الجمعة، ديسمبر ٢٥، ٢٠٠٩

هنفجرررررررررررررر

امبارح كنت بتفرج على الدكتور عصام حجى اللى هو عالم فى وكالة ناسا

واختصارا للحكايه ان الحكومة طفشتو ودا الطبيعى


بالرغم انه خلانى ابتسم واحس بفخر شوية ان فيه واحد مصرى فى وضعه كدا

الا اننى نزلت على جدور رقبتى لما فوقت من الحلم دا

على واقع انا عايشه فيه

فيه ناس سالتنى مش باينه ليه

وبصراحه كنت بدعى أنى افقد القدره على الكلام واصنج واطرش واتعمى

هتقولولى ليه كدا

اقلكم بعد اخرت صبرى واحلامى ام استك واسع

غير النحس المركز وسوء الحظ

انا قلت طالما انا مش هشتغل فى مجال التربيه الخاصه خلاص مش هشتغل

لا الفتره دى لقيت بابا وماما وكل قريبنا حتى بتاع الانابيب الخلاصه اى حد يعرفنى يقولى اشتغلى

اخرجى من البيت قاعدة البيت وحشه

وماما تقلى دا مستقبلك اقلها البركه فيكم ايه هتتبرو منى ولا ايه ... ابهات ايه وامهات ايه اليومين دول

تقولى يعنى هنعيشلك طول العمر ارد واقولها يبقى البركة فى المعاش هيكفينى الحمد لله

تقلى انتى هتقعديلى لسه لما تتجوزى الحياه صعبه ومش مضمونة يبقى حاجة تضمنى بيها مستقبلك

ارد واقولها هو فيه مستقبل برضو انتى بتصدقى الكلام دا

ثانيا العروسة الصينى ضيعت امل لينا فى الجواز

ثالثا هما الرجاله مخلوقين ليه علشان يشتغلو ويستتونا


وكله من الكلام اللى يحبط اكتر منه يشجع دا ورغم مجهوداتى

فى التلامه والرزاله والتطنيش الا لقيت نفسى مجبره

اند محدوفه حتة حدفه على مدرسه ببيه ..... اه والله مدرسه ببييه

هتقلولى فيه مدرسه ببيه .... اقلوكم اهى دى المدرسه اللى بروحها

يا ساده يا عيال المدرسه جالى فيها بلا فخر وبلا حسد على الخيبه

12 حصه بالاجر .... اسم الله عليا

فى مدرسه عباره عن دور ارضى شبه متهالك الرطوبه واكله دماغة ذات حجرات

عباره عن تلاته متر فى تلاته متر والرائحه السائدة هناك بصرف

النظر عن ريحه العيال اللى تقريبا مش بيستحمو الا القليل منهم

يا جمعتنا تخيلو ريحه المدرسه ببيه مش عايزة اقولكم ريحة بووووووووووووووول بالعربى


اه والله ريحتها تقرف والعيال شغالين طول النهار بووووووووووووول

ما علينا بحال المدرسه الحال اللى يحسر فعلا حال التعليم نفسه

كلنا بنسمع عن حال التعليم نفسه زفت .... انما اللى يشوف الواقع نفسه والله هيحبط وهيشوف الدنيا سودة اوى

انا مش بشوفها سودة عشان اخرتى كدا

لا دا انا بحمد ربنا ان بعرف على الاقل اكتب واقرا ...

وبعدين الحاله المستمره فى اهانه الركن الاساسى الا وهو المدرس نفسه

يعنى مثلا 90% من المدرسين فى المدارس ما بين شغلين بالحصه زى حالاتى كدا وفيهم عقد عادى وفيهم عقد

مميز ودا باه اللى الكل بيعزم انهم هيتثبتووووووووووو

وعلشان تتعاقد مميز لازم تمر بانك تكون على راس العمل اللى هيا مرحله الشغل بالحصه

وبعد كدا تتأهل للمراحل التاليه لاما استحاله تتعاقد لازم يمرمطونا

الحصه بتقف بتنين جنيه العقد العادى ملهوش مميزات وبيقبض 175 جنيه تقريبا العقد المميز 350 جنيه

