الجمعة، يناير ٣٠، ٢٠٠٩

اربعه مبروووووك

مبررررررررررررررررروك للكل يا جماعه
انا عارفه انها جيت متاخره بس معلشى
الاول حابه اقول لكيكى بطتى مبروك علشان ربنا زحلقها قصدى كرمها ونجحت فى الترم
وكفااااااااااااارة يا بطتى
وعقبال الباقى .... وتخلصى كدا ....وتنولى شرف ولقب عاطله وبفخر زى كدا
وتانى مبروووووووووووك لجنتى صاحبه مدونة جنه علشان نزلها موضوع فى مدونات مصريه للجيب
تالت مبروك .... لطارق طبعا ... صاحب مدونة كوارث
والف مبروك علشان كتابه الاول ... ويارب ديما بالتوفيق ... ونجاح مستمر باذن الله
ورابع مبروك للغزالى ... صاحب مدونة الغزالى
علشان برضو كتابه .... ويارب ديما فى نجااااااح مستمر


اه حابه ايه حابه دى لا المفروض اشخط الكل لازم يشترى الكتب طبعا ....
مش عايزة اى مبرر ولا اى سبب للامتناع عن شراء الكتب
فاهمين ... حد يقلى انا مش موجود فى مصر ... انا بعيد زى حالاتى كدا مثلا
مفيش اى مشكله .... كل اللى عليك ان تقول لحد قريبك ولا حد من اصحابك
يكونى من القاهره او نزال القاهر ... او ينزل مخصوص عادى يعنى
يشترى الكتاب .... ولما تقابله يدهولك .... زى ما انا عملت بظبط ... وربنا يخليلى زهوتى حببتشى
الكتب فى المعرض .... وبلاش حجج وحركات نص كم .... فهماكم يا خلابيص ... وبلاش بخل
يلا وعقبالكم يا خلاااااااااااااابيص

الأربعاء، يناير ٢٨، ٢٠٠٩

اجابات لا تخطر على عقل بشر ولا حتى حيوان ولا جماد


انا اتقابلت فى العربيه مع بنت بتسالنى ... هو حضرتك درستى فى المدرسه الاعدادى بتاعت البلد

انا طبعا بكل اسف مع زحف الذكريات المهببه اليا ... اه انا اشمعنى

اصل انتى درستيلى ...

انا باه ... بنحنح وعامله فيها صغنونه .... انتى متاكده ... ليه هو انتى فى سنه كام

انا فى كليه تربيه يا ابله ...

ما شا ء الله .... والله كويس ان فى حد فيكم دخل كليه ... وكمان تربيه

بقولها وانا بفتكر الشهر الحزين اللى درسته فى ام المدرسه دى اللى تنحرق

عن قريب والتعليم كلو فى مصر ان شا ءالله

ال وانا اول ما اتخرجت عندى طموحات باه وعامله فيها بورم ... وانااللى هخلى العيال ميه ميه

واى حاجه كنت معترضه عليها ايام المدرسين مش هعملها

انا هحبب العيال فيا هبقى صحبتهم مش مدرسه واوامر وشخطت

احلام ....احلام .... احلام .... لحد ما شوفت الواقع

ودخلت الفصل .... بصراحه انا يومها حمدت ربنا اللى انا نفسى طلعت من كليه

كان مستوى العيال مهبب الا كان قله قليله موجودة ما بين الشاطره والمتوسطة

والباقى هيا والحيطة واحد ... لا والله انا بكدا بهين الحيطة ....

لا كتب ولا كراريس ولا واجب ولا مزاكره ولا فهم ولا اى رد فعل خالص... تنابل

دول المفروض يتعلمو فى فصل من اصحاب بطئ التعليم والفهم

لا وانا عامله فيها الفتكه وشغاله باه ... وال ايه مستقبل وهباب

المهم طول الشهر اشرح .... واهاتى .... وافهم بكذا طريقه والله

وجه امتحان اخر الشهر .... ودا اللى جبلى حرحر وخلانى اعتزل التدريس لفتره القادمه


انا على ما اتذكر ان فيه سؤالين فى الامتحان كانت اجابتهم شبه مستحيله وعبقريه ولا تخطر على بال بشر ولا حتى حيوان ولا جماد

اه والله ما عرفت احددلها اى اتجاه اصلا ... حسسونى انى فاشله فشل زريع

المهم خدو بالكم معايا كدا من السؤال .... ومن الاجابه المتكرره بنفس الطريقه فى الفئه المهبب اياها

السؤال الاول كان بيقول قارن بين العصر الحجرى الحديث والعصر الحجرى القديم

الاجابه العصر الحجرى القديم لم يتم اكتشاف التكنولوجيا الحديثه
انما فى العصر الحجرى الحديث تم اكتشاف التكنولوجيا الحديثه


السؤال التانى ... بم تفسر ... تعاقب الليل والنهار

الاجابه ... علشان النهار الناس بتشتغل فيه وبليل الناس بتخاف تطلع من بيوتها


ياسوااااااااااااادى

ايه دا ... تكنولوجيا ايه وهباب ايه .... دا المنهج كلو مفهوش تكنولوجيا اصلا

جبولى الكلام دا منين ... وكلهم نسخين من بعض ...

