الخميس، أكتوبر ٣٠، ٢٠٠٨

اللهم زيد من نهضة الطحال عندهم .....

النهارده سمعت فى الطبعة الأولى أن الاقتصاد فى الخليج بطئ

فافتكرت اللي قرأته فى أخبار اليوم عدد السبت

وكان بعرض صفحتين كاملين شاملين عن عناوين تجيب ضغط وصور

تكسف وتعر والله

كان العنوان ( ضربة معلم من الرئيس مبارك أنقذت مصر من الأزمة العالمية )

أنا والله على أد ما انفقعت فى مررتى على أد ما ضحكت كنوع من الشفقة والسخرية من العالم الهبله دى

يعنى الدنيا كلها مخروبة ومتنيله وأنظمة بتنهار .....وال إيه المعلم أنقذ مصر

وياريته أنقذها فعلا عن طريق اقتصادنا أحنا ..... لا المعلم بعت رشيدى يدور على دول الخليج يشحت منهم

وال إيه المعلم بعتلهم رساله خطيه .... علشان يشجعهم على الاستثمار

وبصرف النظر عن منظر رشيدى وملك السعوديه فى الصورة اللى تخليك ما تقدر تعمل حاجه غير التف عليهم

واللى شاف الصورة والرشيدى بيدى الظرف بالايدين الاتنين

والملك عبد العزيز بيبصلو كانو بيقلو بزمتك أنت منتش مكسوف أنت ولا معلمك اللي بعتك


المهم أنا في تخيلي أن الرسالة دى محتواها بينص على التالي


ازيك يا عبد العزيز يا خويا ..... والله أنا مزنوق فى قرشين كدا ..... وشوفلى حاجه من تحت الطربيزة كدا

وأنا هظبطك يعنى هبعلك شركة ولا قطاع ولا ابعلك حتت ارض ولا انشالله ابعلك كام نفر من هنا

تخدهم تهين فيهم زى ما يريحك وعادى اضربهم بالجزمة وابق رحلهم برحتك

يلا باه أبعت مع رشيدة .....


أدى المعلم اللى بيصر على أهانت شعب بأكمله...

استثمار ايه اللى باعت يتكلم فيه .....

هو شايفنا دقين عصافير .... دى السعوديه من كام

يوم رحلت مصرين من هنالك ... وقرفانه منهم

ولا لاقى حاجه تتباع فى البلد فقال يستغل الظروف

ولا حكايه أن مصر بتشهد نهضه فى الصناعه الغذائيه فى فرنسا .....

ناس بتاكل هنا حمير وكلاب ..... وبتاكل حاجات مدة صلاحيتها انتهت ..... وبتاكل من مقالب الزباله

ويقل نهضه ..... الله يحرقهم .....

وال إيه باريس معجبه بالصناعه الغذائيه فى حين أن السودان ولبيا نفضت

لحكايه انها تستورد مواد غذائيه من مصر


ولا دا كلو علشان إدمان مبارك لفرنسا ..... اللى تعتبر اكتر دوله زارها مبارك فى عهده

ويقلك استثمار وعلاقات دوليه .... يا ترى علاقات من اى نوع ؟؟؟؟

إيه علاقات زى علاقات ساركوزى إياها .... ال بيقع على كل واحده

يمكن بيباصى حاجه للمعلم

واللى يشل فى الكلام أنهم بيصرو أن معدل النمو زاد والاستثماري زاد

وما كملو ويقلو ....

وزادت السرقه ...زادت بيع البلد ....

فيارب يزيد من

نهضة الطحال والقلب والكبد والشلل والضغط والسكر عندهم

قلو ااااااااااااااامين



الجمعة، أكتوبر ٢٤، ٢٠٠٨

فيا لقسوتك ....



سمعته قد أتى....

فسارعت بالخروج لأراه...

فامتلاء صدى بمسك هواه

تنفسته.... فأبيت أن يخرج منى

فواجه أشياء بداخلي

مددت يدي لملامسته ... فالتقيا بحب

واقتربت بوجهي منه ... فهمس لي

فسقط بردا عليا .... أطفئ نارا ...

ودخل صدري .... أيقظ نبضا ...

أبعد هما ألما بي....

وأتى بأملا كان يأبى المجئ أليا

وجدتنى معه قد أغرقت ...

زلزل أعماقي ...

أبرق أحلاما تناسيتها ....

دثر ذكريات طالما تمنيت محوها...

فأغمت عينيا ...

ابتسمت شفاهي ...

خفق قلبي ...

فطالما تمنيت أن يمتزج بكياني

ولكني وجدته يتباعد ويتلاشى

رجوته أن اذهب معه ...فتركني

فأجبرت عيني على الوميض

أيقنت أنه واقع ..

حقيقه ....ليست بحلم....

