الأربعاء، مايو ١٤، ٢٠٠٨

يا حسنى ....منتش ريس عليا ....

قرأت من كام يوم أن فيه أخوه مسيحيين بيقومو بصلاة لتأيد حسنى وابنه والقسيس بتاعهم يطالبهم بكدا

وفضل يعدد فى مميزات سى حسنى ..... وانه ريسهم وكدا ....

بس لما حد يقرا الخبر دا ....نقول دا يبقى أيه ..؟؟؟.نفاق مثلا ....ما علينا...ليقولوا بنعمل فتنه ولا حاجه ...


أما أنا باه فاض بيا على الأخر بقول ..

يا مبارك منتش ريسى ....

نظرتي ليك ولحكومتك ولحكمك كلها احتقار ...... كلها اشمئزاز ...


يعنى مش مكفيك للانحطاط اللي وصلتنا ليه ..... ولا مكفيك بعت بلادنا لناس تتحكم فينا

وتكون خدام ليها أنت وحكومتك .....

مش مكفيك انك خليت مصر زى قلتها على المستوى العربي ....وتابعه وعبد وخدامه على المستوى العالمي


كل الاستثمار اللي حصل كلو فاشل وكلو عباره عن احتلال والحكومة مرحبه بيه ....

(كان على أيام ممدوح البلتاجي وزير السياحة وأيام المسطول عاطف عبيد كان فيه مجموعه قطرين

عايزين يشتروا مساحات كبيره جدا فى سيناء وبعد ما وصل لممدوح أن اللي وراهم اسرائلين ومستنين

بعد ما يشتروا الأرض يخدوها الاسرائلين منهم ...وبالرغم من معرفة عبيد بكدا ألا انه اعتبره استثمار

وبيرحب بيه ....بس ممدوح البلتاجي رفض ....وخلص الموضوع.....معنى كدا أن حكومات حسنى من

زماااااااااااااااااااااااان جدا شئ عادى أنها تبيع الأرض والبلد .... )

حد يقلى مشروع عدل كان مبنى على دراسة كويسة ونفع إلا...

من أول توشكي اللي بقالها سنين بالرغم أن أتعمل فوق 300 دارسه أثبتت أنها فاشلة و أهدار للمال

وبالرغم من رفض السادات للمشروع لما أتعرض عليه ......

ومشروعات طرق اللى مات عليها 37 ألف السنة اللي فاتت

وكباري أتصرف عليها ملايين ووقفت من غير تكمله لاكتشاف أن فيه غلطت

وحتى مترو الأنفاق أتكرر كام مره تعطيله ومنطقه الأزهر أتقال أنها كانت غلطت من الأول

و بيع مصانع وشركات بتراب الفلوس .....

ومصنع دمياط اللي بيكلف الدولة 10 مليون ونص متر مربع ميه عذبه سنوي و 37 مليار قدم مكعب غاز

طبيعي برضو سنوي لمده ( 15 _ 20 سنه ) دى مده التعاقد .... غير الأضرار اللي قلنا عليها قبل كدا

وبما إن الغاز متصدر اكتر من النص لإسرائيل والباقي بقى لكندا ...

وكمان دخلنا فى مرحله فقر المياه العذبه..... يعنى حتى الميه المعفنة واللي متعالجه بنسبة 20%

وجيبالنا أمراض منيله ....مش هنلاقيها بعد كدا حتى ..... يعنى مشروع فاشل بكل المقايس...


المهم يا جماعه .....دا كلو فقعنا ....وفرسنا ....وغيظنا ....وجبنا ضغط....

بس لما حسنى يبعت تهنئه لإسرائيل بمناسبة مرور 60 سنه ...... دا يبقى اسمها حقاره واستفزاز

وتخلف وفعلا زل .... بس مش زل ليه هو ....

أنا بقول زل لينا أحنا ....وللأسف مكتومين وراضين بالقرف دا كلو ....ليه مش عارفه ...هو مات عندنا

الإحساس برضو .....جتلنا عدوه قله الدم منهم ولا أيه .....

يعنى حسنى بعت هديته اكتر نص احتياطي مصر من الغاز بسعر اقل من الدولار فى حين سعره عالميا 9

دولار( يعنى شويه لإسرائيل وشويه لكندا وإحنا بعد كدا هنولع بعيالنا ) ..... وبعدين يبعت تهنئه.....

يعنى ما راعى ظروف الفلسطينين ...ولا حتى لبنانين ....اللي إسرائيل مدمره حياتهم ....ومعيشاهم فى جحيم

ويروح الغاز لحيوانات بتحطو فى دبابات تدوس بيها عليهم وعلينا ....