و كان مجهود ذاتى انى فسرت الكلام طبع وقصدهم ايه

ولا كل كوم والناس بتخاف تطلع من بيوتها كوم تانى

يا خرااااااااااااااابى

ايه اللى انا حاسه بيه دا .... يعنى ايه ... انا فاشله ولا ايه

دخلت الفصل .... انتو يا زاله منك ليه ليها .... ايه الهبل دا

انا شرحت دا ... تكنولوجيا يا هوبل اللى فى الحجرى الطم ...

يادى المصيبه دا انا عملت اللالى من خريطة لقرايه فى الكتاب واتابع نظام الشرح الحديث

( زى قيام بدوم تمثيل يعنى كل تلميذ ياخد عنصر من عناصر الدرس

ويتخيل انه هو العنصر دا ويقوم بالتحدث عن نفسه ليعرف بيه الباقى )


الله يخر بيتكم .... جبتولى احباط الله يقرفكم .... مفيش اللى خمسه عدلين فى الفصل

لا دا كلو وانا بشتم واهزق ... وهما متنحين ليا ... وفيهم واحد نام

انا كان قلبى هيقف .... والضغط اشتغل

بس هديت نفسى وقلت .... لا يمكن انا علشان خريجه كليه اداب ودارسه اكاديمية

وما دارسة مواد تربويه .... فيمكن دا السبب

فقررت انى اعتزل التدريس ولو بشكل مؤقت ... واكمل دراسات عليا

واخدتلى الدبلوم التربوى ... وبعديها اخدتلى الدبلوم المهنى قسم تربيه خاصه

وبعديها اخدتلى دورتين فى التربيه الخاصه لجميع الاعاقات

وبعدين ختمتها بدورة صعوبات تعلم علشان اقفل باه على اى عيل يقرف اهلى

بقيت ادب وتربيه واعاقات وصعوبات

وياريته جه بفايده .... اصلى اكتشفت ان المشكله الاساسية مش فيا الحمد لله

انما المشكله فى التعليم ذاته ... ودا طبعا بعد ما فضلت ادرس تلت سنين

وبعد التربيه العملى سواء فى مدراس ايام الدبلومات

او فى معظم جمعيات التربيه الخاصه فى القاهره اصلى

اتقدمت واخدت دورات التخاطب والصعوابات من عين شمس

وبعد ما خلص ... قلت ابدا تانى واشق طريقى .... لقيت مصيبه فى طريقى

هيا عباره عن فتنه دينيه فى المدرسه .... اند النابغه الطالب العبقرى نبيه

هبقى احكى ايه اللى حصل بعدين اصل نبيه دا عزيز عليا وربنا

ربنا يخدو البعيد

يتبع ....

وربنا يترها وافتكر اكمل اصلى على ما افتكر كل ما اقول يتبع انسى

ابقو فكرونى باه




الجمعة، يناير ٢٣، ٢٠٠٩

الحكام الجرب

لسه حالا متفرجه على فيلم اجنبى بيحكى ازاى رجع صلاح الدين القدس يااااااااااااااه

من زمان ما سمعنا عن صلاح الدين وفى نفس الوقت بنتمنى نلاقى صلاح الدين دلوقتى

الفيلم بالرغم انه فيه شوية حول الا انه بين اد ايه ايمان اعداء الاسلام بعظمة المسلمين

ودا اعتراف غير مباشر بعظمة الاسلام ... وكانو طول الفيلم بيحترموا تفكير المسلمين وقدرتهم وقوتهم

على استعادة القدس وكان الامر شئ مسلم بيه فعلا .... كايمان منهم متمثل فى استسلام بالواقع

واختصار تم بالفعل استعادة القدس .... حاجه زى الحلم الا انا صحيت منه على كلام

صحبتى الفلسطنيه .... وبسالها ايه الاخبار ... بتاكدلى ان لسه فيه قلق والكهربا مفصوله

ومفيش اكل والحياه صعبه عليهم

بقلها ليه دا فيه معونات كتير دخلت ليكم هو مفيش حد بيوزع الحاجات اللى بتدخلكم دى

صحبتى ... قسما بالله العظيم الاشياء بتتباع علينا ... بتبيعها لينا باغلى شئ حتى انبوبه البتوجاز بتوصل

بما يعادل من 600 جنيه الى 1200 جنيه ....