أبتسامه ....ليست ناضجة

إحساس لممت به قد انتهى

وصدر تنفس ليموت

وقلب خفق ...فأخفق ...ليودع

أكانت أحلامي مستحيلة...!!!


أكانت ابتسامتي قبيحة ...!!!


............!!!



فيا لقسوتك عليا

يا مطر ......!!!!!

الاثنين، أكتوبر ٢٠، ٢٠٠٨

مفيش عهد اوسخ من عهدك يا مبارك

تعدد المصايب من جو لبحر لأرض وتكررت والسبب مبارك وحكومتة الفقر وحزبة الواطى
ما سمعت مره حاجه تفرح

فى عهد مبارك... مفيش مكان ألا وفيه مصيبة ...فى السما طيارات وقعت

مفيش بحر إلا سفن غرقت ....

مفيش طرق إلا وحوادث بالآلاف وناس اتقتلت...
ومفيش قطرات تلاقى اللى أتحرق ولا واللي أتقلب

مفيش مكان إلا فيه عماره وقعت على اللى فيها ....

مفيش منصب ألا اللي مسئول عنه أهمل وسرق وأهدر مال شعب

مفيش واحد مسك الحكومة ألا أزفت من اللي قبله وأطول منه

مفيش مكان فى مصر ألا مهمل من ناحيه الميه والكهربا

مفيش مستشفى حكومية فى مصر الا لما تكون زريبة بهايم أصلا

مفيش مكان اثرى وهام وفيه مستندات الا لما أتحرق ...

مفيش كلب ولا حمار ألا وأيد الجزارين طالته

مفيش مقلب زباله ألا وتلاقي فيه ناس بدور على أكل

مفيش مكان فى مصر ألا أتباع وأتباع بالرخيص اوى

مفيش بنك ألا لما أتسرق منه مليارات من الكبرات ....وسجن ناس غلابة علشان ملاليم

مفيش ترعه ولا زرعه ألا وهيا متسرطنه ... ولا ارض مزروعه بالب ولا الفراولة

مفيش قانون ألا وعدلته علشان تتحنط فى الحكم وتقهر بيه شعب ودوس عليه الجزمة


مفيش مكان ألا وجيمى لف فيه وهاين عليه يبوس أيد الناس علشان يقلهم أنا حلو وشاطر

مفيش عيد ألا ونسمع عن اغتصابات ولا تحرشات ...

مفيش شهر يعدى ألا ونسمع فيه زياده فى الأسعار

مفيش يومين تنيلو يفوتو ونسمع بورصه ولعت ....وفى نفس الوقت اقتصادنا فل


مفيش مكان إلا وتلاقى القراءة للحياه ...واصلا معظم مدارس مصر وقعه

وعياله طالعه ما بتعرف تقراء اصلا....

مفيش بيت فى مصر ألا وتلاقى شباب أتخرج وعاطل وبيتمنى يتجوز ومش لاقى

مفيش حرامى ولا قاتل فى صورة رجل أعمال إلا وطلع برائه

مفيش سجن فيكى يا مصر ألا واتسمي معتقل للى يقول لا ليك ...

مفيش مكان جوه مصر ولا فى اى دوله ألا والمصريين فيه متهان ومضروب الجزمة ...


مفيش عين ما بكت من أحساس بالعجز ولا قلب بيدعى عليك علشان حس بظلم
دا يدل على مزبله فى دماغهم وغباء حكام
وعجز وفشل تاااااااااااااااام فى مخهم الجزمة
اصل لو المصيبه حصلت مره واحده نقول خيبة انما تتكرر بنفس الطريقه دا نوقل عليهم
شوية بهايم ومسكين البلد
بس هنقول ايه شويه جزم وفرحو لما لقوا مقاسهم
واحنا مقاسهم
فنستاهل اللى بيحصل
يووووووووووووووووووووووه

من الأخر كدا مفيش عهد أوسخ من عهدك يا مبارك


الأحد، أكتوبر ١٩، ٢٠٠٨

اقرا وتخيل

الكلام دا جالى على ايملى من صديق عزيز وطلب منى انزله فى المدونة
وطبعا ما اقدر انفضلو وارجع فى كلامى بعد ما وعدته
وهو كالتالى


المطلوب : اقرا وتخيل

سُكون يخيم علي كل شيء

صمت رهيب وهدوء عجيب ليس هناك سوى موتى وقبور


انتهى الزمان وفات الاوان


صيحة عالية رهيبة تشق الصمت


يدوي صوتها في الفضاء توقظ الموتى


تبعثر القبور

تنشق الارض




يخرج منها البشر




حفاة عراة




عليهم غبار قبورهم




كلهم يسرعون يلبون النداء فاليوم هو يوم القيامة لا كلام




ينظر الناس


حولهم في ذهول



هل هذه الارض التي عشنا عليها ؟؟؟


الجبال دكت


الانهار جفت


البحار اشتعلت الارض غير الارض


السماء غير السماء


لا مفر من تلبية النداء




وقعت الواقعة !!!!




