الأربعاء، يوليو ٠٢، ٢٠٠٨

اللى عامل الاعلان دا عالم معفنه

في إعلان رخم جدااااااااااا ويغيظ ..... مش عارفه فيه حد لاحظه ولا لاء

أنا عن نفسى ما شوفته ألا مرتين ... يمكن علشان الفتره اللى فاتت ما قعدتش قدام التلفزيون كتير

بس والله شوفتة ....و اتغظت غيظ ...

على العموم أكيد هما عملينوه علشان يستفذو الناس بيه ....دا لو استفذو أصلا ....

الإعلان عن المجلس القومي لحقوق الإنسان فى مصر ... ومنزل أغنيه بتاعت لون وقفا وأبصر أيه ؟

أنا عايزة اعرف مكلفين نفسهم وعاملين إعلان ليه ...؟؟؟

حقوق أيه اللي عاملين حملة توعيه للناس علشانها ....

مهو كلنا عارفين حقنا ... وبنطالب بيه...

بس مين اللي يخلو عندهم دم ويدهولنا فعلا ....؟؟؟

وازى نخده منهم ....

أنا مش فاهمه والله هدفهم أيه من الإعلان دا .....

بيحسنو صورتهم قدمنا ....ولا بيحاولو يقولوا أنهم مش مسؤلين عن حقوقنا اللي ضاعت

علشان أحنا أصلا ما حافظنا عليها ...ولا يمكن مش عايزنها....

ولا يمكن عقلهم قال ليهم دول مش عارفنها ...

طيب ليه موضحوش أيه هيا الحقوق اللي إحنا نطالب بيها لو ما اخدنهاش ....

مايكونوش مكسوفين ....

هنطالب بحق أيه ولا أيه ولا أيه بس ....

بحقنا أننا نختار حاكم صالح يصلح من حال البلد ...

حقنا فى أننا نشيل اى حاكم ظالم ضيع البلد وضيعنا معاها ...

حقنا فى محاكمه اى مسئول في الحكومة في ميدان عام والعقاب يكون قدام الكل ليكون عبره لغيره ....

حقنا فى رغيف عيش ... وشوية هواء من غير هباب ... وشربة ميه من غير فيرسات ولا امرض

حقنا فى مستشفيات نضيفة ...وعلاج فعال ...

حقنا فى تعليم محترم ... يكون فكرى كانسان يخدم البلد ...

وحقنا فى شغل بعد سنين طويل دراسه....

حقنا نكون فخورين ببلدنا .... وما ألاقى حد يسئ ليها

حقنا لما نعبر عن راى ما ألاقى اعتقال ولا سجن ولا موت ...

دى حقوقنا البسيطة ....

أنما الحكومة تعمل إعلان عن المجلس القومي لحقوق الإنسان

وهيا معدومة الحقوق أصلا ... حقها فى حكمنا معدوم اساس وباطل ...

دا يتسمى حول باه

حقوق ايه ....

وناس بتموت علشان رغيف عيش ... يا حكومة يا جعانه

الناس جالها مرض ...ومفيش علاج ليها ... يا حكومة يا مسلولة

والاعتقالات لكل واحد قال عايزين البلد كويسة .... يا حكومة يا ظالمة

أيمن نور اللي اعتقل علشان وقف قدام مبارك ....

ولا دا كلو حصل لما جيت لجنه من من مجلس النواب الامريكى ينتقدوا فيه

تدهور حقوق الإنسان فى مصر ... أيه خافو من سيدهم ليغضب عليهم

متخفوش دى منظر بس اذا كان عليهم دول عايزين يولعو فينا بجاز ...

والحكومة الرخمه ردت عليهم بنفس التمثلية وعملت إعلان ....
نقلكم ايه بس ...بصو احنا مش عايزين حقوق ولا بدنجان عايزين تحلو عنا وعن البلد
علشان نلحق نفسنا ونصلح اى حاجه

ولا هو كلو قرف فى قرف .... فربنا يخدكم ...

قولو اااااااااااامين

هناك ١٥ تعليقًا:

سبهللة يقول...

والله ضحكتينى اوى لما قلتى يا حكومة يا جعانة يا حكومة يا مسلولة

عمرو (مواطن مصرى)0 يقول...

آمين..

tarek momen يقول...

ااااااميييييين يارب

همس يقول...

يارب ديما نشوفك تضحكى ديما


منوره يا سبهلله

همس يقول...

يسمعها منك ربنا يا عمرو

همس يقول...

منورنى يا استاذ طارق

محمد حلمي مخلوف يقول...

لا تحلموا بعالم سعيد
فخلف كل قيصرا يموت
قيصرا جديد
وخلف كل ثائر يموت
احزان بلا جدوي
ودمعة سدي
امل دنقل قصيدة(كلمات سبارتكوس الاخيرة)

همس يقول...

اهلا بيك يا فندم

وشكرا على القصيدة

منورنى

عاشقة القمر يقول...

هههههههههههههههه مش الحكومه مصريه جعانه حتي الحكومه سوداني جعنع مسلوسه كلنا فقدين حقونا بس نقول ايه غير حتي احنا سودااني حقنا فب تعليم مش لقينا الا احد جيب من 85 الي فوق يدخل الجامعه اما جيب كم سبعين الي 84 يدخل خاصه طيب من فلوس شفتي كيف حتي الشغل العاطل كثراين اهو في نهايه نقول امين ياهمس

Unknown يقول...

بلدنا دى ماشيه بالمقلوب وبعدين هو مجلس حقوق الحمير ده فاضيلنا كفايه عليه نادى الزمالك اللى هيرو حيراقب الانتخابات فيه
يعنى هو خلص الرئاسه ومجلس الشعب وبيلف على النوادى
حاجه فعلا تغيظ والله انا فعلا بخاف لاحسن يجيلك الضغط باين عليكى انك هيحصلك حاجه قريب
على فكره انا خلصت ورجعت ببوست جديد

همس يقول...

اهلا يا عاشقه

اذا كان على التعليم كلو منيل

منورنى يا قمر

همس يقول...

لا بجد كتر خيرهم

عاملين مجلس حقوق الانسان

للاندية

ربنا يصبرنى يا صاصا

متخفش انا جامده مش هيجرالى حاجه


وربنا يستر باه

حكيم النيل يقول...

ياستى الحكاية مش اعلان .. فيه احيانا فلوس لازم تنصرف مش مشكلة بقه تنصرف فى ايه لكن لازم تنصرف. انت مش من مصر ولا ايه؟!
يعنى مثلا مرفق الاتصالات عاملين كول سنتر وتليفونات وموظفين ترد على الناس لكن فيه شكوى واحدة اتحقق أو اترد عليها؟!!!
دى أمور لزوم الديكور وخلافه أما حقوق الانسان مالناش دعوة بيها وبلاش نتكلم فى السياسة الله يخليكى.

همس يقول...

خلاص يا احمد

سكتم اهو

بلا سياسة ياخويا بلا بدنجان

انااقدر اكسرلك كلمة

منورنى

كوارث يقول...

تحيا مصر
هيا ده مصر اللي بنحبها
لو كنا بنحبها !