احنا كمان عندنا ازمة غاز والامبوبه سمعت انها وصلت ل25 جنيه بس كدا رحمه عنكم

خلى مبارك الكلب يشحت الغاز لولاد الكلب ... اهو يقتلو فيكم ... واحنا نولع فى نفسنا

مهيا الانابيب الغاز بتيجى من الانفاق .... وبتتباع زى ما قلت فوق 600 جنيه عندنا

لاحولا ولا قوة الا بالله .... طب مفيش مسؤلين دولين مثلا من الهلال الاحمر ولا الصليب الدولى يوزعوها

لا البركه فى حماس .... بتبيعها للينا .... بعد ما يوزعو على اتباعها

والله السعوديه بعتت بطاطا وبندوره .... باعتها لينا والله

ازاى والكل بيقول المقاومة ... ولما بسمع كلامك بحس ان اسرائيل احسن منها على كدا

طب والله العظيم انا لما كنت بسمع اهلى وانا فى مصر بيحكولى على اللى حماس

بتعملو ما كنت مصدقه

الا لما شوفت بنفسى

ليه بيحصل ايه ...؟؟؟؟

حماس محرمه كل شئ .... كل شئ حرام

انامش فاهمه ؟؟؟ طيب مفيش حد منكم كشعب غير زفت حماس ولا فتح

يدور على مصلحتكم

والله شوفنا وسمعنا لو حد نطق ويمكن قبل ما ينطق اقل شئ حماس بتعملها

الاقامه الجبريه لمدة شهرين تلاته فى بيته ما يخرج منه

ووالله العظيم ... لو حد نطق بيطخوه فى رجله او يقتلوة ...

وعاملين معتقلات تحت المساجد والمستشفيات والمدارس ... وهذا كان بيحصل والحرب علينا


يعنى ايه تحت ....

يعنى فى البدروم .... واخدين ناس وقت الحرب واسرائيل بتموت فينا ... ومعتقلينهم فى البدرومات دى

بتكلمى جد .... ازاى هيا كانت بتقاوم ولا بتسجن ولا بتقتل فيكم وكمان ساعة الحرب

والله العظيم هذا حصل .... ما حد يقدر ينطق

بس اقول ايه نستاهل اكتر من هيك .... احنا اللى عملنا فى نفسينا

شويه يقتلو فى بعض حماس وفتح .... وحماس تقتل فى اللى ضدها وتعتقلهم .... واسرائيل بتحرق فينا


امال يا بنتى البلد هتبنوها ازى من تانى .... والمساعدات اللى جيالكم من بره دى

مين اللى هيمسكها ....

لا ما دلوقتى مختلفين عليها ... والسعوديه منحة مليار وعايزة تديها للسلطة بما انها اللى ماسكة الحكم

مشعل طلع واعترض وقال السعوديه بتعطى الفلوس للايدى الفاسده قصده فتح


دا جزء من حوار دا بينى وبين صاحبتى الفلسطنيه زى العادة و جالى احباط زى العاده برضو


قلت مليون مره صحبتى دى لا هيا فتح ولا هيا حماس ولا بدنجان .... دى واحده زينا بظبط

من ضمن ناس كتير يا عينى ضايعين بين كتلتين اغبى واوسخ من بعض كل همهم مين يوصل للحكم

حتى لو دا خلاهم ضدد نفسهم ... حتى لو على حساب الناس الغلابة اللى بقت خايفه تتنفس

مش عارفه تلاقيها من احتلال اسرائيل ....ولا احتلال فتح وحماس الكلاب

محدش يقلى دول مقاومة وزفت .... مليش دعوه .... مقاومة يعنى تقاومة الظلم وتقتل الظالم

مش اقتل ابن بلدى علشان هو فتح وانا حماس .... مقاومة مش ابيع المساعدات باغلى الفلوس

مقاومة تنصر الحق مش تقتل وتعتقل لو حد اعترض ولا وقف ضدها

الله يحرق فتح على حماس على اسرائيل على كل الحكام العرب

كل كلب فيهم كل همو الكرسى .... هيلم اد ايه فلوس .... هيدوس على مين علشان يفضل ويخرب البلد

ولو خربت طظ انا هسيب البلد واعيش بالفلوس المتهربه .... كلهم ولاد كلب اوساخ


وفالحين بس المقاومة هببت ومبارك اوقف ونيل ....

لا اسرائيل منتظره من حد يرجعها على اللى هيا بتعملو ولا بالمقاومة ولا بمبارك وقفت الضرب

اللى حصل دا شئ طبيعى فى الظروف الوسخه دى ....

وهيا عارفه هتبدا امته وتقف امتة ... اصلها مش هتفضل تضرب متواصل .... ولا هياثر فيها

كلام امم زفت ولا حاكم وسخ ....

