الثلاثاء، يوليو ٢٩، ٢٠٠٨

تلاتة زفت وتلاته طين ....

بالرغم أن الأسبوع دا جميل جداااااااااااااااااااا علشان فيه مناسبتين حلوين أوى أوى خالص

بس هاجل الكلام عنهم لليومين الجين وهنزل صور ليهم .... فانتظروناااااااااااااااااا


برغم أنى ضاربه دماغ جامده وموووووووووووود حلو .... ألا وأنا قاعدة قدام التليفزيون

لا بيا ولا عليا وهشوف برنامج العاشره مساء ... قلت بقالى كام يوم معرفش حاجه عن اى حاجه فى البدنجان

أشوف أحوال المخروبة قصدى البلد .... ألاقي الموضوع الاساسى عن زفت الطين منتوح إسماعيل

قلت أيه القرف دا .... بعد سنتين ونص قال أيه برئ..... يا حلاوة

والراجل المحامى ... كان هيجيلو البواسير من كتر العصبية ..وعروق رقبته كانت هتفرقع...

وقال أيه جى أدافع عن الحق .... أيه دور الهطل دا .... ياشيخ أتلهى وروح اقعد جنب أمك ...

بس ارجع وأقول .... روقى روقى .... عادى جدااااااااا ... دلوقتى اللى يعمل كارثه ولا يقتل

ناس فى أم البلد دى بيطلع براءة .... وبيخدلو يومين والموضوع يناااااااام قصدى يدفن ...

زى ما حصل مع زفت الطين التانى هانى بتاع الدم .... وطلع برائه ...اشمعنى منتوح ....

يلا اللهى يولعوا فى روس بعض كلهم .... عالم قذره وزباله .... علشان الحكومة الجزمة ترتاح ...


وشوية لقيت جرنال جنبى .... كان بتاع الجمهورية يوم الاتنين .... ببص ألاقى مبارك تفضل جاهدا

ومجهودا وحزينا ومحزونا وشاطرا ومشطورا ويرسل تعازيه لأسرة زفت الطين التالت يحيى شاهين

علشان مات .... أيه قمة العاطفة دى ... أيه حنان الأم دا .... يعنى خلاص مفضلناش ألا نعزى فى واحد

افلامة بارده وتجيب الضغط ... أصلى بكره أفلامه كلها جداااااااا... جوها ممل ويشل ...


ومحدش يعملى فزلوك ويقلى دا ليها قصه وهدف وبدنجان .... أقول فى دا كلو طظ وشكرا لرأى حضرتك

وافتكران العلاج بتاعه على نفقة الدوله علشان واحد عامل أفلام مسخره وكلها مبوسة ....

وكان ايمها توفى الدكتور عبد الوهاب المسيرى .... اللى كان قدم طلب للعلاج على نفقة الدولة واترفض

واتعالج على نفقة شيخ سعودى .... يعنى خلاص لما يبقى فيه ناس محترمه ومحتاجه تتعالج يترفض

طلبها ويروح اى كان يعالجو على حسابه .... فى حين أن واحد ملهوش فايده أصلا ويقلك فنان عظيم

فى أيه مش عارف ..... يسافر فى طياره مخصوص ومجهزة على حساب البلد من فلوسنا يعنى


غير ان مفيش اى حد من الحكومة الزباله دى راحة تعزى فى الدكتور عبد الوهاب

بالرغم ان دا احسن والله فى نظرى .... الدفنه والعزى كان جوه نظيف ومحترم طالما فهوش اى حد من الحكومة

ولا لقينا مبارك بينشطر العزاء و مكتوب زى ما أتكتب باسمه يعزى شاهين ....

بجد بجد قرف.... عالم حوله .....
فاكيد هيجى يوم ونلاقى بوزهم فى الارض ....

السبت، يوليو ٢٦، ٢٠٠٨

هو مين العفريت !!!؟؟؟

طبعا اليومين اللى فاتو كان ذكرى ثورة يوليو .... وبصرف النظر عن كانت ذكرى حلوه

وحدث عظيم حصل لمصر والمصرين .... ودا من وجهة نظر العامه ...

أو تكون خطوه فى اللي حصل بعد كدا وتسلط البعض على عبد الناصر والاتهامات

والنكسة بعدها ... دا كلو ما أظن يهم حد دلوقتى خاااااااااااااااالص حتى لو اجتمعنا

أنها ذكرى كويسه لبلدنا فى وقتها ... بس معظم جيلنا محسش بيها أصلا ...

