حكومة الكعب العالى

اليومين دول واكلين دماغنا بموضوع هشام طلعت مصطفى

وكل يوم اشوف وشه فى الجرايد ...بس مش عارفه مستغربين ليه

يعنى انه حرض على القتل ولا حتى قتل بنفسه ...

مش هو رجل اعمال وملياردير ... وتبع الحكومه اوى

ليه مستغربين باه؟؟؟؟؟؟

يعنى اكيد اخلاقه من اخلاق الحكومة .... مهيا كل يوم بتقتل

فينا شوية ... حد استغرب ...ابدا ...بيموتو بس ...

اقربها اللى من يومين الناس اللى ماتو فى الدويقه ....

دول اتقتلو والحكومة هيا اللى قتلاهم ... فلما واحد من تبعها

يقتل حد عادى طبعا ...

بس الغريبة ان الراجل اتقبض عليه بسرعه والاجراءات فى الجون

والحكومة بتسهل الموضوع .... متقولوش حاسه بملل فقالت تفلسع

كام نفر وتدور على جديد ...

ولا يمكن مبارك والحكومة ...خايفين تضيع عليهم المنح

اللى الامارات بتبعتها ... من ضمنها منحة حاكم ابوظبى 180مليون

دولار علشان يتبنى بيها وحدات سكنية لاهالى الدويقه

والحكومة الحريمه الشحاته راحت تعمل بيها

مستشفى للكلاب البوليسية

وطبعا المليون طن قمح ...وغير البقششه بتاعة اللاعيبة ...

وما علينا فى دا كل نسمع فى اى مصيبه يطلع حد ويقلك

الرئيس مبارك يتدخل بنفسه فى اى مصيبة ....

يعنى مستنى المصيبة لما تحصل ويدخل ...

بجد بجد فقعتنى يا مبارك

واما بخصوصو تدخله فى موضوع طلعت اللى اعلاناته مليه

التلفزيون ...زى ما بتروج لواحد عظيم ...مش بتروج لقاتل

المهم مبارك قال مفيش حد اعلى من القانون ...هئه هئه

امال حضرتك وابنك وحكومتك وحزبك الواطى عالين ليه

ولا ميكونش لابسين كعب عالى

واحنا ظلمنكم ....

مره يدخل فى الكورة ومره يدخل علشان ست

وتلك هيا من مهام مبارك العظيم

الف بااااء .... غباااااء

أنا نفسي افهم ... إيه المطلوب منى اعمله ...

لما اسمع أن الحكومة جايبة خبراء اسرائلين وجنسيات تانيه في كهربة السد العالي ....

دا عبط ولا ايه ... يعنى بالرغم من تهديدات إسرائيل بضرب السد العالى

بلاش بالرغم من مشروع إسرائيل بأنها تحفر قناه جنب قناه

السويس وتخرب بيت مصر من كل حاجه ومن ضمنها تسويق

الكهرباء اللي هيا احد نتائج مشروع حفر قناه إسرائيل

للدول العربية اللى أكيد هترحب بكدا ...

وال إيه هيسموها قناه السلام .....

وبالرغم أهمية السد العالى اللى هيا تعتبر

من ضمن الأمن القومي طبعا

ألا أن الحكومة ومبارك فاشلة أصلا في حفظ الأمان فيه

ودا ظهر لما كابلات السد العالى اتسرقت ... واتعاملو مع الوضع
بالبلاهه والهطل المعهود فيهم ....

إنما توصل بيهم يسلمو السد العالى للاسرائلين ...

الاكاده ان لسه بستغرب وبسبهل منهم.... علشان الكل هيقلى هيا جيت

عليه هو كمان ....

بقينا بنتكتم ونتخرس ونقول دا الطبيعى .... ومستسلمين خالص

وايييييييييييييزى وعادى جدا ....

يعنى الجزمة اللي فى دماغ أم الحكومة دى .... مش هتدوب

والغباء المستحكم فيهم.... مش هيجى يوم نسمع فيه قد نفذ ...

مش عارفه اسميه غباء ولا ذكاء ....أنهم بايعين وكسبين صح

وتغور الناس بالبلد كلها ...


