الاثنين، يوليو ٢١، ٢٠٠٨

زقزوق بيكمل زقزقة على ودانا


مبارك بقى مدمن وزراء فاشلين فشل زريع ....وتلاقيه كل ما مدة وزير يخلص

يروح مديه قرار حول لوزارة تانيه ... بالرغم حدوث فشل ومصايب فى كل وزاره ماسكها قبل كدا

زى مثلا بطرس غالى اللي سمعنا عن تقليبو فى فلوس التأمينات وضيع ملايين اللي لحد دلوقت عاجز عن

تدبيرها ومش فالح إلا كل يوم يطلعلنا بأسعار جديدة وضرايب اللى بتقطم الوسط

وكان قبلها فى وزارتين وبرضو مفلحش فيهم .... عادى دى بقت العاده فى أسلوب مبارك لأداره البلد

وبالرغم أن اى دوله فى العالم لما وزير بيفشل فى حاجه بيخلى عند اهلو دم ويخلع بالذوق من المنصب

والكل بتقبل دا بنظره احترام وتقدير ... ومش عيب الواحد يفشل ...

بس من العيب ومن الغباء انه يستمر فى الفشل

ويطلع ويقول أنا مش هستقيل علشان متعودتش الهروب زى الشجيع وزير التعليم فى أزمة الثانوية العامة

لا يا حضرت بلط فيها وكمل خرابها .... وأبقى دلدل رجليك وأنت قاعد فى مارينا بتاعتكم ....

المهم أنا باه سمعت أن وزير الأوقاف زقزوق بيه انه طلع قرار بمنع أمام اى مسجد يقول

حديث الرسول صلى الله عليه وسلم

اللى بيحث على كثره الإنجاب ... علشان النبى هيتباها بينا يوم القيامه اللى بيقول

( تناكحوا ... تناسلوا ...تكاثروا...فأنى مباه بكم الأمم يوم القيامة) صدق الرسول صلى الله عليه وسلم

وقال الشجيع ( اى أمام جامع يقول عندى هذا الكلام أنا حرفده واطرده وامنعه من الصعود إلى المنبر )

أدى الوزير المحترم اللي بيعترض على كلام الرسول .... وأيه أنا معنديش دى .... دا على أساس

أن حضرته متعين على التكية بتاعت بباه....

ودا ليه علشان مبارك وسياسته ومؤتمر السكان

اللى قال أن الزيادة السكانية عقبه فى تنمية البلد ....

دا على أساس أن التمنيه شغاله وعلى ودنها ومفيش خرم ابره فى البلد يكملو فيه تنميه ...

ويا حرام بنفترى عليهم بالخلفه .....

هو أيه دا ... يعنى يغضب الله ورسوله علشان يرضى حاكم

متعشم يحول على اى وزارة تانيه .... ولا بيدادى ويحايل فى مبارك ....

دا نعتبره أيه ... كفر ولا أيه .... وفين الأزهر من الكلام دا .... فالحين بس يتفرجو على فيلم إيران

ويحرموه ... طب ما تتنيلو شوفو اللى بيحرم ويمنع حديث للرسول وهدف حظر الحديث مش مبنى لسمح الله

على عدم صحته فى الأصل ...لا مبنى على إرضاء مبارك ....

ومش بعيد الأزهر تطلع وتقول الحديث غير صحيح ....

دا لو خدت بالها أصلا .... كتر خيرها والله مشغولة بالأفلام ....

أدى الحاكم والحكومة اللى بتحاول بكل السبل تستهبلنا فيها وتبرر وكستها وخبيتها

بأفعال أقذار .... بس الفرق أن الأفعال الأولى فى حقنا كبشر رغم عدم ضياع حقنا عن الله

أنما الأفعال الأقذار فيها فى حق الله ورسوله ( استغفر الله )

وبرضو ساكتين ...وممكن ناس كتيره تقول ما يمنعوا ولا يخرسوا الناس ...