لأننا أحنا دلوقتى اللي محتاجين ثوره بجد , بحق , بشجاعه .... علشان نرجع حقنا


وعلى فكره سبب ذكرى للثوره ....مش علشان اذكر ها فى حد ذاتها .... علشان بصراحه

متهمنيش فى حاجه .... ألا الاسم بس ....ثوره ....

وتانى حاجه ... على حسها .... مبارك اللى يخليه لأحفاد أحفاده .... خرج ناس من السجن

وبرضو بصرف النظر لو كانو طالعين من نص المده ولا قتالين قتله ولا مظلومين حتى

المهم طلعو .... فى المقابل انه تم رفض خروج أيمن نور ..... وحصلت حورات كتيره أوى

أهمها أن أيمن نور طلب العفو من مبارك ويسمحلو انه يخرج على اثر مناسبه الثورة دى

بصراحه اختنقت جداااااااا ... أنا قلت ليه يعنى يعمل كدا .... يعنى هو مش عارفه ...

مين اللي كان السبب فى سجنه ....واللي بيحاول يبين للناس كلها انه انتهى ...

ويبين أد أيه انه بيدمر اى حد يقف قدامه .... معنى يدمر أنا قصدي أسلوب مبارك ...

أنما مش واقع أيمن نور ...يعنى أيمن نور متماسك وليه أنصار كتير ...وكفايه انه وقف قدام مبارك

المهم حاولت افهم ليه أيمن نور بعت رساله للريس ...بصرف النظر أن من حقه يخرج بعد نصف المده

وهو متاكد أن طلبه مش هيتوافق عليه .... قلت يمكن أيمن نور عايز يبين اد أيه موقف مبارك منه

واد أيه أن حكموا ظاااااااااالم .... ما الكل عارف وباصم بالعشرين ...مهوش جديد ...

ولما طلعوا أن أيمن نور طلب العفو من مبارك .... أعلام غبي وبيستهبل علينا .... عايز يموت فينا

او على الاقل يشكك فى نزاهة ايمن نور وكبريائه وانه رمز للتمرد الحق ...

عايزين يفهمونا أدى أيمن نور اللي كل وخده رمز وبطل ... جه اليوم اللي يطلب من مبارك العفو


حكومة صاحبة أعلام غبي ... استحالة طبعا راجل اتحطت فيه ثقة ملايين سواء أعلنوها أو أخفوها

خوف وبطش .... يحط نفسه فى موقف العفو والترجي .... استحالة طبعا

دا قانون ... وشخص طالب بحقه ... فى ظل الواقع عايشينه كلنا ....

بينى وبنكم أول ما سمعت حكايه العفو دى اتخنقت قلت ايه دا ... معقول يعملها مهما كان الألم

أنا عارفه أنى مجربتش سجن ولا مهما وصل تخيلى مش هكون فى مكانه ....

بس هو عارف أكيد أن هيتحط فى ضغوط ... ويكون فى مواقف صعبه .... بس الأهم

اللي هيكون فى مكانه كبيره عن ناس وشباب محتاجين لو لحظة امل فى التغير


ألا صحيح ....العفو دا اسمعها فى أفلام قديمه ...لما عايزين يطلعوا عفاريت من على واحد

فمش معقول يعنى العفو المقصود بيه دا


فالعفو ....فالعفو ....دستور .... فشوفو باه مين العفريت ...




الخميس، يوليو ٢٤، ٢٠٠٨

دبح فى عز الضهر

اتكررت تانى حكايه دبح جواهرجى فى عز ( اى حاجه فيها عز تلاقيها فقر وخراب ) الظهر
والمره دى فى كفر الشيخ (بلدى حببتى ) اللى مسيطانا ....
بصراحه مش عارفه تفاصيل ...
وهنبدا نسمع فتنه طائفيه ... اصلهم قالو اللى دبح الراجل المسيحى صاحب محل الدهب مسلمين
وحتى لو اتقبض عليهم .... عادى هيتسجنو ا.... وينام الموضوع زى اللى قبلو واللى قبلو ....
بس اللى عايزة افهمو ... الموضوع دا صدفه .... ولا مترتب ليه ان كل فتره شوية مسلمين يدخلو واحد
مسيحى صاحب محل دهب.... ولا فيه ناس بتستغل الحكايه دى ... وشاغله سرقه والقتل جه بالغلط
مش عارفه حظ المسحين نحس كدا ليه .... كل مره تيجى فى حد فيهم ...
ومش عارفه فين ام الحكومة الزفت دى اللى قرفتنا بقانون الطوارئ .... يعنى ما عرفتش تمنع حاجه
وتمنع تكرار الموضوع دا ....ولا توفر امن للناس ....
ولا هيا مبسوطة من اللى بيحصل ....ولا يمكن عندها فكره مسبوقه عنه ....
يلا بكره يبان كل حاجه ...

