وعرفت العيال فاتحين بؤهم ليه ....

أنا قررت أن أبطل حرق دم النهارده واخلي يوم الخميس أجازة من الضغط والسكر

وكنت قرأت عند الولد المصري موضوع عن الغش فى الامتحانات وفكرنا بأيام حلوه والله

بصو أنا مش هقول عمرى ما غشيت .... بس والله مش أوى....

يعنى مثلا لو قلت موقف غش كدا من أيام الثانوية العامة وكانت اللي بتراقب عليا واحده من معرفنا فى امتحان علم النفس تقريبا

وتقلى شوفى زميلتك ابص فى الورقة واقلها ما أنا مش عارفه أخد منها أيه أصلا ...لما يئست منى ...خلتني انزل الحمام علشان اطلع بنفسي من الكتاب

وعلشان أصلا مش عارفه أنا عايزة أيه ....؟ ولا هنزل ليه روحت كتبت كام كلمه على رقم الجلوس من كل سؤال علشان أدور عليه فى الكتاب ...

بس مش علشان أنا مش عارفه أيه اللي جى فى الامتحان أصلا .....لا أبدا علشان حاسة أن اللي عارفاه حليته وخلاص ....

بس تتخيلوا كانت الكتابه على أيه ...؟ ايوا ....ايوا....على رقم الجلوس ......

الهم نزلت وابص فى الكتاب ومش عارفه أخد منه أيه أصلا ...حاسه انى حليت كويس ...هو يعنى لازم الدرجة النهائية ...أنا واحده قنوعة ومتواضعة جدا

المهم علشان الحمامات كانت جميله وطراوه وغايه فى النظافه ( أنا بكدب هنا ) ما غبتش وطلعت تانى اللجنه ....

فقربتى باه تقلى يلا راجعي كدا وظبطى نفسك .....

فلقيت موس تحت المقعد ..... فاخدته وبتسلى بيه ...وكانت تحت ايدى ورقه الاجابه ....فراحت ايدى نزله بالموس قسمت ورقت الاجابه نصين

ياحلولى يا حلولى ....شوفو باه ...ثانويه عامة ويحصل كدا .....راحت اللجنه أتقلبت ....وكان هيتعملى محضر غش ال أيه عملت كدا علشان اعلم ورقة اجابتى

وتبقى مميزه يعنى ....علشان بعد كدا يتحطلى ارقام كبيرة ....على اساس ليا واسطه فى كنترول ولا حاجه .....

والموضوع قلب غم ....والحمد لله قربتى دى فهمت وحاولت تقول انى كنت متوتره علشان الامتحان وكدا

وجه واحد وعمل محضر ( قريبى برضو ) وقالو انه غصب عنى نتيجة لضغط الامتحانات والتوتر ....ولو كانت الحكايه طولت كنت طلعت على مستشفى العباسية

دا كلو وقربتى دى مديانى دور تهزيق وأنا مش مستوعبه اللي بيحصل ......ومتنحه وفى حاله من الاسبهلال .....


*---------------------------*

برضو موقف حصل فى ماده الإحصاء وأنا صعب أوى أحفظ وخااااااااااااااااصه الأرقام والقوانين ....

فيوم الامتحان قلت انقل القوانين على الدرج لأنسى حاجه

يادوب الامتحان بدا ....وكان طبعا عدد بسيط مش كل اللجنة علشان فيه ناس مش مختاره الإحصاء ...

فقام المراقب كتر خيره نقلنى فى مقعد بعيد

اشمعنى أنا ما كان ينقل البت اللي ورايا ......هنقول أيه ....حظ مهبب ......

*--------------------*

أما بخصوص الكلية أنا كنت فى قسم تاريخ ....وبالرغم أن كله تواريخ وأرقام

ألا عمرى ما كتبت تاريخ يوحد ربنا فى اى امتحان

كنت أذاكره على انه قصه وادخل الامتحان اكتب القصص بتاعتى ...واخلص قبل نص الوقت ...

ولاقى الناس ترص كلام

هيخترعوا حاجه فى التاريخ .....ولا اكتشفوا حاجه وأنا معرفش .....ما علينا....

واللى بيسال واحد عن الاجابه ....هيقلو أيه هيحكيلو معارك وقصص .....أنت أهبل يابنى .....

*-----------*


تعالوا باه فى الدبلوم التربوي اللي عملته .... كانت كل المواد تربيوية وكلها علم نفس وحفظ باه .....


هبقى احكى مواقف حصلت فيه بس اللي يهمنا دلوقتى موقف الغش ......


مره دخلت المدرج علشان الامتحان لقيت الكل متسلم البينج .....وهاتك يا كتابه ....


فتغظت أوى فالمراقب كان واقف بعيد وأنا فاشلة حتى فى الغش ...

روحت ناديه عليه وقلتلو لو سمحت العيال اللي وره دول بيكتبو على البنج ....ميصحش كدا

راح مزعقلهم ....وابصلهم وهما يستحلفولى .....ويدعو عليا ....وفات الامتحان دا


الامتحان اللي بعده ....كان ماده فقر أوى .....ودكتورها صعب أوى ( حتى من كتر دعوات العيال عليه مات

بالكنسر ...بس والله زعلت عليه طبعا قضاء ربنا انا بهرج )

المهم كان كل سؤال هيجى فى المادة دى و الاجابه عبارة عن فصل من الكتاب ويجى 30 نقطه غير الشرح اللي تحت كل نقطه اصلا ....

فرحت قايله أيه ....؟ انتى بتنسى يا فالحة ما ادخل مع العيال دول انقل جزء على البينج بدل ما أضيع والراجل

بتاع المادة دى صعب ...


فدخلت ورحت قاعده وبدأت اكتب وبدل ما اكتب جزء كتبت كلو .....أيه الهنا دا ....

واهم حاجه وانا قاعده اى حد يعدى عليا يبصلى ويضحك ويمشى .... طبعا ما ركزتش


وقولت يلا يابت اطلعي بره راجعي على الشرح ....خلى ربنا يكرمك كدا....

وجه ميعاد اللجنه ودخلت وأنا فى غاية من الانشكاح ....واقعد فى البينج وأدور على اللي كتبته .....

وما القيش ....يانهار اسود ....


مستقبلى ....ضعت .....تتخيلوا أيه اللي حصل .....؟؟؟؟؟

من الخيبة وضمير السيئ ....مش علشان لسه هغش ....لا علشان فضحت العيال المره اللى فاتت ....

طلع كل اللي كتبته .....كتبته فى البينج اللي قدام مكان امتحاني أصلا ..... أصل كنت تانى بينج وأنا بسلامتي كتبت الكلام فى أول بينج

وأنا باه روحت قلت للبت اللي كانت قدامى سنتك سوده .....انتى هضيعى مستقبلى ...اياكى تحطي و تدارى الكلام وتعملي فيها ذكيه ....

وألا والله مهتعرفى تروحي بتكم ....(بلدهم بعد بلدنا فكانت لازم هتعدى على بلدنا الأول )


واتحلفلها انك مش هتروحى بتكم ...ولو هتروحى هتروحى متشرحه ....المستقبل كدا كدا ضاااااااع




أما العيال شافونى ....وبيضحكو ....ومحدش راضى يقلى دا مش مكانك ....جزاء أنى فتنت عليهم .....


أنا باه فهمت العيال كانوا فاتحين بؤهم ليه ....مش فارحنين بسنانهم ... دا بيضحكو عليا .....

ااااااااااااه ياااااااااااااااااااانى

عاااااااااااااااااااااا عااااااااااااااااااااااااااا