وليها نفس مميزات المثبت

وممكن المدرس يصرف على الاقل كل يوم من تلاته الى خمسه جنيه مواصلات

وياريت بيركبو مواصله واحده الا ممكن يركبو مواصلتين تلاته

يعنى بيصحو من الفجر غير انهم بيوصلو المدرسه نفسهم تكون اتسدت عن التدريس اصلا

وياريت يكون اللى بيدرس بيدرس فى تخصصه اصلا الا نسبه كبيره جدا بيدرسوا غير تخصصه

واقرب مثال هو انا انا اداب تاريخ وبدرس حاسب الى

ومن هنا ندخل لصلب الموضوع وهو ان الحكومة بنت الكلب اللى كلت ودان اهلينا بانها حكومة زفت الكترونيه

الا انها حكومة تولع بجاز ان شاء الله قولو اميييييييييييييييييييين

المهم المدرسه اللى انا فيها فيها ست فصول ابتدائى من اول لحد سته

وكل فصل ليه حصتين فى الاسبوع حاسب الى

ومن اول اوله لحد رابعه ملهمش كتب دراسيه

ماشى ما علينا ..... المفروض يبقى فيه اجهزة كمبيوتر فى المدرسة على الاقل كل

خمسه على جهاز بلاش عشره بحيث يطبقو اللى بيخدوه او يمشو على مبدا ان فيه حكومة الكترونيه

الا المدرسه فيها جهازين جهاز ملهوش غير شاشه وكيب وفاره وجوز سمعات وملهوش كيسه اصلا

والجهاز التانى محتاج شويه صحه علشان يبطل يهنج ....

عشان حبيت اتفزلك ووديت العيال فى حصه قلت اطبق اللى بيخدوه

اولا هنج منى تلت اربع مرات .... مفيش مقاعد اصلا العيال يقعدو

عليها عشان يادوب مكفيه العيال فى الفصل بالعافيه وفيه اللى بيقعدو فى الدسك

اربعه واصلا اصلا المقاعد معدومة المقاعد يعنى متهالكة

بس يا اخونا دا كلو غير صوتى اتنبح عشان العيال تفهم ولا الهوى الا

واحده شافتنى جالى شلل رعاش قالت تجبر بخاطرى والحمد لله

دا كلو ومطلوب من المدرسين ياخدو دبلوم تربوى ودورة طرقه تدريس ودورة الاى سى دى ال

طرق التدريس الحكومة عملاها ببلاش

انما الدبلومة على ايام ما كنت اخدتها كانت المصاريف تقريب من 350 الى 400 بقت ب 1005 غير الكتب

ومواصلات برضو

يعنى دلوقتى زادت تلت اضعاف .... والدبلومة دى اجبارى على اللى مش واخدين كليه تربيه

انما الاى سى دى ال من 600 الى 700 جنيه غير الوقت والمجهود وتروح الدوره ويطلع على المدرسة


يعنى بيحملو المدرسه مجهود ويبقى مقسم نفسه بين مدرسه ودبلومات ودورات وقرف

غير انه معندهوش انتماء للمهنه عشان مش متعين فعلا وفى اى وقت ممكن يلغو عقده

او ما يتمش تعينه اصلا

اللى فرسنى ان دلوقتى المدارس قايمه على المدرسين دول وفيه عجز فى المدرسين طب ليه مش بيعينوهم

ايه ....انفار سارحين الغيط احنا

هتقولولى طب انا شايفه دا كلو وراضيه وبتروحى برضو

هقلكم هو شبه غصب الكل ضدى ومحسسنى انى متكبره

وانا كارهه اروح اصلا وغير كدا وكدا بطلع همى فى كل المدرسة

من اول المدير اللى بيلاقنى اروح براحتى على الحصه بظبط او قبلها بشوية

لحد العيال اللى الواقعه بيؤكدلى ان استحاله هيفهمو اصلا عشان ماده عملى والعملى مش موجود

غير عدم الفهم اللى بعض منه وراثى والبعض الاخر مكتسب بطبيعه المدرسه والعمليه التعليمية