الاثنين، يوليو ٢١، ٢٠٠٨

زقزوق بيكمل زقزقة على ودانا


مبارك بقى مدمن وزراء فاشلين فشل زريع ....وتلاقيه كل ما مدة وزير يخلص

يروح مديه قرار حول لوزارة تانيه ... بالرغم حدوث فشل ومصايب فى كل وزاره ماسكها قبل كدا

زى مثلا بطرس غالى اللي سمعنا عن تقليبو فى فلوس التأمينات وضيع ملايين اللي لحد دلوقت عاجز عن

تدبيرها ومش فالح إلا كل يوم يطلعلنا بأسعار جديدة وضرايب اللى بتقطم الوسط

وكان قبلها فى وزارتين وبرضو مفلحش فيهم .... عادى دى بقت العاده فى أسلوب مبارك لأداره البلد

وبالرغم أن اى دوله فى العالم لما وزير بيفشل فى حاجه بيخلى عند اهلو دم ويخلع بالذوق من المنصب

والكل بتقبل دا بنظره احترام وتقدير ... ومش عيب الواحد يفشل ...

بس من العيب ومن الغباء انه يستمر فى الفشل

ويطلع ويقول أنا مش هستقيل علشان متعودتش الهروب زى الشجيع وزير التعليم فى أزمة الثانوية العامة

لا يا حضرت بلط فيها وكمل خرابها .... وأبقى دلدل رجليك وأنت قاعد فى مارينا بتاعتكم ....

المهم أنا باه سمعت أن وزير الأوقاف زقزوق بيه انه طلع قرار بمنع أمام اى مسجد يقول

حديث الرسول صلى الله عليه وسلم

اللى بيحث على كثره الإنجاب ... علشان النبى هيتباها بينا يوم القيامه اللى بيقول

( تناكحوا ... تناسلوا ...تكاثروا...فأنى مباه بكم الأمم يوم القيامة) صدق الرسول صلى الله عليه وسلم

وقال الشجيع ( اى أمام جامع يقول عندى هذا الكلام أنا حرفده واطرده وامنعه من الصعود إلى المنبر )

أدى الوزير المحترم اللي بيعترض على كلام الرسول .... وأيه أنا معنديش دى .... دا على أساس

أن حضرته متعين على التكية بتاعت بباه....

ودا ليه علشان مبارك وسياسته ومؤتمر السكان

اللى قال أن الزيادة السكانية عقبه فى تنمية البلد ....

دا على أساس أن التمنيه شغاله وعلى ودنها ومفيش خرم ابره فى البلد يكملو فيه تنميه ...

ويا حرام بنفترى عليهم بالخلفه .....

هو أيه دا ... يعنى يغضب الله ورسوله علشان يرضى حاكم

متعشم يحول على اى وزارة تانيه .... ولا بيدادى ويحايل فى مبارك ....

دا نعتبره أيه ... كفر ولا أيه .... وفين الأزهر من الكلام دا .... فالحين بس يتفرجو على فيلم إيران

ويحرموه ... طب ما تتنيلو شوفو اللى بيحرم ويمنع حديث للرسول وهدف حظر الحديث مش مبنى لسمح الله

على عدم صحته فى الأصل ...لا مبنى على إرضاء مبارك ....

ومش بعيد الأزهر تطلع وتقول الحديث غير صحيح ....

دا لو خدت بالها أصلا .... كتر خيرها والله مشغولة بالأفلام ....

أدى الحاكم والحكومة اللى بتحاول بكل السبل تستهبلنا فيها وتبرر وكستها وخبيتها

بأفعال أقذار .... بس الفرق أن الأفعال الأولى فى حقنا كبشر رغم عدم ضياع حقنا عن الله

أنما الأفعال الأقذار فيها فى حق الله ورسوله ( استغفر الله )

وبرضو ساكتين ...وممكن ناس كتيره تقول ما يمنعوا ولا يخرسوا الناس ...

لا هما هيبطلو هجس فى الكلام

ولا الناس هتبطل خلفه .... فنسكت أحسن ... لحد أمته ...

لحد ما يمنعوا القران كمان ....مهيا دى اللي ناقصة فعلا ....

فيالله عليك بهم فأنهم لا يعجزونك

الجمعة، يوليو ١٨، ٢٠٠٨

اول يوم ليا فى سنه جديده من عمرى ...

يوم 17-7-1981 ....يوم ميلادى يا جماعه ....