يا مبااااااااااااااارك ...اللى بيحصل دا اسمه

غبااااااااااااااااء

كل سنه وانتم طيبين

اول شهر رمضان نكون مع بعضنا .... وان شا ء الله ديما مع بعض

لكل المسلمين فى العالم كله
وابوا وامى واختى واخويا الكبير والصغير وزوجة اخويا ومهند باشا اللى هيكون اول رمضان ليه معنا كلنا

لصحابى المدونين ....طبعا حبيبتى قلبى جنه ... وبرنسيسه ...وويفز ... وعاشقه القمر

والاستاذ طارق ...وتامرصلاح ... وحكيم النيل بلدياتى

جنى ...وهشام ...وولد مصرى ...وزهرة المفروسه اللى ربنا يرجعها بالسلامه ....

وصاصا اللى بقالى فتره معرفش حاجه عنه ويارب نطمن عليه قريب ويكون بخير

وعبد الرحمن الصيدلى المطحون الله يكون فى عونه من الطحن ...وخالو احمد ...وانت عارفنى وانا عارفك

والغزالى ...وانا مش سالبى ...

وكوووووووووووووووول المدونين ....

ومعلشى او نسيت اسم مدون .... سماح احنا فى رمضان باه

لكل اصحابى البنانيت .... وربنا يباركلى فيهم ....وما يحرمنى منهم ابدا

لرانيا صحبتى الفلسطنيه ...ولكل اهل فلسطين ...اللى الحمد لله رجعت لاهلها بالسلامه وهتبدا شهر رمضان معاهم

وان شاء الله رمضان الجي فلسطين تبقى حره ....قلو ااااااااااااااامين

وكل واحد فينا ...ربنا راضى عنه ...ويقبل باعماله فى رمضان ... ويحقق كل امنياته ....ويكرهو فى المعاصى ...ويغفرلو ذنوبة

ويهديه للطريق المستقيم....ويبعد عن قلوبنا الكره والحقد ....ويعفو عنا ويرحمنا ....

لمبارك والحكومة ...علشان ان شاء الله هيكون اخر رمضان ليكم .... وباذن الله مش هنشوفك وشكم تانى ...

فان شاء الله جايز ربنا ياخدكم مره واحده ..... فاستعدو لدعواتناااااااااااااا عليكم ....ولازم يكون ليهم نصيب من الدعوات

ومحدش يقول حرام ندعى عليهم ....وندعى ليهم بالهدى ....انا عن نفسى هدعى ربنا يخدهم وارتاح منهم قبل ما رمضان يخلص

قلو اااااااااااااااااااااااامين

لاى شخص زعلانى منى ... ايه في حد بجد زعلان منى ولا ايه ؟؟؟؟؟

طيب طيب لما يخلص رمضان وانا هوريه ....

متخفش هديك عديتك ....

لكل اللى بيدخل المدونة وبينفضلى ومبعلقش .... وربنا يهديه ويعلق بعد كدا ....

واشوفكم كلكم بخير وعلى خير ديما

سلامو عليكم

الا صحيح حد جالو فانوس رمضان ؟؟؟؟

حكومة شحط ...ووزير ......!!!!!!

قرأت النهارده خبر أن المتحف المصري اللي هيشغلو بعد كدا

شركه عالمية اجنبية ....

شوفتو الهنا .... ودا دليل قاطع على فشل بتاع وزارة الثقافه

فاروق حسنى و صاحب الاراء الحقيره والمتخلفة



سواء راية في الحجاب ولا انه بيدادى فى إسرائيل والحوارات

اللى هيا نتيجتها الوحيده انه باين مستوى تفكيره اللي أصلا مينفعش

يبقى وزير ثقافه

واللى متحنط فى الوزاره بقاله اكتر من عشرين سنه

وأخر إنجازاته العبقرية انه يخلى شركة عالمية تشغل المتحف ....

يعنى أنا نفسي افهم حاجه ايه لزمتة لما مش عارف يكون لجنه أو

مجموعه من الناس اللي تدير المتحف

والشلل يطلع دقيقتين ويطس الخبر وال ايه الشركة هتعرض التحف

بشكل حضارى ومميز ...

مميز يعنى إيه ؟؟ هيوقف جنب كل تحفه واحده بمايوة ...

ولا يوقف جنبها واحد يقوم بدور مروحة على اى اجنبى يتفرج عليها

يعنى كل اللى فى وزارة الثقافة مشلول علشان مش عارفين يعرضو

طيب بلاش طالما هما معوقين ميجيبو خبراء لمده معينه كفتره

تدريبية لمصريين .....

ولا نعتبر بيع لتاريخ وأثار بلد بشكل مقنن ....

