الأحد، مايو ٢٥، ٢٠٠٨

اظن ان فيه حاجه مش مظبوطة ....

أنا حاسة ....لالا بل أكيد أن الحكومة بتساعد على احتلال مصر بس بمزاجها .....

حاجات بتحصل واستحالة تكون طبيعيه ...أو صدفه ....أو حتى سياسة وعلاقات دوليه وزفتيه ....

هيا قد تكون مش هقول بسيطة أو اقلل من شانها ...بس ممكن تلاقى كتير يقلك مش معقولة واستحالة هتحصل ....

ليه استحالة .... لو قلنا لاى حد إيه اللي يخلى دوله تحتل دوله هيقلك ابسط حاجه ... أن الدولة الاساسيه تكون
ضعيفه فى السياده سواء بره او جوة

السماح للدوله اللي عايزة تحتلها التدخل فى شئونها وتزليل العقبات فى الداخل علشان تكون المتحكم فيها ....

دا ابسطه حاجه اهو .... نيجى باه لموضوعنا الاساسى ..... ازاى الحكومة المصرية بتساعد على الاحتلال ....؟

ومين هيا أصلا اللي عايز يحتلها .....أو بمعنى اصح يعاد احتلالها ....؟

أظن كدا عرفتوها ....؟

ايوة الزفته إسرائيل ..... سمعت حاجات كتير تقلق بصراحة ومعظمنا عارفنها .....

منها مثلا لما طالب السفير الاسرائيلى فى مصر الحكومة المصرية بإدخال اللغة العبرية فى مناهج التعليم ....

وال أيه دا علشان اتفاقيه الزفت السلام ....أولا لو فعلا السيادة الداخلية فى مصر محترمه وقوية مكنش المتخلف
دا قدر يطلب الطلب دا

ثانيا تحسو ان زى ما بيعمل تمهيد اصلا .. .. بالبلدى كدا ....وخدنها واحده واحده .....

وغير انه بيطال من نضيف افندى لما حصلت أزمة البنزين انه يعملوا جنب للسفاره الاسرائليه بنزينه مخصوصة ليهم ...

بجاحة وسيطرة مقابلها خضوع

وقيام بدور الخادمة والمطيع من جانب الحكومة

وبعدين نسمع حكايه الغاز وعارفين المواويل اللي حصلت ونتيجه للحركة الشعب فالحكومة عملت فيها

فالحة وقالت داخلنا فى مفاوضات علشان نزود السعر

كان الرد المقابل ليها أيه من إسرائيل .... اشترطت أن يتعمل مصنع أسمده إنتاجه يروح لإسرائيل ....

غير أن هيعملو مؤتمر هيتجمع فيه يهود مصر اللي فى الخارج لكى يطالبوا بممتلكتهم اللي الثورة أمنتها وتقدر حاليا 5 مليار جنيه ....

وفعلا شخصية اخدت فندق فى الاسكندريه بعد ضغط إسرائيل على الحكومة المصرية ودا كان من فتره ....

اللي فقعني فى الموضوع أن ازاى أصلا وافقوا على السعر دا .... مضوا على العقد بعد ما شربوهم حاجه اصفرا ....


غير قيام رئيس المساطيل قصدى رئيس الوزراء الأسبق بالموافقة على منح مجموعه من القطرين مساحات من الاراضى فى سيناء

كبيره اوى .... بالرغم أن الأمن اثبت أنهم غطاء لمستثمرين اسرائلين ........


وتنازل مصر عن السيادة العربية فى المنطقه لما رفضت استقبال أطفال عراقيين علشان العلاج فى حين أن استقبلتهم إسرائيل

ال ايه اسرائيل بتقوم بدور المنقذ ..... وواستندلت الحكومة المصريه زى عادتها

زى ما عملت مع الفلسطينيين ....وعدم فتح المعابر إلا لما تؤمر الست إسرائيل .... بصرف النظر عن الموت والجوع اللي الفلسطينيين عايشين فيه

غير اعتقال الفلسطينين أيام فتح المعبر والتحقيق معاهم ومحاولة الحصول على أماكن القيادات ودا طبعا لصالح إسرائيل ......

قتل مصريين على الحدود ...وعدم القدره على الرد ...والمطالبه بالحق ....والقصاص....وقفت موقف الجبان ...

غير القضاء على الصناعة المصرية للادويه ....ببيع الشركات والمصانع لشركات أجنبيه اسرائليه ....

استيراد بملايين الدولارات حاجات تافهة من إسرائيل زى سوست الهدوم والبطانة والخيوط ....

وحصل أن وزير الثقافة اجبر على التراجع فى كلامه بخصوص انه هيحرق اى كتاب إسرائيل لو وجد فى اى مكتبه تابعه لوزارة الثقافة

بعد ما أتقدم استجواب من احد أعضاء مجلس الشعب ....ولما عرفت إسرائيل ...كان يوم مهبب على الوزير اللي فضل يدادى فيها

ويقلهم اصلو استفزني وأنا مهتم جدا بتراث اليهود ..... ودا رمز للخضوع والجبن ....

غير سمعت من فتره أنهم ناوين يطرحوا 51% من قناة السويس للبيع ومش مهم مين اللي هيشترى حتى لو إسرائيل .....المهم التمن....