كان أمبارح أخر يوم في السنه 27 من عمرى

وبدأت اليوم أول يوم في سنه جديده لحياتى ....

وعلشان دى مدونتى ...وأنا حره اكتب فيها اى حاجه .....قررت أنى أهيص هنا شويه وايه كمان هحطها تبع المناسبات الحلوه


واعمل كانى مش شايفه السنه اللي فاتت من عمرى ... وهخلى عندى أمل في سنه جديده بدأتها أن شاء الله

بس بصراحة معنديش اى خطط للسنه دى ...يعنى هعمل فيها أيه ...أفضل زى ما أنا

ولا أغير فيها حاجه ....مع العلم أنى ما بعملش حاجه طبعا ....

أو بمعنى اصح مفيش عوامل تساعد على التغير دا حاليا ...

و لانى أنا بقيت واقعيه جدا جدا .... وبطلت احلم ... فانا قررت أنى أسبلكم حق الأحلام

وأنكم تحلمو بدالي اعمل أيه في السنة الجديدة أن شاء الله

مع العلم أنها أحلام ممكن تتحقق أو أحلام لمجرد الأحلام ....يعنى لو اقتراحكم في الأحلام كان خيال

أنا عندي استعداد كامل وتام أنى اسمع أحلام غير حلمها بدالى ....جايز تتحقق

وهعيش اى حلم بس طبعا حلم حلو... أجازة اليوم من اى حاجه غم ....

أنا عايزة كل حلم لونه بمبى اصفر اخضر احمر مكركرومى ....


اه صحيح ...محدش يخلى شوشو يضحك عليه ويقول خلاص عيد ميلادها عدا

والهديه راحت .....لا يا خلابيص كل واحد يسبلى ورده ...

عايزة المدونة تتملى ورووووووووووووود لحد ما الكمبيوتر ينفجر ويغرق اوضتى

وووووووووووررررررررررررررررررووووووووووووووووووووووددددد

معلشى بحب الورد باه ....متخفوش مهيش رومانسيه ولا حاجه ....أحنا وش كذالك برضو

المهم محدش يعمل فيها ناصح ويتخيل فيه شمع وينفخ لالا أنا خاسه وممكن أطير فيها

ولا حد يعمل فيها ناصح ويدخلى بشموع يروح ويولع فى المدونة دا بصرف النظر

عن اللعب بالنار بييعمل ايه بليل .... فاهمين طبعا هههههههههههه

المهم والاهم أنا مشتاقة لكل حلم هسمعو منكم ....ومشتاقة اكتر لكل ورررررررررده ....

وان شاء الله نتقابل السنه الجيه فى نفس اليوم على خير وابقى اقلكم اى الاحلام تحققت ....
وكل سنه وانتم طيبين وديما معايا في المدونة بأذن الله ....


الأربعاء، يوليو ١٦، ٢٠٠٨

دعم مبارك بتطبيع ابوس الواوا

اليومين دول الدنيا مقلوبة على حكايه الفيلم الاسرائيلى اللى أتذاع فى قاعة فى فندق بتاع الوليد ابن طلال

وحضرو يجى 100 شخصيه ... ولا حد فى من الحكومة المصرية قلو تلت التلاتة كام ....يعنى هيا أول مره

اى حد من العرب يجى يعمل اللى هو عايزة فى البلد ويشترى مؤسسات البلد ولا أراضى من البلد وبملاليم

وهيا فى الأصل بملايين ...

دا البتاع اللى اسمه وليد دا بيتعامل مع إسرائيل فى التسويق لقنواته هو ومزيكا والعين وزوم

ومحسن زفت جابر بتاع عالم الفن .... يعنى عالم زبالة بيتعاملو مع اللي ازبل منهم طالما فيه فلوس

عالم واطيه من الأخر وقذرة .... ولازم يحصل أزاله لقنواتهم دى نهائى .... وبلاها نسمع لاى مغنى يتعامل مع

القنوات دى .... لحد ما ربنا يهدينا خالص ونبطل نسمع لزفت اغانى خالص ....

لحد دلوقتى بنكلم عن افلام واغانى وهجس .... وطبيعى اللى تلاقو فى اى

مجتمع عالم خاينة وواطيه وما يهمهم اى قيمة ولا مشاعر ولا موت ولا حزن ناس

ماتو أو جاعو أو مش لاقين علاج..... وبيتقال على دا سلام .... وفى تطبيع ....


