الأربعاء، فبراير ٢٧، ٢٠٠٨

نصاب مدينة نصر ..وابن الوزير الحيله

وزير ...وزير ...صداع ...حاجات تخنق...تصريحات تسد النفس...زى قلتهم ...

كل يوم والتاني نلاقى وزير ربنا أداه شوبه صحة يجى يتفرعن علينا ويطسنا بكلام يجيب الضغط

زى صاحب المقام المرفوع وزير التنمية اللي من فترة طلع وأدانا تصريح يغم وقال الحد الأدنى للدخل
فى اليوم تقريبا جنيه ونص ...وبيقوله وهو حاسس بانجاز وفرحان ....
جنيه ونص أيه دا مش عارفه ونبى مهوش مكسوف ... دا أنا نفسى اتكسفت اعلق عن الخبر ولا اكتب فيه حاجة

بس الحمد لله ربنا انتقم لينا يا ناااااااااس .... لما ربنا بعتله واحد وضحك على النبى حرسه الننوس الصغنن

الخلفه المهببه .... اللي بيقولو عليه نصاب مدينه نصر...وهو راجل والله .. اللي ضحك على الحيله ابن الوزير

وقلبه فى خمسه مليون جنيه ...وبيقول مجمعهم من الاسره ...محسسنى انه لم مصروف البيت

لما أسرته لم منها خمسه مليون يبقى معاهم كام فى الأساس ... وكمان بيقول أنة أعطى الفلوس للراجل على أساس انه بيصلى وعارف ربنا...ما الكل عارف ربنا ... هيا اختراع... ولا زيادة ذكاء من المحروس... وطبيعي أن هيعملك جو علشان الشغل .... هتقول أيه؟؟؟ ذكاااااااااااااء...

وكمان اثبت بوثائق أن المحروس دخل فى الاشتراك مع اسلام باخد فلوس من الناس والامضاء على وصلات امانه باسمة وممكن نستنتج من كدا باه أيه ؟؟؟

أن يكون أبوة مثلا على درااااااايه تامة باللي بيعملو المحروس ..ولا لاء علشان ميبقاش شكلو وحش قدامنا
وحس انه اتورط والموضوع اتكشف راح بلغ علشان وضعو يتحسن ويبقى شاهد فى القضية ..

أو ممكن نكون ظلمناه مثلا وميكونش عارف حاجه لما ابنه أخلاقه باظة ... ودا نتيجة انشغال الوزير فى
العملية الحسابية بتاعة الجنيه ونص ....لحد ما ساب ابنه دخل فى السكه دى...

أو ممكن العامل الوراثي وخد زكاء والده اللي هو تنميه البلد ...والمحروس حب ينمى نفسه وقال اطلعلى بقرشين ....

بس يا ترى بعد الحكاية دى الريس هيزحلق الوزير على اساس فضيحة ابنه ؟؟؟
ولا هيفضل على أساس أننا بنعيش قمة الازدهار فى السرقة قصدى الديمقراطية...
ومش هياخده بذنب المحروس ابنه؟؟؟



الاثنين، فبراير ٢٥، ٢٠٠٨

العين بالعين...

طبعا الكل سمع وشاف جنازة الملازم محمد عاشور اللى المرشد قتله
وطبعا الكل زعل على شبابه اللى راح وطبعا الدولة كرمتة جدااااا
وطلع قرار جمهورى بترقيته الى نقيب ... يعنى مايترقى الايتقتل ..
نفهم من كدا ان الدولة بتشجع القتل ولا ايه ... قمة الرقى فى التدرج فى الجهاز الوظيفى
المهم ان الحكايه يا اخونة ان دا ما كنش مرشد ولا حاجة دا واحد الملازم دا اصر ان يشتغل مرشد
حاول يرفض راح علقه يومين من رجليه لحد ما اقنع الملازم انه وافق وبعدين فى يوم رحلوه وقله ان فيه عمليه
هتم وجه هو وظابط تانى وراحو المنطق ملاقاش حاجة راح ابو هنادى ( الراجل اللى بيقولو عليه مرشد)
ضرب عليه نار قتله وسحب مسدسه الميرى وهرب وبعد كدا راح لبيت محمد عاشور وقابل ابوه وقلو على كل الحكايه وراح انتحر ....بالمسدس ومات ...
يعنى عملو واشادو بالملازم ونددو بطريقه موتة ...ولغو خالص سبب موتة ايه
السبب الظلم اللى وقع على الراجل ...وخلاه فى ضغط نفسى واحساسه باضطهاد
انا فى راى ان كدا خد حقة ليه يعنى من حق الملازم انه يعذبة
وهو مش من حقه ان ياخد حقه ليه؟؟
علشان دا صاحب سلطة ودا راجل عادى
العين بالعين ... حتى لو الاسلوب اصعب بس كدا خد حقه ...


ياحلولى مايجبها الا ستات مصر ...


انتم طبعا معايا لما اجى أقول ليكم ...أن مش معقول كل يوم وتانى واحد
يطلع يقول كلام رخم رخامة ويحسسك بمدى التفاهة فى كلامه ونكتم فى نفسنا ...