لا هما هيبطلو هجس فى الكلام

ولا الناس هتبطل خلفه .... فنسكت أحسن ... لحد أمته ...

لحد ما يمنعوا القران كمان ....مهيا دى اللي ناقصة فعلا ....

فيالله عليك بهم فأنهم لا يعجزونك

هناك ٢٧ تعليقًا:

Abd-Alrahman يقول...

همس ازيك انا اول تعليق عندك
اية النشاط دة
اية يا بنتي فينك من زمان
انا كنت بعت لك الميل في تعليق خاص
ولكن انتي مش ضفتيه

ع العموم مش موضوعنا
بصي يا ستي
طول عمرنا هنفضل في الزقزقة والبهدلة لحد ما نروح متوجعيش دماغك
الواحد عنده مرارة واحدة

أنت عارفنى وأنا عارفك يقول...

سيبيك من حكاية تناسلوا دى أساسا الشعب المصرى مابيعملش حاجة غير كده والبلد زحمة ومليانة بشر مالهومش ريحة الازمة والناس قربت تمشى فوق بعض من الزحمة. وماتنسيش كمان كثرة كغثاء السيل.

عاشقة القمر يقول...

سلام عليكم همس انا دلووقت مش عندي تعليق لان مستجعل مفيش زمان يارت تفتحي مدونتي عشان فب حاجه ليك

Unknown يقول...

لى الشرف فى أول تعليق ..... أما بالنسبة للى بيقولوا عليه الدكتور زقزوق فدة ما يتقالش فيه الا حسبنا الله ونعم الوكيل ... أما بخصوص فيلم ايران فاللى قالو الاستاذ ابراهيم عيسى مية مية .... وهى اننا فى فترة من الفترات كنا ماسحين الارض بكرامة رئيس من الرؤساء العرب وكان رئيسنا " الرئيس المؤمن" بيقول عليه المجنون وكنا نازلين عليه تريقة .... وماقالوش ان دى حتبوظ العلاقات ولا الكلام الفاضى دة ..... الواضح وضوح الشمس ان احنا بنتلكك..... والسلام ختام.

Unknown يقول...

وبعدين انا مش شايف مانجة ولا ساقعة ولا سخنة

حكيم النيل يقول...

يا ستى المشكلة مش فى زقزوق
المشكلة فى مشروع فاشل بيحاولوا يشيلوه لحد, ولقو اللى يشيله

princess يقول...

هاى:)
يا بنتى قلنا 300مرة بوصوا للجانب المضيىء من الاشياه ههههههههه
بس المرة دى ضلمة اوى :(
دى وزارة الفشل السريع دول بيوصلوا الفشل للمنازل ههه
تحياتى

همس يقول...

الله يسلمك يا عبد الرحمن

معلشى اليومين دول مشغولة

اما بخصوص الايمل انا فعلا ضفتك بس مش عارفه الظاهر فيه حاجه غلط ابقى اكتبه كامل تانى مره

هو انا عاد فيا دماغ ولا مراره

صلى على البنى كدا

همس يقول...

بص يا انت عارفنى

بصرف النظر عن بقينا كوم لحم ولا كوم بدنجان

لا احنا اول دوله فيها ناس بتخلف ولا هنكون الاخر

وبعدين ملهمش لازمة ايه دى اصوت يعنى

كفايه فيهم ناس بتعبد ربنا

ولا دى مش كفايه

منورنى

همس يقول...

ماشى يا عاشقه

اناروحتلك المدونة

همس يقول...

ياعمنا

دى افلام علينا يعنى خلاص كل حاجه منصلح حالها فاضل انهم يسيبو البلد ويتفرجو على افلام

جتهم القرف

ويعدين يا سيدى انا يادوب لسه بجبلك المانجه وجيت ما لقيتك

انت استعجلت اعملك ايه باه

بس بجد منورنى

وانا هفضل شايله المانجه لحد ما تشرفنى مره تانيه

اهلا بيك يا جدع

همس يقول...