أنما لما نيجى لمبارك ....والبرنامج الانتخابي بتاعه مدعم من إسرائيل ....عن طريق تدريب ناس

هو دا باه نسميه أيه .... أحنا عارفين طبعا اد أيه مبارك جى على نفسه وصحته فى خدمة الوطن

ومديها صحوبية مع اسرائيل .... وبيعمل حساب اى كلب ماشى فى شارع عندهم .... علشان ما يحاول

يخليهم غضبنين عليه ....وكتر خيرهم بيدعهموه كمان .... وأنا أقول النحس راكب البلد دى ليه

اتضح أن فيه سبب اساسى ( مبارك ) وسبب برضو اساسى ( صحبته إسرائيل )....

يعنى بلاش فزلكه على حتت فيلم اتنيلو عرضوه من فندق واحد كان سبب فى طلوع أغنيه ابوس الواوا

اللهى تبوسو حماره عميه البعيد ... مهيا فى الأصل حكومة ملهاش قيمة ...ولا ليها لازمة ...

اى نعم حاجه تغيظ وتخنق واللي عايز يولع في الفندق أو صاحبه يتفضل ... محدش يمسكه ...

أنما باه دعم الرأس الكبيره دا باه اللي قايمين يكتشفوه دلوقتى واللي دوام مبارك 27 سنه دليل على

انه مدعوم من زمان .... ويفلقو دماغ أهلينا ويصدعونا بأم السلام والبدنجان ....

فالله يحرق من أول الأفلام على وليد على جابر على المدعم والمدعوم على التدعيم على أبوس الواوا


فشوفتو باه الدعم والسلام والتطبيع ....دا كلو من ابوس الواوا




الجمعة، يوليو ١١، ٢٠٠٨

انا جيه من الفضاء الخارجى

أنا دبيت خناقه أمبارح مع واحد متخلف وسط ناس اغبيه ...

كنت راحه أنا ونور صحبتى المنصورة وبتكلم عادى يعنى ماكنش

مستفز ولا عالى .... لسبب بسيط أننا بنتكلم عن موضوع خاص ... مش معقول نعلى صوتنا

ازيد من مستوى السمع بتاعنا ...


المهم بعد فتره سمعت حد قال من قدام بطلو دوشة حاجه زى كدا

فبسال نورا انتى سمعتى الكلمة قالتلى لاء قلتها أنا حاسه أن فيه حد قال كدا

مش الزباله يتحرج ولا يتكتم ولا على الأقل يطلب باسلو ب محترم ان مثلا نسكت ....لا لقيت زى الطور

مدير ليا وبأسلوب بلطجى وصوت عالى ايوة بطلو رغى ولك شوية من الصبح وانتو بترغو قرفتونى

دا كل وأنا متنحه أنا ونورا مش متخيلين حد يقلنا كدا أصلا ....نورا اتخرست ... وأنا علشان مخنوقة لوحدى

ومتغاظة ومفروسة رديت باه وقلتلو وأنت ليه أصلا رامى ودانك معانا ومركز فى كلامنا وبعدين أنت مالك

أتكلم ولا لاء أنا راكبه بفلوسى( حلو حتت فلوسى دى صح ) وأنا حره ....

طبعا دا كلو وهو بيبرطم ويزعق بسفاله .... مش كدا وبس لاء

دا كل أربعه يتكلمو ويتفزلكو عليا .... من ضمنهم ست كانت قاعده جنب المختلف

وتقلى ميصحش تردى عليه انتى متعلمه وبنت .... رديت قلتلها هو علشان متعلمين نتهزق ومنردش ولا ايه

الغبى يروح مدير ليا تانى ويقلى محنا كلنا متعلمين ويلعن ابو المعلمين فى الأرض ....روحت قلتلو أنت أصلا

تبص قدامك وتحترم نفسك ومتوجهش ليا كلام نهائى ....

المنافق اللى جنبه ويروح موطى عليه ويتكلم معاه كلمتين يقوم الغبى مدريلى ويبرطم والمنافق يطبط عليه

ويهديه فروحت قيلاله أنت بطبط عليه ليه ...متخليه يورينا هيعمل أيه ..؟؟ علشان يتكتم لا يكرر الكلام

والطبطبه ....لما اتفقعت منه ...

واحد باه ورايا راح يستغبى معايا وراح قايل أنا مشوفتش بنت بترد كدا ... روحت باه أنا اللى أديرت

وقلتلو حد أصلا خد رايك ولا وجهلك كلام ولا قلك تتكلم أساسا وحطيت صوباعى على بؤى وقلتلو أنت تسكت

خالص ومسمعش ليك صوت ....ودا باه كان مثال انه انسان منافق بس جبان جدا عارفين ليه فضل مكتوم

ومنطقش الا لما نزلت

بصلى وبيبرطم بس ما سمعتش حاجه علشان كنت بعيده ...فكان طبيعى انها شتيمة مش مهم من واحد جبان أصلا

وأم رايح واحد كبير من قدام باه يقلى مترديش وتتكلمى انتى بنت ... يادة كلمة انتى بنت دى .... هو علشان أنا

بنت يتغلط فيا اسكت وقوم أصلى ركعتين شكر لله ولا أيه بظبط ....