الكل يصمت الكل مشغول بنفسه لا يفكر الا في مصيبته


الان اكتمل العدد من الانس والجن والشياطين والوحوش


الكل واقفون في ارض واحدة




فجأة ....

تتعلق العيون بالسماء انها تنشق في صوت رهيب يزيد الرعب


رعبا والفزع فزعا



ينزل من السماء ملائكة اشكالهم رهيبة






واقفون صفا واحدا في خشوع وذل




يفزع الناس يسألونهم




أفيكم ربنا ... ؟؟؟!!!




ترتجف الملائكة


سبحان ربنا


ليس بيننا ولكنه آت ...


يتوالي نزول الملائكة حتي ينزل حملة


العرش ينطلق منهم صوت التسبيح


عاليا في صمت الخلائق


ثم ينزل الله تبارك وتعالي في


جلاله وملكه ويضع كرسيه حيث يشاءمن ارضه


فمن وجد خيرا فليحمد الله ومن وجد غير ذلك فلا يلومن الا نفسه



الناس ابصارهم زائغة


والشمس تدنو من الرؤس من فوقهم لا يفصل بينهم وبينها


الا ميل واحدولكنها في هذا اليوم حرها مضاعف


انا وأنت واقفون معهم نبكي


دموعنا تنهمر من الفزع والخوف


الكل ينتظر ويطول الانتظار


خمســـــــــــــــــــــــون ألف سنة




تقف لا تدري الى أين تمضي الى الجنة او النار




خمسون الف سنة ولا شربة ماء



تلتهب الافواه والامعاء



الكل ينتظر


البعض يطلب الرحمة ولو بالذهاب الي النار من هول الموقف وطول


الانتظار لهذه الدرجة نعم؟؟؟!!!

ماذا أفعل..


هل من ملجأ يومئذ من كل هذا ؟؟؟

نعم فهناك أصحاب الامتيازات الخاصة


السبعة الذين يظلهم الله تحت عرشه


منهم شاب نشأ في طاعة الله


ومنهم رجل قلبه معلق بالمساجد


ومنهم من ذكر الله خاليا ففاضت عيناه



هل أنت من هؤلاء ؟؟؟


الأمل الأخير..


ما حال بقية الناس ؟

يجثون على ركبهم خائفين ..


أليس هذا هو أدم أبو البشر ؟


أليس هذا من أسجد الله له الملائكة ؟


الكل يجري اليه ....


اشفع لنا عند الله اسأله أن يصرفنا من هذا الموقف ..


فيقول : ان ربى قد غضب اليوم غضبا لم يغضب مثله من قبل ..



نفسي نفسي. .


يجرون الى موسى فيقول



نفسي نفسي ..



يجرون الى عيسى فيقول




نفسي نفسي ..





وأنت معهم تهتف




نفسي نفسي .....





فاذا بهم يرون محمد صلى الله عليه وسلم




فيسرعون اليه




فينطلق الى ربه ويستأذن عليه فيؤذن له




يقال سل تعط واشفع تشفع ..




والناس كلهم يرتقبون




فاذا بنور باهر انه نور عرش الرحمن






وأشرقت الارض بنور ربها




سيبدأ الحساب ..




ينادي ..




فلان ا بن فلان ..




انه اسمك أنت


تفزع من مكانك ..




يأتي عليك الملائكة يمسكون بك من كتفيك




يمشون بك في وسط الخلائق






الراكعة على أرجلها


وكلهم ينظرون اليك





صوت جهنم يزأر في أذنك ..




وأيدي الملائكة على كتفك ..




ويذهبون بك لتقف أمام الله للسؤال .....




ويبدأ مشهد جديد...




هذا المشهد سادعه لك أخي ولك يا أختي




فكل واحد منا يعرف ماذا عمل في حياته




هل أطعت الله ورسوله محمد صلى الله عليه وسلم؟؟؟




هل قرأت القرآن الكريم وعملت بأحكامه ؟؟




هل عملت بسنة نبينا محمد صلى الله عليه وسلم ؟؟؟




أم اتخذت لك نهجا غير نهجه...وسنةغير سنته...



وكنت من الذين أخبر عنهم حين قال




وإنّ امّتي ستفرق بعدي على ثلاث وسبعين فرقة،




فرقة منها ناجية واثنتان وسبعون في النار.