فعلا يا احمد

خيبه وبيوزعوها على الناس

منورنى

همس يقول...

يا صحتك يابرنسيسه

300 مره

والجانب ابو لمبه جاز دا انقرض


دى حكومة كلها للفشل السريع


منورانى يا برنسيس

أنت عارفنى وأنا عارفك يقول...

العزيزة همس
كثرة كغثاء السيل ده مش كلام من عندى ده حديث شريف بس أنا مش حافظه بالنص
العبادة مش كفاية ولكن لازم العمل جنبها عشان كل انسان يقدر يكفى احتيجاته
ماحدش قال الناس ماتخلفش بس بالمعقول يعنى مش خمسة ستة وارمى فى الشارع طول النهار وواحد يطلع توربينى والتانى حرامى والتالت بتاع مخدرات وأظن ده هو اللى بيحصل لألاف الأطفال فى مصر
وماتنسيش ان معظم البلاد اللى الحياة فيها كويسة ومرفهة فى الأغلب بتتميز بعدد محدود من السكان
وماتقوليش الصين لأن الصين فيهامئات ملايين الناس المعدمين مقابل نسبة صغيرة هى اللى مستفيدة من النمو والتطور الأقتصادى
وبعد كده أبقى رد عليا براحة اصلى بتخض
أما بالنسبة لموضوع الحلم فكان صعب أوى وكل سنة وأنتى طيبة
وياريت تبقى تعبرينى وتفوتى وانى مستنيك فى المدونة واياك تنسى التعليق
فى بوست جديد يعنى مش هتيجى على الفاضى

همس يقول...

سلامتك من الخضة يا انتى عافنى

بص يا سيدى يارتنا نص الصين من الاخر

اللى بقت زى الملح فى كل حاجه

ولو قارنا بين الحكومة المصريه وحكومة الصين اللى الناس مدمنة شغل لدرجه ان نسبة الانجاب انخفضت دلوقتى الحكومة الصنيه بطالب النا س تخلف


المهم وبعدين احنا عارفين موقف زقزوق ليه اصلا مش مسالة التنمية اللى قرفين اهلينا بيها وهيا مش موجوده اصلا


اما بخصوص التربينى وغيره ... دا من اطفال الشوارع اللى هيا مشكله لوحدها خالص


وبعدين ليه يعتبروها مشكله ميعتبروها طاقه ويستفيدو منها بدل ما على رايك يبقو تربينو ولا غير

وحتى لو فرضنا انهم على حق

حل المشكله مش عن طريق منع حديث

واسلوب وزير يبقى كدا


اما بخصوصو الحلم

انا برضو بقول ان الحلم صعب

وانت طيب وديما اصحاب

وبعدين خد هنا يعنى ايه مش بعبرك
لا طبعا مقدرش

وانا يا صديقى فى الطريق الى مدونتك


منورنى

غير معرف يقول...

حسبى الله ونعم الوكيل


هما بيعملوا مع المسلمين بس كده


اتحدى أى واحد منهم يدخل الكنيسه


ويعرف يعمل فيها حاجه أنما مع المسلمين بيعملوا كتير


لدرجه أنهم بيقفلوا المساجد بعد الصلاه مباشره ويقولوا أن ده تامين



طب تامين ليه مش بيعملوا مع الكنائس كده


وفى حاجات بلاوى بيعملواها


حسبى الله ونعم الوكيل

تحباتى ؟؟؟؟؟؟؟؟؟؟؟؟؟
رئيس مصر القادم

همس يقول...

بص بصراحه فعلا سمعت ان المساجد بتتقفل

وتبريرهم متخلف زيهم



اهلا بيك يا غير معروف

Mafrousa يقول...