ودا كلو نورا صحبتى يغمز فيا وتشد راسى وتوشوشنى يابنتى دا باين عليه من النوع اللى بيشرب حاجات

مش شايفه عنيه مش مظبوطه و سواد سنانه ....

اكلمى وانشالله تعملى فرح براحتك ....

واحد باه دا كان هادى شوية قاعد جنبنا ... وبيقلى ممكن أقلك على حاجه بس لو هتزعقى بلاش روحت قياله

اتفضل ( وانا قلى فيه ناس بتبقى تعبانه فمعلشى يعنى زى اللى بقلو اشجينى مهيا بقت هيصى )



روحت قلتلو فى اختراع اسمه زوق وان طلب حاجه باحترام وأدب من الناس دا على الاقل أتحرج واسكت

فعلا أنما يتقلى اتكتمو وبطلو رغى .... وهتكلم برحتى وأنا حره ....

انا مش بحكى علشان ناقصه فزلكه من حد ويقلى غلطانه ... ولا يقلى عندهم حق ...

انا اتحدى اى راجل حتى يكون فى نفس موقفى ويسكت ....

او يكون معاه اختو بلاش الجو ويكونو بيتكلمو ويتوجهلهم الكلام بالطريقه دى

ويتخرسو .... وميدهوش بالجزمة كمان ... ما علينا ...

أنا نفسى افهم باه اشمعنى كل حاجه يتقال انتى بنت ميصحش ومش بدنجان .... يعنى لما نتهزق من عالم زباله

او نسمع معاكسات بكلام سافل من عالم وباله او اى حركات قلة أدب فى اى موصلات من عالم سافله

على فكره أنا شوفت بعينى بنات قابلهم المواقف دى ....ومن شده الموقف بيتشل تفكرها وتعجز عن اى رد فعل

وفيه اللى رد وشتم وناس رد عليها وقلها انتى اللى عايزة كدا هو حد جه جنبك ... والله العظيم حصل ...

فليه البنت ساعتها تتخرس وتسكت والمنطق الوحيد انك بنت وميصحش تردى ولا تتكلمى ....

انا باه بقول لكل متخلف تفكيرة كدا ....طظ فى تفكير حضرتك ... وأنا عن نفسى مش هقول ان كل المواقف

بتساعد انك تعرفى تردى ولا تخدى حقك ...بس ليه لما تعرفى تردى ولا تخديى حقك .... نسكت ومنخدهوش

ولو طولتى تديلو بالجزمة لاى سافل ...فتتاخرى ليه ....

طالما تخطى حدوده معاكى سواء بالكلام ولا باى حركة



والناس مش تقف جنبها ليه لا تقلها انتى غلطانه مش علشان ردك لا علشان لمجرد انك بنت ....

الله يحرقهم ...يعنى لو أنا شايفه من الرجولة شئ كنت ارد اقلهم أنا راجل ...بس للأسف العالم الزبالة بينضمو

لفصيله الرجااله ... فانا طالما مش عاجبه أنى بنت وبرد ...ومش مقتنعين أن اى بنت من حقها تدافع عن نفسها

لو اتحطت فى اى موقف غبى مع ناس واطيه ....


علشان للأسف هتلاقى ناس تقلها كبرتى الحكايه ووسعتيها كان موقف حصل وعدا كنتى سكتى وخلاص ...

أنا عارفه أن اى بنت هيكون عندها تردد وجواها خوف دا طبيعى .... ليه تبين لاى سافل دا خوفها

وضعفها ... ليه تسمع لكلام الناس اللى تحبط ....وتحسسك أن دا شئ طبيعى وسكوتك على الموقف طبيعى

علشان أحنا بنات ... ولو رديتى تبقى مش متربيه ....

وعلى فكره مش هتبقى ضعيفه بس ومتنازله عن حقها فى المواقف دى بس لا دا اى موقف فى حياتها هتقابلو

بضعف وتطاطى والمصيبه لما ربنا يكرمها ببنات هتربيهم على الأسلوب دا ...اسكتي علشان انتى بنت ...