فهل سألت نفسك من أي فرقة ستكون؟؟؟




هل أديت الصلاة في وقتها ؟؟؟




هل صمت رمضان ايمانا واحتسابا ؟؟؟



هل تجنبت النفاق أمام الناس بحثا عن الشهرة ؟؟




هل أديت فريضة الحج ؟؟؟




هل أديت زكاة مالك ؟؟؟




هل كنت باراً بوالديك ؟؟




هل كنت صادقا مع نفسك ومع الناس أم كنت تكذب وتكذب وتكذب ؟؟




هل كنت حسن الخلق أم عديم الأخلاق ؟؟؟




هل ..وهل ..وهل ؟؟




هناك الحساب ....




أما الآن ...!!!




فاعمل لذلك اليوم...


ولا تدخر جهداَ


واعمل عملاَ يدخلك الجنه


ويبيض وجهك أمام الله يوم تلقاه ليحاسبك




وإلا فإن جهنم هي المأوى ..


واعلم أن الله كما أنه غفور رحيم هو أيضا شديد العقاب




فلا تأخذ صفه


وتنسى الأخرى ....


إن كنت محباً للخير والمشاركة في الأجر والثواب مرر هذة الرسالة إلى إخوانك ومحبيك




قال رسولنا الكريم صلى الله


عليه وسلم : ' الدال على الخير كفاعله '




أشياء لن يسألك الله عنها




لن يسألك ما نوع السيارة التي تقودها ....




بل سيسألك كم شخصا نقلت بسيارتك ولم تكن لديه وسيلة مواصلات




لن يسألك كم مساحة بيتك ..... بل سيسألك كم شخصا استضفت فيه




لن



يسألك كم كان راتبك ... بل سيسألك كيف أنفقته ومن اين اكتسبته




لن يسألك ما هو مسماك الوظيفي ... بل سيسألك كيف أديت عملك بقدر ما


تستطيع



لن يسألك كم لك صديقاً بل سيسألك كم اخاً لك في الله.




لن يسألك عن الحي الذي عشت فيه ..... بل سيسألك أي نوع من الجيران كنت




لن يسألك عن لون


بشرتك ....



بل سيسألك عن مكنونات نفسك ونظرتك للآخرين





لن يسألك الله عن عدد الأشخاص الذين أرسلت لهم هذه الرسالة بل سيسألك ...




إن كنت قد خجلت من إرسالها لأصدقائك


ولهذا فلن أخجل اليوم من ارسالها...اليكم....أحبتي...



جمعنا الله في


الفردوس الأعلى وجعلنا أخوة متحابين في ظله


يوم لا ظل الا ظله....

سبحانك اللهم وبحمدك أشهد أن لا إله إلا أنت أستغفرك وأتوب أليك .....

الخميس، أكتوبر ١٦، ٢٠٠٨

الحكومة دى نحس....

بالرغم أن أنا ضربه دماغ نوم على الأخر وقلت هبطل فرسه اليومين دول


وأكمل حكايات أفك المدونة شويه .... أن شاء الله هكمل بعدين ...

يس معلشى سمحونى فرسايه صغنونة كدا على الماشى ..... وبعدين عارفه اكيد

تلاقكى فيه منك اللى بيهرش وهيقطع نفسه .....ادمان باه ...حاسه بيكم هههههههه

المهم سمعتو طبعا عن الاجتماع اللى مبارك كان عملو علشان أل ايه يشوف اى إصلاح فى البورصة

غير تصريحات نظيف ان اقتصاد مصر تمام ومش هيتاثر وهجس من دا

أنا عن نفسى سمعت الهطل دا ...واه لو كنت طولت حد فيهم كنت هعضو حتة عضه هههههههههههه

اضرب بدماغى شوية بعيد بس مش اوى يعنى .... لما كل شوية الأسعار ترتفع

كان عليهم عفريت اسمه العالم كله عندو تضخم والأسعار فى العالى ....

بالرغم أننا كنا أعلى في التضخم تقريبا خمسه وتلاتين فى الميه .... وبالرغم من كدا يقلنا مش لوحدنا

ولما تبقى فى كارثه عالمية ....يطلع اخو العفريت اللى فات يقول دا أحنا تمام أوى

والمليارات اللى فسسسسسسسسس فى الهوا دى ....ظط

وال 140 مليار مدخرات البنوك المصرية فى بنوك اوروبا واللى من فلوس الناس وراحت

فى الطراوة ومش عارفين هيجبوها ازاى ؟؟؟؟؟برضو أحنا تمام ....

واللي فقعنى اكتر دا كلو .... الدنيا مخروبة فى العالم

ويقولك الأسعار السلع الغذائيه عندنا قلت بنسبه 40% .....

الظاهر دى التصريحات اللى خرجت من اجتماع مبارك....

والأسعار زى ما هيا وفى زيادة برضو ....ولاد الجزم بيتاجرو بينا ....