واضح انك متنرفزه على الآخر
يمكن انا اول مرة اجي ازورك مش عارفه...يمكن؟
على العموم.....انا حتكلم كده مش بالترتيب
الخطبة و احاديث الرسول
انا حسألك سؤال...انتي شايقه انه مع الغلاء الفظيع و افتقاد الى الاخلاق...اجيب عيال اكتر...ولا اجيب واحد ولا اتنين علشان اعرف اوكلهم و البسهم و اربيهم احسن تربيه؟؟؟
و بعدين الرسول قال سنتى مش احاديثي
و السنه هيه ما رأته العين المجرده
لأنك لو شوفتي حاجه حترسخ فى راسك
اما الاحاديث
انتى معايا انه فيه كتير منها مش صحيح...او ضعيف.....ولو رحتي لأغلب الآحاديث حتلاقيها..متقاله من فلان عن فلان عن فلان ...و بعدين الرسول عليه افضل الصلاه و السلام

انا بحاول اني اري احاديث الرسول من منظور اليوم...مش من منظور زمااان
الدنيا بتتغير
انا ليا قلسفتي الخاصه ...
ممكن كلامي مش يعجبك...بس ممكن برضه تشغلي تفكيرك فيه شوية


بالنسبة للوزراء...انا مش بدافع عن حد
بس كل اللي اقدر اقوله ربنا يتولانا برحمته

تحيلتي يا اجمل همس

tarek momen يقول...

يابنتي في حد ياخد كلام الوزراء جد
ده حتي الوزراء احباب الله و ماحدش بيدق علي كلامهم
وعلي رأي المثل
الوزراء في نعيم
طبعا طول ما هم وزراء
واول ما يسيبوا الوزارة ده طبعا في الحالات الأستثنائية فجاة تلاقيهم عاقلين و بيتكلموا كلام موزون و معقول

bastokka طهقانة يقول...

لا لا لا ملكيش حق يا همسيسو
الشوارع رايقة و المواصلات سهلة و الثانوية العامة بيوصلوها للمنازل ديليفري و الشقق على قفا مين يشيل و الفلوس بتتوزع على الشعب بالهبل

بس مش في بلادنا

سامحني يا رب
قوليلي بقى اجيب لك في السجن اية؟ سيمون فيميه و لا ساليزون؟

اوروفوار

الميكروباص يقول...

المناصب هنا في مصر لا علاقة لها بالدين ولكن علاقتها الاولى بالسياسه- ولا يتدخلون في امور الدين الا لو حدثت كارثه أو في حالة التصدي لفتوى هتعمل مشاكل كبيره داخل البلد- باستثناء هذا الكل يحافظ على منصبه عن طريق ارضاء الباشا الكبير وترديد الكلام الذي يريده ويمليه عليه اللي بيدفعوا لنا المعونه ولازم طبعا ننفذ كلامهم لأننا بنمد ايدنا لهم سنويا
الموضوع معقد أوي وشرحه يطول
لكن مفيش حاجه هاتتغير

همس يقول...

اهلا يا واحده مفروسة

هيا تقريبا انها اول مره تشرفينى

منورانى طبعا


انما نيجى باه رايك

انا معاكى طبعا ان مفيش حد اصلا لاقى يجوز علشان يخلف ولو خلف يادوب عيل ولا اتنين علشان يعرف ياكلهم حتى لو قلنا ان فى شريحه بتخلف علشان تدخلهم دخل حتى ولو بسيط

ثانيا انامعاكى ان فيه احاديث صحيح وفي منها الضعيف وفى منها الغير صحيح

ودا مش مسؤليه زقزوق ولا احنا دا مسؤلية علماء الازهر والدين اللى يبينو لينا

ثالثا المساله هنا مش مساله هو الحديث صحيح ولا لاء المساله انهم بيبررو لنفسهم
خبتهم السوده حتى لو وصلو انهم يمنعو حديث ولا يخرسو الناس حتى

رابعا ودا الاهم ....

