الأربعاء، يوليو ٠١، ٢٠٠٩

طريق الطلاق ولا طريق الحب

امبارح جيت تزورنا واحده قربتنا ... وهيا متجوزة من يجى عشر سنين

وهيا منقبه ومحترمة الا انها فى مرحله انفصال (طلاق) عن جوزها

وبالرغم اللى حكيته من معاناه وظروف الانفصال وحسيت فيها بحزن اوى

ومكنتش بتخبى بالعكس كانت بتحكى مواقف قابلتها وبالرغم انها استحملت

كتير اوى .... الا انها كانت مديانى انطباع انها متماسكة جدا ....

لحد ما اتغير الموضوع محاوله منى انى اخرجها من الجو الحزين اللى هيا فيه دا

وفتحت التلفزيون وجبت العاشره مساءا

فلاقتها بتقلى بتسمعى 90 دقيقه ... فقلتلها لا مش دايما .... قلتلى ليه

قلتلها اصلى بعاند معتز ... قلتلى ازاى قلتلها كل شويه يقلى فاصل واوعو تروحو فى اى حتى

فبغيظو واروح الحته اللى مسكهالى دى

فضحكت .... قلتلى دا من قيمة كام يوم كان جايب قصه حلوه

فقلتلها ازاى ... فبتحكيلى القصه ... عباره عن مهندس ديكور كان حصل خلاف مع زوجته

وبناء عليه طلبت منه لاما تسيب البيت لاما هو اللى يسيب البيت

وما كان منه الا انه طلب منها تفضل هيا فى البيت مع ولادها وسابلها البيت

ولمدة اسبوع وكان فى خلال الاسبوع دا كان بيطمن عليها من امها

وفى يوم طلب من مامتها تروح البيت عندها وتدخلها الاوضه اللى فيها بلكونة ويخلوها تبص من البلكونة

فى وقت معين متفقين عليه

وفعلا حصل دا ... والزوجه لقت عاملها يافطة من 12 متر طول فى 7 متر عرض

وكتبها كلام رومانسى وحاطت صورتها فى قلب وجابلها ناس تعزف كمنجا

وهيا اول ما شافت دا جريت عليه وحضنو بعض ...

يمكن حد سمع عن القصه او شاف الحلقه بتاعت معتز .... بس محدش كان معايا

وشاف طريقه قربتى دى وهيا بتحكيلى .... وحس باد ايه متالمة وحزينه جدا

لدرجه ان حسيت من كلامة ونبرة صوتها انها بتتمنى دا يحصلها ....

واد ايه مقدرة اللى عملو الرجل دا لزوجته .... يااااااه على الحزن اللى حسيته فيها

وبالرغم انها كانت مبينالى انها متماسكة وقويه ....

وهيا العكس خالص .... اد ايه انها لاحولا لها ولا قوة

اد ايه انها مفتقدة الامان والاستقرار فى عمرها دا

اد ايه منتظره فى اخر لحظة ان ربنا يهدى

وكلمة حنينه من اللى كان اقرب واحد ليها تحسسها ان لسه فيه خير فى الدنيا

حسيت فيها بانهيار كل شئ جواها وحوليها ....

ففضلت طول الليل اسال نفسى ليه فى رجاله تعمل كدا

ليه تقسى ... ليه يهين زوجته ام اولادة مهما كان الخلاف بنهم

ليه الحزن اللى هيا حساه دا كلو .... ياترى هتقدر تتكيف ازاى مع وضعها دا

ياترى مهما حكت اللى جواها حد هيحس احساسها ....


واتاكدت فى الاخر ... ان الراجل ممكن يمتلك عقل وروح وكيان السن بكلمة حلوة

بابتسامه يقابلها بيها ...

يحتويها فى حزنها ....

يسامحها ساعة غضبها ....

يساعدها انها متعملش حاجه حرام ....

يقدر حبها ليه....

يهتم بيها وبلاش اهمال وتجاهل ليها ولمشاعرها....


واى ست لو لقت جوزها عملها كدا .... عندها استعداد

تغفرلو اى سيئه عملها فى حقها على مدا عمرهم مع بعض

اكيد مفيش لا راجل ولا ست عندهم الكمال كله

لكن اكيد مع بعض هيلاقو الكمال

فليه الحزن اللى بيسببوه لبعض دا

وليه الكبرياء على السعادة ولا كلمه انا اسف


بالرغم ان كرهت جوزها دا اوى .... الا ان احترمت جدا المهندس اللى عمل لزوجته دا

لقيت الست واحد فى الموقفين .... بس الرجل الختلف

اتاكدت فيه حب فى الحالتين .... بس راجل حافظ عليه .... والتانى اتخلى عنه بسهوله

حسيت ان قربتنا دى حزينه جدا .... وزوجه المهندس فى منتهى السعادة

ليه
بنختار طريق الطلاق عن طريق الحب

هناك ٢٢ تعليقًا:

ديالا يقول...