هتقلولى أيه لزمتة الكلام دا ... هقول ليكم بفضفض من الفقعه اللي أنا فيها يا ناس
وانا بتفرج على منى الشازلى حببتشى ... اه والله حببتشى .. وكان كابوس الحلقة ...

قصدى ضيف الحلقة مسئول طبعا تبع الحكومة ...

وبيرد وبيدى مبررات على سبب الغلاء فى مصر ... والشهادة لله كن جى وماسك فى أيده سبحه

هو اللون بتاع السبحه روش آه هو كدا الله ما اجعلوا خير بين لون السوفندى ولون البرتقال ...

مايل للون العدس كدا... ( واللون دا على فكره ياجماعه بيساعد على الهضم .. كانت حته على الماشى)

وهو ماشاء الله وشة ابيض فى احمر كدا ( دا من الأكل النظيف ) ... المهم

واحده بتتصل بتقول كيلو العدس بقى بتسعه جنية ... قلت فى سرى يا فرحتى حتى العدس مش تعقينه

بقى فول وعدس يادي النيلة ... هو يرد على كل حاجة ويقول دا سوء استهلاك من الناس

فمنى قالت يعنى كيلو العدس حد يرمى ربعه مثلا ..مش مهم دا ..هو ما شاء الله اداها الحل

قلها لو كل تلت اسر تقريبا تشترك وتجيب محسسنى أننا هنعمل جمعية ...

ولا مابتقول ليه دا علبة الزبادي بقت عينات رد عليها وهو فى منتهى البراءة صغيرة بس طعمه

(وربنا أنت اللي طعم طعامه اللي من كتر طعمتها تجيب تسمم)... دا رد مقنع ورخم بشكل

وفى نهاية البرنامج وقال الحل اللي هنعدى بيه الأزمة (ويعتبر حل يتسجل فى اكبر موسوعات الواكسة العالمية)

أن ستات مصر يستحملوا المرحلة دى ويحاولوا يدبروا نفسهم ويمشى حالهم لحد ما تفرج ...

متقلوش الحكومة دى على زمت الستات ومستحملين علشان العيال ..أيه الخيبة دى

نفسى من اى حد يطلع فى برنامج كدا مايتكلمش بهيافة ... علشان مررتى مش مستحمله..

لاما يخدونى اطلع همي فيه...
طيب طالما رجاله الحكومة مش قدها ... سبونا ياستات مصر نحل ( ونبى اتكسفوا شوية )
يا حالولى هنحل حل....وانا ليا حل واحد انتم طبعا عرفينه ...
والباقى عليكم يا ستات وبنات مصر...

الخميس، فبراير ٢١، ٢٠٠٨

بلاش ذكاء فى الغباء يا حكومة...


والله الحكومة دى عايزة الحرق مش مكفيها الطوابير اللي الناس بتوقف فيها
لا كل فتره والتانيه يفننو فى حاجة تقرف فينا.....
أنا فاكره أيام ما طلعو أشاعه على اللى ما يطلعش بطاقة الرقم القومي هيدفع غرامة وهبل كدا وأيامها الناس وقفت بالطوابير ياعينى مدة علشان يطلعوها وتخيل باه كل واحد يدفع 15 جنيه فى ورقه شوفو الحكومة لمت أيه باه والفلوس دى راحت فين ... طبعا لمت ملايين ...

واليومين دول موضوع بطاقة التموين ..وعلشان يضيفوا المواليد الجديدة لازم يطلعوا شهادة ميلاد بالكمبيوتر
وطوابير طوابير ورجعوا قالو علشان ما نتعبش الناس هنخلى مكاتب التمونيه تقوم بالمهم
وبالرغم من كدا الناس تروح المكاتب ترفض وتقول مجاش لينا أمر
ورجع اعلنو تانى وبرضو يردوا نفس الرد المهبب والناس دايخه ووقفه برضو فى طوابير
و الشهادة بتطلع 5جنية ونص...ولمى يا حكومة
كل حاجة علشان يعملوها للناس ...لازم يدفعو الناس حاجة من قبل الخدمة أصلا تتعمل

مش عارفه الحكومة الظاهر مزنوقه فى قرشين كدا قالت نعمل حركة هبله اهو نكسب
حكومة فاضية ومش فالحة إلا أنها تقرف فينا وتسرقنا بمزاجنا

حتى متكسحه تطلع لينا شهادات ميلاد ببلاش ...هينشلو لازم ندفع علشان خدمة لينا متعملتش لسه

وال أيه نعمل البطاقة الذكية ... يعنى كانت الأول الحكومة غبية ومتخلفة

وجيه تتزاكه علينا ...المفروض نعمل أيه يعنى ...
نحزن علشان كانت غبية ولا نفرح علشان هتبقى ذكيه ... ودا أنا اشك فيه
دا أنا كل يوم بكتشف غباء وفقر فى أم الحكومة دى اللي تولع بجاز ووسخ كمان

