الأحد، يونيو ٠٨، ٢٠٠٨

تحيا النكسه ....

طبعا مر علينا اليومين اللي فاتو بذكرى ( مش اللى كانت بتغنى واتقتلت )

بذكرى الوكسة اللي هيا دلع النكسة

واد ايه ان شعب مصر مر بحاله نفسيه زى الزفت ( يجو يشوفونا احنا )

وان حرب اكتوبر ضيعت الاحساس دا

مين الاهطل اللى قال كدا ....نفسى اعرف

لو صدق فعلا وحسو بالنصر وانه رجعو بلدنا .... يبقى كدب فى كدب

ولو كان فى انتصار .... هيبقى انتصار وقتى ظاهرى .... وليس دائم وجوهرى ...

ايه اللى خدناه من من حروب قامت لاسترجاع ارض النهارده هيا محتله فعليا

عادى سينا متباعه لليهود.... وكأنها التكيه بتاعت اهليهم

اى مدينه سياحيه هناك مليانه يهود بيتعاملو احسن من المصرى صاحب الارض

وغير كدا شغالين خدمين هناك ويقلك دا اسمه سياحه ..... يا خى طظ


مفيش مصرى بيمشى هناك الا بجواز سفر .... كانه مش من البلد .... وغريب عنها

ليه قريبه بتحكى قدامى مره بتقول ابن اخت سلفت اختها ( شوفتو التوه دى )جى من شرم الشيخ ترحيلات

يعنى ايه يا جماعه ....يعنى جى لافف على الاقسام من شرم الشيخ للقاهره لطنطا لكفر الشيخ

ليه يا جماعه ....هو كان رايح يعمل ايه اصلا ....

عنده عربية ملاكى وقال اروح اشتغل بيها فى شرم كاجره يعنى ....وهناك مسكوه ولففه

ليه هو عمل مشكله ..... لا علشان معهوش جواز سفر ....

قصدكم تصريح عمل ....؟؟؟

لالا جواز سفر .....

يا جماعه مش معقوله ..... تلاقيه تصريح بس مخلوط عليكم الموضوع

والله جواز سفر .... ممنوع اى مصرى هناك يمشى الا بجواز سفر وعليه تصريح بدخوله شرم الشيخ

ويا عينى جى كانه لابس تهمه وعملوله كعب داير

يا جماعه هيا شرم الشيخ دى فى مصر....

ولا تقصدو مكان تانى ....

ياستى والله دا حصل .....ولا بنبالغ فيه

يا جماعه انا اعرف انها مليانه يهود والمصرين شغالين ليهم خدامين اى نعم وكلو علشان خاطر السياحه

بس علشان يدخل شرم الشيخ يدخلها بجواز واختام وبدنجان ....لا اكيد تهريج

انتى هتفلقينا ....والله حصل دا كله ....وابقى اسالى ....

ميكونش اتباعت ...ولا احنا مش فى مصر اصلا ....

انا بصراحه معرفش موضوع الجواز الا منهم ..... وماروحتش اصلا شرم .....والحمد لله

يعنى ما نعدش نبص باه على النكسه والزفت

وننسى الوكسه والخيبة اللى احنا فيها دلوقتى ....


وتحيا النكسه ....



هناك ٨ تعليقات:

أنت عارفنى وأنا عارفك يقول...

طب هى سفارة شرم الشيخ عنوانها فين بالظبط والفيزا سهلة ولا معقدة

غير معرف يقول...

كلام جميل


بس مش أحنا الى نحس بنصر أكتوبر


لان الى حابوا دول شهداء عند الله

وازى هتحسى بيهم وأحنا فى ذمن الظلم وعدم الضمير


أما بخصوص شرم الشيخ فدى طبها تعتبر مش تبع مصر


تعتبر بلد اليهود كل الى فيها بيقوا السياحه والدخل لمصر والشعب المصرى مش لاقى ياكل

السياحه مش للشعب السياخه والدخل الى بيتكلموا عليه للناس ال.................................



حسبى الله ونعم الوكيل

السياسى المشهور

Unknown يقول...

معلهش يا همس التعليق اللى فات جيه غلط مش لازم تنشريه
المهم
يا ستى ومن امتى خير بلدنا كان لينا؟؟؟ومن امتى كنا احنا الاسياد فى بلدنا ؟؟؟طول عمرنا خدام ومش فارقه كتير للاحتلال ولا السياح كله واحد ما انتى مدرسه تاريخ وعارفه
جوه وبره خدام واليهود بدل ما يدفعوا دم مقابل سينا دفعوا فلوس يعنى برضه خدوها بس بتمن ارخص وحسبى الله ونعم الوكيل فيك يا حسني
والسلام عليكم يا اختى
وبالنسبه للامتحانات الحمد لله كان كويس
وشكرا على السؤال يا اختى

همس يقول...

معرفش والله يا انتى عارفنى

بس لو عرفت ابقى قلنا

حب استطلاع بس مش اكتر

ومنورنا

همس يقول...

فعلا انا هحس بيها ازاى

ولا بنصر ولالا بدنجان

اذا انا مولوده سنه ما مبارك احتلنا

يعنى احس بالظلم باحتلال

لسه موصلنيش النصر لا اكتوبر

ولا مارس حتى

واهلا بيك

همس يقول...

فعلا ديما نلاقى الرخيص

سواء فى بياعتنا او لما حد يشتري


والحمد لله انك بخير فى الامتحانات

وعليكم السلام ورحمة الله وبركاته

يا خويا

Gannah يقول...

همس
انت زرتى شرم الشيخ
انا زرتها مرة واحدة وحسيت انى مش فى مصر
الاجانب بيعملوا كل اللى فى نفسهم خمرة وعرى وبلاوى ولا حد بيقولهم انتو فين
اما المصريين فبيتعاملوا كانهم مواطنين درجة تانية
هى دى اتفاقية البدنجان وشروطها قصدى السلام
اللى خلت سينا برة مصر الى الان
تحياتى

همس يقول...

لا يا جنه كانت قدامى فرصه انى اروحها بس اصحابى الاندال اتخلو عنى

بس الحمد لله ان ما روحتش

مش ناقصه فاقعه

بس ابقى تعالى عندنا الكفر

مهو كلو شيخ برضو

منورانى يا قمر