الجواز والطلاق والخطوبه كل ده نصيب ربنا وقسمته وربنا عمره مابيعمل حاجه وحشه

اما عن المهندس ده

ده غلب الباشمهندس مهند ونور في امسلسل

وربنا الناس دي بجد هتجبيلي الضغط

علي راي هنيدي ده احنا عندنا صنادل في بلدنا

يابنتي انا كده هعمل مظاهره وهطالب الي يجي يخطبني يجبيلي بقي كمنجات وفريق الاوبرا وعماد بعرور

ويفضلوا بقي يتحايلوا عليا عشان اوافق

وبعدين اصحي بقي الاقيني بحلم
هههههههه

انتهي زمن المعجزات ياقمر

تقبلي مروري

Abd Al-Rahman يقول...

السلام عليكم
انا طبعا اتفرجت على الحلقة دى ، وشفت الفيديو أصلا على اليوتيوب ، وفعلا احترمت المهندس ده لأبعد الحدود ، لأنه مصرى اتربى فى جو مليان بمفاهيم غلط ، بس هو قرر انه يطبق المفهوم اللى هو مؤمن انه صح ...
مشكلتنا دايما هى العند ، هو اللى بيكبر الفجوة بين اى اتنين ، لكن انا مؤمن ان الغلط بيبقى على الراجل ، لأن هو المطلوب منه انه يبادر وانه يحتوى الموقف ...
احنا اللى بايدينا نصلح واحنا برضه اللى بايدينا نبوظ ..
**********
زيارة اولى لمدونتك ، واستغربت جدا من عنوان المدونة
" مصرية لكن متغاظة آند مفروسة "
لكن دى معناها انها حاجة غير المعتاد ، المفروض العنوان كان يبقى " مصرية وطبيعى اكون متغاضة ومفروسة "
ههههههههههه
تحياتى

عاشقه الرومانسيه يقول...

لان الانسان مش بيحس بقيمه الجوهره الا لما يفقدها وتبقى فى ايد غيره

عاشقة القمر يقول...

مش عارفه قصة الطلاق ام ياختي قصة دي هو يابقيليد مسلالات تركيا هههههههه
ام ياختي انا دايما بقول هي مراءه هي تكسب زواج لوهي كسبتوا والله هو يحبها واشوف ها احلي احد دنيا
ديه الثقه مش تسألوها كثير لو دي بأدئ طريق الحب مش اهكون فيه الطلاق
طبعا طريق طلاق بيكون صعب شويه طريق الحب اهتخلي الحياه تستمر
في نهاية نقول كل شي قسمه النصيب

عاشقة القمر يقول...

مش عارفه قصة الطلاق دي كثرت في زماننا ياختي قصة دي هو يابقيليد مسلالات تركيا هههههههه
ام ياختي انا دايما بقول هي مراءه هي تكسب زواج لوهي كسبتوا والله هو يحبها واشوف ها احلي احد دنيا
ديه الثقه مش تسألوها كثير لو دي بأدئ طريق الحب مش اهكون فيه الطلاق
طبعا طريق طلاق بيكون صعب شويه طريق الحب اهتخلي الحياه تستمر
في نهاية نقول كل شي قسمه النصيب

Unknown يقول...

اساس اى علاقه مهما كانت هو الاحترام فحتى لو كانت تجمع بين الزوجين علافه حب فهذا غير كافى فلن تستمر العلاقه بدون الاحترام والتفاهم والعقلانيه بين الزوجين
_____________________________________
انتى فيه ايه؟؟بقيتى بتكتبى عن الحب والزواج والطلاق
ايه الموضوع معاكى يا همس يا اختى

أحــوال الهـوي يقول...

المراة تطلب الطلاق من الرجل و اذا نفذ رغبتها تبكي و تندم

اعتقد ان العناد و عدم تحمل الاخر في لحظات ضعفه و غضبه هي سبب كل البلاوي

المهندس صاحب الرومانسيه و اثق من زوجته وان ما حدث كان وليد غضبه او ضعف فاثر السكوت حتي حين ثم عاد و خطب ودها فلم يخسرها و لم يخسر بيته

و لكن اذا عاندت زوجته و ابت الا استمرار الفرقه كنت شفت الوش التاني

الملخص العند يولد الكفر

وهو طريق الطلاق

تحياتي

"النجم القادم" يقول...

قل لن يصيبنا الا ما كتب الله لنا لو مكتوب لنا نحب او نطلق هيكون لنا

Mafrousa يقول...

انا انفرجت على الحلقة ديه على فكرة
بس تصدقى بقا ان الموقف على قد ما هو رومانسي
و لطيف
و طريقة مبتكرة من قبل الزوج فى انه يصالح مراته
إلا انى لاقيتها طريقة مبالغ فيها جداااا
وفيها منظرة
و انا مش بحب كده
اما بقا حكاية الطلاق اللى كترت اليومين دول
انا بلاقى فيها استسهال لانهاء اي خلاف بين الزوجين بدل ما يواجهوا المشاكل اللى بتقابلهم
انا رأي لما اي اتنين يقدموا على خطوة الطلاق
ياخدو هدنه و ينفصلوا عن بعض الاول لمده شهر اتنين و يبعدوا عن بعض خالص
لعل الامور تهدى ما بينهم و يشتاقوا لبعض
و بكده يرجعوا عن فكرة الطلاق
او ان كل منهما يتكيف على العيش بمفرده دون الآخر
و يتم الطلاق بهدوء دون خساير نفسيه
ربنا يعمل الخير للجميع

جنّي يقول...