اللى يشل باه بعد ما الفرح دا ... ليقت الغبى اللى كان وريا فتح الموبيل ويسمع اغانى مسمع

الميكروباص كلو .... واتنين ستات جنبو بيلاعبو طفل ويكلمو بصوت مسموع

ومحدش نطق ولا أتنفس ولا قالو بم ... دى تتفهم ازاى باه

فبصو يقلو أنى بنت ولا جيه من الفضاء الخاجى حتى ...

بس برضو هرد ...وهتكلم .... وممكن اضرب كمان .... ربنا واعدنا بعالم معفنه ...

الأحد، يوليو ٠٦، ٢٠٠٨

أربع حرميه والسرقة واحده


شوفو باه الهجس ....من ولاد الحرميه ...

يعنى لما كل يوم قرفونا بضرايب جديده ....وكل يوم يتفننو ويتفزلكو علينا ويخترعولنا ضريبة جديدة

علشان يمصو بيها دم الشعب الغلبان اللي معظمة عايش اليوم بيومة .....

وكان أخيرها قانون الضرائب على العقارات ...

مهما هيدارو سرقتهم بيه .... ويسدو العجز ازاى ....

دا ضاعوا وعملوا أفلام وحسسونا أنهم هيشحتو علينا لما مبارك قال على الزيادة

وزودوا الأسعار ...وسدو نفس الناس ...واتعلنت العلاوة اللى حطها بسبب الزيادة دى ...

المهم دا كلو ....والناس زعقت ...وصوتت ...ولطم ...وضربت نفسها بالحزمة

وفضلت تقول ياحكومة حرام ....يا زفته مش قدرين نعيش ....مش لاقين ناكل ...

ولا الحكومة معبر ....ولا الزفتة شايفه الناس تعبانه ....

ودا كلو ومستحملين ....أو بمعنى اصح متكسحين ومش عارفين ناخد حقنا ولا قدرين نرفع عن نفسنا الظلم

ليه مش عارف ....؟؟؟ بس مش دا موضوعنا دلوقتى ...

المهم أن السيد نظيف وزير الخرابه ...بطرس غالى وزير التفليسه ....وسامح فهمى وزير غاز إسرائيل

وعثمان وزير الفقر... دول كلهم اشتركو فى خفض الضريبة

اللى مفروضة على الشركات العالمية بتاعت البترول فى مصر بعد ما كانت 20% بقت 1%

ودا بيخسر الدول كل شهر 4 مليار دولار ....


يعنى مشحتين الناس وماصين دمهم وبيسرقوهم ... وكمان بيسيبو حقهم للأجانب

متقلوش سايبين الفلوس دى من كتر الهنا اللي معيشينا فيه ....

ولا من كتر الفلوس اللي معانا فقالو نطلع صدقة ....

ولا ميكونش حاسين أنهم بيدفعو الفلوس دى من جيبهم والتكية اللي هما فيها

اللي سبهالهم المرحومين بابى ومامى....

ولا شالو الضريبة دى ...على أساس أنهم ياخدو نسبة لنفسه ويحوشو ....

فيه أيه بظبط ... ميكونش جلهم أمر بكدا وواجب التنفيذ ...

واللى يشل اكتر عاملين إعلان بيشكرو فيه الناس اللى قدمت الإقرار الضريبى وبتحب تطمنهم ان العائد من

الضرايب زاد بنسبه 1300% وإعلان تافه وساذج وكل ما أشوفه عايزة أتف عليهم ...

وفية شوية عبط يرفعوايدهم و يقلو ولسه ولسه فى دول هبل وهطل ... انا متاكده انهم يقصدو
ب لسه ولسه .... ان لسه فى سرقه ولسه فيه حرميه ...


بصو أنا كان قلبى حاسس من أول ما سمعت عن اللي هيمسك رئاسه الورزاء اسمه نضيف

قلت أن شاء الله هيخلى البلد انضف من الصينى بعد غسيلة ....

حسبنا الله ونعمل الوكيل فى الاربعه دول ....خربوها وقعدو على تلها ...

وبالسم الهارى ان شاء الله لشلة الحرميه دول ....




الخميس، يوليو ٠٣، ٢٠٠٨

حقن بالواسطة ....

حلو اوى الخبر دا ...حتى المرض والعلاج منه بقى فيه وسطة .... تحيا مصر

فى مستشفى كفر الشيخ الناس اللى تعبانه بالكبد مش لاقيه علاج فى المستشفى ولاحقن الالبومين علشان الناس غلابة

والحقنه واقفه 150جنية ... يعنى مستشفى زى قلتها ....

