بصو باه انا قررت اكتب برضو فى التبيخ اللى هو دلع (طبيخ) اهو تغير... يلا نبدا .....
النهارده اتغديت حاجه لو شوفتها وهيا بتتعمل بتقرف اكولها ....ولو اكلتها اتقرف بعد الاكل ....يعنى اكله مقرف وخلاص .... انا والله كت ما باكلها او بمعنى اصح بطلت اكولها ... وبس النهاردة غظت فى نفسى واكلتها ...
تعرفوا هيا ايه .....؟؟؟؟؟؟؟
طبعا الفسيييييييييييييييييخ....!!!!!!!!
هو بورى معفن ....بس ليه تااااااااريخ من ايام الفراعنة .... مش عارفه هما كانو بيعملو حضارة ولا فاضين
يعفنوا السمك ...ولا ايه ...؟
المهم بالرغم من كدا مقدرش اغلط فى عفانه بقالها سبعتلاف سنه ...
انا انصحكم للى يحب يطافس زى كدا ...وعايز ياكلوه ... يشتريه جاهز ...وياكله وبعد كدا يا خد دوش ويفضل بالجاز ....
او يضطر يتعذب ويشوفه وهو بيتعمل ....ويتعذب تانى مره وهو بياكله...
وعلشان القرف يكمل هقلكم كدا كدا الطريقة .....لالا ...مفيش حاجه اسمها مبلاش دى ...
هتتقرفو يعنى هتتقرفو .....يعنى بزمتكم اتقرف لوحدى .....
المهم لو انت جايبة من محل مهما كان محترم ومتسرمك ...وسرميكه ملونة حته ...وال ايه تديك احساس بالنضافه
انسى صاحب المحل بيجيب السمك البورى ...ويروح رميه على اى سطح فى الشمس لحد ما يعفن وبعدين
يجيب برميل كبير بلون الازرق( ال ايه بيدى للسمك احساس انه عايش لسه فى البحر)...
وحبة ملح على حبة شطه حمرة ويسبها تقريبا عشره ايام تعيش وتكمل عفانه مع نفسها ...وممكن تزيد المده ودا على حسن جودة العفانه ....
اما لو عملنا فيها نضاف وولاد ناس ...وعملناه فى البيت ...دا يتطلب منك برضو تسبيه يعفن يوم وتقومى غسلاه بميه دافيه كام مره ....وطسى فيهم حبة ملح وشطه ولمون ونقطتين زيت ( بقيمة اتنين جنيه ) وانصحك علشان الزين غالى ...وكدا كدا هو معفن ...بلاش منه احسن بلا وجع الب ....
وبرضو تسبيه كام يوم لحين اتمام عفنه ...قصدى نضجة ...
وجيبة وافتحى بطنه وشيلى العفانه الظاهره دى ...وهاتى لمون كتير اهو بنحاول نموت اكبر قدر من الجراثيم
وكام راس بصل ...علشان يديكم مناعه ....تحوشو كام رغيف عيش قبلها بسنه ....هيا اكله جامده ومحتاجة عيش بلدنا .... لتكتمل التضحيه الكبيرة وتاكله ...بالهنا...
وبعدها اقعدو مع نفسكم وافضلو اقرفو فيها.... وحاولو تقومو الاول قبل الناس اللى بتاكل معاكم علشان تقرفوهم وهما بياكلو ... امال هنطلع قرفنا فى مين ...؟؟؟ مش كدا ولا ايه ؟؟
ملحوظه : ممكن تحصل حالات تسمم متخفوش ...دى اعراض جانبيه بسيطة جدااااااا...
اهم حاجه شوفو باكو النعناع اللى بيجى فى الاعلان بيطير هدوم الناس دا بكام ...وجبوه وكلوه ...
وبجنيه لبان بنكهت القرفه على نعناع ...كدا يعنى ... بحاول اخليكم تنسو القرف والعفانه دى ...
يلا باه ...النهارده كان يوم العفانه العالمى ...
كانت معكم ...
همس ...من قدام حوض بعد غسل ايديها ....
هناك ٣ تعليقات:
انا اعرف واحده اكلته فى شم النسيم فى نفس اليوم كانت بتشم نسيم فى المستشفى وغسيل معده وشويه حاجات ايه جميله
ياساتر الله اكبر
ايه يابنى انت جى تنق عليا
وبعدين انا خلاص بطلت علشان خاطرك ياعم
ايه الحاجات الجامده المقرفه دى
انا مش عارف المصريين
بيحبوا الحاجات دى ازاى
لا وكل شم نسيم تمشى فى الشارع
الكل بيبقى ارفان من كله
والشارع بيبقى حكايه
وساعات العفانه بتزيد شويه
فبيجى تسمم على الماشى
الحقيقه واضح ان الناس عفنت
من كتر العفانه اللى بيكلوها
إرسال تعليق