يعنى بيع على المستغطى ..... والقبض دافى

وبعدين ازاى ناس أجنبية تدير تاريخنا وحضارتنا واحنا

المصريين ممنوعين من دا ....

أنا مش بقول شعارات ...ولا هقول أن كل مصرى

اللي بيروحو المتحف بيحافظو عليه

ولا بيقدروه أو بمعنى اصح أن الناس في العهد المنيل دا

مش فايقه تقول يا حضاره ولا يا تحف .... مش تقليل من قيمتها

لا بس الواقع والجوع واليأس بيخلى الناس تفقد اى إحساس باى

حاجه ليها قيمة ولا اى حلوه

وبعدين إذا كنت أخر مره دخلت المتحف من يجى سنه تقريبا

كانت التذكره باتنين جنيه ... هما مش حاجه ... بس لما تبقى شركة

أجنبية هتمسكها هدفعنا كام ...

وبعدين هتكون كاداره فقط ...بمعنى عماله اجنبيه ( اللي بتكلفنا

مليارات ) ....ولا كاداره ودخل المتحف المادى يدخل جيبها

وتراضى الحكومة باى حاجه ....

ولا هتجيب نفرين تلاته الروس الكبيره وهيخلو العماله المصريه

اللى فى المتحف وبرضو تدكن العائد المادى ....

ولا الحكومة هتاخد نسبة من الفلوس ....

ولا معنى الاداره إيه مش فاهمه فى الحوار دا ....

يعنى خلاص الحكومة علشان هيا فاشله ومنيله بنيله تبيع

كل حاجه فى البلد ....

بدل ما تدرب كوادر وتستغل الشباب فى أن نلحق البلد

من الخراب المستمر اللى فيها .... لا بتعلن للعالم كله فشلها كاداره

تعرفو الحكومة دى عامله زى الشحط وهايف


ومعندهوش استعداد للشغل .... فيفضل يبيع فى أملاكه ....

يعنى الحكومة دى شحط عااااااااااااطل ...

يعنى ملهمش لازمة لا حاكم ولا وزراء ....

من الأخر حكومة شحط ....

ووزير ......!!!!

لنا الدنيا ولهم الاخره ....

اللهى تنحرق الحكومة باللى فيها يجاز .... يعنى مجلس الشورى ينحرق كدا بسهوله

والله العظيم لو شوية ستات بشوية حلل من الترعه اللى فى بلدنا كانو طفوها ....

و يقولو عربيات مطافى بالهبل وطيارات ..... بيطفو فيها يجى ست ساعات

وكأنهم بيتفاخرو بالعدد وكانه بيدل على الإمكانيات بتاعتهم ..... وربنا دا يدل على

أن الحكومة دى يا دوب تدير حضانه رضع .... وكل وزير يمسكلو عيل يرضعوا


يعنى ايه مبنى مهم ويعتبر السلطه التشريعيه فى البلد يتحرق بالمنظر دا وميعرفوش يسيطرو عليه

يعنى خلاص مفيش جهاز انذار ....وكلو ودانا ويقلك

وال ايه حكومة إلكترونيه ..... دى حكومة متخلفه .... دى حكومة جردلية ....

واللى يفقع على الأعداد دى كلها أنى ما شوف فى التلفزيون إلا واحد بخرطوم بيطفى وياريت

بيطفى فى الحريق لا دا بيرش ميه على الدور التانى بعيد عن النار ....

وفيه مسئول كان بيتكلم ويقول أن عساكر المطافى غير مدربين على الإطفاء فى الأوضاع دى

كان هاين عليا أجيب جردل واطسه على دماغه .... وأقلو حضرتك مشلول ...

يعنى إيه.... غير مدربين.... بتطفحو فلوس ونهبين البلد ...علشان تولعو فيها ولا إيه

أمال شغلتهم ايه ....

دا مبنى من تلت ادوار ومش عارفين يطفوه ....

دول حسسونى أنها ولا حريق الغابات .... ويقلك بدأ تحقيق فى أسباب الحريق ....

علينا برضو ... مهيا معروفه محروقه ليه .... علشان تحرق أعمالكم السوده ....

يعنى بلاش نقرررررر على بعض ..... بس ابقو قلو قبضين كام من الحكاية دى

مش هنحقد عليكم ....بس هنشوف هيا الحكايه مستهله ولا لاء....

بالرغم أنكم فى جميع الأحوال وباى تمن كسبانين ....