الأربعاء، فبراير ٢٠، ٢٠٠٨

ياحرميه يا حرميه يا حكومة ...الجزء التانى

ولسه الحكومة شغاله سرقة فينا...
الأول كانت سرقة فلوس التأمينات واتبعت سياسة التنفيض واللي قم بالدور وزير المالية اللي فضل يتاوب ويكلم فى التليفون ويورينا سنانه.. ونبي حد يقلو إن ضحكته تسد النفس...
أما الثانية باه هيا سرقة فلوس الحج من الناس اللى قعدة طول عمرها تحوش علشان تقوم بفرض من فروض ربنا بس الحكومة نفضت لسياسة التنفيض واتبعت سياسة الطرد ...
ودا اللي حصل للنائب سعد عبود لما قدم استجواب قدام مجلس الشعب ويقول إن بعثة الحج استولت على 135 مليون جنية على أساس إن كل حاج يدفع 12 ألف جنية باجمالى فوق 363 مليون جنية ووزارة الداخلية صرفت عليهم 229 مليون .. وبيقول أن معاه مستندات واخدها من وزارة الدخلية نفسها وفعلا نشرها فى جريدة الدستور

بس طبعا الدنيا قامت وما تهدتش والبركة فى عز اللي عمل اجتماع ومضى يجى 160 نائب اللي على أساسة يمنع عبود من حضور الجلسات خالص ..وفعلا حصل كدا ..
مهو قرفنا فى الحديد وكمان حاطت مناخيرو فى دى كمان ...
المشكلة دلوقتى ان خلاص حتى مجلس الشعب اللي اسمه شعب ياناس باه نوابة بيطردو
اللي من حقهم يحاسبو الحكومة ويحلو مشاكل الشعب
خلاص معدش ليه هيبة ولا قيمة بعد كدا ... اللي هيحصل بعد كدا أن اى عضو يقدم استجواب ومش جى على هواهم ...ولا محدش ليه نفس يرد حتى .. يلا على بره ورينا ياخويا جمال خطوتك

ولا هيا خلاص لسرقه بقت شئ طبيعى ...وحقوق الناس يداس عليها
بطلو باه ماشبعتوش ؟؟؟

الاثنين، فبراير ١٨، ٢٠٠٨

اتحدى الريس يجاوبنى....

خلاص ياجماعه إحنا عرفنا الحمد لله خدنا الكاس وفرحنا وسمعت
أن صاحب قنوات art أتبرع تقريبا بمليون برضو ودبي كرمتهم برضو وأيه المنح نزله ترف عليهم ... مش نق
بس لما الكل النهاردة وبعد أسبوع من الفوز القيه بيكلم لسه عن الموضوع دا الحكاية اووفر شويتين
خلاص كتر خيرهم شرفونا والحمد لله ...
هنفضل نشكر ونغنى ونسيب مشاكلنا والقرف اللي عايشين فيه
دا حتى محتفلوش مع الشعب ولا الناس ...
ودا طبعا علشان الريس وجيمي مقابلينهم يعنى لو الريس كتر خيرة هناهم وعمل الواجب هو وجيمى
وبرضو مجلش الشورى كرمهم وهدايه تزكاية ... دا كويس جدا وفل اوى ...بس
طالما الريس تاعب نفسه كدا كدا ميكمل جميلو ويروح مثلا يستقبل الناس اللي فى طوابير العيش اللي يعينى بتفضل طول النهارعلشان تلاقى رغفين ولا حاجة تقضى بيها اليوم هيا وعيالها وياريت عيش يكون نضيف دا بيبقى مليان مسامير ولا نشارة خشب زى ما سمعنا
ولا يروح عند اى بقال ويشوف نظره الحزن على الناس لما تيجى تشتيرى حاجة وهيا معهاش ويرجع لعيالة
ولا يروح القهاوى النص كم وشوف الشباب العطلان
ولا يروح غرزه من اللي بيتصرف على المخدرات 17 مليار
ولا يروح يشوف الخيبة فى الاراضى بقالها 25 سنه استصلاح ولحد دلوقتى ما طلعت بصلة..
كفايه كدا ولا الجولة بتاعت الريس تخنق ومش قد المقام

هو بيضحك علينا ولا أيه ؟؟كدا هيفرحنا لما يروح يستقبل المنتخب ولا هيسد جوعنا
المهم ..نفسى بجد الريس يجاوبى على سؤالين
الأول: هو أيه إحساسه وهو نايم وشبعان كدا والشعب مش لاقى العيش الحاف؟؟
وثانى: أيه نوع الصبغة اللي بيستعملها لشعره؟؟؟
يارب ما تكون فاتن أصل إعلانها خانقني

الخميس، فبراير ١٤، ٢٠٠٨

الف مبروك يا ريسنا..

