الاثنين، مايو ١٩، ٢٠٠٨

هتعمل أيه بعد سنه2011 وحسنى لسه موجود ؟؟؟؟

فاضل تلت سنين على ما تيجى انتخابات الرئاسة بتاعة مصر ....

حسه أنها ميت سنه .....ياتري هنستحمل التلت سنين دول ....

هنفضل فى القرف لحد 2011 ازاااااااااااااااااااااااااااى

دلوقتى اى حد بيتفرج على التلفزيون أو النت او يبص لحاله او حتى بيسمع كلام الناس الغلابة

ماعاد الكلام بنهم يدل على اى أمل ولا مستقبل .....

الكلام الاساسى اللي بقى فى حياتنا دلوقتى كارثة ....مصيبة

مجاعة ....انهيار اقتصادي ..... أمراض...مفيش موارد ....أصول البلد اتباعت

مفيش انتاج .... احتكار ....

إضراب واعتصامات ....

رفض الفلاحين لزراعة القطن الا 100 الف فى حين ان من المقرر زراعة فوق 300 الف فدان
وزرع بدل منها لب ....

استمرار تساقط القتلى فى طوابير العيش .... وفشل جميع الحلول اللي قرفونا بيها

زيادة أسعار فى المواد الغذائيه بنسبه 10% للمره المليون ونقصها ....

قتل ...اغتصاب ....رشاوى ....قروض مهربه ...

تلوث فى الهوا والميه والناس نفسهم ....

صرف 30 مليون دولار علشان منتدى اقتصادي فى شرم الشيخ وفيه ناس بتاكل زباله ...

تعين أجانب فى مصر بمليارات في حين أن مصر كلها شبابها لاما عاطل
لما اللي بيشتغل مرتبه ما بيكمل أسبوع من الشهر

مش لاقيه اى خبر متصل ببعضه بس كل خبر

بسببه حكومة فاشله ... بتضم فوق 30 وزير ملهمش لازم أصلا ألا أنهم يخدو فلوس وينهبو البلد ويخربوها

فى حين ان امريكا نفسها فيها تقريبا 18 وزير ومسكه العالم كله ....

والنتيجه احنا اللى متنيلين .....


وياترى فعلا هنستحمل ....وحتى لو استحملنا وصبرنا هنقدر نختار رئيس لينا بجد
يطلعنا من المجاعة والدمار اللى بقينا فيه


ولا هنلاقى برضو حسنى قاعدلنا ..... ولا ميكونش السبب فى المصايب دى ....

أمال مين بس ...من 27 سنه وكل يوم أنيل من اللي قبله ...

طيب أنا نفسي افهم كل اللي بيحصلنا دا من دلوقتى لحد سنه 2011 ياترى حسنى
بيفكر يعمل أيه اكتر ما عمله ؟؟؟

هو فيه حاجه متعملتش لسه علشان يخرب البلد ....

بجد والله العظيم عايزة اعرف فاضل أيه فى البلد عدل .....


فإحنا هنستنا كمان سنتين تلاته فى انهيار ودمار .....



طب لو صحينا من النوم سنه 2011 بعد الانتخابات بتاعة الرئاسة ....ولقيت حسنى ولا ابنه جمال رئيس

ههههههههههههه معلشى أصلى نسيت نفسى وبقول انتخابات .....

ولا جايز نلاقى فعلا انتخابات .....بس ساعتها الناس هتكون انقرضت ....
اللي مات من الجوع واللي مات من الفقعه ...

بس بجد هتعملو أيه ساعتها ....؟

بس محدش يقولى هنتحر ....... الانتحار حراااااااااااااااام

هناك ٦ تعليقات:

Unknown يقول...