يعنى ايه كيان دوله مسكاها حكومة محروقه ؟؟؟...ينحرق ...طظ وايه يعنى ....

المهم تنحرق بكام ....

بس اللى بجد مزعلنى اوى ....والدمعه هتفر من عينى ....

هو صفصف ....صفوت الشريف يعنى .... بجد بجد شريف

انه يا عينى عليه كان بيصيف ....وكان هيموت عايز ياخد اللون البرونزى

بس ياعينى ملحقش .... اهو جه لقاها محروقه وسواد

ولما نشوف هيتشال فيها ....ولا هيبلط وتلاقى مبارك يديلو علاوة اهى برضو تنفعو

وخصوصا أننا دخلين على رمضان باه كل سنه وانتم طيبين

ولا يمكن ولع من كتر ما الاسعار ولعت ...

مهيا كل حاجه مولع فى البلد جيت عليه هو ....

فاضل ايه مولعش ولا انحرق فى البلد الا مبارك وحكومتة ....

فلنا الدنيا ولهم الاخر باذن الله ....

مطبات اى اى لتييييييته سوزان ....

العوافى عليكم كلكم .... داخله في الأسبوع ما نفثت عن غيظي اند فرستى .... بس اهو مشاغل

النهارده باه قررت انفث و اديها كلام ....

فبصو باه أنا بنزل المنصورة كتير اليومين دول ... وكل ما اركب تاكسى ....

والاقى فى الراجل بتاع التاكسى ياعينى فى حاجتين فقعينه ..... أول حاجه قانون المرور الجديد

والغرامات والمخالفات اللى هيا اصلا اخترعوها وممكن تكون رزاله من أمين شرطة بيستظرف فى دمه

أصلى بجد بشوف بعيني يعنى مره كنت راكبه قدام فى الميكروباص ... وكان السواق مشغل الكاسيت

ومرين على نقطة تفتيش فأمين الشرطة وقفه ... فالراجل كتر خيره راح موطى صوت الكاست

راح الظريف أمين النيلة الشرطة قلو أنت وطيت الصوت ليه إذا كان أنا وقفتك علشان اسمعوه

كان هاين عليا اقلع اللي في رجلي وأقول للسواق اوعى وشك كدا ... واقوم هبداه فى وش الرزل إياه

بس للأسف مقدرتش مش علشان خوف لاسمح الله ... أبدا ... ولا يمكن تربيتى المحترمة ... برضو لاء

دا علشان كنت لابسه كوتشى فكسلت أفك الرباط ... يلا حصل خير ...

المهم وأنا راكبه مره من المرات مع سواق تاكسى .... ويا عينى عليه مربى لراجل اللى جانبه الرعب

ويقلو شد الحزام هتدفع غرامه خمسين جنيه ... وانا على نياتى أقلو خمسين ليه مش كانت عشره جنيه


قام رايح مطلعلى ورقه مخالفه .... ومدهانى... وقلى يا ابله دى بقت اقل مخالفه بخمسين جنيه ...

ودا كلو عايزة أشوف مكتوب إيه....


أو بمعنى اصح ... صيغة الكلام في الورقة إيه ...؟؟؟

كنت متوقعه مكنوب ... مخالفه ... سواق رزل ... ادفع فلوس يا مخالف ....

بس لقيت حاجه والله ضحكت عليها ... مكتوب فى وسط الورقه ....ورقة تصالح فورية

اومال إيه .... دى حكومة سريعة .... حكومة دمها اللي معدوم أصلا حامى ... مبتشلش حاجه فى نفسها

هيا اهم حاجه تشيل فى جيبها وتشل السواقين يا عينى ....

والله استهيفت اكبر راس فى الحكومة دى لحد أهبل واحد فيها

يعنى إيه بنشترى رضا الحكومة ... ومين أصلا قال معنى اللى واحد يدفع غصب يبقى تصالح أساسا

حتى فى كتابتها رز له ..... حكومة رخمه بصراحة


تانى حاجه ملاحظاها حكاية القراءة للجميع دى .... قصدى القراءة للحياة ...

ومنتشر باه بين السواقين أن تييييييته سوزان مبارك جيه بمناسبه القراءه للأموات .... وإيه

شايلين المطبات ومنضفين الشوارع ... واليوفط بتاع الإعلانات متغيره بالجديد ...