واللى يضحك ان طول ما فيه حصار وضرب وحرق فى غزة ...كل ما يحصل خلاف بين حكام الجرب

يبقى فى المقابل بوس واحضاب لاسيادهم ....

وبعد ما خلص الضرب يتصالحو .... واللى يشل اكتر انهم يتخانقو علنى كدا وينشرو غاسلهم الوسخ

وبعد غدوه مغلقة فى قمة الكويت يطلعو الضحكة مرسومة بمكوة رجل على خلاقهم الوسخه

علشان غدوه تتصالحو .... يبقى هيا كانت سبب الخلاف ولا ايه .... دى حاجه واطيه اوى

ولا يمكن قسمتو بينكم وبين بعضكم تمن سكوتكم على اللى حصل .... وقيضتو تمن اللى ماتو يا كلاب

وسخين وهتفضلو طول عمركم وسخين يا حكام يا جرب .... كلاب ومستنين عضمة

وللاسف العضمة دى احنا .... الله يحرقكم بجاز وسخ

انامش عارفه اصدق ايه بظبط ... اصدق الكلام اللى بيتقال عن المقاومة من هنا وهناك

ولا الكلام من صحبتى اللى عايشه واقع وشايفه وسامعه بنفسها

انااااااااااااااااااااا ززززززززززهقت






الثلاثاء، يناير ٢٠، ٢٠٠٩

اصعب كلمات الحب

اهم حاجه انا صاحيه النهاردة من النوم بعد ما حلمت بخطيبى السابق وانا لما بحلم بيه بصحى مخنوقه جدااااااااا
وافضل ابكى واقول ايه الهبل دا ... لسه بحلم بيه بعد اربعه سنين وهو تلاقى عياله دخلت المدرسه
ودلوقتى وانابفتح الايمل لقيت مبعوتلى الكلام دا
اتخنقت بزياده .... بالرغم انه كلام رائع جدا فى معناه ....وبيلمس اى حد من جواه
******
اصـعـب كلـمـات الحــب
صعب أن تحب شخصا لا يحبك
الأصعب أن تستمر في حبه رغم عدم إحساسه بك
صعب أن ينتهي الحب الصادق نتيجه لأمر تافه
الأصعب أن يستمر الفراق لأن كل طرف ينتظر إشاره الرجوع من الآخر
صعب الوداع في الحب
الأصعب أن ينتهي الحب دون كلمة وداع
صعب الفراق في الحب
الأصعب أن يظل طرف واحد فقط أسير لذلك الحب والحبيب
صعب أن تختار من تحب
الأصعب أن تحاول كراهية من كنت تحب
صعب أن تقع في الحب في الزمن الخاطئ
الأصعب أن يتوافق ذلك مع الشخص الخاطئ
صعب أن يجفاك الحبيب لأسباب غير واضحه
الأصعب أن لايبرر لك غيابه رغم سؤالك الدائم عنه
صعب أن تقع في حب شخص قلبه لا يزال ينزف من خاينه موجعه
الأصعب إقناعه بأنك شخص مختلف
صعب أن تشعر بالحاجة الى الحب
الأصعب فقدان القدره على الحب
صعب فقدان القدره على الحب
الأصعب أن تظل مؤمنا بفقدان هذه القدره
صعب أن يبدأ الحب بالشفقه
الأصعب أن يستمر الحب بالشفقه
صعب أن يتحول الحب الى
الأصعب أن يتحول الحب الى عداوه
صعب أن يأتي الحب قبل الزواج
الأصعب أن يأتي الحب بعد الزواج
أن تحب أكثر من شخص في حياتك
الأصعب أن تجمع أكثر من حب في وقت واحد
صعب أن يعود الحب كما كان بعد الفراق
الأصعب أن نظل ننتظر عودته كما كان
صعب أن تختار بين أكثر من حب
الأصعب أن لاتجد من يستحق الإختيار
صعب محاولة إرضاء الحبيب
الأصعب أن يكون من النوع الذي لا يرضى بسهوله
صعب أن يغار عليك من تحب
الأصعب أن لايغار عليك مطلقا
صعب الاختيار بين الحب والكرامه
الأصعب أن تكون مجبرا على التنازل عن أحدهما
صعب أن تقتل الحب من قلبك
الأصعب أن يحاول الأخرون قتل هذا الحب
صعب أن تضحي من أجل الحب
الأصعب أن لا تجد من تضحي لأجله
الظاهر الصعب والاصعب اننا نلاقى فعلا شئ صادق

الأحد، يناير ١٨، ٢٠٠٩

اصلى كنت فى الاسماعيلية


ايه الهبل اللى من الحكام الهطله دى

محسسنى انهم بينقطو فى فرح .... كل واحد عامل قمه فى بلد شكل

وكل شويه بلد ترفض تروح القمه بتاعت البلد الفلانيه

وبينشرو غسيلهم الوسخ قدام العالم

حتى الاجتماع على انهم يقعدو مع بعض فشلين فيه

جتهم القرق لما يلمهم على مره واحده ....