يعنى عالم حولا يوم ما نكون العالم الوحيده تقريبا فيها

تضخم عالى ...وبره اقل منننا فى الزياده دى .... يقولو لا دا بره زينا وظروفهم منيله

أنما لما العالم يجتمع أن فيه كارثه وخراب ...لالا مبارك وحكومتة يقلو لا دا كلو تمام

وكمان فيه تخفيض فى الأسعار .... وعيشو خالص ....


وكان نفسه يقول لينا ......يلا قومو اتحزموا وارقصو .....
واحب اقلهم من مقعدى هذا ....
وانا كاشفه راسى
غورو جتكم نيله يا عالم يا فقر نحستونا ....

الأحد، أكتوبر ١٢، ٢٠٠٨

انا عضمة كبيره عااااااااااااااااااااااا

بصو مفيش حد شافنى وادانى سنى الحقيقى فعلا ....مش عارفه ليه ؟؟؟

وبالرغم ان الكل معتبر ان دى ميزة كويس خاصه ان انا بنت وكدا الا ان انا متغاظة اوى منها

دا على اساس هعنس والناس هتفتكر انى عيله لسه هههههههههههههه فضلى زلطين ياناس

المهم الموضوع دا بدات الاحظة من سنه رابعه كليه ....

ودا فى بدايه السنه وبتوع سنه اولى باه جاين وفرحنين بالكليه واحنا عاملين فيها كبار

بنبص عليهم ونفتكر ايام ما كنا زيهم تايهين ....وفى ظل هذا

كان لينا مكان بنقعد فيه ديما انا ونورا صحبتى ....ومر فمره لقينا ولد من بتوع سنه اوله يقف قصدنا ومتنحه

والابتسامه مفروده بمكوة رجل على وشة ....وبصراحه كدا امور وعاقل شوية المهم كان كل يوم لما نروح نقعد

فى مكانا نلاقى المحروس واقف ومبتسم ...ونورا تقلى تلاقيه فاكر انك فى سنه اولى ولا حاجه

وبالفعل كان الحوار كلو بيدل على كدا وطول السنه لازم كل يوم نضحك على الموقف دا ....

وسمناه الواد بتاع سنه اولى .... واتخرجنا سنه رابعه ....

قصدى اتخرجت انا... انما نورا العميد نفسه حلفه عليها انها لازم تبقى معاها سنه ....

وقدمت فى كليه التربيه على الدبلوم التربوى

وكانت اخلص محضراتى ونروح مع نورا كليه الاداب تشوف محاضراتها هيا كمان فمره كنا بنلف

فاتقابلت فى واحد اسمه حسام كان طالع معايا معسكر الاسماعيليه بس حزرو فزرو كان معاه مين ؟؟؟؟

عليكم نوووووووور كان معاه الواد بتاع سنه اولى .... بصراحه احنا اول ما شوفناه ماسكين نفسنا بالعافيه

من الضحك ....وحسام ازيك يا بنتى اخبارك ايه ؟؟؟ وانا الحمد لله تمام

وقام بدور التعارف بنا ....

ولسه بيقلو همس .... بتكمل دراسات عليا فى التربيه .....

ليقتو بؤه اتفتح وراح قايل دراساااااااااات عليا

رحت انا اللى راده عليه وقلتلو ايوه دراساااااااااااات عليا .... انا مخلصه كليه

وخلصنا سلامات على السريع .... دا كان اول موقف تقريبا


تانى موقف ....او بمعنى اصح مجموعه مواقف مع بعض .....

ان كل يوم لما ارجع من الكليه واركب علشان اروح لبلدنا .... يتصادف انى اركب مع بنات الدبلومات

وكل يوم الاقى بنت تسالنى انتى فى دبلوم ايه ؟؟؟؟

والتانيه انا فى سنه كام ؟؟؟

المدرس الفلانى بيديكى ؟؟؟؟

مدرستك فين ؟؟

لدرجة انى اتعقدت بقى خلقتى تدى على دبلوم ؟؟؟؟

وبعد كدا لما لقيت الحكايه كدا .... كنت بثبت على كلامهم واريح دماغى ....

وبتبقى كل يوم العربيات مليانه بنات ....ولما بركب معاهم بحس انى طالعه بصبحية والله ....

مش طالع بعربيه بنات


تالت موقف ....

دا باه كان فى اجازة سنه رابعه كليه يعنى كنت خلصت الكليه خالص .... وروحنا نصيف فى

بلطيم ( وهو موقع ساحلى رائع حلو اوى خالث مالث دى بمناسبه انى مدرسة دراسات اجتماعيه)

المهم كانت المدة تقريبا 15 يوم .... وكنا انا واختى وبنت عمتى نطلع نتمشى ونقعد قدام كشك

دا اصرار اختى ال ايه علشان تسمع اغانى ونفضل متحنطين فى المكان لما بيجلنا كالو

المهم وبعدها بيومين ليقت عيال ثانوية عامه جيه تقعد جنبنا .... وفيهم ولد والله باين انى اد امه

بس انطس فى نظره ايامها ولا ايه ؟؟؟؟

فضل كل يوم يجى يقعد جنبنا .... لمدة خمس ايام ولا حاجه ... وقبل ما يمشو بيوم

خاد حباية الشجاعه ولما شافنا خلاص هنروح ....جى زى الاسد ومشى جنبى ....