وشكلو هيستمر ان شاء الله

انا عن نفسى بروح اقعد زى الباشا حتى التحضير بحضرو بالعافيه عشان

مش تخصصى ولا فيه كتب ولا فيه دليل معلم

وبطلت احرق فى دمى ولا ضميرى ينقح ليه

وذلك بطبيعة الجو التلج والرطوبة اللى بيخلى رجليه شبه زرقه فما بالكم العيال

وماما وبابا فضلو يدادو فيا مؤكدين نتيجه لتاريخى السابق فى المهنه

انى هعمل مصيبه وهبطل اروح

وكل يوم بيفوت يبقى عيد بالنسبه ليهم

وبرغم ذلك وعد منى ان المصيبه جيه جيه بس هيا مسألة وقت مش اكتر

عرفتو انا غطسانه فين

غطسانه فى حبة سوااااااااااااااااااااااد ومحبطة جداااااااااااااا

ومش عايزه اتكلم ولا اسمع ولا اتحرك من مكانى اصلا

بس تصدقو وحشتونى جداااااااااااااااااااااااا

دعوتك باه عشان انا فضلى تكه وهنفجر

هناك ٨ تعليقات:

امل يقول...

ربنا معاكى يابنتى
هو انتى اشتغلتى فى كفر البطيخ ولا ايه

بس ليا عندك رجاء
انك تشتغلى مع الولاد فى النظافه والايمان واهمية الجمال
صدقينى هاتاخدى ثواب
وزى مابيقولوا:
الزن على الودان
ولا تفقدى الامل بالله

همس الاحباب يقول...

امممممممممم
هههههههههههه
بالرغم من الماساة اللتى انتى بتحكى عنها
الا انى بضحك جايز من وصفك للمدرسة والاولاد وجايز من منظرك وانتى بتشدى فى شعرك من الاولاد ده على اعتبار انه ما زال هناك شعر
والاحتمال الاكبر ان شر البلية ما يضحك
ربنا معاكى
والحمد لله انك بخير
تحياتى

الميكروباص يقول...

طيب احمدي ربنا على اللي انتي فيه
انا اختي الكبيره كانت بتدرس زمان في مدرسة تجاره
واول تعيينها كان في مدرسه تجاريه بحلوان ومشتركه!!!
ثانوي تجاري ومشتركه
طبعا دي حاجه من المعجزات
وبعد سنين من العذاب جبنا لها واسطه وتم نقلها من التعليم التجاري للتعليم العام
وأصبحت مدرسة كمبيوتر لإعدادي
بتقولي العيال بييجوا المدرسه بأكياس بلاستيك وبشباشب
وطول النهار زعيق وقرف
والآن هي المدرسه الأولى في المدرسه لأن بقالها زمن في الحقل ده
لكن خلاص تعبت وعاوزه ترتاح
وصدقيني كله كده
جميع المؤسسات التعليميه والغير تعليميه فيها نفس الوضع
أوضاع زباله ومفيش حد مستحملها ابدا

أحــوال الهـوي يقول...

حمد الله ع السلامه

اسفرت و انورت
يااااااااااااااااااااه وحشتيني يا شيخه بكلامك و انفجاراتك
و الله انا نفسي اعرف الحكومة شالت ايديها عن الناس و بطلت تعيين و واشتغلت معاهم بمنطق السخرة حيث لا تامينات او معاشات او حقوق و مرتبات شحيحه لا تسمن و لا تغني من جوع

لعن الله هذا النظام و من اجازه و شجع تطبيقه

تحياتي

عاشقة القمر يقول...

بعد الشر عليكي من النفجر والله احسن من من قعدت البيت أنا عايزه نقجر تحملي حتي الله يفرجها والله والله بتدعي ليك حتي بعد اشتغلتي بتدعي ليكي

tarek momen يقول...

اولا حمد لله علي عودتك للتدوين
ثانيا آآآآآمين علي دعوتك علي الحكومة العفنكترونية (كلمة مزدوجة تشمل معفنة و الكترونية في الوقت نفسه)
ثالثا بالعند في الحكومة استمري في التدريس واشرحي 10 دقايق حاسب الي و باقي الحصة تاريخ وعرفي العيال ان بلدهم طلعت احمد عرابي و مصطفي كامل واحمد زويل و فاروق الباز
وبكده يبقي ضحكتي علي الحكومة المعفنة
تحياتي

blue-wave يقول...

لأ وتنفجرى ليه؟؟
هيا دى مصر يا عبله
للأسف.

dodoo يقول...

لو عاوزه رايي اعمليلهم رحله القناطر الخيريه او رشيد وادفيناوخدي معاكي المانجههههههههههههhttp://myblog-dodoo.blogspot.com/