وبصرف النظر زفت التهنئه...دا بكدا بيايد اللي بيحصل فى فلسطين ....

ومديهم حق فى الاعتراض حتى ...وبيعترف بحق إسرائيل فى فلسطين....

وحقها فى سرقه بلادنا ....


ودا كلو ولسه عايز ننطق ونقول رئيس لينا ..... لا طبعا أنا معترفش بيه حتى لو بينى وبين نفسى

مش معقول هتبقى عبد بره .....وريس علينا ....

دى والله تبقى مسخره ...... وانتم يا اخونا المسيحيين ....


أحنا هنسيبكم انتو تصلوا ليه .....وعقبال ما نصلى عليهم قريب أن شاء الله ....


هناك ٨ تعليقات:

ولد مصري يقول...

معلومة بسيطة يمكن تهدي أعصابك شوية على موضوع الغاز، لما بيتم استخراج الغاز فيه نسبة بتروح للبلد ونسبة بتروح للشركة اللي بتستخرج الغاز، اللي حصل إن الشركة اللي بتستخرج الغاز هيه اللي باعت حصتها لاسرائيل مش مصر وطبعا محدش يقدر يمنعها لأن من حقها تبيتع الغاز بالسعر اللي عايزاه وللشخص اللي كمان عايزاه يعني ريسنا براءة من الموضوع ده

أما موضوع التهنئة فمفيش حد غير الدستور بس اللي ذاعوه فبقول يا ريت نتأكد الأول قبل ما نحرق دمنا وكفاية إنه محروق في حاجات تانية كتير

تحياتي

Gannah يقول...

همس
البوست كالعادة يفرس و يغيظ بس فيه معلومات عن صفقة الغاز تفرس اكتر
فيه حملة لوقف تصدير الغاز لاسرائيل و هتلاقى اللينك فى الشات بوكس فى همسات و لولاكى
يا ريت تدخلى الموقع و كمان هتلاقى اول تعليق من دكتور جيلوجى لما هتدخلى مدونته هتلاقى نص صفقة الغاز

اما موضوع التهنئة فواسلاماه واحسرتاه على القدس و على فلسطين
تحياتى

أنت عارفنى وأنا عارفك يقول...

المصيبة ليكونوا دعوله بطول العمر.هى دى حرقة الدم اللى بصح.
وشكرا

همس يقول...

انا عارفه والله حكايه الشركة دى

بس مش معقول مثلا هيحصل استجوابات فى مجلس الشعب

ويبقى وزير البترول هو اللى عامل الصفقه

وغير كدا وكدا مفيش حاجه بتتعمل من غير حسنى يكون على علم بيها وموافق عليها اصلا


اما بخصوص التهنئه انا قلت انه اتعمل مؤتمر القوى الوطنيه واعلام

يعنى الدكتور عبد الوهاب المسيرى

هيعملو مؤتمر هجس من غير تاكيد يعنى

بلاش اكيد سمعو مفيش حد طلع تكذيب ليه

ولا الحكايه دى مش مهمه اصلا

وبعدين اله اعلم

همس يقول...

جنه سلمتك من الفرسه

وانا فعلا مريت على الموقع على السريع

وان اشاء الله هقراه كويس



اما بخصوص التهنئه

بالرغم من ان الدستور جريد كويسه جدا

وما ازاعته مره واحده

او فى مكان بسيط

الا انها قالته فى الصفحه الاولى
بس برضو الله اعلم

همس يقول...

سلمتك يا انت عارفنى

تعرف انا هعما قسم طبى فى المدونة

لنقل واستبدال الدم المحروق

منورنى

bluestone يقول...

انا ماسمعتش عن القسيس ده الحقيقة
وعامة مطالبة القسيس لاي حد بالصلاة لاي سبب بيبقى في هيئة رجاء مش الزام طبعا

بس لو بيدعوله بطولة العمر يبقى لازم نشوف الناس دي لان باين عليهم مبروكين ودعواتهم مستجابة .. :)

اكيد كلنا عارفين ان المؤسسة الدينية في مصر مؤيدة ومبايعة للرئيس بشكل كامل وواضح ومبالغ فيه .. ولا اعتقد ان شيخ الازهر او البابا مطلوب او متوقع منهم اكتر من كده للاسف الشديد

بس هو في الحقيقة ريس علينا شئنا ام أبينا ..
يا بنتي جيلنا كله مايعرفش غيره اصلا
ماشوفناش رئيس لمصر غيره

همس يقول...

انا قرات فعلا من موقع جريده على النت

بس للاسف ما عندى الرابط

بس كان المقال مستفز اوى

بس هنقول ايه هم بعيد عنك


منورنى

وياريت تكرر الزياره