وبيجرجر كلام .... وممكن اتعرف ....

انا والابتسامه على خلقتى مع عقد حواجبى مع كرمشه فى مناخيرى ... سالته سؤال ؟؟؟

انت فى سنه كام يا ضنايا ؟؟؟

بصلى باستغراب ...مع نفخة عظمة اند شلوط خده فى نفسه ... انا مخلص ثانوية عامه وداخل اولى كليه

روحت منفجره من الضحك .... ما شاء الله ...كبير ....وقلتلو انت تتخيل انا سنى كام ؟؟؟

قلى بنفس الشلوط هيكون ايه يعنى .... داخله اولى كليه زى يعنى

دا كلو وزمايله واقفين قصدنا ومنتظرين النتيجة .....

روحت معليه صوتى وقلت يا بابا انا اكبر منك انت لسه داخل اولى كليه وفرحان انا باه مخلصه كليه

قلى بجد ....قلتلو وربنا ....

راح باه اصحابو فى نفس واحد ..... تعالى انت رايح تتصاحب على عضمة كبيرة ( اللى هو انا)

وانفجرنا كووووووووولنا من الضحك ....والواد يا عينى مسبهل وخسيت انه اتحرج اوى

بس عادى .... بس باه انا يومها اخدتلى وقعه جامده اوى ( قلت دا علشان اتريقت على الواد ذنبة يعنى )
فطلعت انا عضمة كبيره عاااااااااااااااااااااااااا عاااااااااااااااااااااااا


تانى يوم لقيته جى ويقلى ..... انتى بجد مخلصه كليه ؟؟؟؟

قلتلو اه وربنا تحب اطلعلك البطاقه يا بنى ؟؟؟؟

يتبببببببببببببببببع




الأربعاء، أكتوبر ٠٨، ٢٠٠٨

ناسف على تاخير التيجااااااان

معلشى يا جماعه انا كنت وعدت ولد مصرى والاستاذ طارق واحمد ك وجنه بحل التيجان

من يجى قرن كدا .....معلشى اتاخرت ....بس اهم حاجه وفيت بوعدى اهو ....

اخش فى الموضوع على طول
************************
اول تاج كان من الولد المصرى .....


ماذا لو اعطيتك ثلاث وردات من هم الاشخاص الذين تهديلهم الورد دا ؟

بصو باه بالرغم انى طفسه فى حكايه الورد بس هقلكم

الاولى: لبابا وماما واخواتى

التانيه :لاصحابى كوووووووووولهم

التلته : لى نفسى ...هو انا مليش نفس ولا ايه
-------------
ماهو هدفك فى الحياة ؟

بجد ان اكون راضيه وقنوعه لابعد حد بحياتى
--------
ان شاء الله بكره احسن من النهارده ...هل تصدق هذه المقوله ؟

بصراحه انا بحس ديما عكس كدا ....

بس لما اعرف ان ظننا بالله لازم يكون خير فبحاول بقدر الامكان ابعد شوشو

عن دماغى واخلى ظنى بربنا خير ....فانشاء الله بكره هيبقى احسن

---------
ماهيا اجمل مقوله سمعتها .؟؟

فى أْيه بتقول تقريبا ( مش حفظاها ) " الا جزاء الاحسان الا الاحسان "

فبتخيل لما احسن فى المعامله لربنا مهما كان قدر الاحسان ...فربنا هيحسن ليا اد ايه .... صعب التخيل صح

----------

مين المغنى اللى بتحبه ؟ وايه اغنيتك المفضله ؟

مليش مغنى مفضل والحمد لله

بس فيه بعض الاغانى

وبصراحة هما تلت اغانى ( سيرة الحب لثومة _ اه لو تعرف لنجاة _ بحبك انا كتير لوائل كافورى )



غزة تمثل ايه بالنسبه ليك؟

تمثل روح بترجع لجسد ( الامه العربيه )
--------

تعطى كام فى الميه لانتمائك لوطنك ؟

عمرها ماهتكون بنسبه

---------
لو تزوجت وانجبت اذكر اسماء الاولاد والبنات اللى تحبهم ؟؟

الاولاد ... عمر _ حمزه
البنات .... همس _عشق

---------
عمرك غشيت وانت صغير ؟

طبعا دانا ليا مواقف فى الموضوع دا وحكتها قبل كدا دورو عليها ....
----------

لو اتعرضت عليك رشوة وانت فى زنقه هتعمل ايه ؟

هدخل الحمام واشد عليها السيفون .... ايه هو دا ؟؟؟تيجى الفلوس مع الزنقه اختارو الفاظ اللغه باه