ولا ايه كل قمه يقولو انهم لمو المبلغ الفلانى تقوم القم التانيه تعلى السعر

محسسنى انهم بينقطو رقاصه الله يحرقهم بجاز

بتمنى فعلا يجتمعوا كلهم فى مكان واحد وبدعى ليل ونها وربنا

مش علشان لقدر الله يتفقو ولا يتنيلو يعملو حاجه .... لالا علشان ربنا يكرم اسرائيل

ويطلع صاروخ احول كدا .... وينزل عليهم يولع فيهم وياربت يكون نووى ولا حتى فسفورى

ما علينا دا شغلهم شغل وسخ اصلا .... وشويه نسوان عاملين فيها حكام

الله يحرقه زى ما عكننو عليا من يوم كان اكثر من رائع فعلا

وهو كان يوم اللى دعتنا فيه نهر الحب بجد بشكرها اوى وربنا يجزيها خير على اللى بتعملو

مش عارفه هو حلو من ناحيه ايه بظبط ... بالرغم انه بدا بحول جامد معايا

وكنت عايزة انفجر فى اى حد ... مش عارفه هو انا اللى كنت حولا ولا الناس اللى حولا

كنت مظبطة نفسى على انى اركب الاوتبيس اللى طالع من عندنا بس لقيت الراجل بيقلى مفيش

انا سمعته من هنا وكان هاين عليا اهبدو بحاجه .... يا سيدى ازى دانا من يوم الاربع وانا سات قالولى

فى اتوبيس الجمعه وكمان ماكده امبارح قلى لاء مفيش.... كان نفسى ساعتها اعض حد

بس كتمت غيظ واقول لا لا انتى راحه اسماعليه هدى نفسك خالص

روحت قلت هركب المنصورة ومنها على الاسماعليه .... لقيت طنطا سالت فى منها للاسماعليه قلولى اه

ركبت طنطا ... واللى يجب الضغط ان كل موقف فى ناحيه نزلت من الميكروباص ركبت علشان اروح


الموقف التانى ....وصلت يا اخونا فين عربيات الاسماعليه ...

ايوا يا ابله .... دى اسماعليه .... ايون ... ركبت بس الظاهر كانو مزنقين فى اى راكب

بالنسبه ليهم فمصدقو لقونى اصلى اكتشفت انها راحه الزعازيع قصدى الزقازيق

اول ما وصلت استغرب خلقة البلد ...والسواق بكل برود يقلى عادى مهيا نص المسافه

اركبى من هنا ..... كنت عايزة اقلو انت اهبل يا عم انت .... قلت بلاش انتى راحه اسماعيليه

ركبت تاكسى علشان اروح الموقف التانى علشان اركب اخيرا للاسماعيليه

ورحت وركبت وبعد طبعا ما اتاكدت قلت كفايا حول كدا وابقى اكمل وانا راجعه مروحه

وانا طول الطريقه فرحانه علشان راحه الاسماعيليه اصلى انا بعشقها جداااااااااااااااااااا

مش عارفه ليه .... يمكن للهدوء اللى فيها وانا بحب الهدوء جدا رغم ان اللى يعرفنى يقول مجنونة

ولا بدى على هدوء اصلا ..... يمكن علشان مانحتها وانا مانجويه اصيله ومشروبى المفضل

يمن علشان فنله منتخبها بتاع الكوره علشان لونى المفضل الاصفر .... ولا يمكن لهدوء اهلها

اللى من الممكن تولع فى نفسك قدمهم ومن هدوء اعصابهم ممكن ينفخو فيك كمساعده انهم يطفوك

بس المهم انا بعشقهااااااا جدااااااااااااااااااااا

المهم وصلت اتقابلت فى مع شله البورسعديه وطلعنا على المستشفى وهلو علينا احلى بنات

من الزقازيق بجد بنات ميه ميه .... وسعيده بمعرفتهم اوى ....

وبعدين استنينا الحاج احمد الصباغ وزهرة واحسان باشا اللى حصل موقف ظبطهم فيه

وزورنا طبعا الفلسطنين بس للاسف حصل حركة نص كم من ادارة المستشفى

انهم ما قالو على كل المرضى الموجودين واكتشفنا ان فيه ناس ما قالو لينا علشان نزورهم

ما علينا .... وروحنا مستشفى الاسماعيليه العام .... وكانت فيها حاله واحده وطلع من حماس