أمريكا دى ورا كل مصايب بنشوفها وبتجيب الأخبار اللي تسد النفس برضو الله يحرقها

أصلى قرأت خبر جامد ان الريس ودا بناء على استفتاء عملتو مجلة من أقدم المجلات فى امريكا اسمها( باراد)
ودا كان فى أخر عدد اصدرتة...
ونتيجة الاستفتاء دا بيقول أن ريسنا دخل قائمة أسوا ديكتاتور فى العالم وطلع ترتيبه أل 18

ألف ألف مبروك على الترتيب بالرغم أن أنا كنت متوقع ترتيب أحسن من كدا

بس الظاهر ما كان فيه دروس تقوية ولا أيه ؟؟؟

ياحرمية يا حرمية يا حكومه

مفيش شغل ولا زفت وأسعار مهببة اهو احنا متنيلين ومش عارفين نعمل حاجة
أما لما يوصل بيهم البجاحة يخدو فلوس التامين اللي توصل 300 مليار جنية
اللي هيا فلوس أبويا ولا أبوك ولا ابوكى

تبقى سرقه عيني عينك ومفيش حد عارف يعمل حاجة مش كفاية كل يوم قرف فينا يادى الشباب اللي مش لقين شغل ولحالنا زى الزفت لا كمان يسرقوا فلوس المعاشات ...
وأيه الوزير المالية باشا راح يضارب فى البورصة بيجى 900 مليون جنية متقلوش دا من ورث العائلة لا وكمان خسر 500مليون جنية فى البورصة مهيا مش فلوس طالعه من جيبة ولا تعبان فيها
ولا قاعد مش لاقى شغل ولا جعان
زى معظم الناس اللي زينا ... خسران أيه يعنى ... ولا حاجة

لا وكمان سمعت تقريبا ودا مش متاكده منه أن هينقطع المعاش بعد موت صاحب المعاش ومثلا مراتة ولا ولادة من بعده مش هيخدوه يعنى أبوهم يدفن والحكومة تدفن العيال وأمهم ...

لا والمصيبة أن حصل استجواب فى مجلس الشعب والوزير باشا ولا معبر حد ولا بيرد على اى سؤال من النواب وبيضحك وبيكلم فى الموبيل ومبين ولا هو فى دماغه .. مهو ليه حق المبلغ حلو أوى..

كان مديني أحساس انه فرحان بسنانه ولا مغير فرشة سنانه جديد ..

الاثنين، فبراير ١١، ٢٠٠٨

رجعنا للغم ...اقرفينا يا حكومة


خلاص خلصنا لعب... وكسبنا واخدنا الكاس والحمد لله ...
دا بعد ما فضلنا كام أسبوع مش واكل دمغنا غير المنتخب
وهنكسب ولا لاء ؟؟
الحمد لله كسبنا ...والحمد لله الناس فرحت شوية ...والناس بعبرت عن فرحتها .... والقنوات والبرامج شغالة بث
والمسؤلين والدنيا كلها بتتكلم..... والمتخب هيجى بكرة والناس هتستقبله ...
دا كلو حلو اوى .... بس ...

هنعمل بعد كدا أيه بعد ما خدنا حقنة البنج دى ...مهيا شوية وهنفوق ...هنلاقى نفسنا زى ماحنا

رجعنا للغم والقرف والأسعار ...والحقوق الضايعه ..

لو أنا من الحكومة أخلى المنتخب يشوفلو مكان تانى

يلعب فيه علشان الناس تتوه شوية عن المصايب اللي بتعلمها.....

الأحد، فبراير ١٠، ٢٠٠٨

والله مسخره من اللى يولعوا بجاز (البهائية)


النهارده مازلت مفروسة برضو من اللي شوفتة فى التلفزيون على قناة دريم
بجد كان هاين عليا أولع فيهم لو أيدى طالت حد فيهم

أول حاجة كانت غيظاني أوى اللي شوفتة فى برنامج الحقيقة لوائل الابراشى وكانموضوع الحلقة بيتكلم عن البهائية المتخلفين.

أل أية دكتور أسنان ودكتورة أسنان برضو ( يارب يوقع طقم سنانهم) بالرغم أن الدكتور دا من وجهة نظري شكلو حلاق صحة ... شكلو يقطع الخميرة من البيت... فقر كدا ..

ولا الست دى حطالى هباب على وشها وقرف وجيه تدافع عن أفكارهم الهبله دى... تقول كل شوي هيا والزفت الثانى الإسلام أعظم من كل شئ ... عارفين دا غصب عنكم مش بمزاجكم ..ولا إحنا عبط علشان تستعطفونا بالكلمتين دول ... الإسلام هيفضل اشرف رسالة على وجه الكون ...بس عايزين نبعد القرف والزبالة دى
ولا المقابر اللي تولع فيهم بجاز وسخ اللي فيها ناس متنيلة فيها من سنة 1940 ...
ولا صلاه الميت بتعاتهم إيه الهبل دا ...
وبالرغم أن الشيخ يوسف القرضاوى قال أن السجن جزاء ليهم .. دا بيتهيئلى دا عقاب خفيف شوية
أنا رأى ووالله العظيم لو اقدر اعملوا أن أولع فيهم فى ميدان عام .. علشان يكونوا عبره