العيب مش فى حسنى العيب فينا احنا الشعب اللى ساكت فوق ال26 سنه كان لازم نصرخ من بدرى بس احنا لسه فيها وانا ناوى لو جمال مسكها او ابوه اعتقد انى ممكن اعمل اى حاجه صح او غلط ،دانا عندى 17 سنه وبفكر كتير اوى فى البلد دى وبوصل للنتيجه واحده ان البلد دى مش هتنضف الا بالدم!!!انا عارف انها حاجه غلط وناس كتير ناقشونى فى الموضوع ده مع ان انا مش مستريحلوا لانه ضد طبيعتى بس ده الحل الوحيد،ساعات كتير بيتهيألى كده والله
ولما الناس تقولى حرام دول مسلمين بسألهم و اسأل هو مش استباحوا دمنا و العشرات مننا بيموتوا فى الاقسام او المظاهرات او طوابير العيش حتى المستشفيات يبقى نستنى ليه؟؟
هما مش استباحوا اعراضنا والدليل على كده حالات الاغتصاب اللى حدثت للصحفيات اثناءانتخابات الر ئاسه وحالات التحرش الجنسى الكتيرررر اوى للنساء والرجال يبقى نستنى ايه؟؟
هما مش استباحوا بيوتنا ؟؟اى حد يخش بيتك يعمل اى حاجه فى اى وقت وسلملى على زوار الفجر ده غير ان لو جالك زوار الفجر(امن الدوله)مفيش مليم بيفضل فى بيتك ولا دهب ولا اى حاجه يبقى نستنى ايه ؟؟؟
ده غير انهم بيحاولوا يسرقوا ديننا !!لما تلاقى على باب كل جامع بوكس...لما يقبوضوا على الشاب اللى بيصلى ويسيبوا اللى بيشرب مخدرات نعمل احنا ايه؟؟لما يقبضوا على اللى بيخش الجامع ويقفلوا القنوات الدينيه على الدش (الكويس والوحش)والوعى الدينى غايب عن مدارسنا اساسا يبقى دينا ينقرض ؟؟
ده اسئله بتجول فى خاطرى كتير ويا ريت حد يلاقى جواب ليهم
وبمناسبه مبارك عاوز يعمل فينا ايه القطى النكته
مبارك بيكلم الشيطان:انا مش عارف يا ابليس يا اخويا اعمل ايه فى الشعب المصرى ده عاوز فكرة جديده تبهدلهم
الشيطان:انا عندى حته فكره ..هات ودنك..............
مبارك:ايه دا يا شوشو ؟؟دى حاجه سهله خالص انا عاوز حاجه صعبه
شوشو:طب هات ودنك والقط الفكره دى........
مبارك: انت شكلك شيطان تايونى!!ايه يا عم الحاجات البسيطه دى؟؟طب هات ودنك انت بقى..........
شوشو:!!!!!!!!لا..لا يا مبارك يا اخويا حرام عليك
ههههههه
هم يبكى.......طولت عليك بس انت اللى فتحت الموضوع
سلام

ولد مصري يقول...

هعمل كوباية شاي بنعناع واشربها وهقعد أضحك لأني هفتكر إن حرقة الدم والفرسة اللي انتي فيها دي دلوقتي طلعت على فشوش

معلش تعيشي وتاخدي غيرها

أشوفك في 2011 ان شاء الله

همس يقول...

بص انا هرد بموضوع

بس الظاهر بين مبارك والشيطان عمار جاااااااامد

وخد راحتك فى الكلام اوى

وربنا يوفئك فى الامتحانات

همس يقول...

حلو اوى

انا هعمل شاى بحليب


وهدعى ان افضل على اد الفرسه بس

وما تزيد عن كدا



ونتقابل سنه 2011 على خير

Gannah يقول...

همس 3 سنين مش فترة قصيرة و ربنا بيغير الحال فى ثوانى و لازم يبقى عندنا ولو بصيص من الامل و نبتدى بنفسنا وساعتها ولا مبارك ولا ابنه هيقدروا يحكموا شعب بيتقى الله و هيرحلوا من غير دم ولا حاجة يا ساسا سامعنى...من غير دم

انا مش هعمل زى مصرى بس ساعتها لو عزم عليا بكباية شاى بالنعناع مش هقدر اقوله لا منا برضه محتاجة اهدى اعصابى مش معقولة نعيش علطول مفروسين
تحياتى

همس يقول...

يانوحى الامل فى ربنا

ويااااااارب ينجينا من اللى احنا فيه

وبعدين دا احنا هنعملك شاى وشاى بحليب وعصير لمون


وسلمتك من حرق الدم