---------

قول تلت صفات فى تلت كلمات توصف بيها نفسك ؟

لا انا هبحبح فى الكلام

1-بحب التسامح جداااااااااااا

2- مرحه
3 عصبيه

---------------


اول مرتب ليك ولو هتجيب هدايه لعلتك هتجيب ايه لكل فرد

مرتب ايه يا عممنا ....دا شعارى ...عاطله وبفخر علشان حكومتى الفقر

بس هتخيل كدا انى اشتغلت وجالى مرتب واتخليهو مبلغ مبالغ فيه هههههههههه

بابا وماما ....اخليهم يحجو تانى

اختى ... اجبلها فستان فرحها يااااااااااارب

اخويا لكبير ( هنفضلو ) واجيب لابنه مهند لعب كتتتتتتتتتتتتتتتتتير

اخويا الصغير .... اخليه للمرتب الجى اصل الفلوس خلصت هههههههههههههههههه

------------------------


اهم صفه فى شريك حياتك

ان يجبرنى انى احترمه فيه غضبه قبل طيبته
------------------------

المجالى اللى غير دراستك بتحبه حتى لو كان رسم على الحيطة ؟
صحفيه قسم تحقيقات حوادث ههههههههههههههه
--------------------

بتحب السفر ؟ طب ايه المكان اللى عاوز تروحه دلوقتى من غير تفكير ؟

جدااااااااااااااااا
اى مكان اكون لوحدى ومفهوش حد خالص ويكون على البحر .....
--------------------------

تمرر التاج لمين ؟

لالا بلاش ليدعو عليا
***************************
******************************
ودا تاج من الاستاذ طارق





. اذكر اسم من طلب منك حل الواجب


استاذ طارق صاحب مدونة ( عابر سبيل )
----------------
اذكر القوانين المتعلقة بهذا الواجب

انى احلو .... ايه الفكاكه دى !!!!
----------------------

تحدث عن ستة اسرار قد لايكتشفها من يقابلك للمرة الأولي

1_ بصو كتير افتكرونى لسه فى الثانوية او الكليه وانا متخرجه من 2002 وبيحطنى فى مواقف محرجه

( هبقى احكى عن المواقف دى اهو بدل الفرسه اللى بتتفرسوها )

2 –فيه ناس قالت انى مغروره ليه معرفش وانا عكس كدا انى بكره الغرور والتكبر جداااااا

وبحب البساطه والتلقائية اوى

3 - ان لازم اى موضوع مقتنعه بيه اتناقش فيها وغالبا مفيش حد بيعرف يقنعنى بالعكس ولا حد بيعرف

يطلعنى غلطانه وابقى عايزة اعرف ليه حصل كدا وعشان ايه وليه نرفض وليه نقبل ....

وكتير قالولى انى عنديه جدااااااااااااااااااا

4- كتير بحس بالناس اللى بتكدب بالرغم ان فيه ناس بيتهيئلها ان مش واخده بالى منه بس انا بفوته

بمزاجى واعيشهم الدور اوى

لحد ما افهم هدف الشخصيه من الكدب دا ايه ؟؟؟؟

5- بالرغم تهريج الا ان انا عصبيه جدااااااا وصوتى عالى واحلى حل ليا لما بكون متعصبة ان اروح

انااااااااااام واصحى الاقى نفسى هاااااااااادية

6- محبش حد يوعد بحاجه او يقلى هعمل حاجه ويخلف فى الكلام معايا ......

مش بحترمه ولا بصدقة وبعتبره كداب


----------------


حول هذا الواجب الي ستة مدونين واذكر اسماءهم مع روابط مدوناتهم


لا مبحبش النميمة وسيرة فلان ولا علان ....بلاش حكايه اذكر دى ....ملناش الا السمعه
----------------------


اترك تعليق في مدونة من حولت الواجب عليهم ليعلمواعن هذا الواجب

ناسف على عدم اللف على المدونات لعدم وجود صحه لذلك ههههههههه
******************************
***********************
التاج دا من ولد مصرى ..... واحمد ك .....وجنه ....