ناس هتقول الإسلام بيدعو بالرأفة ولكم دينكم وليا ديني ماشى دا كلو على عيني وراسي ...
بس دول لا يمدوا بالإسلام بشئ والغرب متخيل ان دى فئة من الإسلام ... عايزن يتنيلو ويفضلوا على كدا فى ستين دهيه ...وما ليهم اى حقوق إحنا دولة دينها الرسمي الإسلام ...
الناس اللي زى دول اظهروا نفسهم دلوقتى وبيطالبو بحقوقهم علشان متأكدين أن فيه فئة من الناس أصحاب النفوس الضعيفة ..سهل استقدامهم .. وخاصة من الشباب .. غير الناس اللي ليها مصلحه ...وبتساعد على كدا
دا كان برنامج وشوية ولما جيت العاشرة مساءا جه فيها تقرير عن العائدين للمسيحية ...

مجموعه من المسيحيين اسملو من فترة لأسباب باه مختلفة مش مهم هيا أيه المهم رفعوا قضية علشان يرتدوا عن الإسلام ويرجعوا للمسيحية تانى ...وكسبوها وال أيه القاضي قال أن يتكتب مسيحي _ مسلم سابقا دا فى البطاقة

وطالعين يهتفوا بيحيا العدل .. عدل أيه دا ..
وبرضو برنامج عما يتساءلون بيتكلمو عن الصوفية ... واللي بتعملو فى الموالد ... حاجات غريبة
غير الاحمدية اللي أتكلمت عليها قبل كدا وتبث من حيفا من إسرائيل ومعظم اللي بيشتغلو فيها مصرين واللي يكلموهم علشان يستفسروا عن الدين شباب مصري

هو إحنا فاضين كل يومين يطلع عالم هبله تقرفنا ... فين المشرعين اللي يحطوا حد علشان الحكايات دى ما تكتر
هيا بلدنا ناقصة بلبلة ... فيه شباب كتيرة مضيعة وممكن ينساقوا ورا الكلام دا
لازم تعدم حقوق الناس دى ... واللي مش عاجبة يروح فى دهيه بره البلد... وما يرجعوا تانى

حاااااااااااااااااااااجة تقرف

الجمعة، فبراير ٠٨، ٢٠٠٨

تعددت المشروعات والسرقة واحده...

كنت عايزة أقول عن حاجة غيظاني أوى فى بلدنا أن كل سنة القيها تهدم فى طرق وتوسع أرصفة وتعمل طوب الاسمنت وتزرع حبة هبل كدا...
كل سنة تقريبا وأيه تاخد وقت وممكن تعمل وتهد ميت مرة ... مش فاهم أيه اللي بيتجدد كل مرة علشان يتهد
ويعملوه تانى يعنى الشوارع هيا هيا وحتى الشجر هوهو ... والبيوت برضو ..
وألاقى لما يعملوا حاجة فى اى مبنى يهدوا السور ويبنوه من تانى ويضربو اى لون .. ال كدا يعنى اضافو الجديد

وتروح فى العملية دى الآلاف واستفدنا أيه مش فاهمه ...طب بتمن دا يضيفوا مباني لاى مؤسسة لو فيه مكان...
يجيبوا أجهزة طبية مثلا لمستشفى ... يعملوا من الأول بضمير وبعد نظر وإتقان وبتكلفه وحده ...ولا هيا السرقة بقت موضة...
أو ينهوا بسرعة اى مشروع ... زى بلدنا اللي بيتعمل فيها مشروع صرف صحي يجى اكتر من سبع سنين
وكل يوم ألاقى يهدوا اللي عملوه ويحفروا اللي ردموه والشوارع متنيلة بنيلة ولا فى حاجة بتتعمل كل المدة دى
والنتيجة أنيل من الأول على الأقل الشوارع كانت عدله شوية ... بس هنقول أيه ... حاجة تفقع..
والمصيبة أنهم بيهتموا بس بالشوارع الرئيسية والشوارع الثانية زى الزفت ومليانة زبالة والمجارة منيلة
طيب كدا كدا فيه فلوس طيب متسيبو اللي متنيل دلوقتى وصلحوا البلاوى دى ...
بس هتقول أيه ؟؟ رخامة والسلام

بس بصراحة كنت متغاظة أوى وكل ما أشوفهم اشتم فيهم وادعى على اللي كان السبب ... لحد النهاردة بس
ال أيه كنت بنق على الحرمية والعالم الفقر اللي بيضيعو الفلوس على الفاضى .. اللي عندنا اللي بيصرفو حبة ملاليم ويدكنوا الباقي ولا على الأقل لو مفيش سرقه فيه إهدار فى فلوس البلد دى ...
بس وربنا حمدت ربنا لما شوفت كلام الدكتور( رضا حجاج) وكلامه عن أزمة المرور طبعا هتقولو أيه اللي جاب كلامي فى الأول لازمة المرور ... بس بيتكلم عن نفس الفكرة إن معظم المشروعات بتقوم على تخطيط غلط ومش على أسس علمية اللي بتخلي فيه سرقه وإهدار فى الفلوس ..