وبرضو ادارة المستشفى حاولت تزحلقنا من اول البوابه يقولولنا ممنوع الزياره

وجوه حصل شد مع محمد الشاعر بعد ما اطلب منه البطاقه من واحد ظريف هناك

بصراحه كان غبى اوى ....وبرضو فيه اغبى منه طلب من احسان باشا الصور من الكام

وحصل شد برضو .... كان الهدف الاساسى من الهبل اللى عملوة يخوفونا

ليه مش عارفه ....لدرجه انهم طلبو مننا نشيل الشيلان الفلسطنيه اللى كنا لبسنها

خوف علينا من امن الدوله .... هبله ايه يارب .... خلاص قمل الدوله باه رعب

طظ فيهم .... خلاص بدل ما يبقو امن للناس خلاص يسببو رعب ليهم

غباء .... بس برضو ولا همنى دا انا فى الاسماعيليه ههههههههههه

المهم احلى حاجه ان بعد ما خرجنا من المستشفى وطلعنا ناكل حاجه احسان باشا

ما هدالو بال الا لما رجع للمستشفى واخد حقو .... اهى دى الرجاله ...

احلى حاجه انك تاخد حقك صح ....


بس بصراحه قضيت انا عن نفسى يوم جميل جداااااا واتعرفت على ناس عسل

وقابلت اصحابى العسل طبعا واللى ربنا ما يحرمنى منهم ابدا ...

وقلت باه ارجع تانى اكمل حول فى مواصلاتى .... الحاج هيما ربالى الخفيف
الراجل علشان روحتلو بدرى مره خلاص خد عليها واضطريت اسفتا انى اسيبهم يكملو اكلهم

واستاذن واروح وركبت للمنصورة المرادى قلت اهو تغير علشان الملل ...

وبعد ما وصلت المنصورة وركبت تاكسى علشان اروح الموقف التانى

ولسه راحه اقول على بلدنا ركبت عربيه ..... حسيت انى مش مرتاحه كدا

واللهم اجعلو خير .... قلت لا باه .... ياعم الاسوطا دى راحه فين ... دى راحه السمبلاوين يا ابله

مين ... ايه البندجاوين دى .... قلت بلاش تتعصبى انتى كنتى فى الاسماعيليه

نزلت وركبت لبلدنا اللى تخليلتها الاسماعيليه برضو .... وجيت اقعد لقيت جبنى اتنين اغتت

من بعض .... ومنهم واحد ريحتو غريبه جدا .... زى ما تقولو كدا متليف بصابونه جودمورننج

واكل ودان اهلى من الرغى .... بس قلت بلاش انتى كنتى فى الاسماعيليه

ورجعت سالمة لهيما باباتى حبيبى .... والحمد لله ... بس مش ملاحظين انه اخد عليا

ومدقق فى المواعيد بعد ما كنت برجع الساعه واحده بليل رجعت الساعه تسعه

بس هقول ايه ؟؟؟؟ يلا ابويا برضو وبموت فيه مبيقدرش يرفض ليا طلب ... هو ممكن يطخنى بس


باااااااااااااااااااااااااس دا كان يومي الرااااااااااااائعه .... مش كنت فى الاسماعيليه يا ناااااااااااااس


طولت عليكم بس براحتى دى مدونتى ومش هتعصب على حد علشان انا كنت فى الاسماعيليه


اه اه صحيح ... البوست الغريب اللى فات

كانت بايته عند صاحبتى وكنت فاتحه المدونة وسبتها ونمت هيا باه عكعكتلى فيها

بس لما اشوفها تانى هعضها حتة عضه .... ما تقلقو انا لسه بعقلى ....تقريبا ههههههه




الاثنين، يناير ١٢، ٢٠٠٩

البودرة المصريه

تحديــــث
اللقاء يوم الجمعه 16/1عدد الجرحى فى الاسماعيلية 19 حالة
بعد ان توفيت شابه هذا الصباح منهم سيدة تبلغ من العمر 58 عام
وشابة فى العناية المركزة عندها 17 سنة والباقى رجال من سن 17 عام الى الاربيعنيات
ومازالت المستشفى تستقبل المزيدم
حتاجين تبرعات مالية
وبعض الملابس
رقم تلفونى هو 0188047779
*******************
طبعا ما فضلش حاجه بعد ما اترمى فسفور ابيض على الغزاوية

موت بالبطيئ للناس والزرع والارض ولا عاد قمم هتنفع ولا مبادرات هتجيب نتيجه

عادى حتى لو بطلو حرب مهما كدا كدا بيموتوا ...