يعنى ايه الرسول قال سنتى ومش احاديثى ...هيا السنه جيه منين ...على حسب معلوماتى

انها جيه من الاحاديث طبعا .... لاما تصححيلى هيا جيه منين

ومش فاهمه يعنى ايه لازم السنه هيا لازم تشوفها العين


بصراحه مش واخده بالى

وممكن تصححى ليا فهمى لو انا غلطانه

اللى وصلنى من كلامك فى النقطه دى حاجتين

لاما ارجع بالة الزمن لورا واروح زمن الرسول عليه افضل الصلاه والسلام واشوف

هو هو بيعمل ايه علشان اقتنع بيه

واطبقو فى زمنا دا


لاما ما اخدش باى حديث للرسول سواء باه صحيح ولا ضعيف ولا خطا

طالما ماشوفتش بعينى

ودا يخلينى مش بؤمن باى سنه للرسول ....

وبعدين مش معنى انها منقوله عن فلان الفلانى انها تكون غلط لان معظم اللى نقلنها كانوا

من الصحابه رضى الله عنهم ومن اتباعهم ...

ويا عزيزتى القران والسنه .... دين الماضى والحاضر والمستقبل ....

واظن لاانا ولا حضرتك نقدر نفسر القران او حديث من الاحاديث التفسير

الصح واليقينى ودا لان مش دراستى اناعلى الاقل ...

وممكن يكون فيه كلام للرسول عليه افضل الصلاه والسلام يتفسر على حسب الاهواء ...

ويبقى ليه اكتر من تفسير ... دا لو خدو بالمعنى الظاهر ....

يعنى هو دين زمااااااااااااااااان واليوم برضو وبكره .... واظن دا الف باء الاسلام


وبصراحهبرضو انا مش فاهمه يعنى اهي الدنيا بتتغير ...

غلطينى لو كلامى غلط هو السنه اللى هيا جزء من الاسلام

كانت نازل لفتره وبس ... يعنى على ايام الرسول بس ... يعنى مهوش مواكب العصر واللى احنا فيه ....


اما من ناحيه التفكير .... انا بحاول جاهده انى بفكر والله بس تصدقى انى كرهت التفكير حتى فى اللى بشوفو


وعلى رايك بالنسبه للزفت الوزراء ... ربنا يرحمنا منهم باه


حضروك شرفنى ... واتمنى اشوفك ديما

همس يقول...

ههههههههههههههههه

حلوه اوى الوزراء فى نعيم

اه منك يا استاذ طارق

ديما كلامك متغطى وماشى فى السليم

منورنى ياااااااا باشا

همس يقول...

يااهلا يا اهلا

ايه النور دا يا طهقانه


انا برضو شايفه كدا


وايه البشرى الجميله دى

سجن مره واحده ....

وكمان هتكلفى نفسك وهتجبيلى دوا

هههههههههههههههههههه


بصى انا ديما بقلهم سندوتشات جبنه وشاى بحليب


منورانى ياريت اشوفك دايما

همس يقول...

ايه التفاؤل دا كلو يا لورنس

طب جاملنا وقول هتتغير

ان شاء هتتغير ان قرب او طال التغير دا


وبعدين لو تدخلو فى الدين دا لسبب واحد بس الاوهو انه يخدمهم ويساعد على تسلطهم وكدبهم


دى كل الحكايه

ومنورنى

حكيم النيل يقول...

فعلا يا همس انا باتفق مع "انت عارفنى" لكن دا ما يمنعش ان مشروع تنظيم الاسرة فى مصر مشروع اهبل ومجرد باب للسرقة .

همس يقول...

ومالو اتفق

انا عندى حريه الاتفاقيات

اما بخصوص تنظيم الاسره دا شئ اكيد

والدليل ان الحكومة اقرت بفشلها

وقررت تجرب باه تجيب بملايين وسائل للرجاله علشان الخلفه واكديت انها غلطة لما اهتمة بتوعيه المراه دون الاهتمام بالرجل


حكومة هبله

منورنى يا احمد ديما