الانفاق كمان في المدن معروفه
همس:
وانتى بتقولى كدا عليهم اه لو يعرفو كانو هيطخوكى

رانيا:
نصها من جانب امي حماس
رانيا:
اكيد
رانيا:
بس احنا ما بنحكي نهائي
رانيا:
الي بيحكي بموت
همس:
انا على فكره هنزل الكلام دا بالنص فى المدونة
همس:
خليهم باه يعرفو
رانيا:
خليهم يعرفو
رانيا:
هو انا احكيلك بصرحة
رانيا:
حماس عملت ليها شعبية
رانيا:
وعملت حاجات كويسة قبل ما تمسك الحكم
رانيا:
مهدت للناس واشبعتهم عشان الانتخابات
رانيا:
واستغلت فرصة ان فتح كانت بتسرق شوية
رانيا:
وسمعتها كانت متبهدلة
رانيا:
فالناس قالت خلينا نغير ونجرب بالكن الحض يجيب
همس:
يعنى ايه الحته الاخيره دى
رانيا:
وبعدين الناس راحت انتخبتهم
رانيا:
وبعد ما انتخبتهم وقعدوا علي الكراسي والفلوس صارت بالكوم تيجي عليهم من ايران وتركيا وقطر
رانيا:
انهبلو
رانيا:
واشي عمرهم ما بيحلمو فيه
رانيا:
فصارو يعضو
همس:
بس الناس دى بتبعت فلوس علشانكم
رانيا:
ودخلوللناس من باب الدين
رانيا:
اة
رانيا:
والناس صدقتهم
همس:
مش عارفه انتى بتدينى احساس انك بتفهمى
همس:
ههههههههه
رانيا:
والحين بتندم علي اليوم الي انتخبتهم فيه
همس:
بجد
همس:
بتندم
رانيا:
ههههههههههههههههههههههههههه
رانيا:
اكييييييييييييييييييييييييييييييد واللة
همس:
يعنى هما كانو مخدعوين فيهم اوى كدا
رانيا:
كفاية عليهم دعاوي الايتام والارامل
رانيا:
الي نهبو فلوسهم وبنو فيهن فيلا وعمارات
رانيا:
والحين اليهود هدوهن كلهن علي روسهم
رانيا:
ما هو الي بيجي بحرام بيروح بلحظة
رانيا:
اة واللة
رانيا:
واحنا اولهم
همس:
انتم ايه بظبط
رانيا
كنا مخدوعين في حماس

بكدا خلص الحوار
انا عايزه افهم نقطتين دلوقتى .... على رايها لو فرضنا حماس ملاك ليه بتبيع للفلسطنين المساعدات اللى بتيجى من بره
ومحدش يقلى لاء استحاله
تانى حاجه اشمعنا المقاومة اللى حصلت منسوبه كلها لحماس بس
ومقاومة يعنى حماس ... بالرغم ان فيه شهداء من جميع الفصائل الفلسطنيه حتى فتح اللى الناس بتقول ما قاومة
ودول عملاء لاسرائيل استشهد منهم اكتر من اربعين واحد ودا احصائيه سمعتها فى التلفزيون ...
ولما نشوف اخرتها.... اصلى زهقت كل حاجه فيها كدب ونفاق علشان المصلحه الذاتيه وبس
حاجه تقرف باه