بدات التدزين من امته ودخلت عالم التدوين ازاى ؟؟
15 يناير 2008

لما سمعت عنه كتير ....وانا زى جنه بظبط لما اتفرجت على حلقه غاده عبد العال فى العاشرة مساءا
-------------------
ايه كان انطباعك فى البدايه ؟

كان مبهم فى الاول بصراحه واللى بيحركنى فضولى

---------------------
مين اكتر واحد بيهمك تعليقه فى بوستاتك الجديدة ؟

لا بصراحه كلهم بس البنانيت الاول معلش يا رداله

-------------------
ايه اهم حاجه اتعلمتها من التدوين ؟

الفقعه فى مررتى
----------------------

حاسس ان التدوين ليه تاثير؟

طبعا .... كفايه تاثيرة على صحتى اهى اهى اهى
------------------------------

اذكر خمس احلام تخص ماضيك تحلم فيها بتغير اشياء ماذا كان ستعدل وماذا ستترك؟
1- الارتباط
2- السفر
3- الدراسة
4- اللى جوايا
5- اشخاص

هعدل فى الارتباط اللى فشلت فيه واخلى الدراسه عمليه وفيها تفكير وابداع

واختيار الشخاص اللى اتخميت فيهم

هسيب ....اللى كان جوايا زى مهو ... وكنت اتمنى سفرى السعوديه يكمل

-------------------------

اذكر خمس احلام تخص مستقبلك ؟

بطلت احلم .....وبعيش يوم بيوم وواقع فقط

--------------------


اذكر شخصين متواجدين الان فى حياتك كنت تود ان يتواجدو قبل زمن ؟

الشخصيه الاولى ( بتتمثل فى اصحابى البنات )

الشخصيه التانيه ( انتم المدونين )
----------------

اذكر شخصين غير متواجدين فى حياتك حاليا وتود ان يتواجدو فى الان او فى حياة اولادك مستقبلا

الشخصيه الاولى راجل يخلى مصر اللى بنحلم بيها موجوده على ارض الواقع

الشخصيه التانيه برضو راجل زعيم عربى مسلم يحرر اى بلد عربيه مسلمة ويرجعلها كرامتها

----------------------

على من تطلق الرصاص
برضو بلاش ليموت ويقول ان انا اللى قتلته
************************
وبصو باه اياكم الاقى حد يبعتلى تيجان ولا بدنجان
مش بحبهم خالص
ولا بعرف اجاوب عليهم
هطخ اللى يبعتلى حاجه
سلاااااااااااااااموز

السبت، أكتوبر ٠٤، ٢٠٠٨

لا اريد ان اكون مباااااااااااركا

بالرغم من كل واحد فيكى يا مصرقالع راسو و داعى عليهم و شاتم و تافف على الحكومة وعلى اللى عاملها

الا ضافت بمبارك وزنق ابراهيم عيسى مش عارفه ليه ...؟؟

ومبارك حط نفسه فى مواجهه بخصوص مقاله عادية ....وربنا بكدا يعتبر اهان نفسه اوى

وعامل فرح بالمقاله ... وفى الاخر شهرين سجن

وخلونى بعيد باه عن الشعارات اللى هيا حقيقة وامر واقع بالجزمة على دماغنا

ان دا انتهاك للحريه والديمقراطية ....وحقوق الانسان والبدنجان .... دا كلو كووووووووسة

انما عايزة اعرف مشعرير مبارك ايه دلوقتى ..... دا لوقلنا ان فيه مشعرير واحاسيس

لو اعتبر زى ما بيقولو ابراهيم عيس اهانه

وعمل عكعكه فى الاقتصاد والزفت ....وفى الاخر يديلو شهرين سجن

واقول....اهنيك على اهانتك الرخيصه بجد .... واقتصادنا الواطى بانجازاتك

بقى الحوار دا كلو على شهرين سجن

كرامتك اللى كانت بتنقح عليك ....وحسسونى ان هيجيلو البواسير ...على شهرين سجن

سبكو من ان دا الحمد لله انهم شهرين وكدا ظلم كمان ....عارفه البؤين دول وحفظاهم

عايز يوصلنا ايه ؟؟؟؟...ان كل يوم هيبقى فى عهدو انيل من اللى قبلو ....

دى معروفه ....وبصمين برجلينا وبالجزمة كمان ....

وبعدين لما نشوف .... هينعدل حال البلد بعد ما اتسجن ....

ولا هيرجعلك شبابك وصحتك علشان تكمل حرق فى البلد ....

دا انا حاسه ان السجن التاهن يارجاله بالمهزله دى ... دى بقت مسخره

انامش عارفه نعزى نفسنا فى ايه... ولا ايه.... ولا ايه

نعزى نفسنا علشان ابراهيم عيسى مخدش فرصته فى الكلام باه طالما هو ظلم بظلم

ولا نعزى نفسنا بالسجن اللى شكلو اتخصخص وبقى لحساب مبارك

ولا نعزى نفسنا لاهانه مكان عريق زى السجن وبقى مليان بالمغضوب عليهم من مبارك
لو انا من المساجين اعتصم
وارفع شعار ( اكون قاتل او مغتصب .....ولكن لا اريد ان اكون مباااااااااااركا )