والسوقين طبعا فى دى مبسوطة .... والكل بيقولو عملو خير ظبطو الشوارع

انا باه عايزة افهم ...اشمعنى فى اى زياره ليهم يفضلو ينضفو ويعدلو الشوارع

افتكرت مبارك لما راح يزور مصنع السكر اللى فى الحامول عملولو مطار مخصوص اتكلف ملايين

علشان كام ساعه ...وعادى جداااااااا

إيه خايفين ياخدو مطب فيقلو اى اى .... ولا العظمة مش مستحمله اى مطب ... ما علينا فى دى

اجى باه اللى فارسنى و ونفسى اسالو مباشرتا لتييييييييييته سوزان .... إيه معنى القراءة للحياه

إيه شايفه برضو المشروع دا فشل ...قالو يمكن السبب في الاسم ...نغيرو بدل القراءة للجميع

نكتب القراءة للحياه .... مهو برضو زى ... مشروع تنظيم الاسره... ماعلينا ....ما الحكايه

من الأول للأخر فشل أصلا وكلو هجس ....


يعنى لما هقرا .... هنشبع .... هنشرب .... هنلاقى علاج ...هنلاقى شغل ....هنلاقى عريس هههههه

وال ايه القراءه للحياه .... دى القراءه للشلل .... القراءة للف الطعمية .....

خلاص الناس معتش وراها حاجه إلا القراءة ....هيا لاقيه تاكل علشان تجيب كتب وتقراءها

ولا ليها نفس أصلا تقرا حاجه ... إيه الهبل اللى بيهل علينا بزياده كل ساعة والتانيه دى

وبعدين هتكون كتب ايه اللى هتتقرا ....اكيد مش كتب بتتكلم عن القرف اللي أحنا فيه

ولا نظام حكومة مبارك المتخلفه اللى وكستنا معها ...

وبعدين القراءة دى عايزة ناس تقراء بحريه والحرية مبنيه على كتابه حره ... وللاسف

عندنا أصحاب الفكر والكلمة بيتسجنو ويدفعو غرامه ....

وتلاقى نهبين الميزانية بتاعت البلد فى الحملة الاعلانيه دى .... ويارتها بتيجى بفايده

يعنى خراب من كل حته ... وهجس ....وعالم فايقه جيه تفقعنا بفلوس لموها مننا

يعنى من الأخر ..... بنتفرس بفلوسنا يا ناس

ادعى عليهم بايه .....وهيا جتتهم نحست وفيهم كل العبر .....

ثورة كوره هتشوط الحكومة

أنا فرحانة جداااااااااااااااا علشان ماتش الاهلى متزاعش خالص

بالرغم أنى أهلاوية ... بس يعنى مش علشان ماتش مش هموت ولا هزعل يعنى

أيه يعنى ماتش ما تزاعش ...كارثه ... طظ.... مش هتكون أنيل من المصايب اللي عايشين فيها

هتقلو ...دى المتعه الوحيده للشعب الغلبان دا .... برضو طظ ...

امال فين متعة الزل والغباء اللى عايش بيها وفيها ... والبركه فى الحكومة

يعنى بلدى بتتباع ... حكومة زباله .... حرميه وسرقه ....

مش عارفين ناكل عيش حاف .... ويقلولى ماتش ....

طبيعى اللى يتنازل عن حقو فى الأول .... واللى يتنازل عن كرمته ...

متوقع يحارب علشان ماتش .... أيه الغباء اللى فينا دا ....

بس يمكن مش بعيد على ربنا تكون سبب فى ثوره ... والناس تتفق على حاجه واحده

زى ايام كاس افريقيا دا ... ونلاقى ناس ماليه الشوارع .... تطالب بحقوقها

و الكويت والسعودية والعالم العربى احتفلوا ...


والامارات عملت احتفال للاعيبه ...

كانهم شئ واحد

متفقين فى الهيافة والخيبة .... اتفقو مره يقفو جنب الشعب الفلسطيني

اتفقوا بدل ما يصرفو فلوس على التخلف دا يعملو مركز للأبحاث العلمية


اتفقوا مره على حاجه .... أبدا .... بس هنقول أيه عالم متخلفة أصلا ...


والله يخليكم محدش يجى يقلى دى ترفيه للناس الغلابة واللى مش لايقه تاكل

ردى عليه ... خليك يا لسانى ساكت ...روح الله يسهلك أنا مش ناقصه فرسه


ولا يمكن تكون سبب فى ثوره تغير الكوره وتشوط الحكومة دى بالمره ...