وبيقول على المشروعات الطرق والكباري اللي حصلت فى القاهرة واللي أتصرف فيها ملايين الملايين
وفى الأخر وقفت ...

من ضمن الأمثلة يعنى بيقول كوبري المنيب بالقاهرة أتكلف 600 مليون جنية على 8 حارات ولكن أتقفل 4 حارات لدواعي أمنية وأصبح المستفاد من الكوبري 4 حارات بس يعنى كل حارة متكلفه 80 مليون
يعنى أتهدر 320 مليون جنية ... أل أتهدر أل ... والأمن دا كان مخفي وظهر فجاءه ولا كان موجود أصلا

ولا غير نفق الأزهر اللي أتكلف مليار ونص وتعمل علشان أل أيه يحافظ على جمال القاهرة الفاطمية
طلع بعد كدا فيه مخاطر فبيغلق 6 ساعات ..
يعنى ممكن فى يوم يحصل مصيبة ويتهد على اللي يبقى فيه(يارب يطلع اللي فى بالى )

جمال إيه ونظافة إيه يعنى النضافة مقطعه بعضها ... طبعا يفهمونا أنهم بينضفوا الشوارع
وهو فى الأصل بينضفو على فلوس البلد ... خربوها وقعدو على تلها

الثلاثاء، فبراير ٠٥، ٢٠٠٨

(أعممنا الوزراء )قاعدين ليه ما تقوموا اتزحلقو....

طبعا عايشين فى البلد دى وشايفين أن كل يوم بيبقى أنيل من اللي قبلو ولا فيه حد راضى يصلح فى البلد
والنهاردة هتكلم عن أسيدنا الوزراء واللي هديها دور نميمة عليهم...
أصل كل يوم وزير يطلع يقول تصريحات تسد النفس
اللي معظمهم سنه فوق 55 سنة يعنى من عصر شدي حيلك يا بلد
زى مثلا وزير الزراعة اللي قال أن 25 سنة استصلاح فى أراضى ولا فيه نتيجة وسماد بقى بالسعر العالمي
ولا وزير البترول اللي طلع يتكلم ازاى هنبع البترول لإسرائيل وباه البنزين سعره مولع...
ولا وزير الداخلية اللي فى عهده إتباع فى مصر سنة 2007 مخدرات ب 17 مليار جنية...
ووزير التعليم اللي بقى فى عهده مابقاش فيه تعليم أصلا والعيال طالع مش بتعرف حاجة وخاصة التعليم الفنى
ولا أمية بتتمحى ...
ولا وزير الصحة اللي فى عهده الكريم أصبح سعر الدواء فى العالى وأصبحت الشركات الأجنبية هيا اللي محتكرة السوق وضيعت الشركات المصرية.. وحددت نشاطها .. وبرضو غرق السوق بالأدوية المغشوشة
وأخيرا وليس بالأخير طبعا سيادة الوزيرة للقوى العاملة اللي فى عهدها
الآلف اللي بيهاجرو بطريقه غير شرعيه وغرقوا ومفيش حد لاقى شغل خالص...
ويقلك شباب بيدور على الأحلام واصل أن شباب طفش من اليأس والفقر والنحس اللي بيقينا فيه


يعنى من الأخر يا أسيدنا بدل ما تتعبوا نفسكم وتنزلوا من بيتكم وتقولوا تصريحات تجيب ضغط
وبتحاولو تعطوا مبررات للناس علشان مفيش حاجة عملتوها عدله ... تليفون صغنن منكم لاى صحافة هتنزل اللي نفسكم تقلوه على الأقل توفروا تمن البنزين بتاع العربيات ..
يعنى بيتهيئلى أن كل وزير بيجى يقول على اللي حصل فى عهد الوزير اللي قبله وخلاص
أحسن حاجة أن تتعمل محكمه ايوا محكمة وما تتسمى غير كدا لكل الوزراء فى الحكومة وفيها يتحاسب كل سنة
ويقدم اللي عمله وإيه اللي حصل ويبقى على مسمع الناس كلها.. ويعرفنا ذمته المالية بالمره
علشان أنا شايفه أن الحكاية بقت سيبة كل وزير يسلمنا للوزير اللي بعده من غير مايعمل حاجة
غير انه يبلط فى الخط ولا هو الدفى حلو برضو

وسلملي على كل اللي مشى على مبدأ إن اسفئناكم

الاثنين، فبراير ٠٤، ٢٠٠٨

سيادة الوزيرة ... حاصلة على الابتدائية ... مش مصدقة

وربنا أنا موت من الضحك أمبارح لما شوفت فى الدستور وزيرة القوى العاملة فى مصر وجنب صورتها التالي ( حاصلة على الابتدائية _نقابية عمالية قديمة _وزيرة القوى العاملة)
لدرجة أن انا قلت جايز فى المطبعة بتاعة الجريدة طيرو بقيت شهادتها بس سلمت باللي مكتوب قدامى.. وكبرت
مهيا بقت كوسة محشية ....بموت فيها