ولا هيا فعلا بقت بالوسطة .... ومش بعيد انها تتباع باه من بره بره والناس تنحرق

دا حال مستشفيات الحكومية فى مصر ....اهمال شديد... انعدام النظافه ... عجز فى العلاج وعدم توفيره للمرضى

بلطجه وفردة من عاملات النظافه والممرضات ومطالبه الاهلى بفلوس واللى مش مصدق يروح مستشفة الحميات اللى فى شبرا

واتحكالى عن بلاوى فيها وتعتبر مزبلة وعفانه فوق تصور اى حد ... وملجا للقطيع من القطط وكمية دبان وناموس عجب

فمن الاخر ايه لازمتة وزير الصحه لما الامراض بتزيد والعلاج مفيش والنظافه معدومة ؟

حاجه تقرف بصراحه

الأربعاء، يوليو ٠٢، ٢٠٠٨

اللى عامل الاعلان دا عالم معفنه

في إعلان رخم جدااااااااااا ويغيظ ..... مش عارفه فيه حد لاحظه ولا لاء

أنا عن نفسى ما شوفته ألا مرتين ... يمكن علشان الفتره اللى فاتت ما قعدتش قدام التلفزيون كتير

بس والله شوفتة ....و اتغظت غيظ ...

على العموم أكيد هما عملينوه علشان يستفذو الناس بيه ....دا لو استفذو أصلا ....

الإعلان عن المجلس القومي لحقوق الإنسان فى مصر ... ومنزل أغنيه بتاعت لون وقفا وأبصر أيه ؟

أنا عايزة اعرف مكلفين نفسهم وعاملين إعلان ليه ...؟؟؟

حقوق أيه اللي عاملين حملة توعيه للناس علشانها ....

مهو كلنا عارفين حقنا ... وبنطالب بيه...

بس مين اللي يخلو عندهم دم ويدهولنا فعلا ....؟؟؟

وازى نخده منهم ....

أنا مش فاهمه والله هدفهم أيه من الإعلان دا .....

بيحسنو صورتهم قدمنا ....ولا بيحاولو يقولوا أنهم مش مسؤلين عن حقوقنا اللي ضاعت

علشان أحنا أصلا ما حافظنا عليها ...ولا يمكن مش عايزنها....

ولا يمكن عقلهم قال ليهم دول مش عارفنها ...

طيب ليه موضحوش أيه هيا الحقوق اللي إحنا نطالب بيها لو ما اخدنهاش ....

مايكونوش مكسوفين ....

هنطالب بحق أيه ولا أيه ولا أيه بس ....

بحقنا أننا نختار حاكم صالح يصلح من حال البلد ...

حقنا فى أننا نشيل اى حاكم ظالم ضيع البلد وضيعنا معاها ...

حقنا فى محاكمه اى مسئول في الحكومة في ميدان عام والعقاب يكون قدام الكل ليكون عبره لغيره ....

حقنا فى رغيف عيش ... وشوية هواء من غير هباب ... وشربة ميه من غير فيرسات ولا امرض

حقنا فى مستشفيات نضيفة ...وعلاج فعال ...

حقنا فى تعليم محترم ... يكون فكرى كانسان يخدم البلد ...

وحقنا فى شغل بعد سنين طويل دراسه....

حقنا نكون فخورين ببلدنا .... وما ألاقى حد يسئ ليها

حقنا لما نعبر عن راى ما ألاقى اعتقال ولا سجن ولا موت ...

دى حقوقنا البسيطة ....

أنما الحكومة تعمل إعلان عن المجلس القومي لحقوق الإنسان

وهيا معدومة الحقوق أصلا ... حقها فى حكمنا معدوم اساس وباطل ...

دا يتسمى حول باه

حقوق ايه ....

وناس بتموت علشان رغيف عيش ... يا حكومة يا جعانه

الناس جالها مرض ...ومفيش علاج ليها ... يا حكومة يا مسلولة

والاعتقالات لكل واحد قال عايزين البلد كويسة .... يا حكومة يا ظالمة

أيمن نور اللي اعتقل علشان وقف قدام مبارك ....

ولا دا كلو حصل لما جيت لجنه من من مجلس النواب الامريكى ينتقدوا فيه

تدهور حقوق الإنسان فى مصر ... أيه خافو من سيدهم ليغضب عليهم

متخفوش دى منظر بس اذا كان عليهم دول عايزين يولعو فينا بجاز ...

والحكومة الرخمه ردت عليهم بنفس التمثلية وعملت إعلان ....
نقلكم ايه بس ...بصو احنا مش عايزين حقوق ولا بدنجان عايزين تحلو عنا وعن البلد
علشان نلحق نفسنا ونصلح اى حاجه

ولا هو كلو قرف فى قرف .... فربنا يخدكم ...

قولو اااااااااااامين