السلام عليكم

من فترة لم احضر ولكن لي عذري فقد تركت التدوين لمدة تقارب الشهر لظروف عديدة منها المرض ولكن لا ادري السبب في عدم حضورك لمدونتي ..

المهم عن البوست الحالي فلو أدرك كل من الزوج والزوجة ان من المستحيل وجود الزوج او الزوجة المثالية مكتملة المواصفات لنجح الزواج ..
لو ادرك كل منهم ان المركب تسير لو تنازل كل طرف عن بعض متطلباته لنجح الزواج ..
لو تغاضى كل طرف عن ابراز عيوب قرينه وغض عنها الطرف لنجح الزواج ..

والحب ضروري جدا لنجاح الزواج وتحقيق المعادلة الغير موزونة ..

تحيتي
الطلاق اساسه العناد وتمسك كل طرف برأيه والاستماته عليه ..

همس يقول...

هههههههههه

فعلا لازم يحصل كدا

وتوافقى علشان ينوبك ثواب فيه


منورانى يا ديالا

همس يقول...

حلو اوى انك بتؤمن ان الغلط يكون على الراجل


امال ظالمين ديما الستات ليه



وحاضر هفكر فى اسم المدونة الجديد

يمكن نعمل نيو لوك


منورنى يا عبد الرحمن

همس يقول...

فعلا يا عاشقه

وساعتها الندم مش بيفيد


منورانى ديما

همس يقول...

ايه اليؤين الجامدين دول يا طيف

حكم ونبى


يارب يجعل ديما طريقك حب وسعاده

منورانى

همس يقول...

مفيش يا صاصا

الدنيا حر قلت اطرى القعده

وبعدين هو كدا مش عاجبكم وكدا مش عاجبكم

اصوت

منوارنى يا صاصا يا خويا

همس يقول...

والله يا احوال

لو حتى الزوجه معانده وفيها غضب الدنيا

وزوجها عمل كدا

هتنسى كل حاجه

لا هو بيكابر وبيهمل مشاعرها وينفضلها

هيا الرجاله كدا


منورنى يا هوا

همس يقول...

ان شاء الله يكتبلنا الخير

والصبر على اى شئ


منورنى يا نجم

همس يقول...

يا مفروسه

سواء كانت مبالغ فيها او بسيطة

المهم يعملو حاجه

وبعدين الستات بترضى باى كلمة حلوة


ويمكن انتى منهم

انما انا وديالا مثلا

عايزين كدا اصلنا طمعين جداهههههه


وبجد فكرة انهم يبعدو عن بعض دى فكره حلوه جدا

ومن غير ما يكون بنهم اى خلاف وحتى لو علاقتهم كويسه

يبعدو علشان يجددو من نفسهم ويفكرو
ويشتاقو لبعض فعلا


منورانى با مفروسه

همس يقول...

وعليكم السلام ورجمة الله وبركاته

اولا انا الف حمدلله على سلامتك يا جنى

ثانيا انا اسفه جدا لتقصيرى وعدم مجى لمدونتك

بس مش انت لوحدك اللى مقصره معظم المدونات ما بروحها لظروف كتيره من ضمنها النت ما بيدينى فرصه اصلو مزرجن بقالو ازيد من شهر وبيزهقنى
فى التحميل


اكيد مفيش حد كامل بس لو اتنين ممكن يكملو بعض

واكيد الكل فيه عيوب بس لو ركزنا فى المميزات اكتر يمكن هنصلح من العيوب


ولو حد زعلان من التانى فى حاجه

وراح خرج اللى جواه وقالو على كل اللى حاسه والتانى سمعه بهدوء
اكيد هيفهمو بعض بدل العند


وربنا يعد الشطان

منورنى ديما يا جنى

shaimaa samir يقول...

بنختار الطلاق
لانه اسهل من الحب

دايما الهروب اسهل


بخصوص الفيديو


انا محترماه جدا

ربنا يسعدهم يارب

همس يقول...

فعلا يا شيماء الهروب اسهل بكتير


واللى عملوه دا يزدنا احترام ليه


منورانى يا شوشو

Ranim Ayman يقول...

ياااااااااا بخت مرات المهندس ربنا يرزقك بزوج صالح ميزعلكيش أصلا مش يزعلك وبعدان يرضيكيييييييييي بجد ربنا يرزقك بزوج الصالح و الذرية الصالحةةةةةةةةةةة


تحياتيييي مبتسمة دائماااااا