واليومين دول فيه بعثات اسرائليه واحده فى محافظة الشرقية وواحده فى سيناء بيعملو أبحاث وبحفرو فى الأرض علشان يثبتوا أن اليهود

هما اللي عملوا الحضارة فى مصر وان اليهود هما اللي بنو الأهرامات ....

حتى بوجود الاف الشباب المصرين فى إسرائيل .... سفرهم نتيجه لأيه ...؟

وفالح الحاج اللي كان بيجى فى برنامج الحقيقة يقول دول خونه وإسرائيل عايزين يجندوهم للمخابرات ..... بلا وكسه


وكل دا يقلك اتفاقيه سلام ..... وبجد بجد أحنا شايفين السلام اللي لركب .....

تحسوا أن بقى حكاية من الشرق وحكاية من الغرب ..... بس السيد هو هو(اسرائيل) ....والعبد هوهو( الحكومة المصريه ) ...

وكلو لبخ ...وأفلام علينا .... وتطبع على الأخر ....

كنا فاكرين أننا أتخلصنا من احتلالهم .....لالا دول عايزين يحتلونا حضاريا ... وماضي ...وحاضر ....ومستقبل ....


ويحتلونا كفكر ... وكسيادة فى المنطقة .... قصدى خلاص دول احتلونا فعلا واشترونا ....

وكل دا والحكومة بتساعدهم .... وتلاقوا حسنى يحط ايدو فى ادهم والابتسامة على أخرها ....

وبتقدملهم مصر حته حته ....بيع.. شراء... امتلاك... هديه ...

ومفيش حد بيكلم ....ولا حد يقول لا ....

وان لله وان إليه راجعون ...... الفااااااااااااتحه




هناك ٦ تعليقات:

الميكروباص يقول...

الاحتلال الذكي هو الاحتلال الثقافي و الاقتصادي و السياسي- لأن موضوع الحرب ده كان له ايامه و انتهت، وحاليا لأن فيه اتفاقية سلام بين مصر واسرائيل فالامور أصبحت بهذا الشكل، والسبب ليس اتفاقية السلام نفسها التي أخذنا بها أرضنا، ولكن السبب الاساسي هو رجال الاعمال ومن قبلهم ولي الأمر، وهذا لأن هذه الاتفاقية موجوده من عام 79 ولكن لم يكن هناك حجم بالتواجد اليهودي داخل مصر مثل ما هو موجود الآن، حتى ايام التسعينيات لم يكن هناك تواجد يهودي بالبلد، يبقى أكيد العيب ليس عيب اتفاقية السلام، يوجد شيء خطأ حدث من القائمين على الأمر داخل مصر هو اللي خلى اليهود يبقى شيء عادي، ولسه، يمكن بعد فتره من الزمان يرجعوا تاني زي ما كانوا أوائل القرن الماضي عندما كانوا موجودين في كل مكان وعادي جدا انك تجد واحد يهودي-
يوجد كلام آخر بيطلع من اسرائيل للإستهلاك الاعلامي فقط- فمثلا موضوع اللغه العبريه ده هما عارفين انه مرفوض، وعندك قصة ان هناك في اسرائيل 55 ألف شاب مصري ده كذبته وزارة الخارجيه، ولو بصينا بالعقل فإن دوله مثل اسرائيل لا يمكن أن تسمح بداخلها بأن يكون هذا العدد كله يعيش فيها من المصريين لأنهم اعداء لنا، فهذا الكلام غير صحيح وما هو موجود من المصريين هناك حوالي ألف وشويه وكلهم شغالين في السياحه و التجاره وغيرها، فإسرائيل تخاف على أمنها جدا ولن تسمح بكل هؤلاء بالتواجد على أرضها
....
اتفاقية السلام بريئه مما حدث
لأن هذه التطورات لم تحدث إلا مؤخرا فقط
والعيب على المسئولين
هم السبب وهم أول من أعطى الفرصه لهم بالدخول إلينا

ولسه

Unknown يقول...

سبحان الله يا همس تحسى ان التاريخ بيعيد نفسه هنطرح اسهم لقناه السويس
واليهود مسيطيرين على الوضع الاقتصادى وهما اللى بيؤمروا ويطلبوا كله ده بيفكرنى باسماعيل بس الفرق ان الخديو اسماعيل كان عاوز يصلحهابجد بس معرفش اما صاحبنا فكلنا عارفين طبعا هو عاوز ايه؟؟

انتوا دماغكم راحت فين؟؟لالالا......انا قصدى انه عاوز بلدنا تتقدم بينا، مش كده و لا ايه يا همس

عروسة ننوسة يقول...

تحياتى لمدونتك الجريئه

همس يقول...

بص يا لورنس بصرف النظر عن اى اسباب

سواء كانت الاتفاقيه او رجال الزفت الاعمال اللى كل همهم يلمو فلوس


النتيجه واحده والضرر الاكبر هيقع علينا احنا

فربنا يسترها باه

همس يقول...

المصيب ان ناس كتير بتقول ان التاريخ اهم حاجه فيه اننا بنتعلم من اخطاء الناس اللى سبقونا واللى حققو انجازات نتخذهم مثل لينا ونكمل بالطريقه الصح

انما ياصاصا الظاهر الحكومة ماشيه حوله اصلا وما بتفرق بين الوش والقفا


ومن ناحيه بتقدمو ...دا بيتقدمو تقدم مزهل بس اكيد مخبين علشان الحسد

حكومة لئيمة صحيح

همس يقول...

ما نتحرم من طلتك يا جنه ابدا


منورانى