المهم جيت ابص على اللى مكتوب بها لقيت كلام ياسلام يفرح لدرجة أنى شكيت فى نفسي ....عارفه عارفه هتقلو ليا ازاى ...شكيت أن زى اى بنت ولا شاب متخرجة من خمس سنين وبشتغل مدرسة اد الدنيا بمرتب محترم ...مش قاعده فى بتنا من النوم للتلفزيون اللي بشوف الانجازات العظيمة فى مصر (فى اللحظة دى أنا بكز بسناني من غيظي)... عشتو الحلم قصدي واقع الست الوزيرة ... برضو مش فاهمين طيب أنا هقلو ليكم

أنا قرأت للست الوزيرة تصريح فى( مؤتمر قادة التغيير) بان الوظائف ملقحة فى كل مكان ومفيش بطالة فى مصر خالص مالص... ومفيش عاطلين عن العمل فى مصر ودا طبعا تنفيذا لبرنامج الريس...

جايز يكون قصدها مفيش شباب عاطل مثلا عن الغرق فى البحر وهو بيهاجر بطرق غير شرعيه

ولا عاطل زى الشاب اللي عنده 17 سنة اللي وقع من رجلين (عجلات) الطيارة ومات مدغدغ فى فرنسا
ولا عاطل عن شرب الشاي ولا الشيشة ولا الحلبة الحصة ولا سحلب فتلة على القهاوى اللي بقت ملية نص مصر ...

وتقلك أن الشباب مستني الوظيفة الميرى هيا متخيلة أن لسه حد فينا عنده أمل أن يتوظف فى الحكومة
ولا متخيلة أن بياع فى محل بقاله ولا هدوم لشاب جامعي ولا سواق تاكسي لدكتور دى تبقى وظيفة
تحقق احلام شاب فى بداية حياتة....

دا أنا كل ما أشوف إعلان حتى ...بقى لازم على الأقل ماجستير ولا دكتوراه وخبرة خمس ولا عشر سنين
يعنى شروط تخلى الشاب يطفش...
بس الحمد لله بالرغم من كدا وخداها مثال ليا يعنى هيا معاها الابتدائية وبقت وزيرة
أمال أنا اللي معايا ليسانس ودبلومات أبقى أيه الريسة ... أنا بفكر أرشح نفسي ... وبعدين أتسجن (دى تتفهم)

وسلملى على الاشتغلات قصدي على الشغل بتاع سيادة الوزيرة

الأحد، فبراير ٠٣، ٢٠٠٨

تتحسدى ياكوكو ...شهرببلاش علشان النت ... هيصنا اهو

مبروك على الكل يا جماعه .... طبعا الكل هيقلى المناسبة أيه ؟
طبعا علشان حاجة عظيمة جدا جدا وحيوية أوى بالرغم أنها مش أكيد لسه ...
عرفه إنكم كدا حصل لغبطة شوية معلشى أنا هقلكم سمعت فى العاشرة مساءا وبعض الأخبار ومن الأصحاب
أن الحكومة هتعمل تعوضي لكل المتضررين لخدمة الانترنت فى مصر ودا عن طريق أن هيخلو الخدمة الشهر الجى ببلاش شوفتو التضحية ودا طبعا علشان الشعب
آه والله دا كلو علشان الشعب .....
بس بجد أنا مش فاهمه هو النت دا مهما كانت الضرورة لاستخدامه سواء باه طيران ولا بنوك ولا غيرو
احسن من تعويضات أهم من كدا .... يعنى مثلا يتصادف ان
النهاردة تقريبا كانت الثانية لموت الف (1000) من المصرين فى عبارة السلام ولحد دلوقتى
لا أتقبض على صاحبها وعايش برة وهايص ولا على باله ....وتعويض ل 1000 أسره عن زوج ولا ابن ولا أخ ولا أخت ولا طفل مات .... الا بملاليم...
دا غير ان فيه ناس لحد دلوقتى محدش عارف عنها حاجة هيا عايشه ولا ماتت.... والحكومة طلعت ليهم شهادة وفاه وفيهم اهالى رفضت تستلمها...
يلا الله يرحمهم دا بنادمين..... مش انترنت

المهم كدا بصراحة فى جو قلق أول مرة الحكومة تعوض عن حاجة بسرعة كدا ...
إيه اللي جرا فى الدنيا يا ناس .... هتتحسدى يا كوكو ( دلع حكومة بذمتكم مش ليها حق ندلعها)

هوعلشان 8 مليون مصري هما اللي بيستخدمو النت أحسن من 75 مليون مصري متضرر من بلاوى
من يومين عملو تعويضات علشان نت ... يا فرحتي..
بس ياخوفى يطلع كلام فى الهوا .... وسلملى على الانترنت

السبت، فبراير ٠٢، ٢٠٠٨

زمتى المالية زى الريس والوزراء......