وامريكا باعته شحنت اسلحه لاسرائيل علشان تحرق غزة براحتها

وطيارات اسرائليه سببت فى اصابة اربعة مصرين منهم اتنين اطفال

نيجى لهنا باه ودا مربط الفرس ..... من كام يوم سمعنا ودا بناء على كلام الحكومة

ان فيه مجموعه من حماس متلثمين اقتحمو الحدود وقتلو ظابط مصرى واصابو كام عسكرى

وقالو ان الظابط مكنش مسلح .... من الاخر الجماعه دول هما اللى غلطانين

والحكومة ما ردتش بعنف ال ايه علشان مقدره اللى هما فيه .... دا اللى فهمتو من مضمون الحوار كلو

واللى يفرسك ظابط وعلى الحدود وال ايه مش مسلح ... ما علينا نعمل اننا هبل المهم

دا مجرد رد فعل سابق ومسبق للى متوقع من اسرائيل .... مش عايز يدى مبرر لحد

اصل مبارك ولا الحكومة مش هيقدرو ينطقو اصلا .... هيقولو ايه ناس فلسطنين قتلو مصرين على الحدود

ومش هنسكت وهندمر الدنيا ... دول اجبن من انهم يقولو كدا

مش علشان لقدر الله فعلا مقدرين الحاله النفسيه الجوع والموت اللى خلو ناس تعمل كدا

لا طبعا دا علشان مبارك ما يديش فرصه حد يقارن بين موقفه مع الفلسطنين وموقفه مع الاسرائلين

يعنى هيبقو سبع على الفلسطنين ..... وفار قدام الاسرائبين اللى بيموتو فينا على الحدود

ولا مبارك ولا حكومتة يقدرو يكحو قدمهم .... لا طبعا فايه العمل .... ينفضو خالص

وديتها ايه يعنى اى ظابط يموت طظ فى دهيه .... هنشغلو مراته زى اللى حصل وهنظبطها بكلمتين تثبيت

وكلو فى سبيل مبارك وحكومتة المشلولة .....

احسن حاجه مبارك يعملها انه يفضل فى البودرة المصريه الخمس خمسات دى اللى كل يوم فالق اهلينا بيها
وكل يوم مؤتمر صحفى يطلعو يقرفونا بيه

وعباس المعفن سايب اهلو يموتو من الفسفور وطالع يتفسح ولا ليه لزمة طب متتلقح مع اهلك طالما الكلام ما منوش فايدة

وولاد الكلب الاسرائلين شغالين ضرب وقتل ...

وكل حاكم عربى ينعر بكلمتين ....

والشعب يطلع يعمل مظاهرات ....

ونواب المجلس يضربو بعض بالجزم ....

بجد بجد انا بكرهه مباااااااااااااارك جداااااااااااااااااااااا



الجمعة، يناير ٠٩، ٢٠٠٩

ابتسامه وسلام

تك تك تك تك

لا انامش قايمه بدور منبه ولا حاجه .... انا بتكتك من البرد ....
بقالى يومين واخده اقامة جبريه فى السرير

متكسره من كتر المشى اللى انا مشيته والبركه فى احمد الصباغ وزهرة وهمس الاحباب

مش عارفه كانت دى رجليهم ولا دى كانت ايه .....مفيش الا انا والغلبانه كيكى اللى مدمرين

وانااقلهم ياناس حرام .... طب مفيش حد يشيلنى .... ولا الهوا

المهم اتقابلت انا وزهرة وروحنا مستشفى الهلال الاحمر وبعد دوخه صغننه اتقابلنا فى المدونين

وشوية ودخلنا المستشفى .... وبعديها روحنا على معهد ناصر ....


و زى ما اتكتب فى بعض المدونات كدا .... ان لقينا فيه ناس مبتور رجليهم

واللى لقينا ابنهم توفى .... وفيه ناس فى العنايه المركزة

بصراحه مش عارفه اقول ايه ... مش على المناظر ... لالا على الاحساس اللى عشناه

مش هقول انها كلها مشاعر حزن ولا هقول مشاعر عجز ....
عجز من انهم زياده عن التلت الاف مصاب وما دخل مصر للعلاج الا اقل من ميه وخمسن جريح فقط
حزن من رفض الحكومة المعفنه دى من منع تصدير الغاز اللى المحكمة طلعت مرتين حكم بمنع تصديره


وبالرغم ان كنت حزينة لما شوفتهم ومكسوفه منهم ... بس بصراحه ضحكت

ايوا ضحكت لما لقيت فيه ناس بتبتسم وبتضحك رغم التعب اللى هما فيه .... ومبسوطة اننا بنزورهم

واد ايه الزيارده دى بتفرحهم واسعدتهم ....

وكمان حسيت بفخر شديد اوى ... انهم من عرب زى ومسلمين وبالرغم من الالم والتعب اللى هما فيه

عندهم اصرار وحماس شديد بعد ما ربنا يشفيهم ورجعو بلدهم لا قصدى بلدنا

ان قدامهم حاجه من اتنين لاما النصر لاما الشهاده ....

وبرضو حسيت برضا وايمان نابع من كل اب فقد ابنه وكل ام بتتمنى بنتها ربنا يشفيها

وكلهم ثبات وقناعه ورضا من ربنا وكل اللى بيعملوه بيصلو وبيدعو ربنا لاولادهم وان ربنا ينصرهم

واللى اثر فيا جامد جدا ... الام اللى بنتها فى العنايه المركزة

بجد كلامها مش عارفه اوصفو ... بالرغم اننا استنينا لحد ما خلصت صلاه

ومش عارفه حسيت من كلامها ان عندها يقين ان ربنا يشفى بنتها وفى نفس الوقت حسيت ان عندها قناعه

ورضا لو لاقدر الله ما كتبلها الشفى .... وفى كلتا الحالتين وشها مليان ايمان وحب

وبالرغم من كدا رفضت اى هديه وكان مبررها ان فيه ناس محتاجه اكتر منها

بجد انا بحسد الناس دى على اللى هما فيه ..... ايه الحب والقناعه والرضا والايمان دا كلو

احساس حلو صح ... تخيلو باه اللى عايشينه فعلا ....

بصراحه انا اخدتلى جرعه تمام ... فخر وحماس وحب وايمان وقناعه ورضا باللى كتبهولنا ربنا

وفى نفس الوقت عدم استسلام وامل فى بكره احسن ... وان احنا فى جميع الحالات كسبانين

سواء شهاده ولا نصر ....


غير كمان اللى خلانى فرحانه ومبسوطة اوى اننا لقين ناس كتير زارتهم وفيه ناس كانت بتزورهم

فى نفس الوقت اللى كنا فيه .... وكنت فرحانه لما لقيت ناس بتسالنى فين مكان الفلسطنيين

بجد بجد حاجه كدا تفرح .... وجه فى بالى سؤال هو لازم يبقى فيه كارثه ولا مصيبه

علشان نقف جنب بعضنا ... علشان نساعد بعضنا ...

علشان نحب بعضنا ... علشان نتقرب من ربنا ومن بعضنا

يعنى الخلاصه ... الزياره عباره عن ابتسامه وسلام بس


الأحد، يناير ٠٤، ٢٠٠٩

بجد اسفه ....

رانيا ....

الموت بيحاصرنا من كل مكان ... مستنين الموت

اخواتى راحو دار اخويا محمد ... وانا وامى وابويا فى البيت وما هنطلع منه الا شهداء


هدايه ...

اختى اتزوجت وانا بمصر ادرس .... لا حضرت ليها فرح

ولا حضرت ليها انجاب البنتين .... ولا حضرت دفنت زوجها

زوجها استشهد .....


نادر ....

البيت عندنا اضرر خالص من الضرب والقصف

وليا قرايب وجيران استشهدو ....


نغم ....

احنا ليل ونهار قدام التلفزيون بنشاهد الاخبار ....

وبنتصل بالاهل كل يوم ... عايشين فى رعب من القصف

ولا فيه مى ولا اكل ولا غاز ولا كهربا

ونادر ليه تلاته ولاد عم استشهدو ....

ما بعرف شو نسوى ... حسبنا الله ونعم الوكيل ...


دا كلام من بعض الاتصالات باصحابى واخواتى الفلسطنين

سواء اللى هنا فى مصر بيدرسو .... او فى غزة مستنين الموت


انا عندى احباط جامد جداااااااااااااااا.....

وما عاد عندى امل فى اى شئ بجد .....

الحاجه الوحيده اللى بتيجى على بالى وبعتبرها كويسه

ما بعد الاستشهاد .... الموت ... هيلاقو جنه .... رحمة من ربنا

بدعى واقول يارب .... اى حد هيموت بالمناظر اللى بنشوفها دا

تاخد روحه قبل ما يحس بلحظة الم واحدة ....

يارب جفف دموع الرجال قبل النساء...

يارب اجعل كل قلب ست او راجل غزاوى منبع للايمان والصبر على البلاء

انا عارفه ان املنا الوحيد فى ربنا ....

بس انا بجد استسلمت واحبطت من كل شئ حولينا .....

بجد اسفه يا اصحابى .....

السبت، يناير ٠٣، ٢٠٠٩

اضعف الايمان

كنت بتكلم مع نهر الحب وقالتلى على موضوع زيارة الجرحى
وطبعا فكره جميله اوى وتعتبر اضعف الايمان بالنسبه لينا
وعلى فكره اى نعم محتاجين تبرع مادى بالنسبه للظروف اللى هما فيها
يس يرضو محتاجين للتبرع بالوقت .... ساعه او اقل من وقتك لزياره الجرحى
واظن ان دا ابسط واضعف شئ
فان شاء الله يوم الاربعاء
1/7
هنروح الهلال الاحمر المصرى اللى فى رمسيس
وهم بيستقبلوا الجرحى الفلسطينين
الساعه 11 الظهر
هم محتاجين
دم
ملايات سرير
وتبرعات مادية
او عينية
هدايا
ملابس
وللمتابعه عند نهر الحب