سمعت من كام يوم أن الكل الريس والسادة الوزراء قدموا إقرار الذمة المالية

وبناء علية أنا قررت إن أقدم زمتى المالية برضو وذلك لتعميق العلاقات بيني وبين كل ما يدخل المدونة
علشان نتعامل بشفافية بس حشمة طبعا تفكيركم ميروحش لبعيد يا خلابيص

بس علشان اخلص زمتى من ربنا هقدم ورقة بكل اللي كان عندي ...وبقى عندي ...ولسه هيبقى عندي ...
وجبته ازاى .. ولية ... وعشان ايه؟؟؟ وديكي ديكي أنت صديقي...
أصلى عارفه اللي بيشتغل فى دماغكم ... ومحدش يقدر ينطق ...
المهم من أولها كدا مش عايزة حد يطلع حدق وينطق بقانون... من أين ليكى بهذا؟؟؟وهذه؟؟ وهؤلاء؟؟؟؟
والعين الوحشة باه تسالنى ازاى ولية ومنين ؟؟؟
وتقلى مش نق ولا حسد؟؟؟
ولا اللي ما ينطق بس ألاقى وشو احمر ودخان طالع من ودانه...
ولا اللي يحب يستفسر دا كلو عندك وسايبة الناس جوعانة؟؟؟
ولا حاطه فلوسي فى بنوك بره ؟؟؟ والخميرة تطلع كام دلوقتى؟؟؟
ولا وابنك عندو كام ؟؟؟

يووووووووه بصو أنا علشان القلق دا
مش هقول حاجة... ويبقى حد يورينى هيقول أيه ولا يقدر يعمل ايه...

بس علشان اخفف من قهركم شوية هاجب على سؤال واحد فقط ...
وهو أن أنا معنديش ابن لسه ( وافهموها باااااااااااه)

وزير الزرعة بيفرحنا بالخيبة مش بالانجازات ... حاجة تكسف

أنا بالرغم أنى من أرياف وشايفة الفلاحين وحالهم اللي بقى لايصر عدو ولا حبيب تخيلت مثلا أن دا أماكن أماكن اللي فيها المشاكل دى مش كل فلاحين مصر وكمان كنت متخيلة المشكله فى السماد بتاع الأرض

معلشى أصلى مش خبرة فى مشاكل الأرض بس اهو بسمع منهم بحكم زى ما قلت أنى من أرياف

بس طلع فيه مشاكل اكبر أو بمعنى اصح مصايب اكبر مش بتتمثل فى مشاكل السماد بس اللي باه سعره مولع نار لما كانت شكارة السماد تبقى 30 جنيه وبعد كدا كل شويه بتزيد لما وصل سعرها 150 جنيه
وكمان مش موجودة بالكميات المطلوبة للاراضى لما دا طبعا هيخلى سعرها أعلى والفلاح يا عيني مش عارف يجبها منين ولا منين وفيه اللي بيجيبو قروض على الأرض بكام ألف جنية وبتحصل مشاكل لو اتاخر فى السداد ودا بيبقى غصب عنه يعنى لما المحصول يا دوب يسدد اللي عليه بعد ما يسيب جزء لأكل البيت هيتفضلو أيه
وعلى رأى الأستاذ احمد سيلمان فى برنامج الطبعة الأولى يعنى الدولة بتسوى لرجال الأعمال اللي قلبو البلد فى ملايين مش عارفه تسويها مع الفلاحين الغلابة دول ... بس هنقول أيه ناس ليها حكومة قصدي بخت

والسماد دا طبعا مستور بالرغم أن فيه مصانع بتصنع بس بنسبة قليلة مش تكفى وبدل ما نزود ونشجع ونجبر على الصناعة المحلية لا بيكبرو دمغهم ونستورد ودا يعنى فكرة عامه عن مشكلة السماد

أما بخصوص الاراضى اللي بتختفى اللي سياسة الدولة بقوم على أنها تبنى مصانع فى الاراضى الزراعية وتصلح الصحراء فوزير الزراعة بيفرحنا وبيقلنا أن مشروعات استصلاح الاراضى مخيب للآمال ودا دلع
خيبة وفااااااااااااشل من الأخر بيقلك الخطة الزمنية اللي الحكومة عملتها للاستصلاح وهيا خمس سنين

دخلت فى 25 سنة وياريت جيت بفايدة إلا الخيبة لحد دلوقت ما طلعت بصلة
يعنى 25 سنة كلام فى الهوا وشعارات وكلام حلو وان الموارد والأكل هيزيد ومش بنذيد إلا خيبة وبالآوى كمان
مفيش اراضى ولا فيه سماد ولا فيه اراضى استصلحت ولا فيه حاجة خالص
ومش عارفه الحكومة دى بتعمل إيه أصلا ولا وزير الزراعة مش مكسوف وهو قاعد فى الوزارة دى من غير ما يعمل حاجة ....حاااااااااجة تخنق
بس مش مشكلة الحاجة الوحيدة اللي تغفر ليه انو يقول كتب أيه فى زمتة المالية السنادى؟؟؟؟
اشجينااااا وفرحنااااااا